ଏଫିସିୟମାନଙ୍କ ନିକଟକୁ ପାଉଲଙ୍କ ପତ୍ର
ଏଫିସିୟଡ଼୍ ଗାର୍ରେ ପାଉଲ୍ତାଦ୍ ଚିଟି
ଏଫିସିୟ ବଇ ବିଷୟ୍ତେ ଅଣ୍ଡୟ୍ ପଦ୍
ଏଫିସି ମଣ୍ଡଲି ଗାର୍ରେ ପାଉଲ୍ତେ ଚିଟି ପାଉଲ୍ତେ ତଡ଼୍ ଆଦ୍ପାର୍ତେ ୬୦ କ୍ରିଷ୍ଟାଦ୍ଦ ଲୋପେ କଲସିୟ ମଣ୍ଡଲି ଗାର୍ରେ ଲେକାନ୍ ସମୟ୍ତେ ଲେକା ଆସ୍ମାତ୍ତେ । ଲେକାନଣ୍ଡ୍ ଅଣ୍ଡ୍ ନିଜେ ପ୍ରେରିତ୍ ପାଉଲ୍ ଇଞ୍ଜ ପରିଚୟ୍ ଇଦ୍ତଣ୍ଡ୍ ୧:୧ । ଯଦି କଲସିୟ ବଇତାଗ୍ ନିଜର୍ ନମସ୍କାର୍ ଇଲୁକ୍ ଗାଲା ନାର୍ଗେ ପଣ୍ଡିତ୍ ଏଫିସି ବଇତିଙ୍କ୍ ପାଉଲ୍ ଲେକ୍ତଣ୍ଡ୍ ଇଞ୍ଜ କେତୁତଡ଼୍ । ଇଦ୍ କାରନ୍ ମାୟ୍ଦିଙ୍କ୍ ଆଦ୍ପାର୍ତେ ସାର୍ରେ ମଣ୍ଡଲିନାଗ୍ ଚିଟି ତୁଃଉସାନ୍ ଉଦେଶ୍ୟ ନେଃଏସ୍ ଲେକା ଆସ୍ମାନ୍ତେ । ପାଉଲ୍ ଇଦ୍ ଗାଲା ଲେକିମିନ୍ଦେଣ୍ଡ୍ ଯେ ଅଣ୍ଡ୍ ଇଦ୍ ଚିଟି ଲେକାନ୍ ୱେଲେ ବନ୍ଦିତାଗ୍ ମାତ୍ତଣ୍ଡ୍ ୩:୧; ୪:୧; ୬:୨୦ । ପାଉଲ୍ ତୁକିକତିଙ୍କ୍ ଏଫିସି ମଣ୍ଡଲିତାଗ୍ ରହସ୍ ଅନ୍ କାୟ୍ଦେ ଇଦ୍ ଚିଟି ରହସ୍ ମାତ୍ତଣ୍ଡ୍ ୬:୧-୭ ।
ଏଫିସି ଏସିଆ ମାଇନର୍ତେ ଅଣ୍ଡୟ୍ ବାଡ଼୍ୟାଦ୍ ଟାୱୁନ୍ ନୁ ରାଜ୍ଦାନୀ ମାତ୍ତେ । ଏଫିସି ଗ୍ରୀକ୍ ଦେୟାମ୍ ଆର୍ତେମୀତାଦ୍ ଉପାସନା ମେଣ୍ଡେ ଇଦିନ୍ ମନ୍ଦିର୍ ସେଙ୍ଗେ ବିକ୍ୟାତ୍ ଆତ୍ତେ ପ୍ରେରିତ ୯:୨୩-୩୧ । ଏଫିସି ମଣ୍ଡଲି ମୁନେନ୍ ଡୁଟାଙ୍ଗ୍ ମାତ୍ତେ ଇତ୍କେ ପେର୍କେ ପିନ୍ଦ ଆତ୍ତେ ପ୍ରକାଶିତ୍ ୨:୧-୭। ପାଉଲ୍ ତାନ୍ ଲେକ୍ତାଗ୍ ଦୁଡ଼େ ଜାଗେତାଗ୍, ଇଶ୍ୱର୍ ବେଲା ତାନ୍ ନାରୁଡ଼୍କିଙ୍କ୍ ଏଞ୍ଚ୍ତଣ୍ଡ୍ ମେଣ୍ଡେ ବେଲା ଜିସୁନ୍ ଇସ୍ ପାପାମ୍ତାଗାଙ୍କ୍ ରକ୍ଷା ମାଡ଼୍ତଣ୍ଡ୍ ଆଦ୍ ବୁଜା ମାଡ଼୍ତଣ୍ଡ୍ । ପାଉଲ୍ ମଣ୍ଡଲିତିଙ୍କ୍ ମେନ୍ଦୁଲ୍ତଡ଼୍ ତୁଲ୍ନା ମାଡ଼ି କ୍ରିଷ୍ଟ ଇଦିନ୍ ତାଲ୍ଲେ ମେଣ୍ଡେ ମୂଲେତାଦ୍ ଡୁଟାଙ୍ଗ୍ କାଲ୍ ବେନନ୍ ତଡ଼୍ କାୟ୍ଲି ଅଣ୍ଡୟ୍ତଡ଼୍ ପେର୍ସୁତାଡ଼୍ । ପାଉଲ୍ତେ ଚିଟି ଦୁଡ଼େ ଜାଗାତାଗ୍ କ୍ରିଷ୍ଟିୟାନ୍ ଜିୱୁଣ୍ଡ୍ ବିଷୟ୍ତେ ନିର୍ଦ୍ଦେଶ୍ ଇତ୍ତଣ୍ଡ୍ ।
ବଇତ୍ ଲପେ ମାନ୍ଦାନ୍ ମୁକ୍ୟ ବିଷୟ୍
୧. ପାଉଲ୍ତେ ନମସ୍କାର୍ ମେଣ୍ଡେ ପରିଚୟ୍ ଇଦାନାଦ୍ । ୧:୧-୨
୨. କ୍ରିଷ୍ଟନ୍ ତଡ଼୍ ମଣ୍ଡଲିତେ ସମ୍ପର୍କ । ୧:୩–୩:୨୧
୩. କ୍ରିଷ୍ଟିୟାନ୍ ଜିୱୁଣ୍ଡ୍ ବାଦ୍କାନାଦ୍ ଆର୍ର୍ । ୪:୧–୬:୨୦
୪. ପାଉଲ୍ତେ ମାଡ଼େଙ୍କ୍ତାଦ୍ ନମସ୍କାର୍ । ୬:୨୧-୨୪
୧
୧ ✡ପ୍ରେରିତ ୧୮:୧୯-୨୧; ୧୯:୧.ଇଶ୍ୱର୍ତେ ଇଚ୍ଛା ଲେକାମ୍ କ୍ରିଷ୍ଟ ଜିସୁନ୍ ୱେରଣ୍ଡ୍ ପ୍ରେରିତ୍ ଶିଷ୍ୟ ଲେକାମ୍ ନିଯୁକ୍ତି ଆସ୍ମାନ୍ଦାନ୍ ପାଉଲ୍, ଜିସୁ କ୍ରିଷ୍ଟନ୍ ତଡ଼୍ କାଇଲି ମିକା ବିଶ୍ୱାସ୍ତେ ବାଦ୍କମାନ୍ଦାନ୍ ଏଫିସିତେ ଇଶ୍ୱର୍ତେ ନାରୁଡ଼୍ ପାକେ ଲେକିମାନ୍ଦାନ୍ ଇଦ୍ ଚିଟି, ୨ ମାନ୍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
ଆତ୍ମିକ୍ ଆର୍ଶିବାଦ୍
୩ ଦନ୍ୟ ମାନ୍ ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଇଶ୍ୱର୍ । ବାତେଙ୍କ୍ଇତ୍କେ ଅଣ୍ଡ୍ ମାନ୍ କ୍ରିଷ୍ଟନ୍ତଡ଼୍ କାଲ୍ପି ସ୍ୱର୍ଗ ନାରିନ୍ ସାରେ ଆତ୍ମିକ୍ ଆର୍ଶିବାଦ୍ ମାଡ଼୍ତନ୍ । ୪ କ୍ରିଷ୍ଟନାଗ୍ କାୟ୍ଲି ମାନାଡ଼୍ ବେଲା ଇଶ୍ୱର୍ତେ ନାରୁଡ଼୍ ଆଦ୍ତାଡ଼୍, ଅଦିନ୍ ସେଙ୍ଗେ ଜଗତ୍ ସୃଷ୍ଟି ଆଦାନ୍ ମୁନେଙ୍କ୍ ଅଣ୍ଡ୍ ମାନାଙ୍କ୍ ଏଞ୍ଚି ମିନ୍ଦେଣ୍ଡ୍ । ଆଦିଙ୍କ୍ ଅନ୍ ପ୍ରେମତେ ମାନାଡ଼୍ ଅନ୍ ମୁନ୍ନେ ପବିତ୍ର ନୁ ନିର୍ଦୋଷ୍ ଆତ୍ତାଡ଼୍ । ୫ ଜିସୁ କ୍ରିଷ୍ଟନ୍ ତଡ଼୍ ଅଣ୍ଡ୍ ମାନାଙ୍କ୍ ତାନ୍ ପିଲାନ୍ ଲେକାମ୍ ଗ୍ରହନ୍ ମାଡ଼ାନଙ୍କ୍ ଆଲ୍ସି ମାତ୍ତଣ୍ଡ୍; ଇଦେକେ ମାତ୍ତେ ଅନାଦ୍ ୱେଡ଼୍କ୍ ନୁ ଇଚ୍ଛା । ୬ ଇଶ୍ୱର୍ତେ ପ୍ରେମତାଦ୍ ଅନୁଗ୍ରହ ସେଙ୍ଗେ ନୁ ତାନ୍ ପ୍ରିୟ ମାର୍ଦିଙ୍କ୍ ବିନା ମୁଲ୍ୟବାନ୍ ଦାନ ଲେକାମ୍ ପାଏମ୍ ଆସ୍ମାନ୍ଦାନ୍ ମାୟ୍ଦିଙ୍କ୍, ମାମ୍ମେ ଇଶ୍ୱର୍ତିଙ୍କ୍ ଦନ୍ୟବାଦ୍ ମାଡ଼ୁତମ୍ । ୭ ✡କଲସୀୟ ୧:୧୪.କ୍ରିଷ୍ଟ ଡଲ୍ତାଙ୍କ୍ ମାନାଡ଼୍ ମୁକ୍ତି ପାଏମ୍ଆତ୍ତାଡ଼୍, ଅର୍ତାତ୍ ମାନ୍ୱାଦ୍ ସାର୍ରେ ପାପ୍ କ୍ଷମା ଆତ୍ତେ । ଇଶ୍ୱର୍ତେ ଅନୁଗ୍ରହ ବେସର୍ ମହାନ୍ ! ୮ ଆଦ୍ ଅଣ୍ଡ୍ ମାନାଙ୍କ୍ ନାର୍ଗେ ଇତ୍ତଣ୍ଡ୍ । ୯ ଇଶ୍ୱର୍ ତାନ୍ ବୁଦ୍ତେ ନୁ ଜିୱୁନ୍ତେ ପୁନ୍ଦାନାଦିନ୍ ତଡ଼୍ ବାତ୍ ଆଲ୍ସି ମାଡ଼ିମାତ୍ତନ୍, ଆଦ୍ ପୁରା ମାଡ଼୍ତଣ୍ଡ୍, ମେଣ୍ଡେ ଆଦ୍ କ୍ରିଷ୍ଟନ୍ ସାହାଯ୍ୟତେ ବେନେ ମିଞ୍ଜ୍ତାଦ୍ ଆଲ୍ସି ମାତ୍ତଣ୍ଡ୍ ଆଦ୍ ମାନ୍ ଗାର୍ରେ କେସ୍ମିନ୍ଦେନ୍ । ୧୦ ଆଦ୍ ଆଲ୍ସ୍ତାଦ୍ ଲେକାମ୍ ସ୍ୱର୍ଗ ନୁ ପୃତିବିତେ ସାରେ ତିଆର୍ ବିଷୟ ଅଣ୍ଡୟ୍ ଆଦ୍ତେ ନୁ କ୍ରିଷ୍ଟ ଆୱୁ ସାରେତଡ଼୍ ତାଲେ ଲେକାମ୍ ମାନ୍ତା ଇଦ୍ ଆଲ୍ସାନାଦ୍ ଇଶ୍ୱର୍ ଲେକାମ୍ ସମୟ୍ତେ ପୁରା ମାଡ଼ିତନ୍ ।
୧୧ ସାରେ ବିଷୟ ଇଶ୍ୱର୍ତେ ଯୋଜନା ନୁ ନିଷ୍ପତ୍ତି ଲେକାମ୍ ତିଆର୍ ଆଦ୍ତେ; ମୁନେକଞ୍ଜ୍ ତିଆର୍ ନିଜେତ୍ ଉଦ୍ଦେଶ୍ୟତେ ସାଦନ୍ ସେଙ୍ଗେ, କ୍ରିଷ୍ଟନ୍ ତଡ଼୍ ଅନାଦ୍ ନିଜେତ୍ ନାରୁଡ଼୍ ଆଦାନ୍ ସେଙ୍ଗେ ଇଶ୍ୱର୍ ମାନାଙ୍କ୍ ହେଞ୍ଚିମିନ୍ଦେନ୍ । ୧୨ ୱାଡ଼ାଟ୍, ବେନଡ଼୍ ସାରେତିଙ୍କ୍ ମୁନେ କ୍ରିଷ୍ଟନାଗେ ଆଶେ ନେହେସ୍ ମାତ୍ତମ୍, ସାରେତଡ଼୍ ଇଶ୍ୱର୍ତେ ମହିମା କିର୍ତ୍ତନ୍ ମାଡ଼ିକା । ୧୩ ମିଡ଼୍ ଆନ୍ତେ ବେସୁଙ୍କ୍ ପରିତ୍ରାଣ୍ ଦର୍ସିକି ଆତ୍କେ ଇଦ୍ ସୁସମାଚାର୍ତେ ସତ୍ଗଟ୍ କେଞ୍ଜ୍ତିଡ଼୍, ଆଦ୍ ସମୟ୍ତେ ଇଶ୍ୱର୍ତଡ଼ି ଆଦ୍ତିଡ଼୍ । ମିଡ଼୍ କ୍ରିଷ୍ଟଙ୍କ୍ ବିଶ୍ୱାସ୍ ମାଡ଼୍ନାଙ୍କ୍, ଇଶ୍ୱର୍ ତାନ୍ ପ୍ରତିଜ୍ଞା ଲେକାମ୍ ପବିତ୍ରଆତ୍ମାନ୍ ଦାନ ମାଡ଼ି ମିଇ ପରୁ ଅନାଦ୍ ସତ୍ ଚିଃନେ ମାଡ଼ି ନିଜର୍ ମାଡ଼୍ତଣ୍ଡ୍ । ୧୪ ଇଶ୍ୱର୍ ତାନ୍ ନାରୁଡ଼୍କିଂଙ୍କ୍ ବେନ୍ ସାରେ ବିଷୟ ଇଦାନ୍ ସେଙ୍ଗେ ପ୍ରତିଜ୍ଞା ମାଡ଼୍ତଣ୍ଡ୍, ଆଦ୍ ସାରେ ଯେ ମାନାଡ଼୍ ଦର୍ସିକିତାଡ଼୍, ପବିତ୍ରଆତ୍ମା ଆଦିନାଦ୍ ନିଜାମ୍ ମାଡ଼ିତାନ୍ ଇଞ୍ଜ କେତ୍ତଣ୍ଡ୍ । ଇଶ୍ୱର୍ ତାନ୍ ନାରୁଡ଼୍କିଂଙ୍କ୍ ସ୍ୱାଦିନତା ଇଦ୍ତଣ୍ଡ୍, ଇଦ୍ ନିଜାତେ ଆୱୁକାନ୍ ସେଙ୍ଗେ, ୱାଡ଼ାଟ୍ ଇଶ୍ୱର୍ତେ ମହିମା କିର୍ତ୍ତନ୍ ମାଡ଼ିକାଡ଼ାଟ୍ ।
ପାଉଲ୍ତେ ପ୍ରାର୍ତନା
୧୫ ଇଦ୍ କାରନ ସେଙ୍ଗେ ପ୍ରବୁ ଜିସୁନାଗାଙ୍କ୍ ମିୟାଦ୍ ବିଶ୍ୱାସ୍ ନୁ ଇଶ୍ୱର୍ତେ ନାରୁଡ଼୍ ସେଙ୍ଗେ ମିୟାଦ୍ ପ୍ରେମ ମିନ୍ଦେ ଇଞ୍ଜ କେଞ୍ଜ୍ତେ ପେର୍କେ, ୧୬ ମିଇ ସେଙ୍ଗେ ଇଶ୍ୱର୍ତିଙ୍କ୍ ଦନ୍ୟବାଦ୍ ଇସ ୱାଦୁତାନ୍ । ନାନ୍ ଗାଲା ନାୟାଦ୍ ପ୍ରାର୍ତନାତାଗ୍ ମିକିଙ୍କ୍ ସାରେଦାମ୍ ଏର୍କେ ମାଡ଼ୁତାନ୍ । ୧୭ ମେଣ୍ଡେ ଗୌରବ୍ତନ୍ ବାବାଲ୍, ମାନ୍ ପ୍ରବୁ ଜିସୁ କ୍ରିଷ୍ଟନ୍ ଇଶ୍ୱର୍ତିଙ୍କ୍ ପ୍ରାର୍ତନା ମାଡ଼ିତାନ୍, ବେଲା ଅଣ୍ଡ୍ ମିକିଂଙ୍କ୍ ପବିତ୍ର ଆତ୍ମା ଇଦ୍ତନ୍ । ଆଦ୍ ଆତ୍ମା ମିକିଂଙ୍କ୍ ଜ୍ଞାନ୍ବାନ୍ ମାଡ଼ିତେ ନୁ ଇଶ୍ୱର୍ତିଙ୍କ୍ ମିଇ ଗାର୍ରେ କେତିତନ୍ । ଆଲାଇତ୍କେ, ମିଡ଼୍ ଅଙ୍କ୍ ପୁନ୍ଦେ ପାର୍ଦ୍ତିଡ଼୍ । ୧୮ ନାନ୍ନେ ଦନ୍ୟବାଦ୍ ମାଡ଼ିତାନ୍, ବେଲାନ୍ ଅନାଦ୍ ୱେସ୍ ଉଡ଼ାନ୍ ସେଙ୍ଗେ ମିୟାଦ୍ ଲୋପେତ୍ ଇଚ୍ଛା ଦାନ୍ଦେ ଆଦ୍ତେ । ଆଦିଙ୍କ୍ ବେନ୍ ଆଶେତ୍ ମାୟ୍ଦିଙ୍କ୍ ମିଡ଼୍ ଅନ୍ ତଡ଼୍ କାର୍ଙ୍ଗିଆସ୍ ୱାତ୍ତିଡ଼୍ । ୧୯ ଅନ୍ ନାରୁନ୍ ସେଙ୍ଗେ ଅନାଦ୍ ପ୍ରତିଜ୍ଞାତ ମହତ୍ ଆର୍ଶିବାଦ୍ତଡ଼୍ ଯେ ବେସର୍ ନାର୍ଗେ ନୁ ମା ଲେକାମ୍ ବିଶ୍ୱାସୀନଡ଼୍ ପାକେ ଅନାଦ୍ ସକ୍ରିୟ ଶକ୍ତି ଯେ ବେସର୍ ମହାନ୍, ଆଦ୍ ମିଡ଼୍ ପୁନ୍ତିଡ଼୍ । ୨୦ ଇଞ୍ଜେ, ମାନାଗେ ଇସ୍ ମାନ୍ଦାନ୍ ଆଦ୍ ଶକ୍ତି ତଡ଼୍ କେ ଇଶ୍ୱର୍ କ୍ରିଷ୍ଟଙ୍କ୍ ଡଲ୍ତାଗାଙ୍କ୍ ତେସ୍ ମିକା ଅଂକିଙ୍କ୍ ସ୍ୱର୍ଗିୟ ନାରୁଡ଼୍ତେ ନିଜର୍ ତିନ୍ଦେପାକେ କୁସ୍ପି ମିନ୍ଦେନ୍ । ୨୧ କ୍ରିଷ୍ଟ ସାରେତଡ଼୍ ସ୍ୱର୍ଗତେ ଶାସକ, କ୍ଷମତା ଅଦିକାରି, ଶକ୍ତିତଡ଼୍ ନୁ ଅଦିପତିନଡ଼୍ ପରୁ ଶାସନ୍ ମାଡ଼ିତନ୍, ଆଦ୍ ନାରୁଡ଼୍ ନୁ ୱେରେ ନାରୁଡ଼୍ତେ କ୍ଷମତା ଇଦାନ୍ ସାରେତଡ଼୍ ପାଡ଼୍ୟି ୱିଡ଼୍ସି ଅନାଦ୍ ପାଡ଼୍ୟି ସାରେତିଙ୍କ୍ ବେଡ଼୍ୟେ । ୨୨ ✡କଲସୀୟ ୧:୧୮.ଇଶ୍ୱର୍ ସାରେ ବିଷୟ କ୍ରିଷ୍ଟନ୍ ଡେକେତ୍ ମଦଲ୍ ନେହେତ୍ତନ୍ ନୁ ସାରେ ବିଷୟ ପରୁ ଅଂକିଙ୍କ୍ ସାରେତିଙ୍କ୍ ବେଡ଼୍ୟେ ପ୍ରବୁ ଲେକାମ୍ ମଣ୍ଡଲିତାଗ୍ ଇତ୍ତନ୍ । ୨୩ ମଣ୍ଡଲି କ୍ରିଷ୍ଟନ୍ ମେନ୍ଦୁଲ୍; ମଣ୍ଡଲି ତଡ଼୍ କ୍ରିଷ୍ଟନ୍ କାମ୍ତେ ସାରେ ପୁରା ଆଦ୍ତେ; ମେଣ୍ଡେ କ୍ରିଷ୍ଟ ସାରେ ବିଷୟ ପୁରା ମାଡ଼ିତନ୍ ।