୧୬
କାବାଆନି ପାଣି ତର୍ତେଙ୍ଗ୍ଁ ଇଜି ଦାବି
(ମାର୍କ ୮:୧୧-୧୩; ଲୁକ ୧୨:୫୪-୫୬)
୧ ✡ମାତିଉ ୧୨:୩୮; ଲୁକ ୧୧:୧୬.ଅର୍ଲେନ୍ ଏସଲୋକ୍ ପାରୁସିର୍ ନି ସାଦୁକିର୍ ଜିସୁଙ୍ଗୁଁ ଦସ୍ ଆସ୍ତେଙ୍ଗ୍ ଇଜି ୱାନି ଲାକ୍ତୁ ୱାତାର୍ । ୱାର୍ ୱାନିଙ୍ଗ୍ ଇର୍ହାର୍, ମାପୁରୁ ୱାନିଙ୍ଗ୍ ଆସ୍କିତାମାନାନ୍ ଇଜି ପାର୍ମାଣ୍ ସିନି ଉଣ୍ତିଙ୍ଗ୍ ୱାନ୍ ଉନ୍ଡ୍ରି କାବାଆନି ପାଣି କିଜ ତର୍ଆ । ୨ ମାତର୍ ଜିସୁ ୱାରିଙ୍ଗ୍ ଇର୍ହାନ୍, “ମିଲିମିଲିକା ବେଡ଼ାଦୁ ବାଦ୍ଡ଼ ନେତେର୍ ତରିତିଙ୍ଗ୍ ନେଗି ପାଗ୍ ଆନାତ୍ ଇଜି ମିର୍ ଇଜିନିଦେର୍, ୩ ମାରି ସାଲିଦିବେଡ଼ାଦୁ ବାଦ୍ଡ଼ ଲାଲ୍ ନି ସିକାଟି ତରିତିଙ୍ଗ୍ ପିରୁ ଆନିକା ନେସ୍ନିଦେର୍ । ମିର୍ ବାଦ୍ଡ଼ତିଙ୍ଗ୍ ସୁଡ଼୍ଜି ପାଗ୍ତି ମାଟା ଆଗ୍ଡ଼ି ନେସ୍ନିଦେର୍ । ମାତର୍ ଇଲେଇତି ସମୟ୍ତି ସିନେଙ୍ଗ୍ୱିଜୁ ମିର୍ ନେସ୍ତେଙ୍ଗ୍ ଆଟ୍ଇଦେର୍ ? ୪ ✡ମାତିଉ ୧୨:୩୯; ଲୁକ ୧୧:୨୯.ତାଗ୍ଇ ନି ଏମେକାର୍ ମାପୁରୁଙ୍ଗ୍ଁ ବିସ୍ବାସ୍ କିଏର୍ ୱାର୍ ସିନା ସୁଡ଼ୁନାର୍, ମାତର୍ ଜୁନସ୍ତି ସିନା ଡ଼ିସ୍ତିଙ୍ଗ୍ ଆଇ ଆମାକାବା ସିନା ୱାରିଙ୍ଗ୍ ସିଆୟ୍ଆଏତ୍ ।”
ମାରି, ୱାନ୍ ୱାରିଙ୍ଗ୍ ଡ଼ିସ୍ତାନ୍ନୋ ସୋର୍ହାନ୍ ।
କମିର୍ ନାନି ପାରୁସି ନି ସାଦୁକିରି ସିକିୟା
(ମାର୍କ ୮:୧୪-୨୧)
୫ ସିସୁର୍ ଗାଡା ଆୟାପାଡ଼୍କା ଇତାରୋ ସୁଡ଼ୁତାର୍ଜେ, ୱାର୍ ରୁଟିଙ୍ଗ୍ ତାତେଙ୍ଗ୍ ବାଣାତାର୍ । ୬ ✡ଲୁକ ୧୨:୧.ଜିସୁ ୱାରିଙ୍ଗ୍ ଇର୍ହାନ୍, “ଜାଗାର୍ତା ଆଦୁ, ପାରୁସି ନି ସାଦୁକିରି କମିର୍ଦାନ୍ ଜାଗାର୍ତାଆଦୁ ।”
୭ ୱାର୍ ଇୟା ବିସୟତୁ ୱାରିୱାରି ଲୋଇ ୱାର୍ଗିଜି ସାତାର୍, “ମାଡ୍ ରୁଟିଙ୍ଗ୍ ତେଇକା ଇଜି ୱାନ୍ ଇକା ଇଜିନାନ୍ ।”
୮ ୱାର୍ ଇନିକା ଇଜିମାର୍ହାର୍ ନେସ୍ତାନ୍ନୋ ଜିସୁ ୱାରିଙ୍ଗ୍ ଇର୍ହାନ୍, “ମି ଲାକ୍ତୁ ରୁଟିଙ୍ଗ୍ ସିଲୁ ଇଜି ଏନ୍ଦା ୱାର୍ଗିଜି ସାଜିନିଦେର୍ ? ମି ବିସ୍ବାସ୍ ଏସ ଉଣା । ୯ ✡ମାତିଉ ୧୪:୧୭-୨୧.ମିର୍ ଇନିକା ଇୟାସାନ୍ଧିବା ବୁଜାଦେଙ୍ଗ୍ ଆଟ୍ଇଜିନିଦେର୍ ? ୫,୦୦୦ ହାଜାର୍ ଲୋକାମାନୁ ନାନ୍ ପାସ୍ଗୋଟା ରୁଟିଙ୍ଗ୍ ବାଟାକିତିମାନି ମାଟା ଇନିକା ମିଙ୍ଗିଁ ଏତ୍ ସିଲେତ୍ ? ନାସ୍ତିୱାଲେ ଏସଗୋଟା ଡାଡ଼ିଆଙ୍ଗାଁ ବର୍ତିକିତିମାର୍ଇଦେର୍ ? ୧୦ ✡ମାତିଉ ୧୫:୩୪-୩୮.ମାରି ଆୟା ୪,୦୦୦ ହାଜାର୍ ଲୋକାଙ୍ଗ୍ ସାତଗଟା ରୁଟିଙ୍ଗ୍ ମାଟା ଏତ୍ ସିଲେତ୍ ? ନାସ୍ତିୱାଲେ ମିର୍ ଏସଗୋଟା ଡାଡ଼ିଆଙ୍ଗାଁ ବର୍ତିକିତିମାର୍ଇଦେର୍ ? ୧୧ ନାନ୍ ଜେ ରୁଟିଙ୍ଗ୍ ବିସୟ୍ତାନ୍ ଇନ୍ଏନ୍ ମାର୍ଆ, ଇକା ଏଣ୍ତେସ୍ ବୁଜାଦେଙ୍ଗ୍ ଆଟ୍ଇଜିନିଦେର୍ ? ନାନ୍ ଇଜିନା, ପାରୁସି ନି ସାଦୁକିରି କମିର୍ଦାନ୍ ଜାଗାର୍ତାମାନ୍ଡ୍ରୁ ।”
୧୨ ନାସ୍ତିୱାଲେ ସିସୁର୍ ବୁଜାଦେଙ୍ଗ୍ ଆଟ୍ତାର୍ ଜେ ଜିସୁ ରୁଟିଦି କମିର୍ ମାଟା ଇନ୍ଏନ୍ମାର୍ହାନ୍, ମାତର୍ ପାରୁସି ନି ସାଦୁକିରି ସିକିୟା ଉଣ୍ତିଙ୍ଗ୍ ଜାଗାର୍ତା କିତାମାର୍ହାନ୍ ।
ଜିସୁ ମସିହ ଇଜି ପିତର ୱେର୍ତାନ୍
(ମାର୍କ ୮:୨୭-୩୦; ଲୁକ ୯:୧୮-୨୧)
୧୩ ୱେନ୍କା ଜିସୁ କାଇସରିୟା ପିଲିପି ଗାଡ଼୍ ଲାକ୍ତୁରି ରାଜିଦୁ ୱାଜି ନିଜେଦି ସିସୁରିଙ୍ଗ୍ ୱେନ୍ବାତାନ୍, “ମନୁସ୍ୟପୁତ୍ର ଏନ୍ ଇଜି ଇୟା ବିସୟ୍ତାନ୍ ଲୋକୁ ଇନିକା ଇଜିନାର୍ ?”
୧୪ ✡ମାତିଉ ୧୪:୧,୨; ମାର୍କ ୬:୧୪,୧୫; ଲୁକ ୯:୭,୮.ୱାର୍ ଇର୍ହାର୍, “ଏନ୍ ଏନ୍ ଇଜିନାର୍, ୱାନ୍ ଡୁବନ୍ସିନି ଯୋହନ, ଏନ୍ ଏନ୍ ଇଜିନାର୍ ‘ଏଲିୟ୍,’ ମାରି ଆଇକାର୍ ଇଜିନାର୍, ଜିରିମିୟ ସିଲିତିଙ୍ଗ୍ ବାବବାଦିରି ମାଣାନ୍ ଅରେନ୍ ।”
୧୫ ଜିସୁ ୱେନ୍ବାତାନ୍, “ନାନ୍ ଏନ୍ ଇୟା ବିସୟ୍ତାନ୍ ମିର୍ ଇନିକା ଇଜିନିଦେର୍ ?”
୧୬ ✡ଜୋହନ ୬:୬୮,୬୯.ସିମୋନ ପିତର୍ ଇର୍ହାନ୍, “ନିନୁ କ୍ରିସ୍ତ ଅର୍ତାତ୍ ମସିହ, ଜିବନ୍ମାନି ମାପୁରୁଦି ମାରିନ୍ ।”
୧୭ ଜିସୁ ଇର୍ହାନ୍, “ଏ ଜୁନସ୍ତି ମାରିନ୍ ସିମୋନ, ନିନ୍ ଦନ୍ୟ !” ଇୟା ସତ୍ ନିନୁ ଆମା ଲୋକାମାଣାନ୍ ପୟ୍ଇ । ନା ମୁସ୍କୁପୁରୁତି ବୁବା ନିଜେ ଇକା ନିମାନୁ ୱେର୍ତାମାନାନ୍ । ୧୮ ଆୟାଉଣ୍ତିଙ୍ଗ୍ ନାନ୍ ବା ନିଙ୍ଗିଁ ଇଜିନା, ନିନୁ ପିତର ଅର୍ତାତ୍ ପିଡ଼ିପି । ମାତର୍ ଇୟା ମୁଲ୍ ପିଡ଼ିପି ମୁସ୍କୁ ନାନ୍ ନା ମଣ୍ତଲି ତିଆର୍କିନା । ଇୟାୱାଜାକି ସାନିୱାଜା ଇନି ଦଂସକିନି ସାକ୍ତି ତାନିଙ୍ଗ୍ ନାସ୍ଟୁ କିଦେଙ୍ଗ୍ ଆଟ୍ଏତ୍ । ୧୯ ✡ମାତିଉ ୧୮:୧୮; ଜୋହନ ୨୦:୨୩.ନାନ୍ ନିଙ୍ଗିଁ ମୁସ୍କୁପୁର୍ତି କୁସିକାଣ୍ତି ସିନା, ମାରି ନିନ୍ ଦୁନିଆଦୁ ଆମାକା ବନ୍ଦକିନି, ମୁସ୍କୁପୁରୁତୁ ଆକା ବନ୍ଦତେବାନାତ୍, ମାରି ନିନ୍ ଦୁନିଆଦୁ ଆମାକା ଇନିକା ଡ଼ିସ୍ନିସିନି, ମୁସ୍କୁପୁରୁତୁ ଆକା ଡ଼ିସ୍ନି ।
୨୦ ଜିସୁଙ୍ଗୁଁ ଜେ ମସିହ ଇଜି ଇକା ଏଙ୍ଗ୍ ଇନ୍ଇ ଉଣ୍ତିଙ୍ଗ୍ ୱାନ୍ ସିସୁରିଙ୍ଗ୍ ମାଟା ସିତାନ୍ ।
ଜିସୁ ନିଜେଦି ସାନିକା ନି ଡ଼େସିଜିବନ୍ଆନି ବିସୟ୍ତାନ୍ ୱେର୍ତାନ୍
(ମାର୍କ ୮:୩୧; ୯:୧; ଲୁକ ୯:୨୨-୨୭)
୨୧ ଆୟା ସମୟ୍ତାନ୍ ଜିସୁ ନିଜେଦି ସିସୁରିଙ୍ଗ୍ ନେସ୍ନିୱାଜା ଇନ୍ଡ୍ରେଙ୍ଗ୍ ଆସ୍ତାନ୍, “ନାନ୍ ପୁରା ଜିରୁସାଲମ୍ତୁ ସନ୍ଡ୍ରେଙ୍ଗ୍ ଆନାତ୍ ମାରି ଦାର୍ମୁଜାଜକ, ଦାର୍ମୁଗୁରୁ ମାରି ନେତାର୍ରି, କିୟୁଦାନ୍ ନାଣ୍ତ ଦୁଃକ୍କାସ୍ଟୁବଗାଜି ସାଦେଙ୍ଗ୍ପଡ଼ାନାତ୍, ମାତର୍ ମୁନେଟି ୱେନ୍କା ମାରିଡ଼େସିଜିବନ୍ ଆଜିନିଙ୍ଗିଁନା ।”
୨୨ ପିତର୍ ଜିସୁଙ୍ଗୁଁ ଉନ୍ଡ୍ରି ବାଡିଦୁ ଅତାନ୍ନୋ ବୁଦିୱେର୍ସି ଇନ୍ଡ୍ରେଙ୍ଗ୍ ଆସ୍ତାନ୍, “ମାପୁରୁ କିମାକିନ୍, ପ୍ରବୁ, ନି ଉଣ୍ତିଙ୍ଗ୍ ଇୟାୱିଜୁ ଏସ୍କାଙ୍ଗ୍ବା ଗଟାମାକିତ୍ ।”
୨୩ ଜିସୁ ମାର୍ଜିବେସ୍ସି ପିତରତିଙ୍ଗ୍ ଇର୍ହାନ୍, “ନା ଆଗ୍ଡ଼ିରାନ୍ ଆକ ସାଙ୍ଗ୍ଆ ସୟତାନ୍, ନିନୁ ନା ଉଣ୍ତିଙ୍ଗ୍ ଉନ୍ଡ୍ରିବାଦା, ଇରିଙ୍ଗ୍ ନିନୁ ମାପୁରୁଦି ବିସୟ୍ ଅଡ଼୍ବିଏଣ୍ତା ଲୋକା ବିସୟ୍ ଅଡ଼୍ବିଜିନି ।”
୨୪ ✡ମାତିଉ ୧୦:୩୮; ଲୁକ ୧୪:୨୭.ତାନେୱେନ୍କା ଜିସୁ ସିସୁରିଙ୍ଗ୍ ଇର୍ହାନ୍, “ଏନ୍ଆପିନ୍ ନାୱାଲେ ୱାଦେଙ୍ଗ୍ ବଦାକିନାନ୍, ଆର୍ତିଙ୍ଗ୍ ୱାନ୍ ନିଜେଦିଙ୍ଗ୍ ମାନାମାକିନି, ମାରି ନିଜେଦି କ୍ରୁସ ପିଣ୍ତିଜି ନା ୱେନ୍କା ୱେନ୍କା ବୁଲାଦେଙ୍ଗ୍ଆନାତ୍ । ୨୫ ✡ମାତିଉ ୧୦:୩୯; ଲୁକ ୧୭:୩୩; ଜୋହନ ୧୨:୨୫.ଇରିଙ୍ଗ୍ ଏନ୍ଆପିନ୍ ନିଜେଦି ଜିବନ୍ତିଙ୍ଗ୍ ରକିୟା କିଦେଙ୍ଗ୍ ବଦାକିନାନ୍, ୱାନ୍ ଆକା ଆରାକିନାନ୍, ମାତର୍ ଏନ୍ ନା ଉଣ୍ତିଙ୍ଗ୍ ନିଜେଦି ଜିବନ୍ତିଙ୍ଗ୍ ଆରାକିନାନ୍, ୱାନ୍ ଆକା ପଇନାନ୍ । ୨୬ ଜଦି ଅରେନ୍ ଲୋକୁ ସାରାଦୁନିଆଦିଙ୍ଗ୍ ଜିଣାଜି, ମାତର୍ ନିଜେଦି ଜିବନ୍ତିଙ୍ଗ୍ ଆରାକିନାନ୍, ୱାନିଙ୍ଗ୍ ଇନି ଲାବ୍ଆନାତ୍ ? ଲୋକୁ ୱାନି ଜିବନ୍ତିଙ୍ଗ୍ ଡ଼େସି ପଇଦେଙ୍ଗ୍, ଇନିକା ସିଦେଙ୍ଗ୍ ଆଟ୍ନାନ୍ । ୨୭ ✡ମାତିଉ ୨୫:୩୧; ରୋମିୟ ୨:୬.ମନୁସ୍ୟପୁତ୍ର ବୁବା ମାପୁରୁଦି ମାଣାନ୍ ଗୌରବ୍ ନି ମୁସ୍କୁପୁର୍ତି ଦୁତ୍କାୱାଲେ ମାରିଡ଼େସି ୱାନାନ୍ । ନାସ୍ତିୱାଲେ ୱାନ୍ ୱିଜୁ ଲୋକାଙ୍ଗ୍ ୱାନି କିତିମାନି ପାଣି ଇସାବ୍ତାନ୍ ପଲ୍ସିନାନ୍ । ୨୮ ନାନ୍ ମିଙ୍ଗିଁ ସତ୍ ଇଜିନା, ମନୁସ୍ୟପୁତ୍ର ରାଜା ଆଜି ୱାନିସାନ୍ଦି ଇବେନୁ ନିର୍ଇ ତେବାତିମାନି ଏସୋଲୋକ୍ ଏଣ୍ତେସ୍ କିଜିବା ସାନିକା ୱେଡ୍ଏର୍ ।”
✡୧୬:୧ ମାତିଉ ୧୨:୩୮; ଲୁକ ୧୧:୧୬.
✡୧୬:୪ ମାତିଉ ୧୨:୩୯; ଲୁକ ୧୧:୨୯.
✡୧୬:୬ ଲୁକ ୧୨:୧.
✡୧୬:୯ ମାତିଉ ୧୪:୧୭-୨୧.
✡୧୬:୧୦ ମାତିଉ ୧୫:୩୪-୩୮.
✡୧୬:୧୪ ମାତିଉ ୧୪:୧,୨; ମାର୍କ ୬:୧୪,୧୫; ଲୁକ ୯:୭,୮.
✡୧୬:୧୬ ଜୋହନ ୬:୬୮,୬୯.
✡୧୬:୧୯ ମାତିଉ ୧୮:୧୮; ଜୋହନ ୨୦:୨୩.
✡୧୬:୨୪ ମାତିଉ ୧୦:୩୮; ଲୁକ ୧୪:୨୭.
✡୧୬:୨୫ ମାତିଉ ୧୦:୩୯; ଲୁକ ୧୭:୩୩; ଜୋହନ ୧୨:୨୫.
✡୧୬:୨୭ ମାତିଉ ୨୫:୩୧; ରୋମିୟ ୨:୬.