୧୮
କରିନ୍ଥ ଟାୱୁନ୍ତାଗ୍ ପାଉଲ୍ତେ ସେବାପାଡ଼୍ୟି
୧ ଇଦିନ୍ପେର୍କେ ପାଉଲ୍ ଆଥେନ୍ସ୍ ୱିଡ଼୍ସି କରିନ୍ଥୀୟତାଗ୍ ଆତ୍ତଣ୍ଡ୍ । ୨ ଆଗେ ଅଣ୍ଡ୍ ପନ୍ତସ୍ତାଗ୍ ଜନମ୍ ମାଡ଼ିମାନ୍ଦାନ୍ ଆକ୍ୱିଲା ପେଦେର୍ତଣ୍ଡ୍ ୱେରଣ୍ଡ୍ ଇହୁଦୀଙ୍କ୍ କାଇଲ୍ତଣ୍ଡ୍ । ସମ୍ରାଟ୍ କ୍ଲଡିୟସ୍ ସାରେତଡ଼୍ ଇହୁଦୀଡ଼୍କ୍ ରୋମ୍ ୱିଡ଼୍ସାନଙ୍କ୍ ଗଟ୍ ହିତ୍ତାଙ୍କ୍, ଅଣ୍ଡ୍ ବେସ୍କ୍ଦିନା ମୁନେନ୍ ତାନ୍ ମୁତ୍ତେ ପ୍ରିସ୍କିଲାନ୍ ତଡ଼୍ ଇତାଲିଆକନ୍ସ୍ ୱାସ୍ମାତ୍ତଣ୍ଡ୍ । ୩ ପାଉଲ୍ ଅଂକିଙ୍କ୍ ଉଡ଼ାନଙ୍କ୍ ଆଞ୍ଜ୍ ଅଡ଼୍ ତଡ଼୍ ବାସେ ମାଡ଼୍ତଣ୍ଡ୍, ବାତେଙ୍କ୍ଇତ୍କେ ଅଣ୍ଡ୍ ଗାଲା ଅଡ଼୍ ଲେକାମ୍ ତମ୍ବୁ ତିଆର୍ ମାଡ଼ି ବାଦ୍କମାତ୍ତଣ୍ଡ୍ । ୪ ଇହୁଦୀ ଇତ୍କେ ଗ୍ରୀକ୍ ନାରୁଡ଼୍ତେ ମନ୍ତାଗ୍ ପ୍ରବୁଙ୍କ୍ ବିଶ୍ୱାସ୍ ମାଡ଼ାନ୍ ମାଇଦିଙ୍କ୍ ସାରେ ବିଶ୍ରାମ୍ଦିନ୍ ଅଣ୍ଡ୍ ପ୍ରାର୍ତନା ଲୋତ୍ତାଗ୍ ଆଲୋଚନା ମାଡ଼ମାତ୍ତଣ୍ଡ୍ ।
୫ ଶୀଲା ନୁ ତୀମତି ମାସିଦୋନିଆତାଗାଙ୍କ୍ ମାଲ୍ସ୍ ୱାତ୍ତେ ପେର୍କେ ପାଉଲ୍ ଇହୁଦୀଡ଼୍ ଗାର୍ରେ ଜିସୁନ୍ ସୁସମାଚାର୍ ପ୍ରଚାର୍ ମାଡ଼୍ତଣ୍ଡ୍ ନୁ ଜିସୁଙ୍କ୍ ମସୀହ ଇଞ୍ଜ କେତ୍ତାନ୍ ସେଙ୍ଗେ ସାକ୍ଷ୍ୟ ହିତ୍ତଣ୍ଡ୍ । ୬ ଇତ୍କେ ଅଡ଼୍ ଅଂକିଙ୍କ୍ ଅତ୍ୟାଚାର୍ ମାଡ଼ି ଅଂକିଙ୍କ୍ ନିନ୍ଦେ ମାଡ଼୍ତାଙ୍କ୍, ଇଦିନାଦ୍ ପ୍ରତିବାଦ୍ ମାଡ଼ି ଅଣ୍ଡ୍ ନିଜେତ୍ ସକେତାଦ୍ ଦୁମ୍ କାଇସ୍ ଅଡ଼୍କିଂଙ୍କ୍ କେତ୍ତଣ୍ଡ୍, “ଯଦି ମିଡ଼୍ ଦଂସଆଦ୍ତିଡ଼୍, ଆଲେକେ ମିଡ଼୍ ନିଜେ ଦାୟି ଆଦ୍ତିଡ଼୍ । ନାନ୍ ଇଦିନ୍ ମାଇଦିଙ୍କ୍ ଦାୟି ଆୟନ୍ । ଇଞ୍ଜେ ନାନ୍ ଅଣଇହୁଦୀଡ଼୍ ଗାର୍ରେ ଆଦ୍ତାନ୍ ।” ୭ ଆଦିଙ୍କ୍ ଅଣ୍ଡ୍ ଅଡ଼୍କିଂଙ୍କ୍ ୱିଡ଼୍ସି ଇଶ୍ୱର୍ତିଙ୍କ୍ ଉପାସନା ମାଡ଼ମାନ୍ଦାନ୍ ତିତସ୍ ଯୁସ୍ତ ପେଦେର୍ତେ ୱେରଣ୍ଡ୍ ଅଣଇହୁଦୀନ୍ ଲୋନ୍ ଆତ୍ତଣ୍ଡ୍ । ଯୁସ୍ତନ୍ ଲନ୍ ଗୁଡ଼୍ୟିତେ ବକେତ୍ ମାତ୍ତେ । ୮ ଗୁଡ଼୍ୟିତେ ବାଡ଼୍ୟଣ୍ଡ୍ କ୍ରିଷ୍ଟପସ୍ ନୁ ତାମ୍ ପରିବାର୍ତେ ସାରେତଡ଼୍ ପ୍ରବୁନାଗ୍ ବିଶ୍ୱାସ୍ ମାଡ଼୍ତଡ଼୍ ନୁ କରନ୍ଥିୟତେ ମେଣ୍ଡେ ନାର୍ଗେ ନାରୁଡ଼୍ ପାଉଲ୍ତେ ଶିକ୍ଷା କେଞ୍ଜି ବିଶ୍ୱାସ୍ ମାଡ଼୍ତଡ଼୍ ନୁ ବାତିସ୍ମ ଆତ୍ତଡ଼୍ ।
୯ ଅଣ୍ଡୟ୍ ନାର୍କେ ପାଉଲ୍ ଅଣ୍ଡୟ୍ ଦର୍ଶନ୍ ଉଡ଼୍ତଣ୍ଡ୍, ଦର୍ଶନ୍ତାଗ୍ ପ୍ରବୁ ଅଂକିଙ୍କ୍ କେତ୍ତଣ୍ଡ୍, “ୱେର୍ମା, ପ୍ରଚାର୍ ମାଡ଼ମାନ୍, ଆଦିଙ୍କ୍ ୱିଡ଼୍ସ୍ମା, ୧୦ ବାତେଙ୍କ୍ଇତ୍କେ ନାନ୍ ନି ତଡ଼୍ ତଡ଼୍ ମିନ୍ଦେନ୍ । ବେନ ନିୟାଦ୍ କ୍ଷତି ମାଡ଼ାଙ୍କ୍ ପାର୍ୱଣ୍ଡ୍, ବାତେଙ୍କ୍ଇତ୍କେ ଇଦ୍ ନଗର୍ତାଗ୍ ନାର୍ଗେ ନାରୁଡ଼୍ ନାୟାଗ୍ ମିନ୍ଦେଡ଼୍ ।” ୧୧ ଆଦିଙ୍କ୍ ପାଉଲ୍ ଆଗେ ଇଶ୍ୱର୍ତେ ବାକ୍ୟ ବିଷୟ୍ତେ ଶିକ୍ଷା ଇସ୍ ଅଣ୍ଡୟ୍ ହେଣ୍ଡ୍ ଆରୁ ନେଲ୍ଞ୍ଜ୍କ୍ ମାତ୍ତଣ୍ଡ୍ ।
୧୨ ଗାଲିୟୋ ଆକାୟାତେ ରୋମୀୟ ଶାସନ୍ ମାଡ଼ାନଣ୍ଡ୍ ମାନ୍ଦାନ୍ ୱେଲେ, ଇହୁଦୀଡ଼୍ ଅଣ୍ଡୟାଗେ ହାସ୍ ପାଉଲ୍ତିଙ୍କ୍ ପଇସ୍ ବିଚାର୍ ଲୋତ୍ତାଗ୍ ଆତ୍ତଡ଼୍ । ୧୩ ଅଡ଼୍ କେତ୍ତଡ଼୍, “ଇ ନାରୁଣ୍ଡ୍ ମୋଶାନ୍ ନିୟମ୍ ବିରୁଦ୍ ରୀତିତେ ଇଶ୍ୱର୍ତେ ଉପାସନା ମାଡ଼ାନଙ୍କ୍ ନାରୁଡ଼୍କିଂଙ୍କ୍ କେତୁତଣ୍ଡ୍ ।”
୧୪ ପାଉଲ୍ ଉତ୍ତର୍ ହିଦାଙ୍କ୍ ତିଆର୍ ଆତ୍ତେ ୱେଲେ, ଗାଲିୟୋ ଇହୁଦୀଡ଼୍କ୍ କେତ୍ତଣ୍ଡ୍, “ଯଦି ଇଗେ ବାତ୍ ଦଷ୍ ବା ଅପରାଦ୍ ମାନ୍ତେ, ଆଲେକେ ମିକିଂଙ୍କ୍ ବିଶ୍ୱାସ୍ ମାଡ଼ି ମିଇ ଗଟି କେଞ୍ଜାନାଦ୍ ନାକିଂଙ୍କ୍ ଯୁକ୍ତିତର୍କ ଆଦ୍ତେ । ୧୫ ଇତ୍କେ ଇଦ୍ ମାମଲା ମାତର୍ ମିୟାଦ୍ ନିଜେତ୍ ନିତିନିୟମ୍, ବାକ୍ୟ ନୁ ପେଦେର୍ତେ ମାଇଦିଙ୍କ୍ ଆସ୍ ମାନ୍ଦାନ୍ ସେଙ୍ଗେ ମିଡ଼୍ ନିଜେ ଇଦିନାଦ୍ ବିଚାର୍ କର୍ତ୍ତାଲ୍ । ନାନ୍ ମୋଶାନ୍ ନିୟମ୍ ବିଷୟ୍, ବିଚାର୍ ମାଡ଼ନ୍ ।” ୧୬ ଇଦ୍ କେସ୍ ଅଣ୍ଡ୍ ଅଡ଼୍କିଂଙ୍କ୍ ବିଚାର୍ ଲୋତ୍ତାଗାଙ୍କ୍ ତଲ୍ତଣ୍ଡ୍ । ୧୭ ଅଡ଼୍ ଉସୁଲ୍ତେ ବାଡ଼୍ୟଣ୍ଡ୍ ସସ୍ଥନସ୍ତିଙ୍କ୍ ପଇସ୍ ବିଚାର୍ ଲୋତ୍ତେ ମୁନ୍ନେ ଦେବ୍ ରେହେତ୍ତଡ଼୍ । ଇତ୍କେ ଗାଲିୟୋ ଆଦ୍ ବିଷୟ୍ତିଙ୍କ୍ ଦ୍ୟାନ୍ ହିୱଣ୍ଡ୍ ।
ପାଉଲ୍ ସିରିୟାତେ ଅନ୍ଥିୟୋକ୍ତାକ୍ ମାଲ୍ତ୍ତଣ୍ଡ୍
୧୮ ପାଉଲ୍ କରିନ୍ଥତାଗ୍ ବିଶ୍ୱାସୀଡ଼୍ ତଡ଼୍ ନାର୍ଗେ ଦିନା ବାସେ ମାଡ଼୍ତଣ୍ଡ୍ । ତାନ୍ପେର୍କେ ଅଡ଼୍କିଂଙ୍କ୍ ୱିଡ଼୍ସି ପ୍ରିସ୍କିଲା ନୁ ଆକ୍ୱିଲାନ୍ ତଡ଼୍ ସିରିଆତାକ୍ ଏର୍ଦାଗ୍ ଆତ୍ତଡ଼୍ । ସେଂକ୍ରିୟାତାଗାଙ୍କ୍ ଏର୍ଦାଲା ୱେୟିଦାନ୍ ମୁନେଙ୍କ୍ ଅନାଦ୍ ଅଣ୍ଡୟ୍ ବ୍ରତ ମାତ୍ତାଙ୍କ୍ ଅଣ୍ଡ୍ ତାନ୍ ତାଲ୍ତିଙ୍କ୍ ଟାଙ୍ଗ୍ରା ମାଡ଼୍ତଣ୍ଡ୍ । ୧୯ ଅଡ଼୍ ଏଫିସସ୍ତାଗ୍ ହେୱୁତ୍ତେ ପେର୍କେ ପାଉଲ୍ ପ୍ରିସ୍କିଲା ନୁ ଆକ୍ୱିଲାତିଙ୍କ୍ ବିଦାୟ୍ ହିତ୍ତଣ୍ଡ୍ । ଅଣ୍ଡ୍ ଆଗେ ପ୍ରାର୍ତନା ସବାତାଗ୍ ଆଞ୍ଜ୍ ଇହୁଦୀଡ଼୍ତଡ଼୍ ଆଲୋଚନା ମାଡ଼୍ତଣ୍ଡ୍ । ୨୦ ନାରୁଡ଼୍ ଅଂକିଙ୍କ୍ ମେଣ୍ଡେ ନାର୍ଗେ ଦିନା ମାନ୍ଦାନଙ୍କ୍ କେତ୍ତଣ୍ଡ୍, ଇତ୍କେ ଅଣ୍ଡ୍ ରାଜି ଆୟଣ୍ଡ୍ । ୨୧ ଆଦ୍ଦାନ୍ ୱେଲେ ଅଣ୍ଡ୍ ଅଡ଼୍କିଂଙ୍କ୍ କେତ୍ତଣ୍ଡ୍, “ଯଦି ଇଶ୍ୱର୍ତାଦ୍ ଇଚ୍ଛା ମାନ୍ତେ, ନାନ୍ ମିଇ ବକେତ୍ ମାଲ୍ସ୍ ୱାଦ୍ତାନ୍ ।” ତାନ୍ପେର୍କେ ଅଣ୍ଡ୍ ଏର୍ଜାହାଜ୍ ତଡ଼୍ ଏଫିସସ୍ ୱିଡ଼୍ସି ଦବ୍ଆତ୍ତଣ୍ଡ୍ ।
୨୨ କାଇସରିଆ ହେୱୁସ୍ ଆଗାଙ୍କ୍ ଅଣ୍ଡ୍ ଯିରୁଶାଲେମ୍ ଆତ୍ତଣ୍ଡ୍ ନୁ ମଣ୍ଡଲିତିଙ୍କ୍ ନମସ୍କାର୍ ମାଡ଼ି ଆଗାଙ୍କ୍ ଅନ୍ଥିୟୋକ୍ ଆତ୍ତଣ୍ଡ୍ । ୨୩ ଆଗେ ବେସ୍କ୍ଦିନା ମାତ୍ତେ ପେର୍କେ ମେଣ୍ଡେ ତାଆକି ଆଞ୍ଜ୍ ଗାଲାତୀୟ ନୁ ଫ୍ରୁଗିୟା ପଡ଼ିୟେତ୍ ନାଡ଼୍ମେ ଇସ୍ ଆତ୍ତଣ୍ଡ୍ ନୁ ହାର୍ଦାଗ୍ ବିଶ୍ୱାସୀଡ଼୍କ୍ ଅଡ଼ାଦ୍ ବିଶ୍ୱାସ୍ ଶିଷ୍ୟ ଗାଡ଼୍ସ୍ ମାନ୍ଦାଙ୍କ୍ ଉତ୍ସାହ ମାଡ଼୍ତଣ୍ଡ୍ ।
ଏପିସସ୍ ନୁ କରିନ୍ଥତାଗ୍ ଆପୋଲ୍ଲୋ
୨୪ ଆଦ୍ ସମୟ୍ତେ ଆଲେକ୍ଜାଣ୍ଡ୍ରିୟାଲ୍ତାଗ୍ ଜନମ୍ ଆତ୍ତେ ଆପୋଲ୍ଲୋ ପେଦେର୍ତଣ୍ଡ୍ ୱେରଣ୍ଡ୍ ଇହୁଦୀ ଏପିସସ୍ତାଗ୍ ୱାତ୍ତଣ୍ଡ୍ । ଅଣ୍ଡ୍ ୱେରଣ୍ଡ୍ ସାୟେତ୍ ନାରୁଣ୍ଡ୍ ନୁ ଦର୍ମଶାସ୍ତ୍ରତାଗ୍ ଅନାଦ୍ ନାର୍ଗେ ବୁଦ୍ ମାତ୍ତେ । ୨୫ ଅଣ୍ଡ୍ ପ୍ରବୁନ୍ ବିଦ୍ୟା ନୁ ଆତ୍ମା ବିଷୟ୍ତେ ଶିକ୍ଷା ପାଏମ୍ ଆସ୍ ମାତ୍ତଣ୍ଡ୍ ନୁ ଗାଟି ୱେଡ଼୍କେତଡ଼୍ ଜିସୁନ୍ ବିଷୟ୍ ଶିକ୍ଷା ହିସ ମାତ୍ତଣ୍ଡ୍ । ଇତ୍କେ ଇଦ୍ ବିଷୟ୍ତେ ଅଣ୍ଡ୍ ମାତର୍ ଯୋହନ୍ତେ ଏର୍ଦିକ୍ଷା ବିଷୟ୍ ପୁଞ୍ଜ୍ ମାତ୍ତଣ୍ଡ୍ । ୨୬ ପ୍ରାର୍ତନାତାଗ୍ ଅଣ୍ଡ୍ ସାହାସ୍ ତଡ଼୍ ଶିକ୍ଷା ହିଦାଙ୍କ୍ ପସ୍ସ୍ପ୍ତଣ୍ଡ୍ । ଅନାଦ୍ ଶିକ୍ଷା କେଞ୍ଜି ପ୍ରିସ୍କିଲା ନୁ ଆକ୍ୱିଲା ତାମ୍ ଲୋନ୍ ଆତ୍ତଡ଼୍ ନୁ ଆଗେ ଅଂକିଙ୍କ୍ ଇଶ୍ୱର୍ତେ ବିଦ୍ୟା ବିଷୟ୍ ସାୟେ ବୁଜାମାଡ଼୍ତଡ଼୍ । ୨୭ ତାନ୍ପେର୍କେ ଆପୋଲ୍ଲୋ ଆକାୟା ପ୍ରଦେଶ୍ତାଗ୍ ଆଦାନଙ୍କ୍ ତିଆର୍ ଆତ୍ତାଙ୍କ୍, ଏପିସସ୍ତେ ବିଶ୍ୱାସୀ ଶିଷ୍ୟ ଅଂକିଙ୍କ୍ ସାହାଯ୍ୟ ମାଡ଼୍ତଡ଼୍ ନୁ ଅଂକିଙ୍କ୍ ଗ୍ରହନ୍ ମାଡ଼ାନ୍ ମାଇଦିଙ୍କ୍ ଅନୁରଦ୍ ମାଡ଼ି ଆକାୟାତେ ବିଶ୍ୱାସୀଡ଼୍କିଙ୍କ୍ ଚିଟି ଲେକ୍ତଣ୍ଡ୍ । ଅଣ୍ଡ୍ ଆଗେ ଏୱୁସ୍ ଇଶ୍ୱର୍ତେ ଅନୁଗ୍ରହତଡ଼୍ ବିଶ୍ୱାସୀ ଆସ୍ ମାନ୍ଦାନ୍ ନାରୁଡ଼୍କିଂଙ୍କ୍ ନାର୍ଗେ ସାହାଯ୍ୟ ମାଡ଼୍ତଣ୍ଡ୍ । ୨୮ ଜିସୁ ଯେ ମସୀହ, ଅଣ୍ଡ୍ ସାହାସ୍ତଡ଼୍ ଯୁକ୍ତି ମାଡ଼ି ଦର୍ମଶାସ୍ତ୍ରତାଗ୍ ଇଦ୍ ପ୍ରମାନ୍ ମାଡ଼ି ବାଷନ୍ ହିଦାନ୍ ୱେଲେ ଅଣ୍ଡ୍ ଇହୁଦୀଡ଼୍କ୍ ହାରାମାଡ଼୍ତଣ୍ଡ୍ ।