୪
ଜିସୁଙ୍ଗୁଁ ସୟତାନ୍ ପରିକା କିତାତ୍
(ମାତିଉ ୪:୧-୧୧; ମାର୍କ ୧:୧୨-୧୩)
୧ ଜିସୁ ପବିତ୍ର ଆତ୍ମାଦୁ ପୁରା ମାନ୍ଜି ଜର୍ଦନ୍ ଗାଡ଼୍ତାନ୍ ଡ଼େସି ୱାତାନ୍ ମାରି ପବିତ୍ର ଆତ୍ମା ୱେର୍ତି ଇସାବ୍ତାନ୍ ସିମ୍ରା ବାଡିଦୁ ସର୍ଆନ୍ ମାରି ସାଲିସ୍ ଦିନ୍ ସାନ୍ଧି ସୟତାନ୍ ୱାନିଙ୍ଗ୍ ପରିକା କିଜିମାର୍ଆତ୍ । ୨ ଆବେନ୍ ୱାନ୍ ସୟତାନ୍ ମାଣାନ୍ ସାଲିସ୍ ଦିନ୍ ସାନ୍ଦି ପରିକା କିଆୟ୍ ଆତାନ୍ । ଆୟାୱିଜୁ ଦିନ୍ତୁ ୱାନ୍ ଇନିକା ବା ଉଣୁଏଣ୍ଗା ତିନ୍ଏଣ୍ଗା ମାର୍ଆନ୍, ମାରି ଆୟାୱିଜୁ ନାଣ୍ଡିଙ୍ଗ୍ ୱିଜିତି ୱେନ୍କା, ଜିସୁ ନାଣ୍ତ ବାଙ୍ଗାଁ ସାତାନ୍ ।
୩ ଆବେଟ୍ ସୟତାନ୍ ଜିସୁଙ୍ଗୁଁ ଇର୍ହାତ୍, “ନିନ୍ ଜଦି ମାପୁରୁଦି ମାରିନ୍, ତୋ ଇୟା କାଲୁଦିଙ୍ଗ୍ ରୁଟି ଆଦେଙ୍ଗ୍ ଆଦେସ୍ ସିଆ ।”
୪ ଜିସୁ ତାନିଙ୍ଗ୍ ଇର୍ଆନ୍, “ଦାର୍ମୁସାସ୍ତ୍ରଦୁ ରାସାତାମାନାତ୍, ଲୋକୁ ଆବ୍କା ରୁଟିଦାନ୍ ଜିଏନ୍ ।”
୫ ମାରି, ସୟତାନ୍ ୱାନିଙ୍ଗ୍ ଉନ୍ଣ୍ତ୍ରି ନିର୍ଇ ଗରନ୍ତି ଟିପୁଦୁ ଅତାଦୋ ସାଣେକ୍ତିଙ୍ଗ୍ ସାରାଦୁନିଆଦି ୱିଜୁ ରାଜିଙ୍ଗ୍ ୱାନିଙ୍ଗ୍ ତର୍ତାତ୍ । ୬ ମାରି, ସୟତାନ୍ ୱାନିଙ୍ଗ୍ ଇର୍ହାତ୍, “ନାନ୍ ନିଙ୍ଗିଁ ଆୟାୱିଜୁଦି ଅଦିକାର୍ ସିନା ମାରି ଦନ୍ ସିନା, ଇରିଙ୍ଗ୍ ଇୟାୱିଜୁ ନାଙ୍ଗିଁ ଆକା ସର୍ପେଆତା ମାନାତ୍, ମାରି ନାନ୍ ଏଙ୍ଗ୍ ବଦା କିନା, ୱାନିଙ୍ଗ୍ ଆକା ସିନା । ୭ ମାରି, ନିନ୍ ମେଣ୍ତେଙ୍ଗ୍ ଗଟ୍କିଜି ନାଙ୍ଗିଁ ମାଡ଼ିସ୍କିନି, ଆଦେଙ୍ଗ୍ ଇୟାୱିଜୁ ନିଦି ଆନାତ୍ ।”
୮ ଜିସୁ ଇର୍ହାନ୍, “ଦାର୍ମୁସାସ୍ତ୍ରଦୁ ରାସାତାମାନାତ୍, କେବଲ୍ ନି ପ୍ରବୁ ମାପୁରୁଙ୍ଗ୍ଁ ମାଡ଼ିସ୍ କିଆ ମାରି ୱାନି ସେବା କିଆ ।”
୯ ମାରି, ୱାନ୍ ୱାନିଙ୍ଗ୍ ଜିରୁସାଲମତୁ ଅତାଦୋ ମନ୍ଦିରତି ସାତ୍ ମୁସ୍କୁରି ଟିପୁଦୁ ନିଲ୍ପିସ୍କିଜି ୱାନିଙ୍ଗ୍ ୱେର୍ତାତ୍, “ନିନ୍ ଜଦି ମାପୁରୁଦି ମାରିନ୍, ଆତିଙ୍ଗ୍ ଇବେଣ୍କୁ ଆଡ୍ଗି ଗାତ୍ଆ । ୧୦ ଇରିଙ୍ଗ୍ ଦାର୍ମୁସାସ୍ତ୍ରଦୁ ରାସାତାମାନାତ୍, ନିଙ୍ଗିଁ ଜିପିସ୍ କିଦେଙ୍ଗ୍ ମାପୁରୁ ନି ସାକା ଅତେଙ୍ଗ୍ ମୁସ୍କୁପୁର୍ତି ଦୁତ୍କାଙ୍ଗ୍ ଆଦେସ୍ ସିନାନ୍ । ୧୧ ମାରିବା ରାସାତା ମାନାତ୍, ଏସ୍ତିୱାଲେ ନି ପାଦାମ୍ କାଲୁଦୁ ଆଟ୍ନାତ୍, ଇୟାଉଣ୍ତିଙ୍ଗ୍ ୱାକ୍ ନିଙ୍ଗିଁ କିକାଣ୍କୁ ପେର୍ଜିଆସ୍ନେ ।”
୧୨ ମାରି, ଜିସୁ ତାନିଙ୍ଗ୍ ଇର୍ଆନ୍, “ଦାର୍ମୁସାସ୍ତ୍ରଦୁ ରାସାତାମାନାତ୍, ନିନ୍ ପ୍ରବୁ ନିଜେଦି ମାପୁରୁଙ୍ଗ୍ ପରିକା କିମା ।”
୧୩ ଜିସୁଙ୍ଗୁଁ ସୟତାନ୍ ୱିଜୁଜାତିଦି ପରିକା ୱିସ୍ତି ୱେନ୍କା ଏସ ବେଡ଼ା ସାନ୍ଧି ୱାନିଙ୍ଗ୍ ଡ଼ିସ୍ତା ସର୍ହାତ୍ ।
ଜିସୁଦି ସେବାକିନିପାଣି ଆରାମ୍
(ମାତିଉ ୪:୧୨-୧୭; ମାର୍କ ୧:୧୪-୧୫)
୧୪ ତାନେ ୱେନ୍କା ଜିସୁ ପବିତ୍ର ଆତ୍ମାଦି ସାକ୍ତିଦାନ୍ ଗାଲିଲିଦୁ ଡ଼େସିସର୍ହାନ୍, ମାରି ଗାଲିଲି ସାରିବେଡ଼ିତିଦି ୱିଜୁ ରାଜିଦୁ ୱାନି ବିସୟ୍ତାନ୍ କାବୁର୍ ୱେଙ୍ଗିଁତାନ୍ । ୧୫ ମାରି, ଜିସୁ ୱାରି ପାର୍ତନାକିନି ଇଲ୍କାଙ୍ଗ୍ ସିକିୟା ସିଜି ୱିଜେରି ମାଣାନ୍ ଦନ୍ୟବାଦ୍ ପଇଦେଙ୍ଗ୍ ଆସ୍ତାନ୍ ।
ଜିସୁଙ୍ଗୁଁ ନାଜରିତ୍ତୁ ମାନାଏତାର୍
(ମାତିଉ ୧୩:୫୩-୫୮; ମାର୍କ ୬:୧-୬)
୧୬ ଜିସୁ ଏମେ ନାଜରିତ ଗାଡ଼୍ତୁ ପିରିତା ମାର୍ହାନ୍, ଆୟା ବାଡ଼ିଦୁ ଆୟା ଦାପ୍ରେ ସର୍ଆନ୍ ମାରି ନିଜେଦି ରିତିଦାନ୍ ରମ୍ନିନାଣ୍ତିଙ୍ଗ୍ ପାର୍ତନା କିନି ଇଲୁଦୁ ଡ଼ୁଗିତାନ୍, ମାରି ସାସ୍ତ୍ର ପଡ଼ାଦେଙ୍ଗ୍ ନିର୍ଆନ୍ । ୧୭ ନାସ୍ତିୱାଲେ ଜିସାଇୟ ବାବବାଦିରି ବଇ ୱାନିଙ୍ଗ୍ ସିତାର୍, ମାରି ୱାନ୍ ଆକା କୁତ୍ତାନ୍, ଏମେ ଜାଗାଦୁ ଇୟା ବାକ୍ୟ ରାସ୍ତା ମାର୍ଆତ୍, ଆକା ପଇତାନ୍,
୧୮ ପ୍ରବୁଦି ଆତ୍ମା ନା ମାନୁ ମାନାତ୍,
“ଇରିଙ୍ଗ୍ କାକୁର୍ତି ଲୋକା ଲାକ୍ତୁ ନେଗିକାବୁର୍ ୱେର୍ନି ଉଣ୍ତିଙ୍ଗ୍ ମାପୁରୁ ନାଙ୍ଗିଁ ଆସ୍କିତାମାନାନ୍,
ଜଇଲ୍ତୁ ମାନିକାର୍ ମୁକ୍ଡ଼ାନାର୍ ମାରି
କାଣାରି ଲାକ୍ତୁ ସୁଡ଼ୁନି ବିସୟତିଙ୍ଗ୍ ୱେର୍ତେଙ୍ଗ୍,
ମାରି ଦୁଃକୁକାସ୍ଟୁ ପଇତି ଲୋକାଙ୍ଗ୍ ମୁକ୍ଡା କିଦେଙ୍ଗ୍,
୧୯ ମାରି ପ୍ରବୁ ୱାନି ଲୋକାଙ୍ଗ୍ ରକିୟା କିନି ସମୟ ଜେ ଇଗା ୱାତାମାନାତ୍ ଇକା ୱେର୍ତେଙ୍ଗ୍
ୱାନ୍ ନାଙ୍ଗିଁ ପୋକ୍ତାମାନାନ୍ ।”
୨୦ ୱେନ୍କା ୱାନ୍ ବଇ ବନ୍ଦ କିଜ ସେବାକିନିୱାନିଙ୍ଗ୍ ଡେପ୍ସିସିତାନ୍ ନୋ ବାସ୍ତାନ୍, ମାରି ପାର୍ତନା କିନି ଇଲୁଦି ୱିଜେରେ ୱାନିଙ୍ଗ୍ ସୁଡ଼୍ଜି ମାର୍ଆର୍ । ୨୧ ମାରି, ଜିସୁ ୱାରିଙ୍ଗ୍ ୱେର୍ତାନ୍, “ନାନ୍ ବଇଦି ଏମେ ବିସୟ୍ ଇଲେଇ ପଡ଼ାତା, ଆମାକା ମିର୍ ୱେରିଦେର୍ ଦାର୍ମୁସାସ୍ତ୍ରଦି ଇୟା ବାକ୍ୟ ଇଲେଇ ନେକ୍କା ଆତାତ୍ ।”
୨୨ ମାରି, ୱିଜେରେ ୱାନି ବିସୟ୍ତାନ୍ ସାକି ସିଦେଙ୍ଗ୍ ଆସ୍ତାର୍ ମାରି ୱାନି ୱେୟୁଦାନ୍ ଏମେ ନେଗି ମାଟା ସୋସି ମାର୍ଆତ୍ ଆବେନୁ ୱିଜେରେ କାବାତା ସର୍ହାର୍, ମାରି, ୱାର୍ ଇଣ୍ତ୍ରେଙ୍ଗ୍ ଆସ୍ତାର୍, “ଇକାନ୍ ଇନିକା ଜୋସେପ୍ତି ମାରିନ୍ ଆଏନ୍ ?”
୨୩ ଆବେଟ୍ ୱାନ୍ ୱାରିଙ୍ଗ୍ ୱେର୍ତାନ୍, “ମିର୍ ସତେନେ ନାଙ୍ଗିଁ ଇୟା ପାଡ଼ିଇ ବିସୟତି ବାକ୍ୟ ଇନିଦେର୍, ଏ ଡାକ୍ଟର୍, ଆଗିଡ଼ି ନିଜେଦିଙ୍ଗ୍ ନେଗେନ୍ କିଆୟ୍ଆଆ, ମାରି ବା ଇନିଦେର୍ କପର୍ନାହୁମ୍ତୁ ଏମେ ଏମେକା ଗଟାତାମାନାତ୍ ଇଜି ମାପ୍ ୱେର୍ଆମାନାପ୍, ଆୟାୱିଜୁ ଇୟା ବାଡିଦୁ ନିଜେଦି ବୁବାୟାୟାଦି ଗାଡ଼୍ତୁ ବା କିଆ ।” ୨୪ ✡ଜୋହନ ୪:୪୪.ମାରି ଜିସୁ ୱାରିଙ୍ଗ୍ ଇର୍ହାନ୍, “ନାନ୍ ମିଙ୍ଗିଁ ସତ୍ ଇଜିନା, ଆମା ବାବବାଦିଦିଙ୍ଗ୍ ନିଜେଦି ବୁବାୟାୟାଦି ଗାଡ଼୍ତୁ ମାନାଏର୍ ।”
୨୫ ମାତର୍ ନାନ୍ ମିଙ୍ଗିଁ ସତ୍ ଇଜିନା, “ଏଲିୟଦି ସମୟଦୁ ଇସ୍ରାଏଲତୁ ଏସ୍ତିୱାଲେ ମୁଣ୍ତ୍ରି ବାର୍ସେକ୍ ସୋଗୋଟା ଲେଜ୍କୁ ସାନ୍ଧି ବାଦଡ଼୍ତାନ୍ ପିରୁ ଆଏତାତ୍ଆକା ୱିଜୁ ଦେସ୍ତୁ କାଦି ଉଣ୍ତେଙ୍ଗ୍ ପୁଟ୍ଏତାତ୍, ନାସ୍ତିୱାଲେ ଇସ୍ରାଏଲତୁ ନାଣ୍ତ ରାଣ୍ତି ଆଇମେକ୍ ମାର୍ଏ; ୨୬ ମାତର୍ ମାପୁରୁ ଏଲିୟଙ୍ଗ୍ ଆୟାୱାନିକା ଲାକ୍ତୁ ପୋକ୍ଏଣ୍ଗା କେବଲ୍ ସିଦନ୍ ଦେସ୍ତି ସାରିପତ୍ତୁମାନି ଅରେତ୍ ରାଣ୍ତି ଆଇମାଦି ଲାକ୍ତୁ ପୋକ୍ତାନ୍ । ୨୭ ମାରି, ବାବବାଦି ଇଲିସାୟତି ସମୟତୁ ଇସ୍ରାଏଲତୁ ନାଣ୍ତ କୁସ୍ଟରୋଗ୍ ଲୋକୁ; ମାରି ୱାରି ମାଣ୍କୁ ଏନ୍ ନେଗେନ୍ ଆଏର୍, କେବଲ୍ ସୁରିଆ ଦେସ୍ତି ନାମାନ ନେଗେନ୍ ଆତା ମାର୍ଆନ୍ ।”
୨୮ ପାର୍ତନା ଇଲୁଦୁ ଇୟାୱିଜୁ ମାଟା ୱେନ୍ବୁ ୱେନ୍ବୁ ୱିଜେରେ ଲୋକୁ ରିସାଆତାର୍, ୨୯ ମାରି ୱାର୍ ନିଙ୍ଗିଁଜି ୱାନିଙ୍ଗ୍ ଆୟା ଗାଡ଼୍ତାନ୍ ସୋପ୍ତାର୍ ମାରି ୱାରି ଗାଡ଼୍ ଏମେ ଗୋରନ୍ ମୁସ୍କୁ ତିଆର୍ ଆତାମାର୍ଆତ୍, ୱାର୍ ଗର୍ନତି ଟିପୁଦାନ୍ ଆଡ୍ଗି ପେଲେକିଦେଙ୍ଗ୍ ୱାନିଙ୍ଗ୍ ଆବେନୁ ଅତାର୍; ୩୦ ମାତର୍ ୱାନ୍ ୱାରି ନାଣ୍ମିରାନ୍ ସତା ସୋର୍ଆନ୍ ।
ଜିସୁ ଦୁବାଆସ୍ତି ୱାନିଙ୍ଗ୍ ନେଗେନ୍ କିତାନ୍
(ମାର୍କ ୧:୨୧-୨୮)
୩୧ ଜିସୁ କପର୍ନାହୁମ୍ ଇନି ଗାଲିଲିଦି ଉଣ୍ତ୍ରି ଗାଡ଼୍ତୁ ୱାତାନ୍, ମାରି ରମ୍ନିନାଣ୍ତିଙ୍ଗ୍ ଲୋକାଙ୍ଗ୍ ସିକିୟା ସିଦେଙ୍ଗ୍ ଆସ୍ତାନ୍, ୩୨ ✡ମାତିଉ ୭:୨୮,୨୯.ମାରି ୱାର୍ ୱାନି ସିକିୟାଦୁ କାବାଆତାର୍, ଇରିଙ୍ଗ୍ ୱାନ୍ ବାକ୍ୟ ଅଦିକାର୍ତି ୱାଲେ ମାଟା ଇଜିମାର୍ଆନ୍ । ୩୩ ଅର୍ଲେନ୍ ପାର୍ତନା ଇଲୁଦୁ ଅରେନ୍ ଦୁବାଆସ୍ତିମାର୍ଇ ଲୋକୁ ମାର୍ଆନ୍, ୱାନ୍ ପେରି ୱେୟୁଦାନ୍ ଆଉଲିଆତାନ୍, ୩୪ ଏ, ନାଜରିତିୟଦି ଜିସୁ, “ମା ୱାଲେ ନି ଇନିକା ମାନ୍ତା ? ନିନୁ ନୋ ମାଙ୍ଗିଁ ସାପିସ୍ କିଦେଙ୍ଗ୍ ୱାତିମାନି ? ନିନୁ ଏନ୍, ଆକା ନାନ୍ ନେସ୍ନା; ନିନୁ ମାପୁରୁଦି ଆୟା ପବିତ୍ର ଲୋକୁ ।”
୩୫ ଜିସୁ ତାନିଙ୍ଗ୍ ଆଦ୍ରିସ୍ କିଜି ଇର୍ହାନ୍, “ଆଲ୍ଜ ମାନ୍ଆ, ୱେନିମାଣ୍କୁ ସହସି ସାଙ୍ଗ୍ଆ ।” ଆବେଟ୍ ଆୟା ଦୁବା ୱାନିଙ୍ଗ୍ ୱିଜେରି ଆଗିଡ଼ି ଆରାପ୍ତାଦୋ ୱାନିଙ୍ଗ୍ ଇନିକା କିଏଣ୍ଗା ୱାନିମାଣ୍କୁ ସତା ସର୍ଆତ୍ । ୩୬ ଆବେଟ୍କୁ ୱିଜେରେ କାବାତାରୋ ନିଜେ ନିଜେଦିମାନୁ ଇନିଞ୍ଜି ସାତାର୍, “ଇକା ଇନି ମାଟା ? ୱାନ୍ ଅଦିକାର୍ ମାରି ସାକ୍ତିଦାନ୍ ଆଦେସ୍ ସିନାନ୍ ତାଗ୍ଇ ଦୁବେଙ୍ଗ୍ ମାରି ୱାକ୍ ସଅନେ ସନେ ।” ୩୭ ଆବେଟ୍ ଜିସୁ ବିସୟ୍ତାନ୍ ଇୟା କାବୁର୍ ୱିଜୁତରିଟି ରାଜିଦୁ ୱେଙ୍ଗିଁତାତ୍ ।
ଜିସୁ ନାଣ୍ତ ଲୋକାଙ୍ଗ୍ ନେଗେଣ୍ତ୍ କିତାନ୍
(ମାତିଉ ୮:୧୪-୧୭; ମାର୍କ ୧:୨୯-୩୪)
୩୮ ୱେନ୍କା ଜିସୁ ପାର୍ତନା ଇଲୁଦାନ୍ ନିଙ୍ଗିଁଜି ସିମୋନ୍କା ଇଣ୍ତ୍ର ସୋର୍ଆନ୍ । ସିମୋନକା ମିମିସିଙ୍ଗ୍ ନାଣ୍ତ ନବ୍ ଆତାମାରାତ୍, ମାରି ୱାର୍ ତାନି ବିସୟ୍ତାନ୍ ୱାନିଙ୍ଗ୍ ୱେର୍ତାର୍ । ୩୯ ଆବେଟ୍ ୱାନ୍ ତାନି ଲାକ୍ତୁ ନିର୍ଆନ୍ନୋ ନବ୍ତିଙ୍ଗ୍ ଆଦ୍ରିସ୍ତାନ୍, ମାରି ତାନିଙ୍ଗ୍ ନବ୍ ଡ଼ିସ୍ତାତ୍, ମାରି ୱାଦ୍ ଆୟାଦାର୍ପେ ନିଙ୍ଗିଁଜି ୱାରି ସେବା କିଦେଙ୍ଗ୍ ଆସ୍ତାନ୍ ।
୪୦ ୱେଡ଼ା ସନିୱାଲେ, ଏମେୱାରି ଲାକ୍ତୁ ଆଇ ଆଇ ରୋଗ୍ ଆସ୍ତିମାର୍ଇ ଲୋକୁ ମାର୍ଆର୍, ଆୟାୱିଜେରେ ୱାରିଙ୍ଗ୍ ୱାନି ଲାକ୍ତୁ ତାତାର୍ ମାରି ୱାନ୍ ୱିଜେରି ମୁସ୍କୁ କିୟୁ ଇଡ୍ଜି ୱାରିଙ୍ଗ୍ ନେଗେଣ୍ତ୍ କିତାନ୍ । ୪୧ ମାରି, ଦୁବେଙ୍ଗ୍ ବା ଆଉଲି ଆଜି ଆଜି ନିନୁ ମାପୁରୁଦି ମାରିସି ଇଜି ଇନ୍ଞ୍ଜି ନାଣ୍ତ ଲୋକା ମାଣ୍କୁ ସୋତେ ସର୍ଏ । ମାରି, ଜିସୁ ୱାରିଙ୍ଗ୍ ଆଦ୍ରିସ୍ କିଜି ୱାର୍ଗିଦେଙ୍ଗ୍ ସିଏତାନ୍, “ଇରିଙ୍ଗ୍ ୱାନ୍ ଜେ କ୍ରିସ୍ତ, ଇକା ୱାକ୍ ନେସ୍ତେ ମାର୍ହେ ।”
ପାର୍ତନା ଇଲ୍ତୁ ଜିସୁ ପ୍ରଚାର୍ କିତାନ୍
(ମାର୍କ ୧:୩୫-୩୯)
୪୨ ସାଲ୍ଦି ଆତାତ୍ଆକା, ଜିସୁ ଗାଡ଼୍ତାନ୍ ସୋଅସି ଉଣ୍ତ୍ରି ସୁନ୍ସାନ୍ ବାଡିଦୁ ସୋର୍ଆନ୍; ମାରି, ଲୋକୁ ୱିଜେରେ ୱାନିଙ୍ଗ୍ ପୟ୍ଜି ପୟ୍ଜି ୱାନି ଲାକ୍ତୁ ୱାତାର୍, ମାରି ୱାନ୍ ଏଣ୍ତେସ୍ ୱାରି ଲାକ୍ତୁରାନ୍ ସୋଲ୍ଏନ୍, ଆୟାଉଣ୍ତିଙ୍ଗ୍ ୱାନିଙ୍ଗ୍ ତେବାକିଦେଙ୍ଗ୍ ବଦାକିତାର୍ । ୪୩ ମାତର୍ ୱାନ୍ ୱାରିଙ୍ଗ୍ ଇର୍ଆନ୍, “ଆଇ ଆଇ ଗାଡ଼୍କାଙ୍ଗ୍ ବା ନାଙ୍ଗିଁ ମାପୁରୁଦି ରାଜିଦି ନେଗିକାବୁର୍ ୱେର୍ତେଙ୍ଗ୍ ଆନାତ୍, ଇରିଙ୍ଗ୍ ଆୟାଉଣ୍ତିଙ୍ଗ୍ ମାପୁରୁ ନାଙ୍ଗିଁ ପୋକ୍ତା ମାନାନ୍ ।”
୪୪ ମାରି, ୱାନ୍ ଜିହୁଦା ଦେସ୍ତି ପାର୍ତନାକିନି ଇଲ୍କାଙ୍ଗ୍ ପ୍ରଚାର୍ କିଦେଙ୍ଗ୍ ଆସ୍ତାନ୍ ।