କଲସୀୟ ଲୋକମାନଙ୍କ ନିକଟକୁ ପାଉଲଙ୍କ ପତ୍ର
କଲସୀୟ ନାରୁଡ଼୍ ଗାରେ ପାଉଲ୍ତେ ଚିଟି
କଲସିୟ ବଇ ବିଷୟ୍ତେ ଅଣ୍ଡୟ୍ ପଦ୍
କଲସିୟ ଗାରେ ଲେକ୍ତାଦ୍ ଚିଟି ଆଦୁତ୍ ପାଉଲ୍ ତଡ଼୍ ଲେକା ଆତ୍ତାଦ୍ ଚିଟି ୧:୧ । ପାଉଲ୍ ଆଦ୍ପାର୍ତେ ଜିସୁ କ୍ରିଷ୍ଟନ୍ ଜନମ୍ତେ ପେର୍କେ ଗାରେଗାରେ ୬୦ କ୍ରିଷ୍ଟାଦ୍ଦତେ ରମ୍ତାଗ୍ ବନ୍ଦି ମାନ୍ଦାନ୍ ୱେଲେ ଅଣ୍ଡ୍ ଇଦ୍ ଚିଟି ଲେକି ମାତ୍ତଣ୍ଡ୍ । କଲସି ଚିଟି ତଡ଼୍ ଏଫିସିୟ ନୁ ଫିଲିପି ଚିଟିତିଙ୍କ୍ ଜଇଲ୍ ଚିଟି ଇଞ୍ଜ କେତିତଡ଼୍ ବାତେଙ୍କ୍ଇତ୍କେ ପାଉଲ୍ ଜଇଲ୍ତାଗ୍ ମାନ୍ଦାନ୍ ୱେଲେ ଇଦ୍ ଚିଟି ଲେକିମାତ୍ତଣ୍ଡ୍ । ଅଣ୍ଡ୍ କଲସିୟ ଟାୱୁନ୍ତାଗ୍ ମାନ୍ଦାନ୍ ମଣ୍ଡଲିତାଗ୍ ଗାରେ ଇଦ୍ ଚିଟି ଲେକିମାତ୍ତଣ୍ଡ୍ । ପାଉଲ୍ ଅଣ୍ଡ୍ ଇଦ୍ ମଣ୍ଡଲିତିଙ୍କ୍ ଆରାମ୍ ମାଡ଼୍ୱେମାତ୍ତଣ୍ଡ୍ ବେଦ୍ ଅଣ୍ଡ୍ ୨:୧ ଲେକିମିନ୍ଦେଣ୍ଡ୍, କିନ୍ତୁ ନାର୍ଗେ ଆଗେ ତାମ୍ ଦାୟିତ୍ୱତେ ମାନ୍ଦାନ୍ ଗଟ୍ ହେର୍କା ମାଡ଼ିତଣ୍ଡ୍ । ଏପ୍ରାପ୍ରସ୍ ଇଦ୍ ମଣ୍ଡଲି ତିଆର୍ ମାଡ଼ିମାତ୍ତଣ୍ଡ୍ । ଆଦିଙ୍କ୍ ଅଣ୍ଡ୍ କଲସିୟତେ ନାରୁଣ୍ଡ୍ ମାତ୍ତଣ୍ଡ୍ ।
ପାଉଲ୍ କଲସିୟ ବେସ୍କେ ମିଚ୍ ଶିକ୍ଷା ବିଷୟ୍ତେ ଚିନ୍ତେତେ ମିନ୍ଦେଣ୍ଡ୍ । ଅଣ୍ଡ୍ ଇଦ୍ ବିଷୟ୍ତେ ଚିଟି ଲେକାନ୍ ସେଙ୍ଗେ ନାର୍ଗେ ସମୟ୍ କଟା ମାଡ଼୍ତଣ୍ଡ୍ । ଇଗାଙ୍କ୍ ଆଦ୍ପାର୍ତେ ମାନ୍ଦେ ଯିହୁଦୀ କ୍ରିଷ୍ଟିୟାନ୍ ବେନଡ଼୍କି ବାଗାତ୍ କ୍ରିଷ୍ଟିୟାନ୍ ନାରୁଡ଼୍କ୍ ପାଆନ୍ତେ ନିୟମ୍ତେ ଯିହୁଦୀ ବ୍ୟବସ୍ଥାତିଙ୍କ୍, ନିଜର୍ ଇସାବ୍ତେ ସୁନ୍ନତ ବିଦୀତିଙ୍କ୍ ପାଲନ୍ ମାଡ଼ାନ୍ ସେଙ୍ଗ୍ ବାଦ୍ୟ ମାଡ଼ାନଙ୍କ୍ ଚେଷ୍ଟା ମାଡ଼ମାତ୍ତଣ୍ଡ୍ । ପାଉଲ୍ ନିଜର୍ ଇସାବ୍ତେ ଦର୍କାର୍ ଆୟ୍ୱେ ଲେକାମ୍ କ୍ରିଷ୍ଟିୟାନ୍ ବିଷୟ୍ତେ ଲେକିତଣ୍ଡ୍, ୱେରଣ୍ଡ୍ ବେନ ଆୟିଣ୍ଡ୍ କ୍ରିଷ୍ଟନ୍ ବିନା ଇଶ୍ୱର୍ତେ ଗାରେ ଗ୍ରହନ୍ ଆଦାନଙ୍କ୍ ପାର୍ୱଣ୍ଡ୍ ୧:୧୫-୨୦ ମେଣ୍ଡେ ନାରୁଡ଼୍ ଯୁକ୍ତିତଡ଼୍ ସ୍ଥାପିତ୍ ଶିକ୍ଷା ମୁଲ୍ୟ ଇନ ଆଦ୍ତେ ୨:୮ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. କଲସିୟ ମଣ୍ଡଲିତିଙ୍କ୍ ପାଉଲ୍ତେ ନମସ୍କାର୍ । ୧:୧-୨
୨. କ୍ରିଷ୍ଟନ୍ ମହାନ୍ ନୁ ମିଚ୍ ଶିକ୍ଷା ପରୁ ପାଉଲ୍ତାଦ୍ ଜବାବ୍ । ୧:୩–୩:୪
୩. ସାୟେ କ୍ରିଷ୍ଟିୟାନ୍ ଜିୱୁଣ୍ଡ୍ ବାଦ୍କାନ୍ ସେଙ୍ଗେ ପାଉଲ୍ତେ ନିର୍ଦ୍ଦେଶ୍ । ୩:୫–୪:୬
୪. ପାଉଲ୍ ଇଦ୍ ଚିଟିତିଙ୍କ୍ ବାଗାତ୍ ମଣ୍ଡଲିନାଗ୍ ମିକା କାର୍ୟାନଙ୍କ୍ କେସ୍ ନମସ୍କାର୍ ମାଡ଼ି ତେର୍ସ୍ପିତଣ୍ଡ୍ । ୪:୭-୧୮
୧
୧ ପାଉଲ୍, ଇଶ୍ୱର୍ତେ ଇଚ୍ଛା ଲେକାମ୍ କ୍ରିଷ୍ଟ ଜିସୁନ୍ ୱେରଣ୍ଡ୍ ପ୍ରେରିତ, ମେଣ୍ଡେ ମାନ୍ ଦାଦାଲ୍ ତିମତି ୨ କଲସିୟତାଗ୍ ମାନ୍ଦାନ୍ ସାଦୁ ନୁ କ୍ରିଷ୍ଟ ବିଶ୍ୱାସି ଦାଦାଲଡ଼୍ ନୁ ଏଲାସ୍କ୍ ଗାରେ ଇଦ୍ ଚିଟି ଲେକିମିନ୍ଦେନ୍ । ମାନ୍ ବାବାଲ୍ ଇଶ୍ୱର୍ତାଗାଙ୍କ୍, ଦୟା ନୁ ଶାନ୍ତି ମୀଇ ସେଙ୍ଗେ ଆୟି ।
ଦନ୍ୟବାଦ୍ତାଦ୍ ପ୍ରାର୍ତନା
୩ ମାମେ ମିଇ ସେଙ୍ଗେ ପ୍ରାର୍ତନା ମାଡ଼ାନ୍ ସମୟତେ ମାନ୍ ପ୍ରବୁ କ୍ରିଷ୍ଟ ଜିସୁନ୍ ବାବାଲ୍ ଇଶ୍ୱର୍ତିଙ୍କ୍ ସାରେଦାମ୍ ଦନ୍ୟବାଦ୍ ଇଦୁତମ୍ । ୪ ବାତେଙ୍କ୍ଇତ୍କେ ମାମେ କ୍ରିଷ୍ଟ ଜିସୁନାଗେ ମିୟାଦ୍ ବିଶ୍ୱାସ୍ ନୁ ଇଶ୍ୱର୍ତେ ସାରେ ନାରୁଡ଼୍ ସେଙ୍ଗେ ମିୟାଦ୍ ପ୍ରେମ ବିଷୟ କେଞ୍ଜ୍ତମ୍ । ୫ ବେସୁଙ୍କ୍ ସୁସମାଚାର୍ତେ ନିଜାମ୍ତାଦ୍ କାବୁର୍ ମିଇପାକେ ମୁନେଙ୍କ୍ ୱାତ୍ତେ, ମିଡ଼୍ ଆଦିନ୍ ତଡ଼୍ ଇତ୍ତାୱୁ ବର୍ସାତାଉ ଗଟି କେଞ୍ଜିମାତ୍ତିଡ଼୍ । ମିଡ଼୍ ବାତ୍ ବର୍ସା ମାଡ଼ିତିଡ଼୍, ବାତ୍ ମିଇ ସେଙ୍ଗେ ସ୍ୱର୍ଗତାଗ୍ ସୁରକ୍ଷିତ୍, ଆଦିନ୍ ପରୁ ମିଇୟାଦ୍ ବିଶ୍ୱାସ୍ ନୁ ପ୍ରେମ ମିନ୍ଦେ । ୬ ବେନ୍ ସୁସମାଚାର୍ ପ୍ରଚାର୍ତେ ସେଙ୍ଗେ ମିଡ଼୍ ମୁନେ ଇଶ୍ୱର୍ତେ ଅନୁଗ୍ରହ ବିଷୟ କେଞ୍ଜ୍ତିଡ଼୍ ନୁ ଇଦିନ୍ ସତ୍ ଏର୍କା ମାଡ଼୍ତିଡ଼୍, ଆଦ୍ ସୁସମାଚାର୍ ଇଞ୍ଜେ ସାରେ ଜଗତ୍ତାଗ୍ ଏକାମ୍ ଆଦୁତ୍ ନୁ ଆର୍ଶିବାଦ୍ ତାତୁତେ । ୭ ✡କଲସୀୟ ୪:୧୨; ଫିଲିମୋନ୍ ୧:୨3.ମାନ୍ ପାକାଙ୍କ୍ କ୍ରିଷ୍ଟନ୍ ବିଶ୍ୱାସ୍ତେ ସେବକ୍ ନୁ ମାନ୍ ଗାଟି ପ୍ରିୟ ଏପାପ୍ରା ନାଗାଙ୍କ୍ ମିଡ଼୍ ଇଶ୍ୱର୍ତେ ଇଦ୍ ଅନୁଗ୍ରହ ବିଷୟ ପୁଞ୍ଜ୍ ମିନ୍ଦେଡ଼ି । ୮ ପବିତ୍ରଆତ୍ମା ମିକିଙ୍କ୍ ଇସ୍ମାନ୍ଦାନ୍ ପ୍ରେମ ବିଷୟ୍ ଅଣ୍ଡ୍ ମାନାଙ୍କ୍ କେସ୍ମିନ୍ଦେନ୍ ।
୯ ଇଦିନ୍ ମାୟ୍ଦିଙ୍କ୍ ମୀଇ ବିଷୟତେ କେଞ୍ଜାନ୍ ୱେଲେକନ୍ସ୍ ମାମେ ସାରେଦାମ୍ ମିଇ ସେଙ୍ଗେ ପ୍ରାର୍ତନା ମାଡ଼ୁତମ୍ । ପବିତ୍ରଆତ୍ମାତଡ଼୍ ଇସ୍ମାନ୍ଦାନ୍ ସାରେ ଜ୍ଞାନ୍ ନୁ ପୁନ୍ଦାନ୍ ଶକ୍ତି ତଡ଼୍ ଇଶ୍ୱର୍ତେ ଇଚ୍ଛା ପୁରା ମିଡ଼୍ ବେଲାନ୍ ପୁନ୍ଦେ ପାର୍ଦ୍ତିଡ଼୍, ଆଦିନ୍ ମାୟ୍ଦିଙ୍କ୍ ମିଇ ସେଙ୍ଗେ ମାମେ ପ୍ରାର୍ତନା ମାଡ଼ୁତମ୍ । ୧୦ ଆଲେକେ, ମିଡ଼୍ ପ୍ରବୁନ୍ ଇଚ୍ଛା ଲେକାମ୍ ବାଦ୍କେ ପାର୍ଦ୍ତିଡ଼୍ ନୁ ଅନାଦ୍ ପସନ୍ଦ୍ ଲେକେତ୍ କାମ୍ ମାଡ଼େ ପାର୍ଦ୍ତିଡ଼୍ । ମୀୟାଦ୍ ଜିୱେତାଗ୍ ସାରେ ଲେକାତ୍ ସାୟେତ୍ କାମ୍ ମାଡ଼େ ପାର୍ଦ୍ତିଡ଼୍ ନୁ ଇଶ୍ୱର୍ତେ ବିଷୟତେ ମିୟାଦ୍ ଜ୍ଞାନ୍ ନାର୍ଗେ ଆଦ୍ତେ । ୧୧ ଗାଡ଼୍ସ୍ଆସ୍ ମିଇଡ଼୍ ବେଲାନ୍ କି ସାରେ ବିଷୟ ସୟେମ୍ ମାଡ଼ିତିଡ଼୍, ଅଦିନ୍ ସେଙ୍ଗେ ଅନାଦ୍ ଗୌରବ୍ମୟ ଶକ୍ତିତଡ଼୍ ମିଡ଼୍ ଶକ୍ତି ଆୟ୍ମୁଟ୍ । ୧୨ ବାବାଲ୍ ଇଶ୍ୱର ୱେସିନ୍ ରାଜ୍ୟତାଗ୍ ତାନ୍ ନାରୁଡ଼୍ ସେଙ୍ଗେ ବାତ୍ ଲେକେତ୍ ନେଃଏତଣ୍ଡ୍, ଆଦିନ୍ ବାଗିଦାର୍ ଆଦାନ୍ ସେଙ୍ଗେ ଅଣ୍ଡ୍ ଯେ ମିକିଙ୍କ୍ ଯୋଗ୍ୟ ମାଡ଼୍ତନ୍, ଅଦିନ୍ ସେଙ୍ଗେ ୱେଡ଼୍କେତେ ଅଙ୍କ୍ ଦନ୍ୟବାଦ୍ ଇମୁଟ୍ । ୧୩ ଅଣ୍ଡ୍ ଇକାଡ଼୍ ଶକ୍ତିତାଗାଙ୍କ୍ ମାନାଙ୍କ୍ ରକ୍ଷା ମାଡ଼୍ତନ୍ ନୁ ବିପଦ୍ ଇଲ୍ୱେ ଜାଗେତାଗ୍ ମାନାଙ୍କ୍ ତାନ୍ ପ୍ରିୟ ପ୍ରେମ ମାରିନ୍ ରାଜ୍ୟତାଗେ ତାତ୍ତନ୍ । ୧୪ ✡ଏଫିସିୟ ୧:୭.ଆ ମାରିନ୍ ତଡ଼୍ ମାନାଡ଼୍ ମୁକ୍ତି ଆତ୍ତାଡ଼୍, ଇତ୍କେ ମାନାଦ୍ ପାପ୍ କ୍ଷମା ଆତ୍ତେ ।
କ୍ରିଷ୍ଟ ନୁ ଅନ୍ୱାଦ୍ କାମ୍
୧୫ କ୍ରିଷ୍ଟ, ତନ୍ଦ୍ଇଲ୍ୱେ ଇଶ୍ୱର୍ତେ ତନ୍ଦାନ୍ ରୁପ ଲେକାମ୍ । ଅଣ୍ଡ୍ ମୁନେଙ୍କ୍ ପୁଟ୍ତେ ମାର୍ ନୁ ସାରେ ସୃଷ୍ଟିତାଗାଙ୍କ୍ ଅଣ୍ଡ୍ ବାଡ଼୍ୟଣ୍ଡ୍ । ୧୬ ବାତେଙ୍କ୍ଇତ୍କେ ଅନ୍ତଡ଼୍ ଇଶ୍ୱର୍ ସ୍ୱର୍ଗତାଗ୍ ନୁ ପୃତିବିତାଗ୍ ସାରେ ଦୃଶ୍ୟ ନୁ ଆଦୃଶ୍ୟ ଜିନିଷ୍, ତେର୍ୱେ ଲେକାତ୍ ନାର୍ଗେଶକ୍ତି, କର୍ତ୍ତାଲଡ଼୍, ଶାସନ୍ ମାଡ଼ାନଡ଼୍ ନୁ ସାରେତଡ଼୍ ଅଦିକାରିଡ଼୍କ୍ ତିଆର୍ ମାଡ଼୍ତନ୍ । ଅନ୍ ତଡ଼୍ ନୁ ଅନ୍ ସେଙ୍ଗେ ଇଶ୍ୱର୍ ସାରେ ବିଶ୍ୱତିଙ୍କ୍ ତିଆର୍ ମାଡ଼୍ତନ୍ । ୧୭ ସାରେ ବିଷୟ ତିଆର୍ତେ ମୁନେଙ୍କେ ଅନାଦ୍ ଅସ୍ତିତ୍ୱ ମାତ୍ତେ ନୁ ଅନ୍ ତଡ଼୍ କାଇଲାନ୍ ପେର୍କେ ସାରେ ବିଷୟ ନିଜର୍ ତିଆର୍ତେ ଜାଗାନାଗ୍ ବେଗେତାୱୁ ଆଗେ ମାତ୍ତା । ୧୮ ✡ଏଫିସିୟ ୧:୨୨,୨3.ଅଣ୍ଡ୍ ତାନ୍ ଉପାସନା ମଣ୍ଡଲି ଲେକାମ୍ତେ ମେନ୍ଦୁଲ୍ତେ ତାଲ୍ଲେ ଲେକାମ୍; ଆଦ୍ ମେନ୍ଦୁଲ୍ତେ ଅଣ୍ଡ୍ ଜିୱୁନ୍ ଶକ୍ତି, ଡଲ୍ତାଗାଙ୍କ୍ ତେଏଦ୍ତେନଣ୍ଡ୍ ଅଣ୍ଡ୍ ମୁନେନ୍ ପୁଟ୍ତେ ମାର୍ । ଆଦିଙ୍କ୍ ସାରେ ବିଷୟତେ ପ୍ରତମ୍ତେ ପଡ଼ିୟେ ଦର୍କାନ୍ ସେଙ୍ଗେ ଅଣ୍ଡ୍ ଯୋଗ୍ୟ ଆତ୍ତନ୍ । ୧୯ ବାତେଙ୍କ୍ଇତ୍କେ ଇଶ୍ୱର୍ତେ ଇଚ୍ଛାତେ ମାର୍ ନିଜେ ଇଶ୍ୱର୍ତେ ପୁରା ରୁପ୍ ପୟ୍ତଣ୍ଡ୍ । ୨୦ ✡ଏଫିସିୟ ୨:୧୬.ମାରିନ୍ ତଡ଼୍ ଇଶ୍ୱର୍ ସାରେ ବିଶ୍ୱତିଙ୍କ୍ ନିଜର୍ ଗାରେ ମାଲ୍ପି ତାତାନଙ୍କ୍ ଇଚ୍ଛା ମାଡ଼୍ତନ୍ । କ୍ରୁଶତାଗ୍ ତାନ୍ ମାରିନାଦ୍ ଡଲ୍ତାଦିନ୍ ତଡ଼୍ ଇଶ୍ୱର୍ ଶାନ୍ତି ମାଡ଼୍ତନ୍ ମେଣ୍ଡେ ପୃତିବି ନୁ ସ୍ୱର୍ଗତାଗ୍ ମାନ୍ଦାନ୍ ସାରେ ବିଷୟତିଙ୍କ୍ ନିଜର୍ ଗାରେ ମାଲ୍ପି ତାତ୍ତନ୍ ।
୨୧ ଅଣ୍ଡୟ୍ ସମୟତେ କାରାପ୍ ଚିନ୍ତା ନୁ କାରାପ୍ କାମ୍ ମାଡ଼ମାନ୍ନାକ୍ ମିଡ଼୍ ଇଶ୍ୱର୍ତାଗାଙ୍କ୍ ଯେକା ମାତ୍ତିଡ଼୍ ନୁ ଅନ୍ ଶତ୍ରୁ ମାତ୍ତିଡ଼୍ । ୨୨ ଇତ୍କେ ଇଞ୍ଜେ ଇଶ୍ୱର୍ ମିକିଙ୍କ୍ ପବିତ୍ର, ସିଦ୍ଦ ନୁ ନିର୍ଦୋଷ୍ ଲେକାମ୍ ଅନ୍ ମୁନେ ତାତାନ୍ ସେଙ୍ଗେ ତାନ୍ ମାରିନ୍ ମେନ୍ଦୁଲ୍ ଡଲ୍ତାଦିନ୍ ତଡ଼୍ ମିକିଙ୍କ୍ ନିଜର୍ ତଡ଼୍ ମେଣ୍ଡନ୍ଦାମ୍ କାଲ୍ପି ମିନ୍ଦେଣ୍ଡ୍ । ୨୩ ମିଡ଼୍ ଅଣ୍ଡୟ୍ ଡ଼ୁଟାଙ୍ଗ୍ ନୁ ନିଜାମ୍ ମୂଲଦୁଆ ପରୁ ତିଆତ୍ଆସ୍ ମାନୁଟ୍ ନୁ ସୁସମାଚାର୍ କେଞ୍ଜାନ୍ ୱେଲେ ବେନେ ଆଶେ ଦର୍କି ମାତ୍ତେ, ଆଗେଙ୍କ୍ ଦାନ୍ଦେ ଆଦାନଙ୍କ୍ ନିଜେତିଙ୍କ୍ ପଡ଼୍ୟି ଇମାଟ୍ । ଆଦ୍ ସୁସମାଚାର୍ କେ ପୃତିବିତେ ସାରେତଡ଼୍ ଗାରେ ପ୍ରଚାର୍ ଅଦୁତ୍ ନୁ ନାନ୍ ପାଉଲ୍, ଅନ୍ୱାଦ୍ ୱେରନ୍ ବିଶ୍ୱାସ୍ତେ ଦାସନ୍ ।
ମଣ୍ଡଲିତାଗ୍ ପାଉଲ୍ତେ କାମ୍
୨୪ ଇଞ୍ଜେ ମି ସେଙ୍ଗେ ବେନ୍ ଦୁଃକାମ୍ କଷ୍ଟ ସେଙ୍ଗେ ନାନ୍ ୱେଡ଼୍କ୍ତାନ୍ । ବାତେଙ୍କ୍ଇତ୍କେ ନାୟାଦ୍ ମେନ୍ଦୁଲ୍ ଦୁଃକାମ୍ ତଡ଼୍ ନାନ୍ କ୍ରିଷ୍ଟନ୍ ମେନ୍ଦୁଲ୍ ଲେକାମ୍ ମଣ୍ଡଲି ପାକାଙ୍କ୍ କ୍ରିଷ୍ଟନ୍ ଦୁଃକାମ୍ତେ ବାକି ଦୁଃକାମ୍ତିଙ୍କ୍ ପୁରା ମାଡ଼ାନ୍ ସେଙ୍ଗେ ନାନ୍ ସାହାଯ୍ୟ ମାଡ଼ୁତାନ୍ । ୨୫ ମୀଇ ସାୟେତ୍ ସେଙ୍ଗେ ଇଦ୍ କାମ୍ ମାଡ଼ାନ୍ ସେଙ୍ଗେ ନାନ୍ ଇଶ୍ୱର୍ତଡ଼୍ ମଣ୍ଡଲିତେ ୱେରନ୍ ଦାସ ଲେକାମ୍ ହେଞ୍ଚି ମିନ୍ଦେନ୍ । ଅନାଦ୍ ସୁସମାଚାର୍ ପୁରାପୁରି କେତାନାଦ୍ ନାୟାଦ୍ କାମ୍ । ୨୬ ଆଦ୍ ସୁସମାଚାର୍ ୱେରଡ଼୍ ଲେକେତ୍ ବିଷୟ୍ । ଯୁଗ୍ଯୁଗ୍ ପଇସ୍ ଇଶ୍ୱର୍ ସାରେତଡ଼ାଗାଙ୍କ୍ ଇଦ୍ ମିଞ୍ଜିସ୍ପି ନେହେସ୍ ମାତ୍ତନ୍, ବାତେଙ୍କ୍ଇତ୍କେ ଇଞ୍ଜେ ତାନ୍ ନାରୁଡ଼୍ ପାକେ କେସ୍ ମିନ୍ଦେନ୍ । ୨୭ ତାନ୍ ନାରୁଡ଼୍କିଙ୍କ୍ ଆଦ୍ ମିଞ୍ଜ୍ତେ ଗଟ୍ କେଞ୍ଜ୍ପାନଙ୍କ୍ ଇଶ୍ୱର୍ତେ ଇଚ୍ଛା ମାତ୍ତେ । ଅନାଦ୍ ଇଦ୍ ନାର୍ଗେ ମୁଲ୍ୟ ନୁ ଗୌରବ୍ ଲେକେତ୍ ଗଟ୍ ସାରେ ନାରୁଡ଼୍ ଜାତିତେ ସେଙ୍ଗେ ଦର୍କାର୍ । ଇଦ୍ ଗଟ୍ ଅଦୁତ୍, କ୍ରିଷ୍ଟ ମୀଇ ଲୋପେ ମିକା ମିନ୍ଦେନ୍ । ଇଦିନ୍ ଅର୍ତ, ମିଡ଼୍ ଇଶ୍ୱର୍ତେ ଗୌରବ୍ତଡ଼ି । ୨୮ ଆଦିନ୍ ସେଙ୍ଗେ ମାନାଡ଼୍ ସାରେତଡ଼୍ ପାକେ କ୍ରିଷ୍ଟଙ୍କ୍ ପ୍ରଚାର୍ ମାଡ଼ୁତାଡ଼୍ । ସାରେତଡ଼୍କ୍ କ୍ରିଷ୍ଟନ୍ତଡ଼୍ କାଲ୍ପି ମିକା ଅଣ୍ଡୟ୍ ଲେକେତ୍ ନାରୁଣ୍ଡ୍ ଲେକାମ୍ ଇଶ୍ୱର୍ତେ ମୁନେ ନିଲ୍ସ୍ପିତାଡ଼୍, ମାନାଦ୍ ସାରେ ବୁଦ୍ଜ୍ଞାନ୍ ବ୍ୟବହାର୍ ମାଡ଼ି, ସାରେତଡ଼୍କ୍ ଚେତନା ନୁ ଶିକ୍ଷା ଇସମିନ୍ଦେମ୍ । ୨୯ ଇଦିଙ୍କ୍ ପୁରା ମାଡ଼ାନ୍ ମାୟ୍ଦିଙ୍କ୍ ନାୟାଗେ ମାନ୍ଦାନ୍ କ୍ରିଷ୍ଟ ଇତ୍ତେ ମହାନ୍ ଶକ୍ତିତିଙ୍କ୍ ବ୍ୟବହାର୍ ମାଡ଼ି ନାନ୍ ଜିୱେ ଅପି ଚେଷ୍ଟା ମାଡ଼ୁତାନ୍ ନୁ ପାଡ଼୍ୟି ମାଡ଼ୁତାନ୍ ।