ତିମତିଙ୍କ୍ ନିକଟକୁ ପାଉଲଙ୍କ ପ୍ରଥମ ପତ୍ର
ତୀମତିନ୍ ଗାର୍ରେ ପାଉଲ୍ତେ ପ୍ରତମ୍ ଚିଟି
ତୀମତି ବଇ ବିଷୟ୍ତେ ଅଣ୍ଡୟ୍ ପଦ୍
୧ ତୀମତି ବଇ ଅଣ୍ଡୟ୍ ଚିଟି, ପ୍ରେରିତ୍ ପାଉଲ୍ତାଗାଙ୍କ୍ ତାନ୍ ଶିଷ୍ୟ ତୀମତିତିଙ୍କ୍ ଲେକ୍ତଣ୍ଡ୍ । ୧ ତୀମତି ସମ୍ବାବନା ପାକାପାକି ୬୨-୬୪ କ୍ରିଷ୍ଟାଦ୍ଦତେ ଜିସୁ କ୍ରିଷ୍ଟନ୍ ଜନମ୍ ପେର୍କେ ଲେକା ଆତ୍ତେ । ଇଦ୍ ଆଦ୍ପାର୍ତେ ଇଦ୍ ପାଉଲ୍ତେ ଜିୱୁଣ୍ଡ୍ ମାଡ଼େଙ୍ଗ୍ ସମୟ୍ । ପାଉଲ୍ ତଡ଼୍ ତୀମତିନ୍ ଗାଟି ସମ୍ପର୍କ ମାତ୍ତେ, ଅଣ୍ଡ୍ ନାର୍ଗେ ସମୟତେ ତୀମତିନ୍ ମାର୍ ଇଞ୍ଜ କେତିତଣ୍ଡ୍ ଫିଲିପିୟ ୨:୨୨; ୧ ତୀମତି ୧:୨; ୧:୧୮ । ଇଦ୍ ପ୍ରେରିତ୍ ପାଉଲ୍ ତଡ଼୍ ଲେକା ଆତ୍ତେ ନାଲୁ ବ୍ୟକ୍ତିଗତ ଚିଟିନ୍ ଲୋପେଙ୍କ୍ ଇଦ୍ ଅଣ୍ଡୟ୍ ବେଗେ କି ମଣ୍ଡଲି ବାଦୁଲ୍ତେ ଅର୍ତୁଣ୍ଡ୍ ନାରୁନ୍ ପରିଚୟ୍ ଇଦ୍ତଣ୍ଡ୍ । ମେଣ୍ଡେ ମୁଣ୍ଡ୍ ବଇକି ଆଦୁତେ ୨ ତୀମତି, ତୀତସ୍ ନୁ ଫିଲିମନ୍ । ୧ ତୀମତିତାଗ୍ ମଣ୍ଡଲିତେ ନାର୍ଗେ ଉପାସନ୍ ଦାରା ବିଷୟ୍ତେ ମିନ୍ଦେ ୨:୧-୫ ।
ଇଗେ ମଣ୍ଡଲିତେ ନେତାଲଡ଼ାଦ୍ ଯୋଗ୍ୟତା ବିଷୟ୍ତେ ଉଡ଼ିତମ୍ ୩:୧-୧୩ ମେଣ୍ଡେ ମିଚ୍ ଗୁରୁଡ଼୍ ବିରୁଦ୍ତେ ସତର୍କ ମିନ୍ଦେ ୧:୩-୧୧; ୪:୧-୫; ୬:୨-୫ । ମଣ୍ଡଲି ଲୋପେଙ୍କ୍ ତୀମତି ବେଦ୍ରକମ୍ ଅଣ୍ଡୟ୍ ନେତାଲ୍ ଆଦାନ୍ ଦର୍କାର୍ ଆଦ୍ ପାଉଲ୍ ତାଲିମ୍ ଇଦାନ୍ ବିଷୟ୍ତେ କେତ୍ତଣ୍ଡ୍ । ୧ ତୀମତିତାଗ୍ ଇଞ୍ଜେତ୍ ନାଟେନ୍ ମଣ୍ଡଲିତେ ପାଡ଼୍ୟି ପରିଚାଲନା ସେଙ୍ଗେ ମଣ୍ଡଲିତେ ନେତାଲଡ଼୍କ୍ ନାର୍ଗେ ମୁଲ ବିଷୟ୍ ଇଦ୍ତେ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ପାଉଲ୍ ତୀମତିଙ୍କ୍ ନମସ୍କାର୍ କେସ୍ ଲେକା ଆରାମ୍ ମାଡ଼ିତଣ୍ଡ୍ । ୧:୧-୨
୨. ପାଉଲ୍ ତୀମତିଙ୍କ୍ ମିଚ୍ ଗୁରୁଡ଼୍ ବିରୁଦ୍ତେ ସତର୍କ କେତିତଣ୍ଡ୍ । ୧:୩-୧୧
୩. କ୍ରିଷ୍ଟନାଗ୍ ପାଉଲ୍ତେ କୃତଜ୍ଞତା । ୧:୧୨-୧୯
୪. ପାଉଲ୍ ମଣ୍ଡଲିତେ ସେବା ପାଡ଼୍ୟି ନୁ ନେତାଲଡ଼୍ ବିଷୟ୍ତେ ତୀମତିଙ୍କ୍ ନିର୍ଦ୍ଦେଶ୍ ଇଦ୍ତଣ୍ଡ୍ । ୨–୩
୫. ତୀମତିଙ୍କ୍ ପାଉଲ୍ତେ ମାଡ଼େଙ୍କ୍ତାଦ୍ ନିର୍ଦ୍ଦେଶନା । ୪–୬
୧
୧ ନାନ୍ ପାଉଲ୍, ମାନ୍ ମୁକ୍ତିଦାତାଲ୍ ନିଜେ ଇଶ୍ୱର ନୁ ମାନାଙ୍କ୍ ଆଶେତେ କ୍ରିଷ୍ଟ ଜିସୁନ୍ ଗଟ୍ ଲେକାମ୍ ଏଞ୍ଚ୍ତଣ୍ଡ୍ ପ୍ରେରିତ ପାଉଲ୍ ।
୨ ✡ପ୍ରେରିତ ୧୬:୧.ଅନ୍ ଦର୍ମମାର୍ ତୀମତିନ୍ ଗାରେ ଲେକିମାନ୍ଦାନ୍ ଚିଟି, ବାବାଲ୍ ଇଶ୍ୱର୍ ନୁ ମାନ୍ ପ୍ରବୁ କ୍ରିଷ୍ଟ ଜିସୁ ମିକିଂଙ୍କ୍ ଅନୁଗ୍ରହ, କୃପା ନୁ ଶାନ୍ତି ଇଦ୍ତଣ୍ଡ୍ ।
ବୁଚା ଶିକ୍ଷା ମାଇଦିଙ୍କ୍ ସତର୍କବାଣୀ
୩ ନାନ୍ ମାସିଦୋନିଆତା ଆଦାନ୍ୱେୟ୍ ମିକିଙ୍କ୍ କେସ୍ମାନ୍ଦାନ୍ ଲେକାମ୍ ମିଡ଼୍ ଏଫିସିତାଗ୍ ମାନୁଟ୍ । ଆଗେ ବେସ୍କ୍ତୁଡ଼୍ ବୁଲ୍ ଶିକ୍ଷାସାରେ ଇଦୁତଡ଼୍, ଅଡ଼୍କିଂଙ୍କ୍ ଆଗାଙ୍କ୍ ବନ୍ଦ୍ ମାଡ଼ାନଙ୍କ୍ ଆଦେଶ୍ ଇମୁଟ୍ । ୪ ଅଡ଼୍ ଲେକେତ୍ ୱେଷଡ଼୍ ନୁ ଆନିଦାଦିଡ଼ାଦ୍ ବଂଶତଡ଼୍କିଙ୍କ୍ ତିଆର୍ ମାଡ଼ାଙ୍କ୍ ଆତ୍ତଡ଼୍ । ଆୱ୍ସାରେ ୱିଡ଼୍ସାଙ୍କ୍ ଅଡ଼୍କିଂଙ୍କ୍ ଶିକ୍ଷାହିମୁଟ୍, ବାତେଙ୍କ୍ଇତ୍କେ ଆଦ୍ ମାତର୍ ଆଙ୍ଗ୍ଡ଼ାମ୍ ଗଲକ୍ ସୃଷ୍ଟି ମାଡ଼ିତ୍ । ବେନ୍ ସରଳ ବିଶ୍ୱାସ୍ତେ ଇଶ୍ୱର୍ତେ ଇଚ୍ଛା ପୁନ୍ଦାଙ୍କ୍ ଆଦ୍ତେ, ଇୱ୍ସାରେ ତାଙ୍କ୍କିଙ୍କ୍ ବାଦା ଇଦ୍ତା । ୫ ସାୟେତ୍ ହୃଦୟ୍, ନିର୍ମଲ ବିବେକ୍ ନୁ ପ୍ରକୃତ ବିଶ୍ୱାସ୍ତେ ବେନ୍ ପ୍ରେମ ଡାଟୁମ୍ ଆଦ୍ତେ, ଆଦିଙ୍କ୍ ଜାଗ୍ରତ୍ ମାଡ଼ାନ୍ ମାଇଦିଙ୍କ୍ ନେଣ୍ଡ୍ ନାନ୍ ଇଦ୍ ଆଦେଶ୍ ଇଦୁତାନ୍ । ୬ ବେସ୍କ୍ତୁଡ଼୍ ନାରୁଡ଼୍ ଇ ବେଡ଼ିୟି ବିଷୟ୍ତିଙ୍କ୍ ମାର୍ଙ୍ଗି ଆଙ୍ଗ୍ଡ଼ାମ୍ ଯୁକ୍ତିତର୍କତେ ଆର୍ବୁଲ୍କା ଆସ୍ମିନ୍ଦେଡ଼୍ । ୭ ଦର୍ମ ଗୁରୁ ଆସ୍ ଇଶ୍ୱର୍ତେ ବିଦି ବ୍ୟବସ୍ଥାତେ ବ୍ୟାକ୍ୟା ମାଡ଼ାଙ୍କ୍ ଅଡ଼୍ ଇଚ୍ଛା ମାଡ଼ିତଡ଼୍, କିନ୍ତୁ ବେନ୍ ବିଷୟ୍ତେ ଦୃଡ଼ ଶିକ୍ଷା ଇଦ୍ତଡ଼୍ ଆଦ୍ ଅଡ଼୍ ନିଜେ ବୁଜେମ୍ ଆୟଡ଼୍, ବେନ୍ସାରେ ବିଷୟ୍ତେ ନିଜାମ୍ତେ ମତ ପ୍ରକାଶ୍ ମାଡ଼ିତଣ୍ଡ୍, ଆଦ୍ ପ୍ରକୃତତେ ବାତେ, ଅଡ଼୍ ପୁନ୍ନଡ଼୍ ।
୮ ମାମ୍ ପୁତ୍ମ୍ ଯେ, ବ୍ୟବସ୍ଥାତିଙ୍କ୍ ସାୟେ ବ୍ୟବହାର୍ ମାଡ଼୍କେ, ଆଦ୍ ସାୟ୍ । ୯ କିନ୍ତୁ ହେର୍କେ ନେହ୍ତ୍ ୱେୟ୍ତିତ୍, ଇ ବ୍ୟବସ୍ଥା ଦାର୍ମିକ ନାରୁଡ଼୍ତେ ମାଇଦିଙ୍କ୍ ଆୟ । ନିୟମ୍ତିଙ୍କ୍ ବାଙ୍ଗାମାଡ଼ାନ୍ ନାରୁଡ଼୍ ଆଦାର୍ମିକିଡ଼୍ତେ ମାଇଦିଙ୍କ୍ ଆଦ୍ ତିଆର୍ ଆସ୍ମିନ୍ଦେ । ବେନଡ଼୍ ସ୍ୱେଚ୍ଛାଚାରୀ, ବେନଡ଼୍ ଇଶ୍ୱର୍ତିଙ୍କ୍ ୱେର୍ୱଡ଼୍, ବେନଡ଼୍ ପାପ୍ ଅପକର୍ମତେ ବେନଡ଼୍ ଦର୍ମବାବ ବା ଆଦ୍ୟାମିବଦ ଇଲେ, ବେନଡ଼୍ ୟାୟ୍ବାବାଙ୍କ୍ ଆୱ୍କାଙ୍କ୍ ହେର୍କେ ମାଡ଼ାନଡ଼୍; ନାରୁଙ୍କ୍ ଆୱ୍କାନଡ଼୍, ୧୦ ବେବିଚାରି, ଅସ୍ୱାବାବିକ କାମୁକତା, ନାରୁନ୍ ଡଙ୍ଗାନଡ଼୍ ନୁ ମିଚ୍ ସାକ୍ଷ୍ୟ ଇଦାନଡ଼୍, ବିଶ୍ୱାସ୍ ଇଲ୍ୱଡ଼୍ ନୁ ବେନଡ଼୍ ସତ୍ ଶିକ୍ଷାତେ ବିରୁଦ୍ ମାଡ଼ିତଡ଼୍ ଅଡ଼୍ ସେଙ୍ଗେ ବ୍ୟବସ୍ଥା ତିଆର୍ ଆତ୍ତେ । ୧୧ ଇଦ୍ ଉପଦେଶ୍ ଇଶ୍ୱର୍ତେ ଗୌରବ୍ ପ୍ରସଂଶା ସେଙ୍ଗେ ଆୟି । ଇଦ୍ ସାୟେତ୍ ଗଟ୍ ପ୍ରଚାର୍ ମାଡ଼ାନଙ୍କ୍ ଦାୟିତ୍ୱ ନାକିଙ୍କ୍ ଇତ୍ତଡ଼୍ ।
ଇଶ୍ୱର୍ତେ ଦୟା ସେଙ୍ଗେ ଦନ୍ୟବାଦ୍
୧୨ ନା ପର ବରସା ୱାଟି ଇଦ୍ ସେବା ପାଡ଼୍ୟି ନିଯୁକ୍ତି ମାଡ଼୍ତାଙ୍କ୍ ନାନ୍ ମାନ୍ ପ୍ରବୁ ଜିସୁଙ୍କ୍ ଦନ୍ୟବାଦ୍ ଇଦ୍ତାନ୍, ଅଣ୍ଡ୍ ନାକିଙ୍କ୍ ବିଶ୍ୱସ୍ତ ମନେ ମାଡ଼ି ସେବକ୍ ପଡ଼ିୟେତାଗ୍ ନିଯୁକ୍ତ ମାଡ଼ିମିନ୍ଦେଣ୍ଡ୍, ୧୩ ✡ପ୍ରେରିତ ୮:3; ୯:୪,୫.ମୁନେନ୍ ନାନ୍ ଜିସୁ କ୍ରିଷ୍ଟଙ୍କ୍ ନିନ୍ଦା ମାଡ଼ମାତ୍ତାନ୍, ଆଗେକ୍ବା ଅଣ୍ଡ୍ ନାକିଙ୍କ୍ ଯୋଗ୍ୟ ମନେ ମାଡ଼ି ନିଯୁକ୍ତ ମାଡ଼୍ତଣ୍ଡ୍ କିନ୍ତୁ ନାନ୍ ବାତ୍ ମାଡ଼ୁତାନ୍ ଇଞ୍ଜ ପୁନ୍ୱାଙ୍କ୍ ଇଶ୍ୱର୍ ନାକିଙ୍କ୍ ଦୟା ମାଡ଼୍ତଣ୍ଡ୍, ଅବିଶ୍ୱାସୀ ମାନ୍ଦାନ୍ ୱେଲେ ନାନ୍ ଆଲା ମାଡ଼ମାତ୍ତାନ୍ । ୧୪ ମା ପ୍ରବୁନ୍ ନାର୍ଗେ ଅନୁଗ୍ରହ ନୁ ଅନାଗ୍ ବିଶ୍ୱାସ୍ ମେଣ୍ଡେ ପ୍ରେମତେ ଆସ୍ମିନ୍ଦେନ୍ । ୧୫ ପାପିଡ଼୍କ୍ ଉଦାର୍ ମାଡ଼ାନ୍ ମାଇଦିଙ୍କ୍ କ୍ରିଷ୍ଟ ଜିସୁ ପୃତିବିତାଗ୍ ୱାସ୍ମାତ୍ତଣ୍ଡ୍, ହିଦ୍ ଅଣ୍ଡୟ୍ ନିଜାମ୍ ସତ୍ ସାରେତଡ଼୍ ହିଦିଙ୍କ୍ ପୁନ୍ଦାନ୍ ଦର୍କାର୍ । ଆ ପାପୀଡ଼ି ଲୋପେ ନାନ୍ ସାରେତଡ଼୍କିଙ୍କ୍ ଅନ୍ ବାଡ଼୍ୟଣ୍ଡ୍ । ୧୬ କିନ୍ତୁ ନା ଲେକାମ୍ ଅର୍ତୁଣ୍ଡ୍ ବେଡ଼୍ୟେ ପାପୀ ପ୍ରତି ଆନ୍ତେ ଇଶ୍ୱର୍ତେ କୃପା ନୁ କ୍ରିଷ୍ଟ ଜିସୁନ୍ ସହନଶିଳତା ନାକିଙ୍କ୍ ଅଣ୍ଡୟ୍ ୱେଷଡ଼୍ ମାଡ଼ି ନେହ୍ତଣ୍ଡ୍, ଆନ୍ୱେ ନାରୁଡ଼୍ ବେଲା ଜିସୁନାଗ୍ ବିଶ୍ୱାସ୍ ମାଡ଼ି ଅନନ୍ତ ଜିୱୁନ୍ ଲାବ୍ ମାଡ଼ିତଡ଼୍ । ୧୭ ସାରେ ବିଶ୍ୱ ଜଗତ୍ତେ ତନ୍ଦ୍ୱାଦ୍, ୱେରଣ୍ଡେ ଇଶ୍ୱର୍, ସାରେଦିନାତ୍ ରାଜାଲ୍, ଅଣ୍ଡୟ୍ମାତର୍ ଇଶ୍ୱର ଯୁଗ୍ଯୁଗ୍ ସମ୍ମାନିତ ନୁ ମହିମାନ୍ନିତ ଆଇଣ୍ଡ୍ । ଆମେନ୍ ।
୧୮ ନା ମାର୍ ତୀମତି, ନି ବିଷୟ୍ତେ ମୁନେକଙ୍କ୍ ପ୍ରକାଶ ପାହେମ୍ ଆତ୍ତେ ବାବବାଣି ଲେକାମ୍ ନାନ୍ ନିକିଙ୍କ୍ ହି ଆଜ୍ଞା ହିଦୁତାନ୍ । ଆ ବାବବାଣିତିଙ୍କ୍ ଅମଗ ଅସ୍ତ୍ର ଲେକାମ୍ ବ୍ୟବହାର ମାଡ଼ି ନିମେ ଜିୱୁନ୍ ସଂଗ୍ରାମ୍ତେ ଜିଡ଼ି ଲାବ୍ ମାଡ଼ା । ୧୯ ବିବେକ୍ତିଙ୍କ୍ ସାୟେ ନେହ୍ସ୍, ନି ଦର୍ମ ବିଶ୍ୱାସତେ ଡ଼ୁଟାଙ୍କ୍ ମାନ୍ । ବେନ୍ ବେନ୍ଡ଼୍ ବିବେକ୍ତେ ଚେତାବନୀତିଙ୍କ୍ ୱିଡ଼୍ସି ମାଡ଼ି ନିଜର୍ ଦର୍ମବିଶ୍ୱାସ୍ତିଙ୍କ୍ ନଷ୍ଟ ମାଡ଼ିସ୍ ମିନ୍ଦେଡ଼୍ । ୨୦ ଇଡ଼୍ ଲୋପେଙ୍କ୍ ହୁମନାୟ ନୁ ଆଲେକ୍ଜାଣ୍ଡାର ମାତ୍ତଡ଼୍ । ହି ଇର୍ୱୁଡ଼୍କିଙ୍କ୍ ନାନ୍ ଶୟ୍ତାନ୍ତେ କାଇଦାଗ୍ ୱିଡ଼୍ସିସ୍ ଉପଯୁକ୍ତ ଦଣ୍ଡ ବିଦାନ ମାଡ଼୍ତାନ୍, ଉଏତ ଇଦିନ୍ ୱାରା ଅଡ଼୍ ଇଶ୍ୱର୍ତେ ନିନ୍ଦାତାଗାଙ୍କ୍ ୱେରେ ଆଦାନଙ୍କ୍ ଶିକ୍ଷା ପାଏମ୍ ଆଦ୍ତଡ଼୍ ।