ଥେସଲନୀୟ ବିଶ୍ୱାସୀମାନଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
ଥେସଲନିୟ ବିଶ୍ୱାସୀଡ଼୍ ଗାର୍ରେ ପାଉଲ୍ତେ ପ୍ରତମ୍ ଚିଟି
୧ ଥେସଲନିୟ୍ ବିଷୟ୍ତେ ଅଣ୍ଡୟ୍ ପଦ୍
ପ୍ରତମ୍ ଥେସଲନିୟ ପ୍ରେରିତ୍ ପାଉଲ୍ତଡ଼୍ ଲେକ୍ତାଦ୍ ଆସ୍ମାତ୍ତେ ୧–୧ । ଇଦ୍ ଆସ୍ମାନ୍ତେ ପାଉଲ୍ତଡ଼୍ ମୁନେତ୍ ଚିଟି ଲେକ୍ତାଦ୍ ଆସ୍ମାତ୍ତେ ନୁ ଆଦ୍ ବାଇବଲ୍ତାଗ୍ ୱେରଡ଼୍ ଗଟ୍ ଆତ୍ତେ । ଇଦ୍ ଜିସୁ କ୍ରିଷ୍ଟନ୍ ଜନମ୍ତେ ଗାର୍ରେ ୫୧ ଏଣ୍ଡ୍କ୍ ପେର୍କେ ଲେକ୍ତାଦ୍ ଆସ୍ମିନ୍ଦେ । ପାଉଲ୍ ବେସୁଟ୍ ଥେସଲନିକିୟ ମଣ୍ଡଲିତିଙ୍କ୍ ଚିଟି ଲେକ୍ତଣ୍ଡ୍, ଆସୁଟେ ଅଣ୍ଡ୍ କରନ୍ତି ମଣ୍ଡଲିତାଗ୍ ମାତ୍ତଣ୍ଡ୍ । ବେନ୍ ମଣ୍ଡଲିକି ଅଣ୍ଡ୍ ଦ୍ୱିତିୟ ମିଶ୍ନାରି ଆଦ୍ଦାନ୍ ୱେଲେ ଆଦ୍ ମଣ୍ଡଲି ନିଲ୍ସ୍ପି ମାତ୍ତଣ୍ଡ୍ ପ୍ରେରିତ ୧୭:୧-୧୦ । ଇଦ୍ ପ୍ରେରିତ୍ ବଇତାଗ୍ କେତିତଡ଼୍ ଯେ, ଇଦ୍ ବେସ୍କ୍ତୁଡ଼୍ ଯିହୁଦୀ ନୁ ନାର୍ଗେ ଗ୍ରୀକ୍ ଗଟ୍ତେ କେସମାନ୍ଦାନ୍ ନାରୁଡ଼୍ତଡ଼୍ ତିୟାର୍ ଆସ୍ମାତ୍ତେ ।
ପାଉଲ୍ ମଣ୍ଡଲି ନିଲ୍ସ୍ପ୍ତେ ପେର୍କେ ଅଣ୍ଡ୍ ନାର୍ଗେ ଦିନା ଥେସଲନିୟତାଗ୍ ମାନ୍ଦାନଙ୍କ୍ ପାର୍ୱଣ୍ଡ୍ । ଆଦିଙ୍କ୍ ମାଡ଼େଙ୍ଗ୍ ଆଗେ ମାନ୍ଦାନ୍ ବିଶ୍ୱାସୀଡ଼୍କିଙ୍କ୍ ସାହାସ୍ ଇଦାନଙ୍କ୍ ଅଣ୍ଡ୍ ଇଦ୍ ଚିଟି ରଅତଣ୍ଡ୍ । ୱେରଣ୍ଡ୍ କ୍ରିଷ୍ଟିୟାନ୍ ବେଲା ବାଦ୍କାନଙ୍କ୍ ଆଦ୍ତେ, ଇଦ୍ ଚିଟିତାଗ୍ ନାର୍ଗେ ବିଷୟ୍ ନୁ ବାତ୍ବାତ୍ ସାଦାରନ୍ ନିର୍ଦେଶନା ମିନ୍ଦେ । ପାଉଲ୍ ବେସ୍କିନାଗ୍ ଦ୍ୱିତୀୟଦାମ୍ ୱାଦାନ୍ ବିଷୟ୍ତେ ମନ୍ ଇତ୍ତନ୍ । ଆଦ୍ପାର୍ଦ୍ତେ ଥେସଲନିୟ ମଣ୍ଡଲିତେ ବିଶ୍ୱାସୀଡ଼୍ ସ୍ୱତନ୍ତ୍ର ଲେକାମ୍ ଇଦ୍ ବିଷୟ୍ତେ ତିଆର୍ତେ ମାତ୍ତଡ଼୍ । ପାଉଲ୍ ଦ୍ୱିତୀୟଦାମ୍ ୱାଦାନ୍ ବିଷୟ୍ତେ କେସ୍ ବେଲା ଇଶ୍ୱର୍ତିଙ୍କ୍ ସାର୍ଦେ ମାଡ଼ାନ୍ ଲେକାମ୍ ବାଦ୍କାନ୍ ସେଙ୍ଗେ ୱାଦାନ୍ ଇଦ୍ତଣ୍ଡ୍ । ୫:୬-୮
ବଇତ୍ ଲୋପେ ମାନ୍ଦାନ୍ ବିଷୟ୍
୧. ପାଉଲ୍ ମଣ୍ଡଲିତିଙ୍କ୍ ନମସ୍କାର୍ ମାଡ଼ି ନୁ ଇଶ୍ୱର୍ତିଙ୍କ୍ ଦନ୍ୟବାଦ୍ ଇସ୍ ଇଦ୍ ଚିଟି ଆରାମ୍ ମାଡ଼୍ତଣ୍ଡ୍ । ୧:୧-୧୦
୨. ପେର୍କେ ଅଣ୍ଡ୍ ତିମତି ତାସ୍ମାନ୍ଦାନ୍ କାବୁର୍ ନୁ ଅନ୍ ପାଡ଼୍ୟି ବିଷୟ୍ତେ ବୁଜାମାଡ଼୍ତଣ୍ଡ୍ । ୨; ୩
୩. ପାଉଲ୍ ନିର୍ଦେସନା ଇଦ୍ତଣ୍ଡ୍ ଯେ, କ୍ରିଷ୍ଟିୟାନ୍ ନାରୁଡ଼୍ ଜିସୁ କ୍ରିଷ୍ଟନ୍ ଦ୍ୱିତୀୟଦାମ୍ ୱାଦାନ୍ ୱେସ୍ତଡ଼୍ ବେଲା ବାଦ୍କାନଡ଼ାଦ୍ ସାୟେ । ୪:୧–୫:୧୫
୪. ପାଉଲ୍ ମେଣ୍ଡଅନ୍ଦାମ୍ ମଣ୍ଡଲିତିଙ୍କ୍ ନମସ୍କାର୍ ମାଡ଼ୁତଣ୍ଡ୍ ନୁ ଅଡ଼୍କିଂଙ୍କ୍ ନିଜାମ୍ ଲେକେ ଚିଟି କାର୍ତାନଙ୍କ୍ କେସ୍ ତେର୍ସ୍ପିତଣ୍ଡ୍ । ୫:୧୬-୨୮
୧
୧ ✡ପ୍ରେରିତ ୧୭:୧.ନାନ୍ ପାଉଲ୍, ସିଲାନ୍ ନୁ ତୀମତିନ୍ ପାକେ ଥେସଲନିକୀ ତାଗ୍ ମାନ୍ଦାନ୍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ବିଶ୍ୱାସୀ ମଣ୍ଡଲିତା ଇଦ୍ ଚିଟି । ବାବାଲ୍ ଇଶ୍ୱର୍ ନୁ ପ୍ରବୁ କ୍ରିଷ୍ଟନ୍ ସୁକାମ୍ତେ ନୁ ସାୟେ ମିଇ ପର୍ର ଆୟି ।
ଥେସଲନିୟଡ଼୍ ବିଶ୍ୱାସ୍ ସେଙ୍ଗେ ଦନ୍ୟବାଦ୍
୨ ମାମ୍ମେ ସାରେଦିନା ମିଇ ସାରେତଡ଼୍ ସେଙ୍ଗେ ଇଶ୍ୱର୍ତିଙ୍ଗ୍ ଦନ୍ୟବାଦ୍ ଇସମାନ୍ତମ୍ ନୁ ମାମ୍ମେ ପ୍ରାର୍ତନାତାଗ୍ ମିଇ ବିଷୟ୍ତେ ସାରେଦାମ୍ କେସମାନ୍ତମ୍ । ୩ ମାମ୍ମେ ବାବାନ୍ ଇଶ୍ୱର୍ତେ ପାକେ ଏର୍କା ମାଡ଼ମାନ୍ତମ୍, ବେଲାନ୍ ମିଡ଼୍ ନିଜେତ୍ ବିଶ୍ୱାସ୍ତିଙ୍କ୍ ପାଡ଼ିୟିଦାଗ୍ ମାଡ଼ୁତମ୍, ପ୍ରେମତେ ମାଡ଼ି ବେଲାନ୍ ତିପାଲ୍ତେ ମାଡ଼ୁତିଡ଼୍ ନୁ ମାମ୍ମେ ବେଲାନ୍ ଡ଼ାଟ୍ଟୁମ୍ । ୪ ଦାଦାନଡ଼ି ନୁ ଏଲାସ୍କ୍ ! ମାମ୍ମେ ପୁତ୍ତମ୍ ଯେ, ଇଶ୍ୱର୍ ମିକିଂଙ୍କ୍ ପ୍ରେମ ମାଡ଼ୁତ୍ ନୁ ତାନ୍ ନାରୁନ୍ ଆଦାନ୍ ସେଙ୍ଗେ ମିକିଂଙ୍କ୍ ହେଞ୍ଜିମିନ୍ଦେନ୍ । ୫ ମାତର୍ ବାକ୍ୟତେ ଆୟ୍ୟ, ପବିତ୍ରଆତ୍ମା ଲାୱୁ ତଡ଼୍, ସୁସମାଚାର୍ତେ ସତ୍ୟତେ ଲେକେତ୍ ମାଡ଼ି ମାମ୍ମେ ଆଦ୍ ମିଇ ପାକେ କେତୁତମ୍ । ମିଡ଼୍ ପୁତ୍ତିଡ଼୍, ମିଇ ତଡ଼୍ ମାନ୍ଦାନ୍ ୱେଲେ ମାମ୍ମେ ବେଦ୍ଲେକାମ୍ ଲେକେତ୍ ଜିୱୁନ୍ତେ ମାଡ଼୍ତମ୍; ବେଦ୍ଲେକାମ୍ ମିୟାଦ୍ ସାୟେ ମା ଜିୱୁନ୍ତେ ଆଶେ ମାତ୍ତେ । ୬ ✡ପ୍ରେରିତ ୧୭:୫-୯.ମିଡ଼୍ ମାକିଂଙ୍କ୍ ନୁ ମାମ୍ମେ ପ୍ରବୁଙ୍କ୍ ପେର୍କେ ଆଦ୍ତିଡ଼୍ ନୁ ଗାଟି ତିପାଲ୍ ଆଦାନ୍ ଗାଲେ ପବିତ୍ରଆତ୍ମା ତାଗାଙ୍କ୍ ଲେକେତ୍ ୱେଡ଼୍କେତେ ଆଦ୍ ସୁସମାଚାର୍ କେତାନାଦ୍ କେଞ୍ଜ୍ତିଡ଼୍ । ୭ ଇଦ୍ଲେକାମ୍ ମିଡ଼୍ ମାସିଦୋନିଆ ନୁ ଆକାୟା ତାଗ୍ ମାନ୍ଦେନଡ଼୍ ସାରେ ବିଶ୍ୱାସିଡ଼୍ ସେଙ୍ଗେ ଲେକେତ୍ତୋଡ଼ି ଆସ୍ମାତିଡ଼୍ । ୮ ମିୟାଗାଙ୍କ୍ ଯେ ମାତର୍ ପ୍ରବୁନ୍ କେତ୍ତେ ଗଟ୍ ମାସିଦୋନିଆ ନୁ ଆକାୟାତେ ସାରେପାକେ ଆସ୍ମାତ୍ତେ, ଆଦ୍ ଆୟ୍ୟ, ମାତର୍ ଇଶ୍ୱର୍ତେ ସେଙ୍ଗେ ମିୟାଦ୍ ବିଶ୍ୱାସ୍ତେ ବିଷୟ ସାରେପାକେ ଇଦ୍ଲେକାମ୍ ଆସ୍ମିନ୍ଦେ, ତାନ୍ ମୁନେ ବାତ୍ କେତାନାଦ୍ ଇଲ୍ଲେ । ୯ ମାମ୍ମେ ମିଇ ପାକେ ୱାଦାନ୍ ୱେଲେ ମିଡ଼୍ ବେଲାନ୍ ମାକିଂଙ୍କ୍ ସାର୍ଦେତେ ଆସ୍ ମାତ୍ତିଡ଼୍ ନୁ ସାରେ ପୁତ୍ଲାମ୍ ପୁଜେ ୱିଡ଼୍ସି ସତ୍ ନୁ ଜିୱେମାନ୍ଦାନ୍ ଇଶ୍ୱର୍ତେ ଉପବାସ୍ ମାଡ଼ାଙ୍କ୍ ମୁନେ ୱାତ୍ତିଡ଼୍; ୧୦ ମେଣ୍ଡେ ବେଲାନ୍ ଇଶ୍ୱର୍ତେ କପାମ୍ତାଗାଙ୍କ୍ ମାନ୍ନାଅଙ୍କ୍ ଗେଲ୍ସ୍ପା ସେଙ୍ଗେ, ଡଲ୍ତାଗାଙ୍କ୍ ପୁନରୁତ୍ତାନ୍ ଅନାଦ୍ ମାର୍ ଜିସୁ ସ୍ୱର୍ଗତାଗାଙ୍କ୍ ୱାଦାନ୍ ୱେଲେ କେପି ମାନୁଟ୍, ଇୱୁସାରେ ବିଷୟ୍ତେ ଆଗେତ୍ ନାରୁଡ଼୍ ଗଟି ତିର୍ୟମିନ୍ଦେଡ଼୍ ।