୬
ୟାୟବାବ ନୁ ମାର୍ମାୟାସ୍କ୍
୧ ✡କଲସୀୟ 3:୨୦.ପିଲାନଡ଼ି, ୟାୟବାବନ୍ ଗଟି କେଞ୍ଜାନାଦ୍ ମିୟାଦ୍ କ୍ରିଷ୍ଟିୟାନ୍ ପାଡ଼୍ୟି, ବାତେଙ୍କ୍ ଇତ୍କେ ଇଦ୍ଏ ସାୟେତ୍ ବ୍ୟବହାର୍ । ୨ “ମିୟାୱୁ ୟାୟବାବାଙ୍କ୍ ସମ୍ମାନ୍ ମାଡ଼ାଟ୍ ।” ଇଦ୍ଏ ଗଟ୍ତାଗ୍ ଅଣ୍ଡୟ୍ ପ୍ରତିଜ୍ଞା କାଲ୍ପି କେତ୍ତଡ଼୍, ୩ “ବେଲାକି ମିୟାଦ୍ ସାୟେ ଆଦ୍ତେ ନୁ ମିଡ଼୍ ପୃତିବିତାଗ୍ ନାର୍ଗେଜେଲ୍ ମାନ୍ତିଡ଼୍ ।” ୪ ✡କଲସୀୟ 3:୨୧.ୟାୟବାବଡ଼୍, ପିଲାକିଙ୍କ୍ କପାମ୍ ମାଡ଼ାନ୍ ଲେକାମ୍ ବାତ୍ ବ୍ୟବହାର୍ ମାଡ଼୍ମାଟ୍, ଇତ୍କେ ପ୍ରବୁନ୍ ବ୍ୟବହାର୍ ନୁ ଶିକ୍ଷାତଡ଼୍ ଅଡ଼୍କିଂଙ୍କ୍ ପୋଡ଼୍ପାଟ୍ ।
ଗତି ନୁ ସାଉକାରୀ
୫ ✡କଲସୀୟ 3:୨୨-୨୫.ଗତିନଡ଼ି, ମିଡ଼୍ କ୍ରିଷ୍ଟନ୍ ସେବା ମାଡ଼ୁତିଡ଼୍ ଇଞ୍ଜ ଆଲ୍ସି ହୃଦୟତାଗ୍ ୱେର୍ରେତଡ଼୍ ୱାଡ଼୍କି ଜଗତ୍ତେ ସାଉକାରୀଡ଼୍ ଗଟ୍ ପାଲନ୍ ମାଡ଼ାଟ୍ । ୬ ମାଲିକ୍ ମିକିଂଙ୍କ୍ ଉଡ଼ାନ୍ ୱେଲେ ଅନାଗ୍ ସାୟେ ଆଦାନଙ୍କ୍ ଆଦ୍ ମାଡ଼୍ୱେକନ୍ସ୍, କ୍ରିଷ୍ଟନ୍ କ୍ରିତଦାସ ଲେକାମ୍ ମିୟାଦ୍ ସରଲ୍ ହୃଦୟ୍ ଇସ୍ ଇଶ୍ୱର୍ତେ ଇଚ୍ଛା ଲେକାମ୍ ମାଡ଼ାଟ୍ । ୭ ଆସାମ୍ ମାନେୟ୍ତାଦ୍ ସେବା ମାଡ଼ୁତିଡ଼୍ ଆଲ୍ସ୍ୱେ ପ୍ରବୁନ୍ ସେବା ମାଡ଼ାନ୍ ଲେକାମ୍ ୱେଡ଼୍କେତେ ଆଦ୍ ମାଡ଼ାଟ୍ । ୮ ଏର୍କା ନେଃଏମୁଟ୍, ଅଣ୍ଡ୍ କ୍ରୀତଦାସ୍ ଆୟିଣ୍ଡ୍ ବା ସ୍ୱାଦିନ୍ ଆୟିଣ୍ଡ୍ ପ୍ରବୁ ସାର୍ରେ ନାରୁଡ଼୍କିଂଙ୍କ୍ ଅନାଦ୍ ସାୟେତ୍ ପାଡ଼୍ୟି ସେଙ୍ଗେ ପୁରଷ୍କାର୍ ଇଦ୍ତଣ୍ଡ୍ । ୯ ✡କଲସୀୟ ୪:୧; କଲସୀୟ 3:୨୫.ମାଲିକିନଡ଼ି, ମିଇ କ୍ରିତଦାସିଡ଼୍ ସେଙ୍ଗେ ଆଦେଲେକାମ୍ ବ୍ୟବହାର୍ ମାଡ଼ାଟ୍ ନୁ ଅଡ଼୍କିଂଙ୍କ୍ ଦମ୍କା ମାଡ଼୍ମାଟ୍ । ଏର୍କା ନେଃଏମୁଟ୍, ମିଡ଼୍ ନୁ ମିଇ କ୍ରିତଦାସଡ଼୍ ସାର୍ରେତଡ଼୍ ସ୍ୱର୍ଗତଣ୍ଡ୍ ପ୍ରବୁନ୍ ଅଦିନ୍ । ଅଣ୍ଡ୍ ସାର୍ରେତଡ଼୍କିଙ୍କ୍ ସାମାନ୍ ବିଚାର୍ ମାଡ଼ିତନ୍ ।
ଆତ୍ମିକ୍ ଯୁଦ୍ ଜଗ୍ଡ଼ାମ୍
୧୦ ସାର୍ରେତିଙ୍କ୍ ପେର୍କେ, ପ୍ରବୁନ୍ ତଡ଼୍ କାୟ୍ଲି ଅନ୍ ମହାଶକ୍ତିତାଗ୍ ଶକ୍ତିମାନ୍ ଆୟ୍ମୁଟ୍ । ୧୧ ଇଶ୍ୱର୍ ଇତ୍ତାଦ୍ ସାର୍ରେ ଆତ୍ମିକ୍ ଯୁଦ୍ଜଗ୍ଡ଼ାମ୍ ତଡ଼୍ ତିଆର୍ ଆୟ୍ମୁଟ୍, ବେଲାକି ଶୟ୍ତାନ୍ତେ କାରାପ୍ ଚିନ୍ତେତିଙ୍କ୍ ସାମ୍ନା ମାଡ଼ାଙ୍କ୍ ପାର୍ଦ୍ତିଡ଼୍ । ୧୨ ବାତେଙ୍କ୍ଇତ୍କେ ମାନାଡ଼୍ ସ୍ୱର୍ଗତେ ନାରୁଡ଼୍ ବିରୁଦ୍ତେ ଯୁଦ୍ ମାଡ଼୍ୱାଡ଼୍; ମାନାଡ଼୍ ଶୂନ୍ୟତେ ଶୟ୍ତାନ୍ ଶକ୍ତି ନୁ ଇଦ୍ ଯୁଗ୍ତେ ଶାସନ୍ମାଡ଼ାନଡ଼୍, ରାଜାଲଡ଼୍ ନୁ ସାର୍ରେ ବିଶ୍ୱଶକ୍ତି ବିରୁଦ୍ତେ ଯୁଦ୍ ମାଡ଼ୁତମ୍ । ୧୩ ଆଦିଙ୍କ୍ ଇଞ୍ଜେ ଇଶ୍ୱର୍ ଇତ୍ତେ ଆତ୍ମିକ୍ ଯୁଦ୍ ଜଗ୍ଡ଼ାମ୍ କେର୍ମୁଟ୍; ଆଲେକେ କାରାପ୍ ସମୟ୍ତେ ମିଡ଼୍ ଶତ୍ରୁଡ଼୍ ଚିଟିରମଣତିଙ୍କ୍ ଅଟ୍କା ମାଡ଼େପାର୍ଦ୍ତିଡ଼୍ ନୁ ଶେଷ୍ ଆୟ୍ନା ଯୁଦ୍ ମାଡ଼ିମିକା ଡୁଟାଙ୍ଗ୍ ମାନ୍ତିଡ଼୍ । ୧୪ ଆଦିଙ୍କ୍ ସତ୍ୟତାଦ୍ ବେଲ୍ଟ୍, ଦାର୍ମାମ୍ତେ ଗୁଣ୍ଡେତାଗ୍ କେର୍ଦାନାଦ୍ ନୁ ୧୫ ଡେକେତାଗ୍ ଶାନ୍ତିତେ ସୁସମାଚାର୍ ଲେକେତ୍ ଏର୍ପୁକ୍ କେର୍ସ୍ ଗାଡ଼୍ସ୍ଆସ୍ ନିଲ୍ମୁଟ୍ । ୧୬ ସାରେଦାମ୍ ବିଶ୍ୱାସ୍ତାଦ୍ ମୁନ୍ତା କାଞ୍ଜିମାନୁଟ୍, ଇଦିନ୍ ସାହାଯ୍ୟତେ ଶୟ୍ତାନ୍ ଏସ୍ତେ ସାର୍ରେ କିସ୍ତାୱୁ କାଡ଼୍କିଙ୍କ୍ ବାୟିଦେ ଏସାଙ୍କ୍ ମିଡ଼୍ ପାର୍ଦ୍ତିଡ଼୍ । ୧୭ ପରିତ୍ରାଣ୍ ରକତାତ୍ ତାଲ୍ଲେତାଗ୍ କେର୍ଦାନାଦ୍ ନୁ ପବିତ୍ର ଆତ୍ମା ଇତ୍ତେ ଇଶ୍ୱର୍ତେ ବାକ୍ୟ ରକମ୍ ଚୁର୍ ପୟ୍ମୁଟ୍ । ୧୮ ଇଶ୍ୱର୍ତେ ସାହାଯ୍ୟ ବିକ୍ୟାତାଲ୍କି ପ୍ରାର୍ତନା ତଡ଼୍ ଇୱୁସାର୍ରେ ମାଡ଼ାଟ୍ । ସାର୍ରେ ଅସୁବିଦା ୱେଲେ ପବିତ୍ର ଆତ୍ମାତେ ଚାଲାମାଡ଼ାନ୍ ଲେକାମ୍ ପ୍ରାର୍ତନା ମାଡ଼ାଟ୍ । ତିଆର୍ତେ ମାନୁଟ୍; ବେସୁଟ୍ ଆୟ୍ୱିମାଟ୍ । ଇଶ୍ୱର୍ତେ ନାରୁଡ଼୍ ସେଙ୍ଗେ ସାରେଦାମ୍ ପ୍ରାର୍ତନାତାଗ୍ ମନ୍ ଇସ୍ମାନୁଟ୍ । ୧୯ ନା ସେଙ୍ଗେ ମିକା ପ୍ରାର୍ତନା ମାଡ଼ାଟ୍, ବେଲାକି ସୁସମାଚାର୍ଦେ ଲୋପେତ୍ ବିଷୟ୍ କେତାନଙ୍କ୍ ନୁ ୱେର୍ରେଇଲ୍ୱେ ଆଦ୍ କେତାନଙ୍କ୍ ଇଶ୍ୱର୍ ନା ପାୟୁର୍ତାଗ୍ ଟିକ୍ କବର୍ ଇଦ୍ତଣ୍ଡ୍ । ୨୦ ଇଞ୍ଜେ ଇକ୍ଲେମ୍ତଡ଼୍ ବନ୍ଦିତାଗ୍ ମାତ୍କେମିକା ନାନ୍ ସୁସମାଚାର୍ ସେଙ୍ଗେ ୱେରଣ୍ଡ୍ ରାଜଦୂତ୍ । ପ୍ରାର୍ତନା ମାଡ଼ାଟ୍, ବେଲାକି ନାନ୍ ସାହାସ୍ ତଡ଼୍ ମନ୍ଇସ୍ ସୁସମାଚାର୍ ପ୍ରଚାର୍ ମାଡ଼ାନଙ୍କ୍ ପାର୍ଦ୍ତାନ୍ ।
ମାଡ଼େଙ୍କ୍ତାଦ୍ ନମସ୍କାର୍
୨୧ ✡ପ୍ରେରିତ ୨୦:୪; ୨ ତୀମତି ୪:୧୨.✡କଲସୀୟ ୪:୭,୮.ନାୟାଦ୍ ଅବସ୍ଥା ବିଷୟ୍ତେ ମିଡ଼୍ ବେଲାକି ପୁନ୍ଦେପାର୍ଦ୍ତିଡ଼୍, ଆଦିନ୍ ସେଙ୍ଗେ ମାନ୍ ପ୍ରିୟ ଦାଦାଲ୍ ନୁ ପ୍ରବୁନ୍ ପାଡ଼୍ୟି ମାଡ଼ମାନ୍ଦାନ୍ ବିଶ୍ୱାସ୍ତେ ଦାସ ତୁକିକ ନା ବିଷୟ୍ତେ ମିକିଂଙ୍କ୍ ସାର୍ରେ ଗଟି କେତିତଡ଼୍ । ୨୨ ମାମ୍ ସାର୍ରେତମ୍ ବେଲା ମିନ୍ଦେମ୍, ଆଦ୍ ବିଷୟ୍ତେ କେସ୍ ମିକିଂଙ୍କ୍ ସାର୍ଦେ ମାଡ଼ାନ୍ ସେଙ୍ଗେ ନାନ୍ ଅଂକିଙ୍କ୍ ମିଇ ଗାର୍ରେ ରଅତୁତାନ୍ । ୨୩ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ବିଶ୍ୱାସି ଦାଦାଲଡ଼୍ ନୁ ଏଲାସ୍କିଙ୍କ୍ ଶାନ୍ତି, ପ୍ରେମ ନୁ ବିଶ୍ୱାସ୍ ଇୱିଣ୍ଡ୍ । ୨୪ ମାନ୍ ପ୍ରବୁ ଜିସୁ କ୍ରିଷ୍ଟନ୍ ସେଙ୍ଗେ ବେନଡ଼ାଦ୍ ପ୍ରେମ ଅମର୍, ଅଡ଼୍ ସାର୍ରେତଡ଼୍କିଂଙ୍କ୍ ଅନୁଗ୍ରହ ଆୟି ।