ଥେସଲନୀୟ ବିଶ୍ୱାସୀମାନଙ୍କ ନିକଟକୁ ପାଉଲଙ୍କ ଦ୍ୱିତୀୟ ପତ୍ର
ଥେସଲନିୟ ବିଶ୍ୱାସୀଡ଼୍ ଗାର୍ରେ ପାଉଲ୍ତେ ଦ୍ୱିତିୟ ଚିଟି
୨ ଥେସଲନିୟ ବିଷୟ୍ତେ ଅଣ୍ଡୟ୍ ପଦ୍
ଥେସଲନିୟ ମଣ୍ଡଲି ଗାର୍ରେ ଦ୍ୱିତିୟ ଚିଟି ପ୍ରେରିତ୍ ପାଉଲ୍ତଡ଼୍ ଲେକ୍ତାଦ୍ ଆସ୍ମାତ୍ତେ ୧:୧ । ପ୍ରତମ୍ ଥେସଲନିୟତେ ସୁଦୁଟ୍ ଦିନାମ୍ ପେର୍କେ କ୍ରିଷ୍ଟନ୍ ଜନମ୍ତେ ୫୧ ଏଣ୍ଡ୍କ୍ ପେର୍କେ ଇଦ୍ ଚିଟି ଲେକିମାତ୍ତଣ୍ଡ୍ । ପାଉଲ୍ ବେସୁଟ୍ ଥେସଲନିକିୟ ମଣ୍ଡଲିକିଙ୍କ୍ ଚିଟି ଲେକ୍ତଣ୍ଡ୍, ଆସୁଟେ ଅଣ୍ଡ୍ କରନ୍ତିୟ ମଣ୍ଡଲିତାଗ୍ ମାତ୍ତଣ୍ଡ୍ । ବେନ୍ ମଣ୍ଡଲି ଅଣ୍ଡ୍ ଦ୍ୱିତିୟ ମିଶନାରୀ ଆଦାନ୍ୱେଲେ ନିଲ୍ସ୍ପି ମାତ୍ତଣ୍ଡ୍ ପ୍ରେରିତ ୧୭:୧-୧୦ ।
ପ୍ରେରିତ୍ ବଇତାଗ୍ କେତାନଙ୍କ୍ ଆଦ୍ତେ ଯେ, ବେସ୍କ୍ତୁଡ଼୍ ଯିହୁଦୀ ନୁ ନାର୍ଗେ ଗ୍ରୀକ୍ ଗଟ୍ କେସମାନ୍ଦାନ୍ ନାରୁଡ଼୍ତଡ଼୍ ଇଦ୍ ଥେସଲନିୟ ମଣ୍ଡଲି ନିଲ୍ସ୍ପି ମାତ୍ତଡ଼୍ । ଥେସଲନିକିୟ ମଣ୍ଡଲି ଗାର୍ରେ ଲେକ୍ତାଦ୍ ଆସ୍ମାନ୍ଦାନ୍ ଚିଟିତାଗ୍ କ୍ରିଷ୍ଟନ୍ ୱାଦାନାଦ୍ ନୁ ମାଡ଼େଙ୍କ୍ତେ ୱେଲେତ୍ ବିଷୟ୍ ଲେକ୍ତାଦ୍ ମିନ୍ଦେ । ବାତେଙ୍କ୍ଇତ୍କେ ପାଉଲ୍ ରେଣ୍ଡ୍ ତାନ୍ ଚିଟିତାଗ୍ ଥେସଲନିକିୟ ମଣ୍ଡଲି ଗାର୍ରେ ଇଦ୍ ଦ୍ୱିତୀୟଦାମ୍ ୱାଦାନାଦ୍ ବିଷୟ୍ତେ ନାର୍ଗେ ବିଷୟ୍ ଲେକିମିନ୍ଦେଣ୍ଡ୍ । ଦ୍ୱିତିୟ ଥେସଲନିୟତାଗ୍ ଲେକ୍ତାଦ୍ ବିଷୟ୍ ଗାରେଗାରେ ଦୁଡ଼ା ବିଷୟ୍ ମାଡ଼େଙ୍କ୍ତେ ୱେଲେତ୍ ବିଷୟ୍ । ପାଉଲ୍ ଗାଲା ମିଟିଙ୍କ୍ ବିଷୟ୍ତେ ସତର୍କ ମାଡ଼ୁତଣ୍ଡ୍ । ସାର୍ରେ ନାରୁଡ଼୍ ତାମ୍ କାଦି ସେଙ୍ଗେ ପାଡ଼୍ୟି ମାଡ଼ାନାଦ୍ ସାୟେ ୩:୬-୧୦ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ପାଉଲ୍ ତାନ୍ ଚିଟିତାଗ୍ ନିଜେତ୍ ନୁ ତାନ୍ତଡ଼୍ ପାଡ଼୍ୟିମାଡ଼ାନଡ଼ାଦ୍ ପରିଚୟ୍ ଇସ୍ ଆରାମ୍ ମାଡ଼ିତନ୍ । ୧:୧-୨
୨. ନୁ ଥେସଲନି ମଣ୍ଡଲି ସେଙ୍ଗେ ଇଶ୍ୱର୍ତିଙ୍କ୍ ଦନ୍ୟବାଦ୍ ଇଦ୍ତଣ୍ଡ୍ ନୁ ପ୍ରାର୍ତନା ମାଡ଼ିତନ୍ । ୧:୩-୧୨
୩. ଦ୍ୱିତିୟ ଅଦ୍ୟାୟତେ ଜଗତ୍ତେ ମାଡ଼େଙ୍କ୍ତେ ୱେଲେତ୍ ବିଷୟ୍ତେ କେତିତଣ୍ଡ୍ । ୨
୪. ନୁ ଅଣ୍ଡ୍ ମଣ୍ଡି ବିରୁଦ୍ତେ ନୁ ଗାଟି ପାଡ଼୍ୟି ମାଡ଼ାନ୍ ବିଷୟ୍ତେ କେତିତଣ୍ଡ୍ । ୩:୧-୧୫
୫. ପାଉଲ୍ ମେଣ୍ଡଅନ୍ଦାମ୍ ମଣ୍ଡଲିତେ ନାରୁଡ଼୍କିଂଙ୍କ୍ ନମସ୍କାର୍ ମାଡ଼ି ତେର୍ସ୍ପିତଣ୍ଡ୍ । ୩:୧୬-୧୮
୧
୧ ✡ପ୍ରେରିତ ୧୭:୧.ନାନ୍ ପାଉଲ୍, ସିଲେ ନୁ ତୀମତି ମାନ୍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନାଗେ ମାନ୍ଦାନ୍ ଥେସଲନିକୀ ମଣ୍ଡଲି ପାକେ ଚିଟି ଲେକ୍ତାନ୍ ।
୨ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
କ୍ରିଷ୍ଟ ୱାଦାନାଦ୍ ନୁ ବିଚାର୍
୩ ହୋ ଦାଦାନଡ଼ି ନୁ ଏଲାସ୍କ୍ ! ମିଇ ସେଙ୍ଗେ ଇଶ୍ୱର୍ତିଙ୍କ୍ ସାରେଦାମ୍ ଦନ୍ୟବାଦ୍ ଇଦାନ୍ ମାୟାଦ୍ ଲେକାମ୍, ମେଣ୍ଡେ ଆଦ୍ ଲେକାମ୍, ବାତେଙ୍କ୍ ଇତ୍କେ ମିୟାଦ୍ ବିଶ୍ୱାସ୍ ଲେକାମ୍ ନାର୍ଗେ ଆସମିନ୍ଦେ, ନିଜେ ନିଜେତ୍ ଲୋପେ ମୀଡ଼୍ ସାରେତଡ଼୍ ୱେରନ୍ ୱେର୍ର ପ୍ରେମ ଅଦିକ୍ ଆସ୍ମିନ୍ଦେ । ୪ ଇଦ୍ଲେକାମ୍ ମୀଡ଼୍ ବେନ୍ସାରେ ତାଡ଼ନା ନୁ କଷ୍ଟ ଆଦୁତିଡ଼୍, ଆଗେକ୍ ମିୟାଦ୍ ସାରେ ନୁ ବିଶ୍ୱାସ୍ତେ ସେଙ୍ଗେ ମାମ୍ମେ ନିଜେତ୍ ଇଶ୍ୱର୍ତେ ମଣ୍ଡଲି ମୁନେ ମିଇ ବିଷୟ୍ତେ କେତିତମ୍ ।
୫ ଇଶ୍ୱର୍ତେ ବେନ୍ ରାଜ୍ୟ ସେଙ୍ଗେ ମୀଡ଼୍ ଦୁଃକାମ୍ ମାଡ଼ୁତିଡ଼୍, ଆଗେତ୍ ଯୋଗ୍ୟ ଇଞ୍ଜ୍ ଆତ୍ତାଙ୍କ୍ ସେଙ୍ଗେ ଇଦ୍ ତ ଇଶ୍ୱର୍ତେ ଟିକ୍ ବିଚାର୍ତେ ସାରେତାଦ୍ ପ୍ରମାନ୍ । ୬ ବାତେଏ ଟିକ୍ ଆଦ୍ ଇଶ୍ୱର୍ ମାଡ଼ିତନ୍ । ବେନ ନାରୁଡ଼୍ ମିକିଂଙ୍କ୍ କଷ୍ଟ ଇତ୍ତଡ଼୍ ଇଶ୍ୱର୍ ଅଡ଼୍କିଂଙ୍କ୍ କଷ୍ଟ ଇଦ୍ତନ୍ । ୭ ଇଶ୍ୱର୍ ମିୟାଦ୍ ତିପାଲ୍ତିଙ୍କ୍ ଶେଷ୍ ମାଡ଼ିତନ୍, ମାନ୍ ଗାଲା ସାନ୍ତନା ମାଡ଼ିତନ୍ । ଇଶ୍ୱର୍ ଇଦ୍ ପାଡ଼୍ୟି ସାଦନ୍ ମାଡ଼ିତନ୍, ବେସୁଟ୍ ପ୍ରବୁ ଜିସୁ ତାନ୍ ବେଡ଼୍ୟାଦ୍ ପରାକ୍ରାନ୍ତ ଦୂତନ୍ ତଡ଼୍ ସ୍ୱର୍ଗତାଗାଙ୍କ୍ ଡିଗିତଣ୍ଡ୍ । ୮ ବେନଡ଼୍ ଇଶ୍ୱର୍ତିଙ୍ଗ୍ ପୁନଡ଼୍ ନୁ ମାନ୍ ପ୍ରବୁ ଜିସୁନ୍ ସୁସମାଚାର୍ ମାନେମ୍ ଆୟ୍ୟଡ଼୍, ଅଡ଼୍କିଂଙ୍କ୍ ଅଣ୍ଡ୍ ନିଡ଼୍ତାନାଦ୍ କିସ୍ତାଗ୍ ଦଣ୍ଡ୍ ହିଦ୍ତନ୍ । ୯ ଆଦ୍ ନାରୁଡ଼୍ ପ୍ରବୁନ୍ ଶାନ୍ତି, ପରାକ୍ରମ୍ ନୁ ଗୌରବ୍ ତାଗାଙ୍କ୍ ୱେରେ ଆସ୍ ସାରେଦିନାତ୍ ସେଙ୍ଗେ ବିନଷ୍ଟ ଆଦ୍ତଡ଼୍ । ୧୦ ବାତେଙ୍କ୍ ଇତ୍କେ ଆଦ୍ ଦିନ୍ ଅନ୍ ତାନ୍ ନାରିଡ଼୍ ଡ଼ାଗାଙ୍କ୍ ନୁ ସାରେ ବିଶ୍ୱାସି ନଡ଼୍ଗାଙ୍କ୍ ସମ୍ମାନ୍ ନୁ ଗୌରବ୍ ପାଏମ୍ ଆଦ୍ତଡ଼୍ । ଇଡ଼୍ ଲୋପେ ମିଡ଼୍ଆନ୍ନ୍ତେ କାଇଲିତିଡ଼୍, ବାତେଙ୍କ୍ ଇତ୍କେ ମାମ୍ ମିକିଂଙ୍କ୍ ବେନ୍ସାରେ କାବୁର୍ ଇସ୍ ମାତ୍ତମ୍, ଆଗେ ମିଡ଼୍ ବିଶ୍ୱାସ୍ ମାଡ଼୍ତିଡ଼୍ ।
୧୧ ମାନ୍ ଇଶ୍ୱର୍ ବେଦ୍ଲେକାମ୍ ମିକିଂଙ୍କ୍ ନିଜେ କାର୍ଙ୍ଗ୍ତଣ୍ଡ୍ ଯୋଗ୍ୟ ହିଞ୍ଜ ଗଣନା ମାଡ଼ିତନ୍, ମେଣ୍ଡେ ସାରେ ସାୟେ ପାଡ଼୍ୟି ନୁ ବିଶ୍ୱାସତେ ପାଡ଼୍ୟି ଶକ୍ତିତେ ସିଦ୍ଦ ମାଡ଼ିତନ୍, ଆଦିନ୍ ସେଙ୍ଗେ ମାମ୍ମେ ସାରେଦାମ୍ ମିଇ ସେଙ୍ଗେ ପ୍ରାର୍ତନା ମାଡ଼ୁତମ୍ । ୧୨ ଆଲେକେ, ମାନ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ତାଗାଙ୍କ୍, ନିମ୍ ମା ପ୍ରବୁ ଜିସୁନ୍ ପେଦେର୍ତିଙ୍କ୍ ଗୌରବ୍ ମାଡ଼୍କେ ନୁ ମିକିଂଙ୍କ୍ ଆନ୍ତେ ଅଣ୍ଡ୍ ଗୌରବ୍ ମାଡ଼ିତନ୍ ।
✡୧:୧ ପ୍ରେରିତ ୧୭:୧.