ପିତର ଲିଖିତ ଦ୍ୱିତୀୟ ପତ୍ର
ପିତର୍ ଲେକ୍ତାଦ୍ ଦ୍ୱିତୀୟ ଚିଟି
ପିତର୍ ବଇ ବିଷୟ୍ତେ ଅଣ୍ଡୟ୍ ପଦ୍
ପିତର୍ତେ ଦ୍ୱିତୀୟ ଚିଟି କେତିତ୍ ଯେ, ଆଦ୍ ଚିଟି ପ୍ରେରିତ୍ ପିତର୍ ତଡ଼୍ ଲେକା ଆସ୍ମିନ୍ଦେ । ଇତ୍କେ ଇଞ୍ଜେ ନାର୍ଗେ ପଣ୍ଡିତ୍ ନାରୁଡ଼୍ ଇଦ୍ ସତ୍ ଆୟ ଇଞ୍ଜ କେତିତଡ଼୍ । ସମ୍ବାବନା ଇଦ୍ ମେଣ୍ଡେଅର୍ତୁଣ୍ଡ୍ ପିତର୍ତେ ବାଦୁଲ୍ ଲେକ୍ତଣ୍ଡ୍ । ଲେକ୍ତେନନ୍ କେତିତଣ୍ଡ୍ ଯେ ଅଣ୍ଡ୍ ଜିସୁ କ୍ରିଷ୍ଟନ୍ ଉଡ଼୍ତେନଣ୍ଡ୍ ସାକ୍ଷୀ ଆତ୍ତଣ୍ଡ୍ । ବିଶେଷ୍ ବାବେ ଜିସୁ କ୍ରିଷ୍ଟନ୍ ଲେକାମ୍ ବିଷୟ୍ କେତିତଣ୍ଡ୍ ୧:୧୭-୧୮ । ଯଦି ପିତର୍ ଇଦ୍ ଚିଟି ଲେକ୍ତଣ୍ଡ୍ ସମ୍ବାବନା କ୍ରିଷ୍ଟନ୍ ଜନମ୍ତେ ପେର୍କେ ୫୬-୬୯ ଲୋପେ ଅନ୍ ଡଲାନ୍ ମୁନେନ୍ ଇଦ୍ ଲେକ୍ତଣ୍ଡ୍ । ପିତର୍ ଗାଲା ଇଦ୍ ତାନ୍ ଦ୍ୱିତୀୟ ଚିଟି ଇଞ୍ଜ କେତିତଣ୍ଡ୍ ୩:୧ । ପିତର୍ତେ ମୁନେତ୍ ଚିଟି ଲେକା ଆତ୍ତେ ପେର୍କେ ଆଦ୍ ଲେକ୍ତାଦ୍ ସମୟ୍ତିଙ୍କ୍ ପଡ଼୍ୟେ ଇସ୍ ଇଦ୍ ଦ୍ୱିତୀୟ ଚିଟି ଇଞ୍ଜ କେତିତଣ୍ଡ୍ । ଅଣ୍ଡ୍ ସାର୍ରେ କ୍ରିଷ୍ଟିୟାନ୍ ନାରୁଡ଼୍କିଙ୍କ୍ ଇଦ୍ ଚିଟିତାଗ୍ ପାତା ଇଦ୍ତଣ୍ଡ୍ ୨ । ପିତର୍ ବିଶ୍ୱାସୀ ନାରୁଡ଼୍କ୍ ସାହାସ୍ ଇଦାନଙ୍କ୍ ନୁ ସାୟେ ଜିୱୁଣ୍ଡ୍ ବାଦ୍କାନ୍ ସେଙ୍ଗେ ମେଣ୍ଡେ ମିଚ୍ ମେସ୍ତେରିଡ଼୍ ପେର୍କେ ଆନ୍ମାଟ୍ ଇଞ୍ଜ ସତର୍କ ମାଡ଼ାନ୍ ସେଙ୍ଗେ ଇଦ୍ ଚିଟି ଲେକ୍ତଣ୍ଡ୍ । ଜିସୁ ୱାଦାନ୍ ସେଙ୍ଗେ ନାର୍ଗେ ସମୟ୍ ଆଦୁତଣ୍ଡ୍ ଇଞ୍ଜ କେସମାନ୍ଦାନ୍ ନାରୁଡ଼୍କିଙ୍କ୍ ପାସ୍କାନ୍ ସେଙ୍ଗେ ସାହାସ୍ ଇଦୁତଣ୍ଡ୍ । ଇଶ୍ୱର୍ ଜାମ୍ ଆୟଣ୍ଡ୍ ମାତର୍ ସାର୍ରେତଡ଼୍ ଉଦ୍ଦାର୍ ପାଏମ୍ଆତ୍ତଡ଼୍ ଇଦ୍ ଇଶ୍ୱର୍ ଇଚ୍ଛା ମାଡ଼ୁତଣ୍ଡ୍ ୨ ପିତର୍ ୩:୮-୯ ଇଦ୍ ଅଣ୍ଡୟ୍ ସାୟେ ଜିୱୁଣ୍ଡ୍ତାଦ୍ କାରନ୍ ୩:୧୪ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ପିତର୍ ଅଣ୍ଡ୍ ନିଜର୍ ପରିଚୟ୍ ଇଦ୍ତଣ୍ଡ୍ ମେଣ୍ଡେ ତାନ୍ କାର୍ତାନଡ଼୍କିଙ୍କ୍ ପାତା ଇଦ୍ତଣ୍ଡ୍ । ୧:୧-୨
୨. ତାନ୍ପେର୍କେ ବିଶ୍ୱାସୀ ନାରୁଡ଼୍କ୍ ସାୟେ ଜିୱୁଣ୍ଡ୍ ବାଦ୍କାନ୍ ସେଙ୍ଗେ ମନେ ମାଡ଼ିଦ୍ତଣ୍ଡ୍, ବାତେଙ୍କ୍ଇତ୍କେ ଇଶ୍ୱର୍ ମାନାଙ୍କ୍ ସପଟ୍ ମାଡ଼୍ତଣ୍ଡ୍ । ୧:୩-୨୧
୩. ଅଣ୍ଡ୍ ମିଚ୍ ମେସ୍ତେରିଡ଼୍କ୍ ସତର୍କ ମାଡ଼ି ମାଡ଼େଙ୍ଗ୍ ସମୟ୍ତେ ଅଡ଼୍ ପ୍ରତି ବାତ୍ ଗଟେମ୍ ଆଦ୍ତେ ଆଦ୍ କେତିତଣ୍ଡ୍ । ୨:୧-୨୨
୪. ପିତର୍ ଜିସୁ କ୍ରିଷ୍ଟନ୍ ମେଣ୍ଡେଅନ୍ଦାମ୍ ସେଙ୍ଗେ ତିଆର୍ଆସ୍ ମାଞ୍ଜ୍ ସାୟେ ଜିୱୁଣ୍ଡ୍ ବାଦ୍କାନଙ୍କ୍ ସାହାସ୍ ଇଦ୍ତଣ୍ଡ୍ । ୩:୧-୧୭
୧
୧ ଶିମୋନ୍ ପିତର୍ତେ ଚିଟି; ଜିସୁ କ୍ରିଷ୍ଟନ୍ ୱେରଣ୍ଡ୍ ଦାସ ନୁ ପ୍ରେରିତ, ବେନଡ଼୍ ମାନ୍ ଇଶ୍ୱର୍ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନ୍ ଦାର୍ମାମ୍ତେ ସେଙ୍ଗେ ବିଶ୍ୱାସ୍ ଲେକାମ୍ ନାର୍ଗେ ଦାନାମ୍ ଦାନ ପାଏମ୍ ଆତ୍ତଡ଼୍, ଅଡ଼୍ ଗାରେ ଇଦ୍ ଚିଟି ଲେକୁତଣ୍ଡ୍ ।
୨ ଇଶ୍ୱର୍ ନୁ ମାନ୍ ପ୍ରବୁ ଜିସୁ କ୍ରିଷ୍ଟନ୍ ବିଷୟ୍ତେ ମିୟାଦ୍ ଜ୍ଞାନ୍ ତଡ଼୍, ପୁରାପୁରି ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଆୟି ।
ଇଶ୍ୱର୍ କାର୍ଙ୍ଗାନାଦ୍ ନୁ ଏଞ୍ଚାନାଦ୍
୩ ଲେକେତ୍ ଦାର୍ମାମ୍ ଜିୱେ ବାଦ୍କାନ୍ ସେଙ୍ଗେ ମାନାଙ୍କ୍ ବାତ୍ସାରେ ଦର୍କାଡ଼୍, ଆଦ୍ ଇଶ୍ୱର୍ ନିଜର୍ ସ୍ୱର୍ଗୀୟ ଶକ୍ତିତେ ମାନାଙ୍କ୍ ଦାନ ମାଡ଼୍ତନ୍ । ବେନ ନିଜର୍ ମୟିମା ନୁ ଦାର୍ମାମ୍ତାଗ୍ ବାଗିଦାର୍ ଆଦାନ୍ ସେଙ୍ଗେ ମାନାଙ୍କ୍ ଆହ୍ୱାନ୍ ମାଡ଼୍ତନ୍, ଅଙ୍କ୍ ପୁତ୍ତାଙ୍କ୍ ମାମେ ଇଦ୍ ଦାନ ପାଏମ୍ ଆତ୍ତମ୍ । ୪ ଇଦ୍ଲେକାମ୍ ଅଣ୍ଡ୍ ମାନାଙ୍କ୍ ଅନ୍ ଇଚ୍ଛାଲେକାମ୍ ଲେକେତ୍ ମହାନ୍ ନୁ ମୁଲ୍ୟବାନ୍ ଦାନ ଇତ୍ତନ୍ । ଇଦ୍ ସାରେ ଦାନ ତଡ଼୍ ମିଡ଼୍ ଇଦ୍ ଜଗତ୍ତେ ଦଂଚକାରି କାମ୍ତାଗାଙ୍କ୍ ଉଦ୍ଦାର୍ ଆସ୍ ସ୍ୱର୍ଗତାଦ୍ ସ୍ୱଭାବ୍ତାଗ୍ ଅଂଶି ଆଦେ ପାର୍ଦ୍ତିଡ଼୍ । ୫ ଆଦିନ୍ ସେଙ୍ଗେ ମିୟାଦ୍ ବିଶ୍ୱାସ୍ ତଡ଼୍ ସାୟେତ୍ ଗୁନାମ୍; ସାୟେତ୍ ଗୁନାମ୍ ତଡ଼୍ ଜ୍ଞାନ୍; ୬ ଜ୍ଞାନ୍ ତଡ଼୍ ନିଜର୍ ଗାଡ଼୍ସ୍; ନିଜର୍ ଗାଡ଼୍ସ୍ ତଡ଼୍ ସୟେମ୍ ଆଦାନାଦ୍; ସୟେମ୍ ଆଦାନାଦ୍ ତଡ଼୍ ଇଶ୍ୱର୍ପରାୟଣ; ୭ ଇଶ୍ୱର୍ପରାୟଣ ତଡ଼୍ ଦାଦାଲ୍ତାମୁଣ୍ଡ୍ ସ୍ନେହ ନୁ ଦାଦାଲ୍ତାମୁଣ୍ଡ୍ ସ୍ନେହ ତଡ଼୍ ପ୍ରେମ କାଲ୍ପାନଙ୍କ୍ ଜିୱୁଣ୍ଡ୍ ଇସ୍ ଚେଷ୍ଟା ମାଡ଼ାଟ୍ । ୮ ଇୱୁ ସାୟେତ୍ ଗୁନାମ୍ ମିକିଂଙ୍କ୍ ଦର୍କାର୍ ଆଦ୍ତେ; ଇୱୁସାରେ ମିୟାଗ୍ ମାତ୍କେ, ମିଡ଼୍ ପାଏମ୍ ଆତ୍ତେ ପ୍ରବୁ ଜିସୁ କ୍ରିଷ୍ଟନ୍ ଜ୍ଞାନ୍ ମିକିଙ୍କ୍ ସକ୍ରିୟ ନୁ ସଫଳ ମାଡ଼ି ନେଃଏତିତନ୍ । ୯ ଇତ୍କେ ଇୱୁସାରେ ଗୁନାମ୍ ବେନନାଗ୍ ଇଲ୍ଲେ, ଅଣ୍ଡ୍ କାନାଲ୍ ନୁ ଗାଟି ଜେକେ ଉଡ଼ାନଙ୍କ୍ ପାର୍ୱଣ୍ଡ୍; ଅଦିନ୍ ମୁନେଙ୍କ୍ ମାଡ଼୍ତେ ସାରେ ପାପ୍ତାଗାଙ୍କ୍ ପରିଷ୍କାର୍ ଆତ୍ତେ ଇଞ୍ଜ ଅଣ୍ଡ୍ ମାର୍ଙ୍ଗ୍ତନ୍ ।
୧୦ ଆଦିନ୍ସେଙ୍ଗେ, ଆ ଦାଦାନଡ଼ି ନୁ ଏଲାସ୍କ୍, ଇଶ୍ୱର୍ ଯେ ମିକିଙ୍କ୍ ଏଞ୍ଚିମିକା କାର୍ଙ୍ଗ୍ତଣ୍ଡ୍; ଇଦ୍ ଆନୁବୁତିତିଙ୍କ୍ ସାରେଦିନା ମାଡ଼୍ନ୍ ସେଙ୍ଗେ ଅଦିକ୍ ଯତ୍ନବାନ୍ ଆୟ୍ମୁଟ୍ । ଇଦ୍ଲେକାମ୍ ମାଡ଼୍କେ, ମିଡ଼୍ ବେସୁଙ୍କ୍ ମୀଇ ବିଶ୍ୱାସ୍ତାଗାଙ୍କ୍ ୱେରେ ଆୟ୍ୱିଡ଼୍ । ୧୧ ଇଦ୍ ଉପାୟତେ ମାନ୍ ପ୍ରବୁ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନ୍ ଅନନ୍ତ ରାଜ୍ୟତାଗ୍ ନେଙ୍ଗାନ୍ ସେଙ୍ଗେ ମିଡ଼୍ ପୁରା ଅଦିକାର୍ ପାଏମ୍ ଆଦ୍ତିଡ଼୍ ।
୧୨ ଯଦିବା ମିଡ଼୍ ଇଦ୍ ସାରେ ବିଷୟ ପୁତ୍ତିଡ଼୍ ନୁ ମିୟାଦ୍ ପାଏମ୍ ଆସ୍ମାନ୍ଦାନ୍ ସତ୍ତେ ଡୁଟାଙ୍ଗ୍ ତିଆର୍ ଆତ୍ତିଡ଼୍, ଇୱୁସାରେ ଗଟି ନାନେ ସାରେଦାମ୍ ମିକିଙ୍କ୍ ଏର୍କା ୱାଟିଦାନଙ୍କ୍ ଇଚ୍ଛା ମାଡ଼ୁତାନ୍ । ୧୩ ନାନେ ଜିୱେ ମାନ୍ନା ଯାକ ଇୱୁସାରେ ବିଷୟ ସେଙ୍ଗେ ମିକିଙ୍କ୍ ଚେତନା ମାଡ଼ାନାଦ୍ ନା ସେଙ୍ଗେ ଟିକ୍ ଆଦ୍ତେ ଇଞ୍ଜ ନାନେ ଆଲ୍ସିତାନ୍ । ୧୪ ମା ପ୍ରବୁ ଜିସୁ କ୍ରିଷ୍ଟନାଗାଙ୍କ୍ ଗାଟିସାୟେ ସୁଚନା ପାହେମ୍ ଆସ୍ମାନ୍ଦାନ୍ ଲେକାମ୍ ସିଟ୍ପାଟ୍ ଡଲାନ୍ ମେନ୍ଦୁଲ୍ ୱିଡ଼୍ସିତାନ୍ ଇଞ୍ଜ ନାନ୍ ପୁତ୍ତାନ୍ । ୧୫ ନାୟାଦ୍ ଡଲ୍ତେ ପେର୍କେ ମିକା ମିଡ଼୍ ବେଲା ଇୱୁସାରେ ବିଷୟ ସାରେଦିନା ଏର୍କା ନେଃଏତିତିଡ଼୍, ଇଦିନ୍ ନିୟମ୍ ମାଡ଼ାନଙ୍କ୍ ନାନେ ପାର୍ତେ ଆସର୍ ଚେଷ୍ଟା ମାଡ଼ୁତାନ୍ ।
କ୍ରିଷ୍ଟନ୍ ମହିମାତାଦ୍ ସାକ୍ଷୀ
୧୬ ପ୍ରବୁ ଜିସୁ କ୍ରିଷ୍ଟଙ୍କ୍ ଗୌରବ୍ମୟ ମେଣ୍ଡନ୍ଦାମ୍ ୱାଦାନ୍ ବିଷୟ୍ତେ ମିକିଙ୍କ୍ କେଞ୍ଜ୍ପାନଙ୍କ୍ ମାମେ ଆଲ୍ସ୍ତେ ୱେଷଡ଼୍ ପର ଆସେ ନେଏୱମ୍ । ମାମେ ନିଜର୍ କଣ୍ଡେତାଗ୍ ଅନ୍ ମଇମା ଉଡ଼୍ତମ୍ । ୧୭ ✡ମାତିଉ ୧୭:୧-୫; ମାର୍କ ୯:୨-୭; ଲୁକ ୯:୨୮-3୫.ବାବାଲ୍ ଇଶ୍ୱର୍ ତଡ଼୍ ଅଣ୍ଡ୍ ସମ୍ମାନିତ ନୁ ଗୌରବାନ୍ୱିତ ଆଦାନ୍ ୱେଲେ ମାମେ ଆଗେ ମାତ୍ତମ୍ । ମହାମହିମାତାଗାଙ୍କ୍ ଅନ୍ ବିଷୟ୍ତେ କେସ୍ ମାନ୍ଦାନ୍ ଇଦ୍ ଗଟ୍ ମାମେ କେଞ୍ଜ୍ତମ୍, “ଇଣ୍ଡ୍ ମାନ୍ ପ୍ରିୟ ମାର୍, ଇଣ୍ଡ୍ ସେଙ୍ଗେ ମାମେ ସନ୍ତୁଷ୍ଟ ।” ୧୮ ମାମେ ଅନ୍ ତଡ଼୍ ଆଦ୍ ପବିତ୍ର ମେଟେତାଗ୍ ପରୁ ମାନ୍ଦାନ୍ ୱେଲେ ମାମେ ନିଜେ ଇଦ୍ ସ୍ୱର୍ଗତେ ଗଟ୍ କେଞ୍ଜ୍ତମ୍ ।
୧୯ ଆଦିଙ୍କ୍ ବାବବାଦିନଡ଼୍ତଡ଼୍ ପ୍ରଚାର୍ ମାଡ଼୍ତେ ଗଟ୍ତଡ଼୍ ମାୟାଦ୍ ବିଶ୍ୱାସ୍ ଅଦିକ୍ ଡୁଟାଙ୍ଗ୍ ଆତ୍ତେ । ଅଦିନ୍ ସେଙ୍ଗେ ମିଡ଼୍ ମିକା ମନ୍ ଇଦାନ୍ ଦର୍କାଡ଼୍, ବାତେଙ୍କ୍ଇତ୍କେ ଆଦ୍ ଇକାଡ଼୍ତାଗ୍ ୱେରଡ଼୍ କୁପି ୱେସ୍ ଲେକାମ୍ । ବାଲ୍ୱିୟ୍ତେ ୱେଲେପେୟ୍ତାନ୍ ଉକାକିନ୍ ୱେସ୍ ମୀଇ ହୃଦୟତାଗ୍ ପେଇନା ଯାକ ଇଦ୍ ନିଡ଼୍ସ ମାନ୍ତେ । ୨୦ ମିଡ଼୍ ଇଦ୍ ଇସର୍ ପୁଞ୍ଜ୍ ମାନୁଟ୍ ଯେ, ଦର୍ମଶାସ୍ତ୍ରତାଗ୍ ଲେକାମାନ୍ଦାନ୍ ବେନେବା ବାବବାଣୀ ବେନ ନିଜର୍ ଜ୍ଞାନ୍ତେ ବୁଜେମ୍ ଆଦାନଙ୍କ୍ ପାର୍ୱଣ୍ଡ୍ । ୨୧ ବାବବାଣୀ ମାତର୍ ନାରୁନ୍ ଆଲ୍ସାନ୍ ଲେକାମ୍ ଆୟ । ଇଶ୍ୱର୍ତେ ବକ୍ତ ଦାସନଡ଼୍ ପବିତ୍ରଆତ୍ମା ତଡ଼୍ ପରିଚାଲିତ୍ ଆସ୍ ଇଶ୍ୱର୍ତାଗାଙ୍କ୍ ପାଏମ୍ ଆସ୍ମାନ୍ଦାନ୍ କାବୁର୍ ପ୍ରକାଶ୍ ମାଡ଼୍ତଡ଼୍ ।
✡୧:୧୭ ମାତିଉ ୧୭:୧-୫; ମାର୍କ ୯:୨-୭; ଲୁକ ୯:୨୮-3୫.