ମାଥିଉ ଲିଖିତ ଯୀଶୁ ଖ୍ରୀଷ୍ଟଙ୍କ ସୁସମାଚାର
ମାତିଉ ରାସ୍ତିମାନି ଜିସୁ କ୍ରିସ୍ତଦି ନେଗିକାବୁର୍
ମାତିଉ ବଇ ବିସୟ୍ତାନ୍ ଏସ ମାଟା
ମାତିଉ ରାସ୍ତିମାନି ସୁସମାଚାର୍ ପୁନି ନିୟମ୍ତୁ ଜିସୁଦି ଜିବନ୍ତିଙ୍ଗ୍ ୱେର୍ସିମାନି ନାଲ୍ଗି ବଇଙ୍ଗାଁ ମାଣ୍କୁ ଉନ୍ଡ୍ରି । ଇୟାୱିଜୁ ବଇଆଙ୍ଗ୍ଁ ଜିସୁ କ୍ରିସ୍ତଦି ନେଗିକାବୁର୍ ଇନାର୍ । ଇୟାୱିଜୁ ଜିସୁଦି ସାତି ୱେନ୍କା ମାତିଉ, ମାର୍କ, ଲୁକ ମାରି ଯୋହନ ରାସ୍ତା ମାର୍ର୍ହାର୍ । ମାତିଉ ରାସ୍ତିମାନି ସୁସମାଚାର୍ ରାସ୍ତିମାନିକା ଟିକ୍ ଦିନ୍ ନେସ୍ଇତି ମାରିଙ୍ଗ୍ ବା ପଣ୍ତିତ୍କୁ ଇନାର୍ ଇକା କ୍ରିସ୍ତଦି ଜନମ୍ତି ୬୦ ବାର୍ସେକ୍ ୱେନ୍କା ରାସ୍ତା ମାର୍ହାତ୍ । ଇକାବା ବିସ୍ବାସ୍ କିଆୟ୍ଆନାତ୍ ଜେ, ଇୟା ବଇ ପାଲେସ୍ଟାଇନ୍ ଦେସ୍ତି ଜିରୁସାଲାମ୍ ଗାଡ଼୍ତାନ୍ ରାସ୍ତା ମାର୍ହାତ୍ ।
ମାତିଉ ଇୟା ସୁସମାଚାର୍ତି ରାସ୍ତିକାନ୍ । ଜିସୁ ୱାନିଙ୍ଗ୍ ସିସୁ ୱାଜା କୁକ୍ନି ଆଗ୍ଡ଼ି ୱାନ୍ ଅରେନ୍ ସିସୁଟୁ ଲସ୍ନିକାନ୍ ମାର୍ହାନ୍ । ୱାନି ଆଇ ଦରୁ ଲେବି ମାର୍ହାତ୍ । ୱାନ୍ ବାର୍ଲୋକା ସିସୁରି ଲୋଇରାନ୍ ଅରେନ୍ ମାର୍ହାନ୍ । ୱାନ୍ ଜିହୁଦିର୍ ଉଣ୍ତିଙ୍ଗ୍ ଇୟା “ନେଗିକାବୁର୍” ରାସ୍ତାମାର୍ହାନ୍ । ଆମାକା ୱାନ୍ ୱାନି ରାସ୍ତିମାନୁ ପାଡ଼ିଇ ନିୟମ୍ତୁ ୬୦ ଗୋଟା ପଦ୍କୁ ରାସାତିମାନିଙ୍ଗ୍ ପାର୍ମାନ୍ ଆନାତ୍ । ଜିସୁ ଜେ କ୍ରିସ୍ତ ଅର୍ତାତ୍ ମସିହ ମାପୁରୁଦି ବାସେଆତି ରକିୟା କିନିକାନ୍ ମାରି ରାଜା ଆମାୱାନି ୱାନି ବିସୟ୍ତାନ୍ ପାଡ଼ିଇ ନିୟମ୍ତି ଦାର୍ମୁସାସ୍ତ୍ରଦୁ ବବିସତ୍ବାଣି କିଆୟ୍ଆତାମାର୍ର୍ହାତ୍ ଇକା ମାତିଉ ନେସ୍ନିୱାଜା ୱେର୍ତାମାର୍ହାନ୍ । ମାତିଉ ବା ମୁସ୍କୁ ରାଜି ବିସୟ୍ତାନ୍ ଗାଦି ରାସ୍ତାମାନାତ୍ । ଜିହୁଦିର୍ କ୍ରିସ୍ତ ଅର୍ତାତ୍ ମସିହଙ୍ଗ୍ ଦେସ୍ତିଙ୍ଗ୍ ସାସ୍କିନି ରାଜା ଆନାନ୍ ଇଜି ଆସାତାମାର୍ହାର୍ । ମାତିଉ ଆୟା ବିସ୍ବାସ୍ତିଙ୍ଗ୍ ଡ଼େପ୍ସି ମାପୁରୁଦି ରାଜି ଜେ ଆତ୍ମିକ୍ ରାଜି, ଦୁନିଆଦି ରାଜି ଆଏତ୍ । ଇୟା ବିସୟ୍ତିଙ୍ଗ୍ ୱେର୍ତେଙ୍ଗ୍ ନାଣ୍ତ ଜାତୁନ୍ତାନ୍ ଦ୍ୟାନ୍ ସିତାମାନ୍ ।
ମାତିଉ ରାସ୍ତିମାନି ନେଗିକାବୁର୍ ପୁନି ନିୟମ୍ତି ପ୍ରାତୁମ୍ତି ବଇ ୱାଜା ସତ୍ ଇରିଙ୍ଗ୍ ପାଡ଼ିଇ ନିୟମ୍ତି ବାକ୍ୟୱିଜୁଦି ନାଣ୍ଡ୍ ଇସାବ୍ତାନ୍ ରାସାତାମାନାତ୍ । ଇୟା ବଇ ପାଡ଼ିଇ ନିୟମ୍ତିଙ୍ଗ୍ ମାରି ପୁନି ନିୟମ୍ତିଙ୍ଗ୍ ମିସାକିନାତ୍ । ପଣ୍ତିତ୍କୁ ବା ଇନାର୍ ମାତିଉ ୱାନି ରାସ୍ତିମାନୁ ମୋସାଦି ନିୟମ୍ତି ବଇଙ୍ଗାଁ ୱେନ୍କା ସନ୍ଡ଼୍ରେଙ୍ଗ୍ ସେସ୍ଟା କିତାମାନାନ୍ । ଜିସୁଦି ଗରନ୍ ମୁସ୍କୁ ସିକିୟା ସିନି ବିସୟ୍ ମାତିଉ ୫:୭ ଅଦ୍ୟାୟ୍, ମାପୁରୁ ମୋସେଙ୍ଗ୍ ନିୟମ୍ ସିନି ବିସୟ୍ତି ୱାଲେ ବା ତୁସାୟ୍ଆନାତ୍ ଦ୍ୱିତିୟ ବିବରଣି ୧୯:୩; ୨୩:୩୩ ।
ଇୟା ବଇଦୁ ମାନି ମୁକିୟ୍ ବିସୟ୍
୧. ଜିସୁ କ୍ରିସ୍ତଦି ଜନମ୍ ମାରି ୱାନି ସେବା ପାଣିଦି ଆରାମ୍ । ୧–୪
୨. ଜିସୁ କ୍ରିସ୍ତଦି ସେବା ପାଣି ମାରି ସିକିୟା । ୫:୧-୨୫
୩. ଜିସୁ କ୍ରିସ୍ତଦି ସାନିକା ମାରିଡ଼େସି ଜିବନ୍ଆଜି ନିଙ୍ଗିଁନିକା । ୨୬:୧-୨୮
୧
ଜିସୁ କ୍ରିସ୍ତଦି କୁଟୁମ୍
(ଲୁକ ୩:୨୩-୩୮)
୧ ଇକା ଆଜିନାତ୍ ଜିସୁ କ୍ରିସ୍ତଦି ଡକ୍ରାଦାଦ୍ସିରି ଦର୍କା ଦାଡ଼ି; ୱାନ୍ ଦାଉଦଦି କୁଟୁମ୍ ମାର୍ହାନ୍, ଦାଉଦ ଅବ୍ରାହାମଦି କୁଟୁମ୍ ମାର୍ହାନ୍
୨ ଅବ୍ରାହାମ ଇସ୍ହାକ୍ତି ବୁବାସି । ଇସ୍ହାକ୍ ଜାକୁବଦି ବୁବାସି । ଜାକୁବ, ଜିହୁଦା ନି ୱାନି ତଡ଼ାନ୍କା ବୁବାସି । ୩ ଜିହୁଦା, ପେରସ ନି ସେରହତି ବୁବାସି । ତାମର ୱାରି ଆଇସି । ପେରସ ହେବ୍ରଣତି ବୁବାସି । ହେବ୍ରଣ ଅରାମତି ବୁବାସି । ୪ ଅରାମ ଅମିନାଦବତି ବୁବାସି । ଅମିନାଦବ ନହସନତି ବୁବାସି । ନହସନ ସଲମନତି ବୁବାସି । ୫ ସଲମନ ବୟଜତି ବୁବାସି । ବୟଜକା ଆଇସି ଦରୁ ରାହବ୍, ବୟଜ ଅବେଦତି ବୁବାସି, ରୁତ ଅବେଦକା ଆଇସି ମାର୍ହାତ୍, ଅବେଦ ଜେସିଦି ବୁବାସି ।
୬ ଜେସି ରାଜା ଦାଉଦତି ବୁବାସି । ଦାଉଦ ସଲମନ୍ତି ବୁବାସି, ସଲମନକା ଆଇସି ଆଗ୍ଡ଼ି ଉରିୟଦି ଆଡ଼ି ମାର୍ହାତ୍ । ୭ ସଲମନ୍ ରିୟବିୟାମତି ବୁବାସି । ରିୟବିୟାମ ଅବିୟଦି ବୁବାସି । ଅବିୟ ଆସାଦି ବୁବାସି । ୮ ଆସା ଜିହସାପଟତି ବୁବାସି । ଜିହସାପଟ ଜରାମତି ବୁବାସି । ଜରାମ ଉଜିୟଦି ବୁବାସି । ୯ ଉଜିୟ ଜତାମତି ବୁବାସି । ଜୋତମ ଆହାସତି ବୁବାସି । ଆହାସ ହିଜକିୟଦି ବୁବାସି । ୧୦ ହିଜକିୟ ମନସିଦି ବୁବାସି । ମନସି ଅମନତି ବୁବାସି । ଅମନ ଜସିୟଦି ବୁବାସି ।
୧୧ ଜସିୟ, ଜିକନିୟ ମାରି ୱାନି ତଡ଼ାନ୍କା ବୁବାସି । ଇକା ଇସ୍ରାଏଲ୍ ଲୋକାଙ୍ଗ୍ ଗତିମୁରୁଲି କିଜି ବାବିଲନ୍ତୁ ଅନିୱାଲେରି ମାଟା ।
୧୨ ୱାରିଙ୍ଗ୍ ବାବିଲନ୍ତୁ ଅତି ୱେନ୍କା । ଜିକନିୟଦି ମାରିସି ସଲ୍ଟିୟେଲ ଜନମ୍ଆତାନ୍ । ସଲ୍ଟିୟେଲ ଜିରୁବ୍ବାବେଲତିଙ୍ଗ୍ ଜନମ୍ କିତାନ୍, ୧୩ ଜିରୁବ୍ବାବେଲ ଅବିହୁଦକା ବୁବାସି । ଅବିହୁଦ ଏଲିୟାକିମ୍କା ବୁବାସି । ଏଲିୟାକିମ୍ ଅଜ୍ଜୁରକା ବୁବାସି । ୧୪ ଅଜ୍ଜୁର ସାଦକକା ବୁବାସି । ସାଦକ ଆକିମ୍ତି ବୁବାସି । ଆକିମ୍ ଏଲିହୁଦକା ବୁବାସି । ୧୫ ଏଲିହୁଦ ଏଲାଜାରକା ବୁବାସି । ଏଲାଜାର ମତାନକା ବୁବାସି । ମତାନ ଜାକୁବରି ବୁବାସି । ୧୬ ଜାକୁବ ଜସେପ୍କା ବୁବାସି । ଜୋସେପ୍ ମରିୟମ୍ତି କନ୍ଲି । ମରିୟମତି ପଟାଦାନ୍ ଜିସୁ ଜନମ୍ଆତାନ୍ । ଜିସୁ ମସିହ ଦର୍ତାନ୍ ବା ୱେଙ୍ଗିଁନାନ୍ ।
୧୭ ଇୟାୱାଜା ଅବ୍ରାହାମତି ମାଣାନ୍ ଦାଉଦଦି ସାନ୍ଦି ଆତାର୍ ପୁରା ସଉଦ କୁଟୁମ୍ । ଦାଉଦ ମାଣାନ୍ ଗତିମୁରୁଲି ୱାଜା ବାବିଲନ୍ତୁ ଇନି ସାନ୍ଦି ସଉଦ କୁଟୁମ୍, ମାରି ଗତିମୁରୁଲି ୱାଜା ବାବିଲନ୍ତୁ ଇତି ୱେନ୍କାରାନ୍ କ୍ରିସ୍ତଦି ଜନମ୍ ସାନ୍ଦି ଆତାର୍ ସଉଦ କୁଟୁମ୍ ।
ଜିସୁ କ୍ରିସ୍ତଦି ଜନମ୍
(ଲୁକ ୨:୧-୭)
୧୮ ✡ଲୁକ ୧:୨୭.ଇକା ଆଜିନାତ୍ ଜିସୁ କ୍ରିସ୍ତଦି ଜନମ୍ତି ମାଟା ଜିସୁ କ୍ରିସ୍ତଦି ଆଇସି ମାର୍ହାତ୍ ମରିୟମ୍ । ଜିସୁକ୍ରିସ୍ତଦି ଜନମ୍ ଇୟାୱାଜା ଆତାମାର୍ହାତ୍ । ମରିୟମ୍ତିଙ୍ଗ୍ ଜୋସେପ୍ତି ୱାଲେ ପେଡ଼ିଆଦେଙ୍ଗ୍ ଲସ୍ତା ମାର୍ହାର୍ । ମାତର୍ ପେଡ଼ିଆନି ଆଗ୍ଡ଼ି ୱେଙ୍ଗିଁତାତ୍ ଜେ ମରିୟମ୍ ପବିତ୍ର ଆତ୍ମାଦାନ୍ ଗାର୍ବୁଦୁତେବାତାମାନାତ୍ । ୧୯ ଜୋସେପ୍ ୱିଜୁୱାଲେ ଦାର୍ମୁଦି ପାଣିକିନିକାନ୍ ମାର୍ର୍ହାନ୍ । ମାରି ମରିୟମତିଙ୍ଗ୍ ଲୋକା ଆଗ୍ଡ଼ି ନିଦା କିଦେଙ୍ଗ୍ ୱାନ୍ ବଦା କିଏଜିମାର୍ହାନ୍ । ୱାନ୍ ଲସାତିତାନେଙ୍ଗ୍ ରୁକ୍ତେଙ୍ଗ୍ ନେସ୍ଇୱାଜା ଉପାୟ୍କିତାନ୍ । ୨୦ ୱାନ୍ ଇକା ଅଡ଼୍ବିନିୱାଲେ ଅରେନ୍ ପ୍ରବୁଦି ଦୁତ୍ ୱାନିଙ୍ଗ୍ ଲବେରୁ ତରାଇଆଜି ଇର୍ହାତ୍, “ଏ ଦାଉଦ କୁଟୁମ୍ତି ଜୋସେପ୍, ମରିୟମ୍ତିଙ୍ଗ୍ ନିଜେଦି ଆଡ଼ି ୱାଜା ଇଡ୍ଦେଙ୍ଗ୍ ତିଲାମା, ଇରିଙ୍ଗ୍ ପବିତ୍ର ଆତ୍ମାଦାନ୍ ୱାଦ୍ ପଟାଦୁ ଆତାମାନାତ୍ । ୨୧ ✡ଲୁକ ୧:୩୧.ତାନିଙ୍ଗ୍ ଅରେନ୍ କଡ଼ ଜନମ୍ ଆନାନ୍ । ମିର୍ ୱାନି ଦରୁ ଜିସୁ ଇଡ୍ନିଦେର୍ । ଇରିଙ୍ଗ୍ ୱାନ୍ ୱାନି ଲୋକାଙ୍ଗ୍ ୱାରି ପାପ୍ତାନ୍ ରକିୟା କିନାନ୍ ।”
୨୨ ବବିସତ୍ବକ୍ତାଦି ମାଣାନ୍ ପ୍ରବୁ ଆମାକା ଇର୍ହାମାର୍ହାନ୍, ଆକା ସତ୍ଆଦେଙ୍ଗ୍ ଇକା ଗଟାତାତ୍ । ୨୩ ଆୟା ବବିସତ୍ ମାଟା ଆଜିନାତ୍, “ଅରେତ୍ ରିପା ଗାର୍ବୁଦୁ ତେବାଜି କଡ଼ଦିଙ୍ଗ୍ ଜନମ୍ସିନାତ୍ । ମାରି ଲୋକୁ ଆୟା କଡ଼ଦିଙ୍ଗ୍ ଇମାନୁଏଲ ଦର୍ତାନ୍ ୱେଙ୍ଗ୍ଁନାନ୍ । ଇମାନୁଏଲଦି ଅର୍ତ ମାପୁରୁ ମା ୱାଲେ ମାନାନ୍ ।”
୨୪ ଜୋସେପ୍ ସୁସ୍କାଣ୍କାଣ୍ ନିଙ୍ଗିଁଜି ପ୍ରବୁଦି ଦୁତ୍ ୱାନିଙ୍ଗ୍ ଏଣ୍ତେସ୍ ଆଦେସ୍ ସିତାତ୍, ଆୟାୱାଜା କିତାନ୍ । ୱାନ୍ ମରିୟମ୍ତିଙ୍ଗ୍ ପେଡ଼ିଆନାନ୍ । ୨୫ ✡ଲୁକ ୨:୨୧.ମାତର୍ ମରିୟମ୍ କଡ଼ଦିଙ୍ଗ୍ ଜନମ୍ କିଇ ସାନ୍ଦି ୱାନ୍ ତାନି ୱାଲେ ଡର୍ଏତାମାର୍ହାନ୍ । ମାରି ଜୋସେପ୍ ଆୟା କଡ଼ଦି ଦରୁ ଜିସୁ ଇଟ୍ତାନ୍ ।