ଗରନ୍ ମୁସ୍କୁରାନ୍ ଜିସୁଦି ସିକିୟା
୫
୫:୧–୭:୨୯
୧ ଜିସୁ ଲୋକୁ ଗହଲି ସୁଡ଼୍ଜି ଉନ୍ଣ୍ତ୍ରି ଗରନ୍ ମୁସ୍କୁ ସର୍ହା ବାସ୍ତାନ୍ । ସିସୁର୍ ୱାନି ସାରିବେଡ଼୍ତି ଉଣ୍ତାତାର୍ । ୨ ଲୋକାଙ୍ଗ୍ ଜିସୁ ସିକିୟା ସିଜି ଇର୍ହାନ୍ ।
ସତ୍ ୱେଡ଼ିକା
(ଲୁକ ୬:୨୦-୨୩)
୩ ମାପୁରୁମାନୁ ଏମାକାର୍ ଆସା ଇଡ୍ନି, ଲୋକୁ ଦନ୍ୟ,
ଇରିଙ୍ଗ୍ ମାପୁରୁଦି ରାଜି ୱାରିଦି ।
୪ ଆଡ଼୍ବାଜି ମାନି ଲୋକୁ ଦନ୍ୟ,
ଇରିଙ୍ଗ୍ ମାପୁରୁ ୱାରିଙ୍ଗ୍ ୱେଡ଼ିକା ସିନାନ୍ ।
୫ ଦାର୍ମୁ ଲୋକୁ ଦନ୍ୟ,
ଇରିଙ୍ଗ୍ ୱାର୍ ମାପୁରୁଦି ପାର୍ମାଣ୍ କିତିମାନି ବିସୟ୍ ଲାବ୍କିନାର୍ ।
୬ ମାପୁରୁଦି ବଦାଦାନ୍ ପାଣି କିଦେଙ୍ଗ୍ ଏମେୱାରି ନାଣ୍ତ ଆସା, ୱାର୍ ଦନ୍ୟ,
ଇରିଙ୍ଗ୍ ମାପୁରୁ ୱାରିଙ୍ଗ୍ ୱେଡ଼ିକାକିନାନ୍ ।
୭ ଏମେକାର୍ ଆଇୱାରି ଉଣ୍ତିଙ୍ଗ୍ ଦୟା ତର୍ନାର୍ ୱାର୍ ଦନ୍ୟ,
ଇରିଙ୍ଗ୍ ମାପୁରୁ ୱାରିଙ୍ଗ୍ ଦୟା କିନାନ୍ ।
୮ ଏମେୱାରି ଜିବନ୍ ନେଗିକା ୱାର୍ ଦନ୍ୟ,
ଇରିଙ୍ଗ୍ ୱାର୍ ମାପୁରୁଦି ଦର୍ସନ୍ ପଇନାର୍ ।
୯ ଏମେକାର୍ ସାନ୍ତି କିଦେଙ୍ଗ୍ ଇଜି ପାଣିକିନାର୍ ୱାର୍ ଦନ୍ୟ,
ଇରିଙ୍ଗ୍ ୱାର୍ ମାପୁରୁଦି କଡ଼ର୍ ଇଜି ୱେଙ୍ଗ୍ଁନାର୍ ।
୧୦ ✡୧ ପିତର ୩:୧୪.ଏମେକାର୍ ମାପୁରୁଦି ବଦାଦାନ୍ ପାଣିକିଜି କାସ୍ଟୁ ପଇନାର୍, ୱାର୍ ଦନ୍ୟ,
ଇରିଙ୍ଗ୍ ମୁସ୍କୁପୁର୍ ୱାରିଦି ।
୧୧ ✡୧ ପିତର ୪:୧୪.ନାୱାଲେ ବୁଲାନିକାର୍ ଆତିମାନିଙ୍ଗ୍ ଲୋକୁ ଜଦି ମିଙ୍ଗିଁ ଅପମାନ୍ସିନାର୍, କାସ୍ଟୁ ସିନାର୍ ମାରି ମି ବିରଦ୍ତାନ୍ ତାଗ୍ଇ ବାଣ୍ତିସ୍ତି ମାଟେଙ୍ଗ୍ ଇନାର୍, ଆରିଙ୍ଗ୍ ମିର୍ ଦନ୍ୟ । ୧୨ ✡ପ୍ରେରିତ ୭:୫୨.ନାଣ୍ତ ୱେଡ଼ିକାଆଦୁ, ଇରିଙ୍ଗ୍ ମୁସ୍କୁପୁର୍ତୁ ମି ପୁରସ୍କାର୍ ନାଣ୍ତ; ଆୟାୱାଜାତ ୱାର୍ ମି ପୁର୍ବେଦି ଡକ୍ରାଦାଦାର୍ରି ବାବବାଦିରିଙ୍ଗ୍ କାସ୍ଟୁକିତାର୍ ।
ସର୍ ନି ଜାୟ୍
(ମାର୍କ ୯:୫୦; ଲୁକ ୧୪:୩୪-୩୫)
୧୩ ✡ମାର୍କ ୯:୫୦; ଲୁକ ୧୪:୩୪,୩୫.ମିର୍ ୱିଜୁ ଲୋକା ଦୁନିଆଦି ସର୍ତି ୱାଜା । ମାତର୍ ସର୍ ଜଦି ସର୍ଦିସାୱି ଆରାକିନାତ୍, ଆରିଙ୍ଗ୍ ତାନିଙ୍ଗ୍ ମାରି ସର୍ଆଡ଼୍ନିୱାଜା କିଦେଙ୍ଗ୍ ଆଏତ୍ । ନାସ୍ତିୱାଲେ ଆକା ପୁରା ତାଗ୍ଇକାଆଜି ଆତ୍ରେ ପକାଇଆନାତ୍ । ଲୋକୁ ତାନିଙ୍ଗ୍ ମାଟ୍ସିସନାର୍ ।
୧୪ ✡ଜୋହନ ୮:୧୨; ୯:୫.ମିର୍ ସାରା ଦୁନିଆଦି ଜାୟ୍ ୱାଜା । ଏମେ ଗାଡ଼୍କି ଗରନ୍ ମୁସ୍କୁ ତିଆର୍ ଆନାମାନାତ୍, ଆକା ଏସାଙ୍ଗ୍ ମାର୍ଗିଜି ତେବାଦେଙ୍ଗ୍ ଆଟ୍ଏତ୍ । ୧୫ ✡ମାର୍କ ୪:୨୧; ଲୁକ ୮:୧୬; ୧୧:୩୩.ଦିୱା କାସିସ୍କିଜି ଏନ୍ ଅଡି ଆଡ୍ଗି ପିଡ଼ିକ୍ସି ଇଡ୍ଏନ୍ । ତାନିଙ୍ଗ୍ ଦିୱା ଇଡ୍ନି ମୁସ୍କୁ ବାଡିଦୁ ଇଡ୍ନାନ୍ ମାରି ଆକା ଇଲୁଦୁ ମାନି ୱିଜେରିଙ୍ଗ୍ ଜାୟ୍ ସିନାତ୍ । ୧୬ ✡୧ ପିତର ୨:୧୨.ଆୟାୱାଜା ମି ଜାୟ୍ ଲାକ୍ତୁ ତରାଇଆପିତ୍ । ଆରିଙ୍ଗ୍ ମି ସତ୍ପାଣି ସୁଡ଼୍ଜି ୱାର୍ ମି ମୁସ୍କୁପୁର୍ତି ବୁବା ମାପୁରୁଦି ଦନ୍ୟବାଦ୍ କିନାର୍ ।
ନିୟମ୍ତି ବିସୟ୍ତାନ୍ ସିକିୟା
୧୭ ଅଡ଼୍ବିମାଟ୍ ଜେ ନାନ୍ ମସା ସିତି ନିୟମ୍ ମାରି ବାବବାଦିରି ସିକିୟା ୱିଜୁ ଗୁସାକିଦେଙ୍ଗ୍ ୱାତାମାନା । ଆୟାୱିଜୁ ଗୁସାକିଦେଙ୍ଗ୍ ସିଲେ, ମାତର୍ ସତ୍ତାନ୍ ସତ୍ କିଦେଙ୍ଗ୍ ୱାତାମାନା । ୧୮ ✡ଲୁକ ୧୬:୧୭.ମନ୍ତୁ ଇଡ୍ଦୁ, ବାଦଡ଼ ନି ଦୁନିଆ ତିର୍ଆଜି ତେବାନି ସାନ୍ଦି ନିୟମ୍ତି ଉନ୍ଣ୍ତ୍ରି ଇସ୍ରି ଠିକା ବା ନାମ୍ଏତ୍ । ୱିଜୁ ବିସୟ୍ତି ପୁରା ଆଇ ସାନ୍ଦି ଇକା ଗଟାଏତ୍ । ୧୯ ଆଦେଙ୍ଗ୍ ଏନ୍ଆପିନ୍ ନିୟମ୍ତି ୱିଜୁମାଣ୍କୁ ଇସ୍ରି ମାଟାଦିଙ୍ଗ୍ ଅମାନ୍ୟ କିନାନ୍ ମାରି ଆୟାୱାଜା କିଦେଙ୍ଗ୍ ଆଇୱାରିଙ୍ଗ୍ ସିକିୟା ସିନାନ୍, ୱାନ୍ ମୁସ୍କୁପୁର୍ତି ରାଜିଦୁ ୱିଜେରିମାଣ୍କୁ ଇସ୍ରିକାନ୍ ଇଜି ୱେଙ୍ଗ୍ଁନାନ୍ । ୨୦ ନାନ୍ ମିଙ୍ଗିଁ ଇଜିନା, ଦାର୍ମୁଗୁରୁ ମାରି ପାରୁସିର୍ ମାଣ୍କୁ ନାଣ୍ତ ବିସ୍ବାସ୍ତାନ୍ ମାପୁରୁଦି ବଦାଦି ପାଣି କିତିଙ୍ଗ୍ ମାତର୍ ମିର୍ ମୁସ୍କୁପୁର୍ତୁ ଡ଼ୁଗୁଦେଙ୍ଗ୍ ଆଟ୍ନିଦେର୍ ।
ରିସାଆନି ବିସୟ୍ତାନ୍ ସିକିୟା
(ଲୁକ ୧୨:୫୭-୫୯)
୨୧ ମିର୍ ୱେର୍ଇମାନିଦେର୍; ପୁର୍ବେକାଡ଼ାଦାନ୍ ଲୋକାଙ୍ଗ୍ ଇର୍ହାମାନାର୍, ଲୋକାଙ୍ଗ୍ ସାୟାମାର୍ଗା ଡାକ୍ମାଟ୍ । ଏନ୍ ଆକା କିନାନ୍, ୱାନ୍ ବିସାର୍ଆନାନ୍ । ୨୨ ମାତର୍ ନାନ୍ ଇଜିନା, ଏନ୍ ଏମେ ତଡ଼ାନ୍ ମୁସ୍କୁ ରିସାଆନାନ୍, ୱାନ୍ ବା ବିସାର୍ଆନାନ୍ । ଏନ୍ ତଡ଼ାନ୍ତିଙ୍ଗ୍ ବାୟା ଇଜି କାଡ଼୍ନାନ୍, ୱାନ୍ ନାଣ୍ତ କୁଟୁମ୍ ଆଗ୍ଡ଼ି ଦଣ୍ଡ୍ ପଇନାନ୍ । ମାରି ଏନ୍ ତଡ଼ାନ୍ତିଙ୍ଗ୍ ପାଣିସିଇ ମୁର୍କୁ ଇଜି ଇନାନ୍, ୱାନ୍ ନରକ ସିସୁଦୁ ପକାନି ଦଣ୍ଡ୍ ମାନାତ୍ । ୨୩ ଆଦେଙ୍ଗ୍ ମାପୁରୁଦି ଉଦେସ୍ତାନ୍ ବେଦି ମୁସ୍କୁ ପୁଜାସିଦେଙ୍ଗ୍ ସନିୱାଲେ ଜଦି ମି ଏତ୍ ୱାନାତ୍ ଜେ ମି ଉଣ୍ତିଙ୍ଗ୍ ଆମା ତଡ଼ାନ୍ତି ମନ୍ତୁ ଏସ ଅସାନ୍ତିମାନାତ୍ । ୨୪ ବେଦି ଆଗ୍ଡ଼ି ଆୟା ପୁଜା ସିନିକା ଡ଼ିସ୍ସି ସିଜି ବେଗି ବେଗି ସାନ୍ଡ୍ରୁ, ତଡ଼ାନ୍ତି ୱାଲେ ଡ଼େସି ମିସାତି ୱେନ୍କା ଡ଼େସି ୱାଜି ମାପୁରୁଦିଙ୍ଗ୍ ଆକା ପୁଜା ସିଦୁ ।
୨୫ ଜଦି ଏନ୍ ମି ବିରଦ୍ତାନ୍ ରାସ୍ସି କର୍ଟଦୁ ସନ୍ଡ଼୍ରେଙ୍ଗ୍ ଜାସେକିନାନ୍, କର୍ଟଦୁ ସନି ଆଗ୍ଡ଼ି ୱେଡ଼ା ମାନ୍ବୁ ମାନ୍ବୁ ୱାନି ୱାଲେ ନିଜେ ନିଜେମାନୁ ମିସାଦୁ । ଆଏତିଙ୍ଗ୍ କର୍ଟଦୁ ସରିଙ୍ଗ୍, ୱାନ୍ ମିଙ୍ଗିଁ ବିସାର୍କିନିୱାନି କିୟୁଦୁ ଆସ୍ପିସ୍କିନାନ୍ ମାରି ଆତିଙ୍ଗ୍ ନ୍ୟାୟ୍ କିନିକାନ୍ ମିଙ୍ଗିଁ ଜଇଲ୍ତୁ ଅତେଙ୍ଗ୍ ଇଜି ପଲିସ୍କା କିୟୁଦୁ ସର୍ପେ କିନାସିନାନ୍ । ୨୬ ନାନ୍ ମିଙ୍ଗିଁ ସତ୍ ଇଜିନା, ମି ମୁସ୍କୁ କିଆଇଆତିମାନି ୱାଡି ଡାବୁଙ୍ଗୁଁ ବା ଡ଼େସିସିଇ ସାନ୍ଦି ମିର୍ ଆବେଟ୍କୁ ସହସ ୱାଦେଙ୍ଗ୍ ଆଟ୍ଇଦେର୍ ।
ଦାରିପାଣି ବିସୟ୍ତାନ୍ ସିକିୟା
୨୭ ଦାରିପାଣି କିମାଟ୍, ଇୟା ଆଜ୍ଞା ମିର୍ ପୁର୍ବେକାଡ଼ାଦାନ୍ ୱେର୍ଇମାନିଦେର୍ । ୨୮ ମାତର୍ ଇଲେଇ ନାନ୍ ମିଙ୍ଗିଁ ଇଜିନା, ଜଦି ଏନ୍ ଆଇୱାନି ଆଇମାଦିଙ୍ଗ୍ ତାଗ୍ଇ କାଣ୍ଗାଦାନ୍ ସୁଣାନ୍, ୱାନ୍ ତାନି ୱାଲେ ମୋନ୍ତୁ ମୋନ୍ତୁ ଦାରିପାଣିକିତାମାନାନ୍ । ୨୯ ✡ମାତିଉ ୧୮:୯; ମାର୍କ ୯:୪୭.ଜଦି ମି ଉଣେରି କାଣ୍ଗାଦି ଉଣ୍ତିଙ୍ଗ୍ ମିର୍ ପାପ୍ କିନିମାନିଦେର୍, ଆୟା କାଣ୍ଗାଦିଙ୍ଗ୍ ଉନ୍ଦ୍ଜ ପୋକ୍ତୁ । ମି ୱିଜୁ ମେନ୍ଧଲ୍ ନରକଦୁ ଆର୍ନି ବାଦ୍ଲୁ, ମେନ୍ଦଲ୍ତି ଉଣ୍ତ୍ରି ବାଗ୍ ନାସ୍ଟୁଆନିକା ନେଗେତ୍ । ୩୦ ✡ମାତିଉ ୧୮:୮; ମାର୍କ ୯:୪୩.ଜଦି ମି ଡେବିରି କିୟୁ ମିଙ୍ଗିଁ ପାପ୍ତି ପାଣି କିବିସ୍କିଜିମାନାତ୍, ଆୟା କିୟୁଦିଙ୍ଗ୍ କୟଜ ପୋକ୍ତୁ । ମି ୱିଜୁ ମେନ୍ଧଲ୍ ନରକଦୁ ଆର୍ନି ବାଦ୍ଲୁ ଉଣ୍ତ୍ରି ବାଗ୍ ନାସ୍ଟୁଆନିକା ମି ଉଣ୍ତିଙ୍ଗ୍ ନେଗେତ୍ ।
ଆଇମାଦିଙ୍ଗ୍ ଡ଼ିସ୍ନି ବିସୟ୍ତାନ୍ ସିକିୟା
(ମାତିଉ ୧୯:୯; ମାର୍କ ୧୦:୧୧-୧୨; ଲୁକ ୧୬:୧୮)
୩୧ ✡ମାତିଉ ୧୯:୭; ମାର୍କ ୧୦:୪.ଜଦି ଏନ୍ ନିଜେଦି ଆଡ଼ିଙ୍ଗ୍ ଡ଼ିସ୍ତେଙ୍ଗ୍ଁ ବଦାକିନାନ୍, ୱାନ୍ ତାନିଙ୍ଗ୍ ରାସାତି ଇସାବ୍ତାନ୍ ଉଣ୍ତ୍ରି ଆଇମା ଡ଼ିସ୍ନି ଆକୁ ସିପିନ୍ ଇୟା ସିକିୟା ମିର୍ ଆଗ୍ଡ଼ିରାନ୍ ପୟ୍ତିମାନିଦେର୍ । ୩୨ ✡ମାତିଉ ୧୯:୯; ମାର୍କ ୧୦:୧୧,୧୨; ଲୁକ ୧୬:୧୮; ୧ କରିନ୍ତିୟ ୭:୧୦,୧୧.ମାତର୍ ନାନ୍ ମିଙ୍ଗିଁ ଇଜିନା, ଦାରିପାଣି କିନିକା ଡ଼ିସ୍ତିଙ୍ଗ୍ ଆଇ ଇନି ପାଣିଦିଙ୍ଗ୍ ବାଦ୍ଲୁ ଅରେନ୍ ୱାନି ଆଡ଼ିସିଙ୍ଗ୍ ଡ଼ିସ୍ନି ଆକୁ ସିତିଙ୍ଗ୍, ୱାନ୍ ତାନିଙ୍ଗ୍ ଦାରିପାଣି କିନି ନିନ୍ଦାଦୁ ଦସ୍ କିଜିନାନ୍ ମାରି ଏମେ ମେମାରି ଆୟା ଆଇମାଦିଙ୍ଗ୍ ପେଡ଼ି ଆନାନ୍, ୱାନ୍ ବା ଦାରିପାଣି କିନାନ୍ ।
ପାର୍ମାଣ୍ ବିସୟ୍ତାନ୍ ସିକିୟା
୩୩ ପୁର୍ବେ କାଡ଼ାଦାନ୍ ଇୟା ସିକିୟା ୱେନ୍ଞ୍ଜି ୱାଜିନିଦେର୍, ପାର୍ମାଣ୍ ରୁକ୍ମାଟ୍ । ମାପୁରୁ ଆଗ୍ଡ଼ି ଏମେ ପାର୍ମାଣ୍ କିତିମାନିଦେର୍, ତାନିଙ୍ଗ୍ ପୁରାକିଦୁ । ୩୪ ✡ଜାକୁବ ୫:୧୨; ମାତିଉ ୨୩:୨୨.ମାତର୍ ନାନ୍ ମିଙ୍ଗିଁ ଇଜିନା, ପାର୍ମାଣ୍ କିନିୱାଲେ, ପାର୍ମାଣ୍ କିମାଟ୍ । ମୁସ୍କୁପୁର୍ତି ଦର୍ତାନ୍ କିମାଟ୍, ଇରିଙ୍ଗ୍ ଆକା ମାପୁରୁଦି ବାସ୍ନି ଗଦି । ୩୫ ଦୁନିଆଦି ଦର୍ତାନ୍ ପାର୍ମାଣ୍ କିମାଟ୍, ଇରିଙ୍ଗ୍ ଆକା ମାପୁରୁଦି କାଲ୍କୁ ଇଡ୍ନି ବାଡି । ଜିରୁସାଲାମ୍ ଗାଡ଼୍ ଦର୍ତାନ୍ ବା ପାର୍ମାଣ୍ କିମାଟ୍, ଇରିଙ୍ଗ୍ ଆକା ଆଜିନାତ୍ ରାଜାରିରାଜାଦି ଗାଡ଼୍ । ୩୬ ମି ତାଲାଦି ଆନାଦୁରିଆ କିମାଟ୍, ଇରିଙ୍ଗ୍ ଉନ୍ଣ୍ତ୍ରି କୁକୁଟି କାଡ଼ା ନି ଅଡ଼ିନିକା କିନି ସାକ୍ତି ମିଙ୍ଗିଁ ସିଲେତ୍ । ୩୭ ମିର୍ ପାର୍ମାଣ୍ ନିୟମ୍ କିଏଣ୍ଗା କେବଲ୍ “ହଁ” ମାଟା “ହଁ” ଆପିତ୍, “ସିଲେ” ମାଟା “ସିଲେଣ୍” ଆପିତ୍ । ତେନିମାଣାନ୍ ନାଣ୍ତ ମାଟା ଇଜି ପାର୍ମାଣ୍ କିନିକା ସୟତାନ୍ତି ପେରିସ୍କିନି ମାଣାନ୍ ୱାନାତ୍ ।
ପ୍ରତିସଦ ବିସୟ୍ତାନ୍ ସିକିୟା
(ଲୁକ ୬:୨୯-୩୦)
୩୮ “କାଣ୍ଗା ବାଦ୍ଲୁ କାଣ୍ଗା,” ପାଲୁ ବାଦ୍ଲୁ ପାଲୁ । ଇୟା ବାଦ୍ଲୁ ଅନିମାଟା ମିର୍ ୱେର୍ଇମାନିଦେର୍ । ୩୯ ମାତର୍ ନାନ୍ ମିଙ୍ଗିଁ ଇଜିନା, ଏନ୍ ମି ଅନିସ୍ଟ କିତିଙ୍ଗ୍ ୱାନି ବାଦ୍ଲୁ ଅମାଟ୍ । ଜଦି ମି ଉଣେରି ବୁଗୁଲିଦୁ ଏନ୍ ସାପୁଡ଼ୁ ଡାକ୍ତାନ୍, ମାରି ଉନ୍ଣ୍ତ୍ରି ସାପୁଡ଼ୁ ଡାକ୍ତେଙ୍ଗ୍ଁ ମି ଡେବିରି ବୁଗୁଲି ବା ତର୍ସୋ ସିଦୁ । ୪୦ ଜଦି ଏନ୍ ମି ଆଙ୍ଗିଁ ଅତେଙ୍ଗ୍ ଇଜି ମି ବିରଦ୍ତାନ୍ ମାଟା ଇଜି ମିଙ୍ଗିଁ ବିସାର୍ ବାଡିଦୁ ଅନାନ୍, ୱାନିଙ୍ଗ୍ ମି ସୁଟେର୍ ବା ଦାନ୍ ସିଦୁ । ୪୧ ଜଦି ଏମେ ସୈନ୍ୟ ମିଙ୍ଗିଁ ୱାନି ବଜୁ ପିଣ୍ତ୍ଜ ୱାନି ୱାଲେ ଉଣ୍ତ୍ରି କିଲୋମିଟର ସନ୍ଡ଼୍ରେଙ୍ଗ୍ ଇଜି ଜାସେକିନାନ୍, ମିର୍ ଇନିକା ଅଡ଼୍ବିଏଣ୍ତା ୱାନି ୱାଲେ ରୁଣ୍ତି କିଲୋମିଟର ସାନ୍ଡ୍ରୁ । ୪୨ ଜଦି ଏନ୍ ମିଙ୍ଗିଁ ଇନି ଜିନିସ୍ ଲୋସ୍ନାନ୍, ମାନା କିଏନ୍ଣ୍ତା ୱାନିଙ୍ଗ୍ ସିଦୁ । ଏନ୍ ଇନିକା ଉଦାର୍ ଲୋସ୍ତିଙ୍ଗ୍, ୱାନିଙ୍ଗ୍ ଆକା ସିଦୁ ।
ସାତ୍ରୁରିଙ୍ଗ୍ ଜିବନ୍ନଦୁ
(ଲୁକ ୬:୨୭-୨୮,୩୨-୩୬)
୪୩ “ଜିବନ୍ନୋଦୁ ମି ସଙ୍ଗ୍ଁରିଙ୍ଗ୍, କାଡ଼୍ଦୁ ମି ସାତ୍ରୁରିଙ୍ଗ୍ ଇୟା ସିକିୟା ଆଗ୍ଡ଼ିରାନ୍ ୱେର୍ଇମାନିଦେର୍ ।” ୪୪ ମାତର୍ ନାନ୍ ମିଙ୍ଗିଁ ଇଜିନା, ଜିବନ୍ନୋଦୁ ମି ସାତ୍ରୁରିଙ୍ଗ୍ । ଏମେକାର୍ ମିଙ୍ଗିଁ ତାଡ଼ନାକିନାର୍, ୱାରି ଉଣ୍ତିଙ୍ଗ୍ ପାର୍ତନା କିଦୁ । ୪୫ ଇୟାୱାଜା କିତିଙ୍ଗ୍ ମୁସ୍କୁପୁର୍ତି ବୁବା ମାପୁରୁଦି କଡ଼ର୍ ଇଜି ୱେଙ୍ଗିଁନିଦେର୍ । ଇରିଙ୍ଗ୍ ମାପୁରୁ ନେଗିୱାରି ନି ତାଗ୍ଇୱାରି ଲୋକାମୁସ୍କୁ ୱାନି ୱେଡ଼ା ଜାୟ୍ ସିନାନ୍, ମାରି ସତ୍ପାଣି ନି ତାଗ୍ଇପାଣି କିନି ୱିଜେରିଙ୍ଗ୍ ପିର୍ରୁ ସିନାନ୍ । ୪୬ କେବଲ୍ ମିଙ୍ଗିଁ ଜିବନ୍ନୋଜି ମାନି ଲୋକାଙ୍ଗ୍ ଜିବନ୍ନତିଙ୍ଗ୍, ମାପୁରୁ ଏନ୍ଦା ମିଙ୍ଗିଁ ପୁରସ୍କାର୍ ସିନାନ୍ ? ସିସ୍ଟୁ ଲୋସ୍ନିକାର୍ ବା ଆକା କିନାର୍ । ୪୭ ଜଦି କେବଲ୍ ମି ତଡ଼ାନ୍କାଙ୍ଗ୍ ୱାର୍ଗିନିଦେର୍, ଆରିଙ୍ଗ୍ ମିର୍ ନେ ଉପ୍କାପାଣି କିଜିନିଦେର୍ ? ଅବିସ୍ବାସ୍ରି ବା ଆକା କିନାର୍ । ୪୮ ମି ମୁସ୍କୁପୁର୍ତି ବୁବା ଏଣ୍ତେସ୍ ପବିତ୍ର, ମିର୍ ଆୟାୱାଜା ପବିତ୍ର ଆନିକାମାନାତ୍ ।
✡୫:୧୦ ୧ ପିତର ୩:୧୪.
✡୫:୧୧ ୧ ପିତର ୪:୧୪.
✡୫:୧୨ ପ୍ରେରିତ ୭:୫୨.
✡୫:୧୩ ମାର୍କ ୯:୫୦; ଲୁକ ୧୪:୩୪,୩୫.
✡୫:୧୪ ଜୋହନ ୮:୧୨; ୯:୫.
✡୫:୧୫ ମାର୍କ ୪:୨୧; ଲୁକ ୮:୧୬; ୧୧:୩୩.
✡୫:୧୬ ୧ ପିତର ୨:୧୨.
✡୫:୧୮ ଲୁକ ୧୬:୧୭.
✡୫:୨୯ ମାତିଉ ୧୮:୯; ମାର୍କ ୯:୪୭.
✡୫:୩୦ ମାତିଉ ୧୮:୮; ମାର୍କ ୯:୪୩.
✡୫:୩୧ ମାତିଉ ୧୯:୭; ମାର୍କ ୧୦:୪.
✡୫:୩୨ ମାତିଉ ୧୯:୯; ମାର୍କ ୧୦:୧୧,୧୨; ଲୁକ ୧୬:୧୮; ୧ କରିନ୍ତିୟ ୭:୧୦,୧୧.
✡୫:୩୪ ଜାକୁବ ୫:୧୨; ମାତିଉ ୨୩:୨୨.