କରନ୍ତିୟ ବିଶ୍ୱାସୀମାନଙ୍କ ନିକଟକୁ ପାଉଲଙ୍କ ଦ୍ୱିତୀୟ ପତ୍ର
କରନ୍ତିୟ ବିଶ୍ୱାସୀଡ଼୍ ଗାର୍ରେ ପାଉଲ୍ତେ ଦ୍ୱିତିୟ ଚିଟି
୨ କରନ୍ତିୟ ବଇ ବିଷୟ୍ତେ ଅଣ୍ଡୟ୍ ପଦ୍
ଦ୍ୱିତୀୟ୍ କରନ୍ତି ପ୍ରେରିତ୍ ପାଉଲ୍ତଡ଼୍ ଆଦ୍ପାର୍ତେ ଜିସୁ କ୍ରିଷ୍ଟନ୍ ଜନମ୍ତେ ସାରେ ୫୫-୫୬ ଏଣ୍ଡ୍ ପେର୍କେ ଲେକ୍ତାଦ୍ ଆସ୍ମାତ୍ତେ । ୧–୧ ମାନ୍ ପାକ୍ ମାନ୍ଦାନ୍ କରନ୍ତିୟ ମଣ୍ଡଲିତିଙ୍କ୍ ଲେକ୍ତାଦ୍ ଆସ୍ମାତ୍ତେ ଚିଟି ଲୋପେଙ୍କ୍ ଇଦ୍ ଆଦୁତ୍ତେ ପାଉଲ୍ତେ ଦ୍ୱିତୀୟ୍ ଚିଟି । ପଣ୍ଡିତିଡ଼୍ ବିଶ୍ୱାସ୍ ମାଡ଼ିତଡ଼୍ ଯେ, ଇଦିନ୍ ମୁନେଙ୍କ୍ ପାଉଲ୍ କରନ୍ତିୟ ମଣ୍ଡଲି ଗାର୍ରେ ଅଣ୍ଡୟ୍ ଆଣ୍ଟ୍ ଚିଟି ଲେକିମାତ୍ତଣ୍ଡ୍ ୨:୩-୪ ପଦତାଗ୍ ଅଣ୍ଡ୍ ବାତ୍ ଗଟ୍ ଇଦ୍ତଣ୍ଡ୍, ଆଦିନ୍ ବାତ୍ବା ନକଲ ମାୟାଗ୍ ଇଲ୍ଲେ । ଆଦ୍ପାର୍ତେ ପାଉଲ୍ ମାକିଦୋନିଆତାଗ୍ ମାନ୍ଦାନ୍ ୱେଲେ ଦ୍ୱିତିୟ କରନ୍ତିୟ ଲେକିମାତ୍ତଣ୍ଡ୍ ୨:୧୩ ।
ଦ୍ୱିତିୟ କରନ୍ତି ଆଦୁତ୍ତେ ମେଣ୍ଡେନଣ୍ଡ୍ ଅଦ୍ୱିତିୟ କରନ୍ତି ଇଲ୍ଲେ, ଆଦ୍ ଗାଟି ନିଜେତାଦ୍ ନୁ ଆଲ୍ସାନ୍ ଲେକେତାଦ୍ । କରନ୍ତିୟତାଗ୍ ମାନ୍ଦାନ୍ ମଣ୍ଡଲି ବିଷୟ୍ତେ ତୀତସ ତାଗାଙ୍କ୍ ସାୟେତ୍ କାବୁର୍ ପାଏମ୍ଆସ୍ ପାଉଲ୍ ୱେଡ଼୍କ୍ତଣ୍ଡ୍ । ଇଦ୍ ଚିଟିତାଗ୍ ପୁନାଦ୍ ନିୟମ୍ତାଦ୍ ଦାନ ବିଷୟ୍ତେ ଶିକ୍ଷା ପାଏମ୍ ଆଦ୍ତାଡ଼୍ । ଇଦ୍ ଲେକ୍ତାଗ୍, ବେଗେ ପାଉଲ୍ ଜିରୁଶାଲେମ୍ତେ ବିଶ୍ୱାସୀଡ଼୍କିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ଡାବ୍କ୍ ତାଲ୍କାନଙ୍କ୍ ନିର୍ଦେଶ୍ ଇଦ୍ତଣ୍ଡ୍ ୮–୯ । ଇଦ୍ ପୁନ୍ଦାନଙ୍କ୍ ଆଦୁତ୍ତେ ଯେ, ମଣ୍ଡଲି ବାୟିଦେ କନ୍ସ୍ ବେସ୍କ୍ତୁଡ଼୍ ମିଚ୍ ପ୍ରେରିତିଡ଼୍, ଅଡ଼୍ ନିଜେତିଙ୍କ୍ ପଦ ଉନ୍ନତି ମାଡ଼ାନଙ୍କ୍ ପାଉଲ୍ତେ ବିରୁଦ୍ତେ ମଣ୍ଡଲିତେ ବେସ୍କ୍ତୁଡ଼୍ ନିର୍ଦ୍ଦିଷ୍ଟ ନାରୁଡ଼୍କିଂଙ୍କ୍ ଇଂସା ବ୍ୟବହାର୍ ମାଡ଼ୁତଡ଼୍ । ଅଡ଼୍ ପାଉଲ୍ତେ ଅଦିକାର୍ଦିଙ୍କ୍ ନାକିଂଙ୍କ୍ ହେର୍କା ମାଡ଼ୁତଡ଼୍ । ବେଲାନ୍କି ଦ୍ୱିତିୟ କରନ୍ତି ମାଡ଼େଙ୍କ୍ତେ ୱେଲେ ଅଣ୍ଡ୍ ୱେରଣ୍ଡ୍ ଜିସୁ କ୍ରିଷ୍ଟନ୍ ଅଦିକାର୍ତେ ୱେରଣ୍ଡ୍ ପ୍ରେରିତ୍ ଇଞ୍ଜ ଗାଡ଼୍ସ୍ ତଡ଼୍ ପ୍ରାମାନ୍ ମାଡ଼ୁତଣ୍ଡ୍ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ପାଉଲ୍ ଚିଟିତ୍ ଆରାମ୍ତେ ୱେଲେ ନମସ୍କାର୍ ମାଡ଼ୁତଣ୍ଡ୍ । ୧:୧-୭
୨. ପାଉଲ୍ ତାନ୍ ଆଦାଙ୍କ୍ ତିୟାର୍ ଆତ୍ତାଗ୍ ବାଦ୍ଲେମ୍ ନୁ ଅଡ଼୍ ବିଷୟ୍ତେ ଦର୍କିମାନ୍ଦାନ୍ ତଥ୍ୟ ନୁ ତାନ୍ ଚିଟି ବିଷୟ୍ତେ ଅଡ଼ାଦ୍ ଜବାବ୍ । ୧:୮–୭:୧୬
୩. ପାଉଲ୍ ଜିରୁଶାଲେମ୍ତେ ବିଶ୍ୱାସୀଡ଼୍ ମାୟ୍ଦିଙ୍କ୍ ଦାନ ଆଦାୟ୍ ମାଡ଼ାନ୍ ବିଷୟ୍ତେ ନିର୍ଦେଶ୍ ଇଦ୍ତଣ୍ଡ୍ । ୮:୧–୯:୧୫
୪. ମାଡ଼େଙ୍ଗ୍ ପାଉଲ୍ ତାନ୍ ପ୍ରେରିତ୍ ପଦ ସୁରକ୍ଷା ମାଡ଼ିତନ୍ ନୁ ମେଣ୍ଡେ ଆଦାନ୍ ସେଙ୍ଗେ ସତର୍କ ମାଡ଼ିତନ୍ । ୧୦:୧–୧୩:୧୦
୧
୧ ✡ପ୍ରେରିତ ୧୮:୧.ନାନ୍ ପାଉଲ୍, ଇଶ୍ୱର୍ତେ ଇଚ୍ଛା ଲେକାମ୍ ଜିସୁ କ୍ରିଷ୍ଟନ୍ ପ୍ରେରିତ୍ ନୁ ମାନ୍ ଦାଦାଲ୍ ତୀମତି, କରିନ୍ଥ ମଣ୍ଡଲିତାଗ୍ ଲେକୁତାନ୍ ନୁ ଆଖାୟା ଦେଶ୍ତେ ସାରେ ବିଶ୍ୱାସୀ ପାକେ ଇଦ୍ ଚିଟି ଲେକମିନ୍ତେନ୍ ।
୨ ମାନ୍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
ପାଉଲ୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇତ୍ତନ୍
୩ ୱାଡ଼ାଟ୍, ମାନ୍ ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଦନ୍ୟ ନାରୁଣ୍ଡ୍, ଦୟାକାରି ନୁ ସାରେତଡ଼୍ ସାହାଯ୍ୟତେ ଉତ୍ସ, ଇଶ୍ୱର୍ତିଙ୍କ୍ ଦନ୍ୟବାଦ୍ ଇଦିକାଡ଼୍ । ୪ ମାନ୍ ଦୁଃକାମ୍ କଷ୍ଟ ୱେଲେ ଇଶ୍ୱର୍ ମାନ୍ ବେନ୍ ସାନ୍ୱନା ଇଦ୍ତନ୍, ଆଦ୍ ସାନ୍ୱନା ତଡ଼୍ ମାନାଡ଼୍ ଦୁଃକାମ୍ କଷ୍ଟ ମାଡ଼ମାନ୍ତାନ୍ ବାଗାତଡ଼୍କ୍ ସାନ୍ୱନା ଇଦ୍ଦେ ପାର୍ଦତାଡ଼୍ । ୫ ମାନାଡ଼୍ କ୍ରିଷ୍ଟନ୍ ଗାଟି ଦୁଃକାମ୍ କଷ୍ଟତାଗ୍ କାଇଲ୍ତାଙ୍କ୍ କ୍ରିଷ୍ଟନ୍ ତଡ଼୍ ଇଶ୍ୱର୍ତେ ମହାସାନ୍ତନାତେ ମିକା ତଡ଼୍ ଆଦେ ପାର୍ଦତାଡ଼୍ । ୬ ମାନାଡ଼୍ ଯଦି ଦୁଃକାମ୍ କଷ୍ଟ ମାଡ଼ିତାଡ଼୍, ଆଦ୍ ମିକିଂଙ୍କ୍ ଉପକାର୍ ନୁ ପରିତ୍ରାଣ ସେଙ୍ଗେ । ମାନ୍ ସାନ୍ୱନା ଦର୍କେ, ମିଡ଼୍ ମିକା ଆଦେଲେକାମ୍ ଗାଡ଼୍ସ୍ତେ ଦୁଃକାମ୍ କଷ୍ଟ ମାଡ଼ାନ୍ ସେଙ୍ଗେ ସାନ୍ୱନା ନୁ ଶକ୍ତି ଦର୍କିତ୍ । ୭ ମିୟାଗ୍ ମାୱାଦ୍ ଆଶେ ମିନ୍ତେ । ମାମ୍ମେ ପୁତ୍ତମ୍, ମିଡ଼୍ ମାୟାଦ୍ ଦୁଃକାମ୍ ତିପାଲ୍ତେ ବେଲାନ୍ ତଡ଼୍ ଆସ୍ମିନ୍ତେମ୍, ଆଦ୍ଲେକାମ୍ ମା ସାନ୍ତ୍ୱନାତାଗ୍ ମିକା ତଡ଼୍ ଆଦ୍ତିଡ଼୍ ।
୮ ✡୧ କରନ୍ତିୟ ୧୫:3୨.ହୋ ଦାଦାଲଡ଼ି ନୁ ଏଲାସ୍କ୍, ମାମ୍ମେ ଏସିଆ ପ୍ରଦେଶ୍ତେ ମା ପରୁ ଗଟେମ୍ ଆସ୍ମାନ୍ଦାନ୍ କଷ୍ଟ ବିଷୟ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତମ୍ । ଆଦ୍ କଷ୍ଟ ସହେମ୍ ଆଦେପାର୍ନାଙ୍କ୍ ମାମ୍ମେ ଜୀୱୁନ୍ତେ ଆଶେ ୱିଡ଼୍ସିତ୍ତମ୍ । ୯ ମାକିଂଙ୍କ୍ ଡଲାନ୍ ଗଟ୍ ଇସ୍ମିନ୍ତେଡ଼୍ ଇଞ୍ଜ ଆଲ୍ସମାତ୍ତମ୍ । ବାତେଙ୍କ୍ ଇତ୍କେ ଇଦ୍ ଗଟେମ୍ ଆତ୍ତେ, ଆଦିଙ୍କ୍ ନିଜେତ୍ ପରୁ ଆଶେ ମାଡ଼କଟ୍ ଡଲାନଙ୍କ୍ ଜୀୱୁନ୍ ଇସ୍ମାନ୍ଦାନ୍ ଇଶ୍ୱର୍ତେ ପରୁ ଆଶେ ୱାଟ୍ତମ୍ । ୧୦ ଅଣ୍ଡ୍ ମାକିଂଙ୍କ୍ ବୟାନକ୍ ଡଲ୍ତାଗାଙ୍କ୍ ଉଦ୍ଦାର୍ ମାଡ଼୍ତଣ୍ଡ୍ ନୁ ଉଦ୍ଦାର୍ ମାଡ଼ିତନ୍, ମେଣ୍ଡେ ଅଣ୍ଡ୍ ଯେ ବବିଷ୍ୟତ୍ତେ ମିକା ଉଦ୍ଦାର୍ ମାଡ଼ିତନ୍, ଅନାଗେ ମାୟାଦ୍ ଇଦ୍ ଆଶେ ମିନ୍ଦେ । ୧୧ ମିଡ଼୍ ପ୍ରାର୍ତନା ତଡ଼୍ ମାକିଂଙ୍କ୍ ସାହାଯ୍ୟ ମାଡ଼ାଟ୍ । ଆଲାକେ, ମା ସେଙ୍ଗେ ମାଡ଼ମାନ୍ଦାନ୍ ନାର୍ଗେ ପ୍ରାର୍ତନାତାଦ୍ ଉତ୍ତର୍ ଦର୍କିତ୍ ନୁ ଇଶ୍ୱର୍ ମାକିଂଙ୍କ୍ ଆର୍ଶିବାଦ୍ ମାଡ଼ିତନ୍ । ମା ସେଙ୍ଗେ ନାର୍ଗେ ନାରୁଡ଼୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇଦ୍ତଡ଼୍ ।
ପାଉଲ୍ତେ ଯୋଜନାତାଗ୍ ବାଦ୍ଲେମ୍
୧୨ ଜଗତ୍ତେ ଜିୱୁନ୍ ନୁ ବିଶେସ୍ତେ ମିଇ ତଡ଼୍ ମାୟାଦ୍ ସମ୍ପର୍କ ଇଶ୍ୱର୍ତେ ପବିତ୍ରତା ନୁ ବିଶ୍ୱସ୍ତତା ତଡ଼୍ ପରିଚାଲିତ୍ ଇଞ୍ଜ ମାନ୍ ମୋନ୍ତାଦ୍ ସାକ୍ଷ୍ୟ । ଇଦିନ୍ ସେଙ୍ଗେ ମାନ୍ ମନ୍ତାଗ୍ ଗର୍ବ ଆଦ୍ତେ । ମାନବିକ୍ ବୁଦ୍ତେ ଆୟ୍ୟ, ମାତର୍ ଇଶ୍ୱର୍ତେ ଅନୁଗ୍ରହ୍ତଡ଼୍ ଆଦ୍ ମାଡ଼ାନଙ୍କ୍ ମାମ୍ମେ ତିଆର୍ ଆସ୍ମିନ୍ଦେମ୍ । ୧୩ ବାତ୍ କାର୍ସ୍ ମିଡ଼୍ ବୁଜେମ୍ ଆଦ୍ତିଡ଼୍, ମୀଇପାକେ ମାମ୍ମେ ମାତର୍ ଆସରେ ଲେକୁତମ୍ । ୧୪ ନାନ୍ ଆଶେ ମାଡ଼ୁତାନ୍, ଇଞ୍ଜେ ବାତ୍ ଇସୁର୍ ବୁଜେମ୍ ଆଦୁତିଡ଼୍, ଆଦ୍ ଆସୁଟେ ପ୍ରବୁ ଜିସୁନ୍ ୱାଦାନ୍ ଦିନାମ୍ତେ ସାରେ ବୁଜେମ୍ ଆଦ୍ତିଡ଼୍ । ଆଲେକେ, ମିଡ଼୍ ମା ସେଙ୍ଗେ ଗର୍ବ ମାଡ଼ିତିଡ଼୍ ନୁ ମାମ୍ମେ ମିକା ମିଇ ସେଙ୍ଗେ ଗର୍ବ ମାଡ଼ିତମ୍ ।
୧୫ ଇଦ୍ ବିଷୟ୍ତେ ନାନ୍ ନିଜାମ୍ ଲେକାମ୍ ପୁଞ୍ଜ୍ମାତ୍ତାଙ୍କ୍ ମୁନେନ୍ ମିଇ ଗାର୍ରେ ଆଦ୍ଦାନ୍ ସେଙ୍ଗେ ନାୟାଦ୍ ଇଚ୍ଛା ମାତ୍ତେ । ଆଲେକେ, ମିଡ଼୍ ରେଣ୍ଡ୍ଦାମ୍ ନାକିଂଙ୍କ୍ ଉଡ଼ି ୱେଡ଼୍କ୍ ମାଡ଼େ ପାର୍ୱେଡ଼ି । ୧୬ ✡ପ୍ରେରିତ ୧୯:୨୧.ମାସିଦୋନିଆ ଆଦାନ୍ ୱେଲେ ନୁ ଆଗାଙ୍କ୍ ମାଲ୍ଦାନ୍ ୱେଲେ ମିଇ ପାକେ ବସ୍ ଦିନା ମାନ୍ଦାନ୍ଙ୍କ୍ ନାୟାଦ୍ ଇଚ୍ଛା ମାତ୍ତେ, ବାତେଙ୍କ୍ ଇତ୍କେ ଯିହୁଦା ପ୍ରଦେଶ୍ତାଗ୍ ଆଦାନ୍ ସେଙ୍ଗେ ନାନ୍ ମିୟାଦ୍ ସାଆଯ୍ୟ ଦର୍କାର୍ ମାତ୍ତେ । ୧୭ ନାନ୍ ବାତ୍ ନିଜାମ୍ ଆୟ୍ୱେକଟେ ଇଦ୍ ପାଡ଼୍ୟି ତାଲିକା ତିଆର୍ ମାଡ଼ିମାତ୍ତାନ୍ ? ବେନଡ଼୍ ଅଣ୍ଡୟ୍ ତଡ଼େକ୍ “ଅଁ, ନୁ ଇଲ୍ଲେ, ଇଲ୍ଲେ,” ମାଡ଼ିତଡ଼୍, ଅଡ଼୍ଲେକାମ୍ ବାତେଏ ନାନ୍ ଜିନେତ୍ ସ୍ୱାର୍ତସିଦ୍ଦି ସେଙ୍ଗେ ନାୟାଦ୍ ପାଡ଼୍ୟି ମାଡ଼ିତାନ୍ ? ୧୮ ନିଜାମ୍ ଇଶ୍ୱର୍ ବିଶ୍ୱାସ୍ତେ ତଣ୍ଡ୍, ବେନ୍ କବର୍ ନାନ୍ ଇଦ୍ତାନ୍ ଆଦ୍ “ଅଁ ବା ନା,” ଆୟ୍ୟ । ୧୯ ✡ପ୍ରେରିତ ୧୮:୫.ସିଲେ, ତୀମତି ନୁ ନାନ୍ ମିଇ ଗାର୍ରେ ପ୍ରଚାର୍ ମାଡ଼ମାନ୍ଦାନ୍ ଇଶ୍ୱର୍ତେ ମାର୍ ଜିସୁ କ୍ରିଷ୍ଟ, ବେସୁଙ୍କ୍ ୱେରଡ଼୍ ତଡ଼େକ୍ “ଅଁ ନୁ ଇଲ୍ଲେ,” କେଲଣ୍ଡ୍ । ମେଣ୍ଡେଅଣ୍ଡ୍ ରକମ୍, ଅଣ୍ଡ୍ ଆଦୁତନ୍ ଇଶ୍ୱର୍ତେ “ଅଁ ।” ୨୦ ଆଦିଙ୍କ୍ ଇଶ୍ୱର୍ତେ ସାର୍ରେ ପ୍ରତିଜ୍ଞା ସାରେ ସତ୍ ଆତ୍ତେ, ଆୱୁ ସାରେ ଅଁ ଅଡ଼ାଗେ ମିନ୍ଦେ; ଇଦିନ୍ ସେଙ୍ଗେ ଜିସୁ କ୍ରିଷ୍ଟନ୍ ତଡ଼୍ ଇଶ୍ୱର୍ତେ ଗୌରବ୍ ସେଙ୍ଗେ ମାମ୍ ଆମେନ୍ ମାଡ଼ିତମ୍ । ୨୧ ଇଗେ ନିଜେ ଇଶ୍ୱର୍ ଜିସୁ କ୍ରିଷ୍ଟନାଗ୍ ମିୟାଦ୍ ନୁ ମାନ୍ ଜିୱୁଣ୍ଡ୍ତିଙ୍କ୍ ଅଣ୍ଡୟ୍ ମାଡ଼ି ସୁରକ୍ଷା ମାଡ଼୍ତଣ୍ଡ୍ । ୨୨ ଅଣ୍ଡ୍ ମାନ୍ ୱେରେ ମାଡ଼ି ମିନ୍ଦେନ୍ ନୁ ମାନ୍ ହୃଦୟତାଗ୍ ତାନ୍ ପବିତ୍ର ଆତ୍ମାତିଙ୍କ୍ ନେଃଏତାଙ୍କ୍ ମାନ୍ ପରୁ ମାଲିକ୍ ଆତ୍ତଣ୍ଡ୍ । ପବିତ୍ର ଆତ୍ମା ଆଦୁତ୍ତେ, ମାନ୍ ପରୁ ଇଶ୍ୱର୍ତେ ଅଦିକାର୍ତେ ଚିଃଏନେ ନୁ ବବିଷ୍ୟତ୍ତେ ମାନ୍ ବାତ୍ ଦର୍କିତ୍, ଆଦିନ୍ ଗେରେଣ୍ଟି ଲେକାମ୍ ।
୨୩ ଇଶ୍ୱର୍ ଆଦୁତନ୍ ନା ସାକି । ଅଣ୍ଡ୍ ନା ଜିୱୁଣ୍ଡ୍ତିଙ୍କ୍ ପୁତ୍ତଣ୍ଡ୍ । ମିକିଂଙ୍କ୍ ନାନ୍ନେ ମେଣ୍ଡେ ବେଲାନ୍ ତିପାଲ୍ ଇୱନ୍, ଆଦିନ୍ସେଙ୍ଗେ ନାନ୍ କରିନ୍ଥ ଆଦାନଙ୍କ୍ ମାନ୍ ମାଡ଼ନ୍ । ୨୪ ମିଡ଼୍ ବେନ୍ ଗଟ୍ତିଙ୍ଗ୍ ବିଶ୍ୱାସ୍ ମାଡ଼ିତିଡ଼୍, ଇଦ୍ ବିଷୟ୍ତେ ମିଇ ପରୁ ଶାସନ୍ ମାଡ଼ାନଙ୍କ୍ ମାମ୍ମେ ଆଲ୍ସି ମାଡ଼ମ୍, ବାତେଙ୍କ୍ ଇତ୍କେ ମିଡ଼୍ ବିଶ୍ୱାସ୍ତାଗ୍ ଲେକାମ୍ ଗାଡ଼୍ସ୍ ମିନ୍ଦେଡ଼ି । ଇତ୍କେ ମିଇକିଂଙ୍କ୍ ମାତର୍ ୱେଡ଼୍କ୍ ମାଡ଼ାନ୍ ସେଙ୍ଗେ ମିଇ ତଡ଼୍ ଅଣ୍ଡୟାଗ୍ କାଇଲି ମାମ୍ମେ ପାଡ଼୍ୟି ମାଡ଼ୁତମ୍ ।