ଯୋହନ ଲିଖିତ ଦ୍ୱିତୀୟ ପତ୍ର
ଯୋହନ୍ ଲେକ୍ତାଦ୍ ଦ୍ୱିତୀୟ ଚିଟି
ଯୋହନ୍ ବଇ ବିଷୟ୍ତେ ଅଣ୍ଡୟ୍ ପଦ୍
ଯୋହନ୍ ଲେକ୍ତାଦ୍ ଦ୍ୱିତୀୟ ଚିଟି ଜିସୁ କ୍ରିଷ୍ଟନ୍ ଜନମ୍ତେ ୫୦ ରୁ ୧୦୦ କ୍ରିଷ୍ଟାଦ୍ଦ ଲୋପେ ପ୍ରେରିତ ଯୋହନ୍ତଡ଼୍ ଲେକା ଆସ୍ମାତ୍ତେ । ଯୋହନ୍ ନିଜେତିଙ୍କ୍ ଲେକକ୍ ଇଞ୍ଜ ପରିଚୟ ଇୱଣ୍ଡ୍, ଅଦିନ୍ ବାଦୁଲ୍ତେ ଅଣ୍ଡ୍ ନିଜେତିଙ୍କ୍ ପ୍ରାଚିନ୍ ଇଞ୍ଜ ପରିଚୟ ଇଦ୍ତନ୍ । ଯୋହନ୍ତାଦ୍ ଦ୍ୱିତୀୟ ଚିଟିତେ ପ୍ରସଙ୍ଗତଡ଼୍ ଯୋହନ୍ ଲେକ୍ତାଦ୍ ସୁସମାଚାର୍ତାଗ୍ ମାନ୍ଦାନ୍ ବିଷୟତଡ଼୍ ସାମାନ୍ । ଇଦ୍ ସ୍ୱତନ୍ତ୍ର ଲେକାମ୍ ଜିସୁଙ୍କ୍ ବେନ୍ ଇସାପ୍ତେ ଅଣ୍ଡ୍ ଅର୍ତୁଣ୍ଡ୍ ୱେରଙ୍କ୍ ପ୍ରେମ ମାଡ଼ାନ୍ ବିଷୟତେ ଜିସୁନ୍ ଆଦେଶ୍ତିଙ୍କ୍ କେତିତଣ୍ଡ୍, ଆଦେ ରକମ୍ ଜିସୁନାଦ୍ ଆଦେଶ୍ ପାଲନ୍ ମାଡ଼ାନାଦ୍ ଅଦୁତ୍, ଅଂକିଙ୍କ୍ ପ୍ରେମ ମାଡ଼ାନାଦ୍ ଯୋହନ୍ ୧:୫-୬, ଯୋହନ୍ ୧୫:୯-୧୦ ।
ଇଦ୍ ବିଶ୍ୱାସ୍ ମାଡ଼ାନଙ୍କ୍ ଆଦ୍ତେ ଯେ, ଯୋହନ୍ ବେସୁଟ୍ ଏଫିସ୍ତାଗ୍ ମାଞ୍ଜ ମାତ୍ତଣ୍ଡ୍, ଯୋହନ୍ ସୁସମାଚାର୍ ତଡ଼୍ ଯୋହନ୍ ତାଦ୍ ମୁଣ୍ଡ୍ଚିଟି ମିକା ଲେକିମାତ୍ତଡ଼୍, ଆୱୁ ୧ ଯୋହନ୍, ଦ୍ୱିତୀୟ ଯୋହନ୍ ନୁ ୩ ଯୋହନ୍ । ଯୋହନ୍ ଇଦ୍ ଚିଟିତାଗ୍ ଏଞ୍ଚିମାନ୍ଦାନ୍ ନାଟାଡ଼୍ ମେଣ୍ଡେ ତାନ୍ ପିଲା ଇଞ୍ଜ କେସ୍ ମଣ୍ଡଲିତିଙ୍କ୍ ଚିଟି ଲେକିତଣ୍ଡ୍ । ଯୋହନ୍ ଇଦ୍ ଚିଟି ଲେକାନାଲ୍ଦ୍ ଉଦେଶ୍ୟ ଅଦୁତ୍ ବିଶ୍ୱାସିଡ଼୍କିଙ୍କ୍ ସାହାସ୍ ଇଦାନାଦ୍ ମେଣ୍ଡେ ମେସ୍ତେରିଡ଼ାଗାଙ୍କ୍ ସତର୍କ ମାଡ଼ାନ୍ ସେଙ୍ଗେ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ
୧. ଯୋହନ୍ ଇଦ୍ ଚିଟି ବେନନ୍ ସେଙ୍ଗେ ଲେକ୍ତନ୍ ଇଦ୍ କେସ୍, ଅଂକିଙ୍କ୍ ଗ୍ରହନ୍ ମାଡ଼ାନଡ଼୍କିଙ୍କ୍ ନମସ୍କାର୍ କେତିତନ୍ । ୧:୧-୩
୨. ଯୋହନ୍ ମଣ୍ଡଲିତିଙ୍କ୍ ସାହାସ୍ ଇସ୍ ବେଡ଼ିୟାଦ୍ ଆଦେଶ୍ ବିଷୟତେ ମନେ ୱାଟିଦ୍ତଣ୍ଡ୍ । ୧:୪-୬
୩. ଅଣ୍ଡ୍ ମିସ୍ ମେସ୍ତେରିଡ଼୍ ବିଷୟତେ ସତର୍କ ମାଡ଼ିଦ୍ତଣ୍ଡ୍ । ୧:୭-୧୧
୪. ଅଣ୍ଡ୍ ବେଗେ ବାଦ୍କୁତନ୍ ଆଗେତ୍ ବିଶ୍ୱାସିଡ଼୍କିଙ୍କ୍ ନମସ୍କାର୍ କେସ୍ ଲେକା ତେର୍ସ୍ପିତଣ୍ଡ୍ । ୧:୧୨-୧୩
୧
୧ ପ୍ରାଚିନ୍ ଯୋହନ୍ ଯେ ନାନ୍ ୱେରଡ୍ ହେଞ୍ଚ୍ତାଦ୍ ବଦ୍ର ନାଟାଡ଼୍ ନୁ ତାନ୍ ପିଲାନ୍ ଗାରେ ଇଦ୍ଚିଟି ଲେକୁତାନ୍ । ମିକିଙ୍କ୍ ନାୟାଦ୍ ପ୍ରେମ କେତୁତାନ୍ । ମାତର୍ ନାନେ ଆୟନ୍, ବେନଡ଼୍ ସତ୍ୟତାଗ୍ ସନ୍ଦାନ୍ ପାଏମ୍ ଆତ୍ତଡ଼୍, ସାରେତଡ଼୍ ମିକିଙ୍କ୍ ପ୍ରେମ ମାଡ଼ିତଡ଼୍ ।
୨ ମାନାଗ୍ ଆଦ୍ ସତ୍ୟ ମିନ୍ଦେ ନୁ ସାରେଦିନାମ୍ ମାନ୍ତେ ।
୩ ବାବାଲ୍ ଇଶ୍ୱର୍ ନୁ ତାନ୍ ମାର୍ ଜିସୁ କ୍ରିଷ୍ଟ ମାକିଙ୍କ୍ ଅନୁଗ୍ରହ, କୃପା ନୁ ଶାନ୍ତି ଇସ୍ମିକା ସତ୍ ନୁ ପ୍ରେମତେ ଆର୍ଶିବାଦ୍ ମାଡ଼ିଣ୍ଡ୍ ।
ସତ୍ ନୁ ପ୍ରେମ
୪ ଇଶ୍ୱର୍ତେ ଆଜ୍ଞା ଲେକାମ୍ ମିୱଡ଼୍ ବେସ୍କ୍ତୁଡ଼୍ ପିଲା ଯେ ସତ୍ତେ ପର ଜିୱେତିଙ୍ଗ୍ ଆଦାରିତ ମାଡ଼୍ତଡ଼୍, ଇଦ୍ ଗଟ୍ ପୁଞ୍ଜ୍ ନାନେ ଗାଟି ୱେଡ଼୍କେ ଆତ୍ତାନ୍ । ୫ ✡ଯୋହନ୍ ୧3:3୪; ୧୫:୧୨,୧୭.ପ୍ରିୟ ନାଟାଡ଼୍, ନିକିଙ୍କ୍ ନାୟାଦ୍ କେତାନାଦ୍ ଗଟ୍, ମାମେ ନିଜେନିଜର୍ ଲୋପେ ପ୍ରେମ ମାଡ଼ାନ୍ ଦର୍କାର୍ । ଇଦ୍ ଅଣ୍ଡୟ୍ ପୁନେ ଗଟ୍ ଆୟ, ମୁନେଙ୍କ୍କଞ୍ଜ ମାମେ ଇଦ୍ ଆଦେଶ୍ ପାଏମ୍ଆତ୍ତମ୍ । ୬ ବେନ୍ ପ୍ରେମ ଗଟ୍ ଇଗେ ଲେକ୍ତାନ୍, ଆଦିନ୍ ଅର୍ତ ଆତ୍ତେ, ଜିୱେତାଗ୍ ଇଶ୍ୱର୍ତେ ଗଟ୍ ପାଲନ୍ ମାଡ଼ିକାଡ଼୍ । ଆଦ୍ ଗଟ୍ ବାତେ, ମିଡ଼୍ ମୁନେଙ୍କ୍କଞ୍ଜ୍ କେଞ୍ଜ୍ତିଡ଼୍, ଆଦ୍ ଆତ୍ତେ, ମାମେ ସାରେତମ୍ ନିଜେ ନିଜର୍ ଲୋପେ ପ୍ରେମତେ କାଇଲି ମାନ୍ଦାନାଦ୍ ସାୟେ ।
୭ ନାନ୍ ଇଦ୍ କେତୁତାନ୍ ବାତେଙ୍କ୍ଇତ୍କେ ନାର୍ଗେ ବୁସାକେତାନଡ଼୍ ଇଞ୍ଜେ ଜଗତ୍ତାଗ୍ ଉଡୁତଡ଼୍ । ଜିସୁ କ୍ରିଷ୍ଟ ନାରୁନ୍ ମେନ୍ଦୁଲ୍ ପୟସ୍ ୱାସ୍ମାତ୍ତନ୍ ଇଞ୍ଜ ଅଡ଼୍ ସ୍ୱୀକାର୍ ମାଡ଼ଡ଼୍ । ଇଦ୍ଲେକେତ୍ ନାରୁଣ୍ଡ୍ ନିଜାମ୍ ବୁସାକେତାନଣ୍ଡ୍, ଅଣ୍ଡ୍ ନିଜାମ୍ କ୍ରିଷ୍ଟନ୍ ଶତ୍ରୁ ! ୮ ଆଦିଙ୍କ୍ ସାବ୍ଦାନ୍ ମାନୁଟ୍, ମାମେ ମୀଇ ସେଙ୍ଗେ ବାତେ ମାଡ଼୍ତମ୍, ଆଦ୍ ସାରେ ୱିଡ଼୍ସକଟ୍ ବେଲାକି ପୁରା ପୁରସ୍କାର୍ ପାଏମ୍ ଆଦ୍ତିଡ଼୍ ।
୯ ବେନ ଆୟି କ୍ରିଷ୍ଟନ୍ ଶିକ୍ଷାତେ ଲୋପେ ମାନକଟ୍ ବାୟ୍ଦେ ପେଇସ୍ ଆଞ୍ଜ୍, ଅଣ୍ଡ୍ ଇଶ୍ୱର୍ ତାଗାଙ୍କ୍ ୱେରେ ଆତ୍ତନ୍ । ବେନ ଆୟି କ୍ରିଷ୍ଟନ୍ ଶିକ୍ଷାତାଗ୍ ଡୁଟାଙ୍କ୍ ମାନ୍ତଣ୍ଡ୍, ଅଣ୍ଡ୍ ଇଶ୍ୱର୍ ନୁ ତାନ୍ ମାର୍ ଇର୍ୱୁଡ଼୍ ତଡ଼୍ କାଇଲିମିନ୍ଦେନ୍ । ୧୦ ବେନ ଯଦି ଇଦ୍ ଶିକ୍ଷା ଆସ୍ ମୀଇ ଗାରେ ୱାଡ଼୍କଟ୍ ମାତ୍କେ, ଅଙ୍କ୍ ମୀଇ ଲନ୍ କାର୍ଙ୍ଗ୍ମାଟ୍, “ମିୟାଦ୍ ଶାନ୍ତି ଆୟି,” ଇଞ୍ଜ ବେନ ଅଙ୍କ୍ ନମସ୍କାର୍ କେଲ୍ମାଟ୍ । ୧୧ ବେନ ଆୟି ଅନ୍ୱାଦ୍ ଶାନ୍ତି କାମନା ମାଡ଼ିତଣ୍ଡ୍, ଅଣ୍ଡ୍ ତାନ୍ କାରାପ୍ କାମ୍ତାଗ୍ ଅଂଶି ଆଦ୍ତନ୍ ।
ମାଡ଼େଙ୍କ୍ତାଦ୍ ଗଟ୍
୧୨ ନାନ୍ ମିକିଙ୍କ୍ ନାର୍ଗେ ଗଟ୍ କେତାନାଦ୍ ମିନ୍ଦେ, କିନ୍ତୁ କାଗଜ୍ ନୁ କଲମ୍ତଡ଼୍ ଆୱୁସାରେ ଇଞ୍ଜେ ନାନ୍ କେତାନଙ୍କ୍ ଇଚ୍ଛା ମାଡ଼ନ୍ । ମୀଇ ଗାରେ ୱାସ୍ ନିଜେ ଗଟିତିର୍ୟାନଙ୍କ୍ ଆଶେ ନାନ୍ ନେଃଏତାନ୍ । ଆଦ୍ ମାଡ଼େ ପାର୍କେ, ମାନାଡ଼୍ ପୁରା କୁସ୍ ଆଦ୍ତାଡ଼୍ ।
୧୩ ଇଶ୍ୱର୍ ଏଞ୍ଚିମାନ୍ଦାନ୍ ଏଲାଡ଼୍ତେ ପିଲା ମିକିଂଙ୍କ୍ ନମସ୍କାର୍ ମାଡ଼ୁତଡ଼୍ ।
✡୧:୫ ଯୋହନ୍ ୧3:3୪; ୧୫:୧୨,୧୭.