ଫିଲୀମନଙ୍କ ନିକଟକୁ ପାଉଲଙ୍କ ପତ୍ର
ପିଲିମନଦି ଲାକ୍ତୁ ପାଉଲତି ଆକୁ
ପିଲିମନ ଆକୁ ବିସୟ୍ତାନ୍ ଏସ ମାଟା
ଇସ୍ରି ପିଲିମନ ଆକୁ ପ୍ରେରିତ ପାଉଲତି ମାଣାନ୍ ରାସାତାମାର୍ହାତ୍ ୧:୧ । ଏସ୍ତିୱାଲେ ଇକା ରାସ୍ତାନ୍ ୱାନ୍ ଜଇଲ୍ତୁ ମାର୍ହାନ୍, ଆମାକା ଅର୍ତ ଆନାତ୍ସୁଗି ୱାନ୍ ରୋମତାନ୍ ଇକା ରାସ୍ତାମାନାନ୍ । ଜଦି ୱାନ୍ ରୋମତୁ ମାର୍ହାନ୍ କ୍ରିସ୍ତଦି ଜନମ୍ତି ପାକାପାକି ୬୧ ବାର୍ସେକ୍ ୱେନ୍କା ଇୟା ବଇ ରାସ୍ନାମାନାନ୍ । ଆମାକା ଆୟା ସାମାନ୍ ବେଡ଼ାଦୁ କଲସିୟ ମଣ୍ତଲିଦିଙ୍ଗ୍ ରାସ୍ନାମାନାନ୍ ।
ୱାନ୍ ଇୟା ଆକୁ ପିଲିମନ ଦର୍ତି ଅରେନ୍ ଲୋକ୍ତିଙ୍ଗ୍ ରାସ୍ତାମାନାନ୍ । ପିଲିମନ ଅରେନ୍ ମଣ୍ତଲିଦି ପେରିକାନ୍ ମାରି ଦାସରି ପେରିକାନ୍ ମାର୍ହାନ୍ । ପାଉଲ ରାସ୍ନାନ୍ ଜେ, ୱାନ୍ ଅନିସିମସଦିଙ୍ଗ୍ କାସ୍ଟୁ ସିମାକିନ୍, ଏନ୍ କି ଫିଲିମନଦି ମାଣାନ୍ ଡଙ୍ଗାଁ କିଜି ଆକ ଉରୁକ୍ତା ମାର୍ହାନ୍ । ରୋମିୟ ନିୟମ୍ ଇସାବ୍ତାନ୍ ପିଲିମନ ଅନିସିମସଦିଙ୍ଗ୍ ସାନି ଦଣ୍ତ ସିନି ଅଦିକାର୍ ମାର୍ହାତ୍ ।
ଅନିସିମସଦିଙ୍ଗ୍ କ୍ରିସ୍ଟାନ୍ ତଡ଼ାନ୍ ୱାଜା ମାନାନି ଉଣ୍ତିଙ୍ଗ୍ ଏଣ୍ତେସ୍ ରାଜି ଆନାନ୍ ଆୟାଉଣ୍ତିଙ୍ଗ୍ ପିଲିମନଦିଙ୍ଗ୍ ଅନୁରଦ୍ ପାଉଲ ସିନାନ୍ । ପାଉଲ ଅନିସିମସଦିଙ୍ଗ୍ ୱାନି ବାଡିଦୁ ସେବା ପାଣି କିନି ଉଣ୍ତିଙ୍ଗ୍ ସାରି ସିନି ଉଣ୍ତିଙ୍ଗ୍ ଆଦେସ୍ ସିତାନ୍ ୧:୧୩-୧୪ ।
ଇୟା ଆକୁଦୁ ମାନି ମୁକିୟ୍ ବିସୟ୍
୧. ପାଉଲ ପିଲିମନଦିଙ୍ଗ୍ ନମସ୍କାର୍ କିନାନ୍ । ୧:୧-୩
୨. ପାଉଲ ଅନିସିମସଦି ମାଣାନ୍ ପିଲିମନତିଙ୍ଗ୍ ଉନ୍ଡ୍ରି କ୍ରିସ୍ଟାନ୍ ତଡ଼ାନ୍ ୱାଜା ମାନାଦେଙ୍ଗ୍ ୱେର୍ନାନ୍ । ୧:୪-୨୧
୩. ପାଉଲ ୱାନି ମାରିଡ଼େସି ସନି ବିସୟ୍ତାନ୍ ମୋନ୍ତାନ୍ ୱେର୍ନାନ୍ ମାରି ନମସ୍କାର୍ କିଜି ୱିସ୍ନାନ୍ । ୧:୨୨-୨୫
୧
୧ ଜିସୁ କ୍ରିସ୍ତଦି ଉଣ୍ତିଙ୍ଗ୍ ଜେଲ୍ତୁ କାଟେକିଜିମାନି ନାନ୍ ପାଉଲ ମାରି ତଡ଼ାନ୍ ତିମତିମାଣାନ୍, ତଡ଼୍ ମାରି ଅର୍ସେପାଣିକିନି ପିଲିମନଦି, ୨ ✡କଲସିୟ ୪:୧୭.ମାରି ତାମେ ଇଲ୍ତୁ ଉଣ୍ତାଜି ମାନି ପାର୍ତନା କିଜିମାନି ମଣ୍ତଲି, ତାଙ୍ଗିଁ ଅପ୍ପିୟା ମାରି କ୍ରିସ୍ଟାନ୍ଦାର୍ମୁଦୁ ଜୁଦ୍ତୁ ମା ୱାଲେ ପାଣିକିତିମାନି ଆର୍କିପତି ଲାକ୍ତୁ ଆକୁ ୩ ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍ ।
ପିଲିମନତି ଜିବନ୍ନୋନିକା ମାରି ବିସ୍ବାସ୍
୪ ତଡ଼ାନ୍ ପିଲିମନ, ୱିଜୁ ଦେବେଙ୍ଗ୍ ନାନ୍ ପାର୍ତାନା କିନିୱାଲେ ମିଙ୍ଗିଁ ଏତ୍କିଜି ମାପୁରୁଙ୍ଗ୍ ଦନ୍ୟବାଦ୍ ସିଜିମାନା, ୫ ଇରିଙ୍ଗ୍ ନାନ୍ ୱେର୍ଆମାନା, ପ୍ରବୁ ଜିସୁମାନୁ ମି ବିସ୍ବାସ୍ ମାରି ଦାର୍ମୁଜିବନ୍ଜିନି ଲୋକା ଉଣ୍ତିଙ୍ଗ୍ ମି ଜିବନ୍ନୋନିକା ! ୬ କ୍ରିସ୍ତଦି ୱାଲେ ମିସାନି ମାଣୁକୁ ମାପ୍ ଜିବନ୍ତୁ ଆମା ୱିଜୁ ଆର୍ସିବାଦ୍ ପୟ୍ତିମାନିକା, କ୍ରିସ୍ତ ବିସ୍ବାସ୍ତି ୱାଜା ମି ୱାଲେ ମା ମିସାନିକା ଆୟାୱିଜୁଦି ବୁଜାଇ ଅରତ୍ ବୁଜାନି ଉଣ୍ତିଙ୍ଗ୍ ମିଙ୍ଗିଁ ସାକା କିପିନ୍, ଇୟାକା ନା ପାର୍ତାନା । ୭ ଲାଡ୍ତି ତଡ଼ାନ୍କୁ ନି ତାଙ୍ଗିଁକି, ନି ଜିବନ୍ନୋନିକା ନାଙ୍ଗିଁ ନାଣ୍ତ୍ ୱେଡ଼ିକା ସିତାମାନାତ୍ ମାରି ୱେଡ଼ିକା ବା କିତାମାନାତ୍; ଇରିଙ୍ଗ୍ ମିର୍ ପ୍ରବୁଦି ସାଦୁରି ଜିବନ୍ତୁ ୱେଡ଼ିକା ବର୍ତି କିତିସିତିମାନିଦେର୍ ।
ଅନିସିମସଦି ଉଣ୍ତିଙ୍ଗ୍ ଅନୁରଦ୍
୮ ଇୟାଉଣ୍ତିଙ୍ଗ୍ ମି କ୍ରିସ୍ତ ବିସ୍ବାସ୍ତି ତଡ଼ାନ୍ ୱାଜା ମି ପାଣି ବିସୟ୍ତାନ୍ ଆଦେସ୍ ସିଦେଙ୍ଗ୍ ନା ସାସ୍ ମାନାତ୍ । ୯ ମାତର୍ ମି ଉଣ୍ତିଙ୍ଗ୍ ନା ଜିବନ୍ନୋନିକା ମାନିଙ୍ଗ୍ ନିଙ୍ଗିଁ କେବଲ ଅନୁରୋଦ୍ କିଜିନା । ଜଦିବା ନାନ୍ ପାଉଲ ଅରେନ୍ ଡକ୍ରା, କ୍ରିସ୍ତ ଜିସୁଦି ଉଣ୍ତିଙ୍ଗ୍ ଇଲେଇ ଜଇଲ୍ତୁ ମାନା, ୧୦ ✡କଲସିୟ ୪:୯.ଆତିଙ୍ଗ୍ବା ନାନ୍ ମାଡ଼ିସ୍କିଜି ଇକା ୱେର୍ସିନା । ଇୟା ଜଇଲ୍ତୁ ଅବସ୍ଥାଦାନ୍ ନାନ୍ ଆମାୱାନିଙ୍ଗ୍ କ୍ରିସ୍ତଦି ଉଣ୍ତିଙ୍ଗ୍ ନିଜେଦି ମାରିନ୍ ୱାଜା ପୟ୍ତାମାନା, ନାନ୍ ୱାନି ଆତ୍ମିକ ବୁବା ୱାଜା ଆତାମାନା, ଆୟା ଅନିସିମସ୍ ଉଣ୍ତିଙ୍ଗ୍ ନା ଇୟା ଅନୁରଦ୍ । ୧୧ ଅର୍ଲେନ୍ ଅନିସିମସ ମି ଉଣ୍ତିଙ୍ଗ୍ ଦର୍କାର୍ ସିଲେତାନ୍; ମାତର୍ ଇଲେଇ ୱାନ୍ ନିଙ୍ଗିଁ ନି ନାଙ୍ଗିଁ ବିସେସ୍ ଦରକାର୍ତୁ ୱାନାନ୍ ।
୧୨ ୱାନ୍ ତୋ ନା ଜିବନ୍ତି ୱାଜା ନାନ୍ ଇଲେଇ ୱାନିଙ୍ଗ୍ ମି ଲାକ୍ତୁ ପୋକ୍ସି ସିନି ୱାଲେ ନା ଜିବନ୍ ଆଡ଼୍ବାତି ୱାଜା ଆଜିନାତ୍ । ୧୩ କ୍ରିସ୍ତଦି ନେଗିକାବୁର୍ ପ୍ରଚାର୍ କିନି ଉଣ୍ତିଙ୍ଗ୍ ନାନ୍ ଇୟା ଜଇଲ୍ତୁ ତେବାତାମାନା । ଇବେନୁ ମାନି ସାନ୍ଦି ନି ବାଦ୍ଲୁ ୱାନିଙ୍ଗ୍ ନା ସେବା ପାଣିଦୁ ଲାଗେକିଦେଙ୍ଗ୍ ନା ବଦା ମାର୍ହାତ୍ । ୧୪ ମାତର୍ ଇୟା ବିସୟ୍ତାନ୍ ନାଙ୍ଗିଁ ସାକା କିନି ଉଣ୍ତିଙ୍ଗ୍ ନିଙ୍ଗିଁ ଜାସାପେଲା କିଏ, ଆକା ନିଜେଦି ବଦାଦାନ୍ ନିନ୍ କିଦେଙ୍ଗ୍ ଆଟ୍ନି । ଆୟା ଆମାକାଆପିତ୍, ନି ରାଜି ଡ଼ିସ୍ସି ନାନ୍ ଇନିକା କିଦେଙ୍ଗ୍ ଅଡ଼୍ବିଏ ।
୧୫ ମାରିବା ୱିଜୁଦିନ୍ ନି ଲୋକ୍ ଆଜି ତେବାନାନ୍ ଇଜି ଅନିସିମସ ଏସୋ ଦିନ୍ ନିଙ୍ଗିଁ ଡ଼ିସ୍ତା ସର୍ହାମାର୍ହାନ୍ । ୧୬ ମାରି ୱାନ୍ ଇଲେଇ କେବଲ୍ ଅରେନ୍ କଟିସାକର୍ ଆଏନ୍ । କ୍ରିସ୍ତଦି ବିସ୍ବାସ୍ସି ୱାଜା ୱାନ୍ ଇଲେଇ ମା ଅରେନ୍ ଲାଡ୍ତି ତଡ଼ାନ୍ । ନା କାଣ୍ଗାଦୁ ଇଲେଇ ୱାନ୍ ଏସ ସାହାଜ୍ୟକିନିକାନ୍ ! ମି ଅରେନ୍ ଦାସ୍ ମାରି କ୍ରିସ୍ତଦି ବିସ୍ବାସ୍ସି ତଡ଼ାନ୍ ୱାଜା ୱାନ୍ ମି ଉଣ୍ତିଙ୍ଗ୍ ମାରି ଏସ ସାହାଜ୍ୟକିନିକାନ୍ ଆଏନ୍ !
୧୭ ଆଦେଙ୍ଗ୍ ନାଙ୍ଗିଁ ଜଦି ନି ୱାଲେ ଅର୍ସେମାନିକାନ୍ ଇଜି ଅଡ଼୍ବିଜିମାନି, ନାଙ୍ଗିଁ ଏଣ୍ତେସ୍ କୁକ୍ତିମାନ୍ଦି, ୱାନିଙ୍ଗ୍ ବା ଆୟାୱାଜା ମାନାଆ ! ୧୮ ୱାନ୍ ଜଦି ନି ଇନି ଅନ୍ୟାୟ୍ କିନାମାନାନ୍, ମାରି ନିଙ୍ଗିଁ ୱାନିନ୍ଦି ଇନିକା ସିନିକାମାନାତ୍, ଆକା ନା ଇସାବ୍ତୁ ରାସ୍ସୋ ସିଦା । ୧୯ ଇକା ସୁଡ଼୍ଦୁ, ନାନ୍ ନିଜେଦି କିୟୁଦାନ୍ ରାସ୍ସି ସିଜିନା, “ନାନ୍, ପାଉଲ, ସତ୍ ଆକା ଡ଼େସିସିନା ।” ପୁରା ମିଙ୍ଗିଁ ନାନ୍ ଏତ୍ କିବିସ୍କିନି ସିନି ଦର୍କାର୍ସିଲେ ଜେ, ମି ଜିବନ୍ତି ଉଣ୍ତିଙ୍ଗ୍ ବା ନିନ୍ ନାମାନୁ ରୁଣୁଆତିମାନି । ୨୦ ଆଦେଙ୍ଗ୍ ତଡ଼ାନ୍, ନା ୱାଜା ଅରେନ୍ କ୍ରିସ୍ତ ବିସ୍ବାସ୍ତି ତଡ଼ାନ୍ତିଙ୍ଗ୍ ପ୍ରବୁଦି ଉଣ୍ତିଙ୍ଗ୍ ଦୟା କିଆ, ଇୟାମାଣାନ୍ ନାନ୍ ନାଣ୍ତ୍ ୱେଡ଼ିକା ଆନା ।
୨୧ ନିନୁ ନା ମାଟା ଇଡ୍ନି ଇଜି ସତ୍ତାନ୍ ନେସ୍ସି, ନାନ୍ ନିଙ୍ଗିଁ ଇୟା ଆକୁ ରାସ୍ସିନା । ସତ୍ତାନ୍ ନାନ୍ ନେସ୍ନା, ନି ମାଣ୍କୁ ନାନ୍ ଏସ ଆସା କିଜିନା, ନିନ୍ ନା ଉଣ୍ତିଙ୍ଗ୍ ତାନି ମାଣୁକୁ ନାଣ୍ତ୍ କିନି । ୨୨ ଇୟାତାନି ୱାଲେ ନା ମାରି ଉନ୍ଡ୍ରି ଅନୁରଦ୍, ଆବେନୁ ନା ଉଣ୍ତିଙ୍ଗ୍ ଉନ୍ଡ୍ରି ବାକାର୍ ତିଆର୍ କିଜ ଇଡ୍ଦୁ । ନା ଆସା, ମି ପାର୍ତାନା କିନିମାଣୁକୁ ନାନୁ ମି ଲାକ୍ତୁ ମାରିଡ଼େସି ୱାନା ।
ସାରାସାରିଦି ନେଗିମାଟା
୨୩ ✡କଲସିୟ ୧:୭; ୪:୧୨.ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍ ନା ୱାଲେ ଜଇଲ୍ତୁ ତେବାତିମାନି ଏପାଫ୍ରା ମାରି ନା ୱାଲେଅରେସ୍ପାଣିକିନିକାନ୍, ୨୪ ✡ପ୍ରେରିତ ୧୨:୧୨,୨୫; ୧୩:୧୩; ୧୫:୩୭-୩୯; କଲସିୟ ୪:୧୦ପ୍ରେରିତ ୧୯:୨୯; ୨୭:୨; କଲସିୟ ୪:୧୦କଲସିୟ ୪:୧୪; ୨ ତିମତି ୪:୧୦; କଲସିୟ ୪:୧୪; ୨ ତିମତି ୪:୧୧.ମାରି ମାର୍କ, ଆରିସ୍ଟାର୍କସ୍, ଦିମା ମାରି ଲୁକ ମାଡ଼ିସ୍ କିଜିନାର୍,
୨୫ ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍ ଦୟା ମି ୱିଜେରି ଲାକ୍ତୁ ମାନିତ୍ ।