୨
ସତ୍ତି ଦାର୍ମୁପାଣି
୧ ମାତର୍ ମିର୍ ନେଗି ସିକିୟାଦି ନେଗି ମାଟା ୱେର୍ତୁ । ୨ ପେରିପେରିୱାରିଙ୍ଗ୍ ମାନାଦେଙ୍ଗ୍, ବିସାର୍କିନି ମାରି ନିଜେଦିଙ୍ଗ୍ ଡାଟ୍ଇଡ୍ଦେଙ୍ଗ୍ ଅନୁରଦ୍ କିଦୁ; ୱାର୍ ଟିକ୍ ବିସ୍ବାସ୍, ଜିବନ୍ନୋନିକା ନି ସାସ୍ତାନ୍ ପୁରାବର୍ତି ଆପିର୍ । ୩ ବୟ୍ସତି ଆଇମେକାଙ୍ଗ୍ଁ ପବିତ୍ର ଜିନି ମାଡ଼ିଦେଙ୍ଗ୍ ସିକିୟା ସିଦୁ । ୱାକୁ ଆଇ ଲୋକା ସୁରିମାଟା ୱାର୍ଗିମାକିୱି, କାଡ଼ୁ ଉଣିମାନୁ ଦାସ୍ ଆମାକିୱି । ୪ ମାପୁରୁଦି ବାକ୍ୟ ଏଣ୍ତେସ୍ ନିଦା ଆଏତ୍, ଇୟାଉଣ୍ତିଙ୍ଗ୍ ୱାର୍ ଆଇଲିକାଙ୍ଗ୍ ନିଜେଦି କନ୍ଲିରିଙ୍ଗ୍ ମାରି କଡ଼ରିଙ୍ଗ୍ ଜିବନ୍ନୋନି ଉଣ୍ତିଙ୍ଗ୍ ସିକିୟା ସିଦୁ, ୫ ଆର୍ତିଙ୍ଗ୍, ୱାକୁ ପବିତ୍ରତା, ନେଗି ଇଲ୍ତି ଆଇମା, ଦାର୍ମୁ, ମାରି ନିଜେଦି କନ୍ଲିଙ୍ଗ୍ ମାନାପିଉ, ମାଙ୍ଗିଁ ସିଆୟ୍ ଆତିମାନି ମାପୁରୁଦି କାବୁର୍ ବିରୁଦ୍ତାନ୍ ଏନ୍ ଇନି ନିଦା କିଦେଙ୍ଗ୍ ଆଟ୍ଏର୍ ।
୬ ଆୟାୱାଜା ମୁରୁଲିଆଙ୍ଗ୍ ୱିଜୁ ବିସୟ୍ତାନ୍ ନିଜେଦିଙ୍ଗ୍ ଡାଟ୍ଇଡ୍ଦେଙ୍ଗ୍ ଅଜା କିଦୁ । ୭ ୱିଜୁ ବିସୟ୍ତାନ୍ ସତ୍ପାଣି ପୁରା କିଜି ମିର୍ ନିଜେଦି ଜିବନ୍ତୁ ନେଗିକା ତର୍ତୁ । ନେଗିମୋନ୍ତାନ୍ ମାରି ବୁଦିଦାନ୍ ନେଗି ବାସାଦାନ୍ ସିକିୟା ସିଦୁ । ୮ ଆର୍ତିଙ୍ଗ୍, ଏନ୍ ମିଙ୍ଗିଁ ସୁରି ୱାର୍ଗିଦେଙ୍ଗ୍ ଆଟ୍ଏନ୍ ମାରି ଏଣ୍ତେସ୍ ମି ସାତ୍ରୁରୁ ମା ବିରୁଦ୍ତାନ୍ ଇନି ତାଗ୍ଇ ମାଟା ଇନ୍ଡ୍ରେଙ୍ଗ୍ ଆଟ୍ଏଜି ସେମାର୍ ଆନାର୍ ।
୯ ଦାସ୍କୁ ମାଲିକ୍କାଙ୍ଗ୍ ମାନାଜି ୱିଜୁ ବିସୟ୍ତୁ ୱାରିଙ୍ଗ୍ ସିକିୟା ସିପିର୍; ମାଲିକ୍କା ମାଟାଦିଙ୍ଗ୍ ଡ଼େସି ୱେର୍ମାକିର୍ । ୧୦ ୱାର୍ ଡଙ୍ଗାଁ କିଏଣ୍ଗା, ୱିଜୁଦିନ୍ ନିଜେଦି ସାଦୁ ମାରି ବିସ୍ବାସ୍ତି ପରିଚୟ ସିପିର୍ । ଆର୍ତିଙ୍ଗ୍, ୱାରି ୱିଜୁ ପାଣିକିତି ୱେନ୍କା ମାଙ୍ଗିଁ ରକିୟାକର୍ତ୍ତା ମାପୁରୁଦି ବିସୟ୍ତାନ୍ ମା ଦାର୍ମୁ ସିକିୟାଦିଙ୍ଗ୍ ଗୌରବ୍ କିନାର୍ ।
୧୧ ଇରିଙ୍ଗ୍ ୱିଜୁ ଲୋକାଙ୍ଗ୍ ରକିୟା ଉଣ୍ତିଙ୍ଗ୍ ମାପୁରୁଦି ଦୟା ୱେଙ୍ଗିଁତା ମାନାତ୍ । ୧୨ ମାରି, ୱାନି ଆୟା ଦୟା ଉଣ୍ତିଙ୍ଗ୍ ଦାର୍ମୁସିଲିକା ମାରି ଦୁନିଆ ଆସାଦିଙ୍ଗ୍ ଡ଼ିସ୍ସି, ଇୟା ଜୁଗ୍ତୁ ନେଗିବୁଦି, ଦାର୍ମୁ ମାରି ଦାର୍ମୁ ୱାଜା ଜିନାଟ୍, ୧୩ ମାରି ଆୟା ୱେଡ଼ିକାଦି ଆସା ମାରି ମା ପେରି ମାପୁରୁ ନି ରକିୟାକିତିକାନ୍ ଜିସୁ କ୍ରିସ୍ତଦି ଗୌରବ୍ ୱେଙ୍ଗିଁଦେଙ୍ଗ୍ ସୋଲ୍ସିନାତ୍, ଆୟା ଦିନ୍ତିଙ୍ଗ୍ କାପ୍କିଜି ମାପ୍ ତେବାତାମାନାପ୍ । ୧୪ ✡୧ ପିତର ୨:୯.ଆୟା କ୍ରିସ୍ତ ଜିସୁ ମାଙ୍ଗିଁ ୱିଜୁ ତାଗ୍ଇ ପାଣିଦାନ୍ ଡ଼ିସିସ୍ କିଦେଙ୍ଗ୍ ମାରି ନିଜେଦି ଉଣ୍ତିଙ୍ଗ୍ ସତ୍ପାଣିଦୁ ୱେଡ଼ିକାଆଜି ନିଜେଦି ଲୋକା ୱାଜା ପୁରା ନେଗେନ୍ କିଦେଙ୍ଗ୍ ମା ଉଣ୍ତିଙ୍ଗ୍ ନିଜେଦିଙ୍ଗ୍ ସିଆୟ୍ଆତାନ୍ ।
୧୫ ଇୟାୱିଜୁ ବିସୟ୍ ଅଜା କିଦୁ ମାରି ମି ପୁରା ଡାଟ୍ତାନ୍ ଲୋକାଙ୍ଗ୍ ୱେଡ଼ିକା କିଦୁ । ୱାରିଙ୍ଗ୍ ୱେର୍ସି ଜାଗ୍ରାତା କିଦୁ, ମିଙ୍ଗିଁ ଏନ୍ କାଡ଼୍ମାକିନ୍ ।