୯
ବୁମ୍ ନୁ ସ୍ୱର୍ଗତ୍ ସେୱା କିୟାନାଦ୍
୧ ମୁନେତ୍ ନିୟମତାଗ୍ ସେୱାକିନାଦ ନୁ ନାରୁଡ୍ ମାଡ଼୍ତାଦ୍ ଅରଟ୍ ସେୱା ମାଡ଼ାନ୍ ପଡ଼୍ୟେ ବିଷୟତେ ମିନ୍ଦେ । ୨ ଆଦେଲେକାମ୍ ଅରଟ୍ ସେୱା ମାଡ଼ାନ୍ ବାକ୍ଡ଼ା ମାତ୍ତେ । ଆଦିଙ୍କ୍ ପବିତ୍ର ବାକ୍ଡ଼ା ଇଞ୍ଜ କେତ୍ତଡ଼୍ । ଇଗା କୁପି ୱାଟାନ୍ ପଡିୟା, ଅରଟ୍ ଟେବୁଲ୍ ନୁ ଟେବୁଲ୍ତେ ପର୍ର ଇଶ୍ୱରନ୍ ମାଇଦିଙ୍କ୍ ମାନାଡ଼୍ ଇତ୍ତାୱ ରୂଟି ମାତ୍ତା । ୩ ସିଲେତ୍ ପେର୍କେ ମେଣ୍ଡେୱେରଟ୍ ବାକ୍ଡ଼େ ମାତ୍ତା ଆଦିନ୍ ବାଡ଼ିୟା ପବିତ୍ର ପଡ଼୍ୟେ ଇଞ୍ଜ କେତିତଡ୍ । ୪ ଆଗା ସୁନାତାଦ୍ ଦୁପାମ୍ ଇଦାନାଦ୍ ପଡ଼୍ୟେ ମାତ୍ତେ, ମେଣ୍ଡେ ସନ୍ତେ ତିଆର୍ ମାଡ଼୍ତାଦ୍ “ନିୟମ ବାକ୍ସ,” ମାତ୍ତେ, ଇଦ୍ ବାକ୍ସତେ ଲୋପେ “ମାନ୍ନା,”*ଉସ୍କ ନେଲ୍ତାଗ୍ ମାନ୍ଦାନ୍ୱେଲେ ସ୍ୱର୍ଗକନ୍ସ୍ ତିନ୍ଦାନାଦ୍ କାଦି ଇଶ୍ୱର୍ ଇତ୍ତଣ୍ଡ୍ । ଆଦିନ୍ ଅର୍ତ ବାଆତେ ? ମାନ୍ଦାନାଦ୍ ଅରଟ୍ ସୁନାତାଦ୍ କାସ୍ଲା ମାତ୍ତା, ହାରୋଣତାଦ୍ ଡୁଡ୍ କଡ଼୍ସି ମାତ୍ତେ ମେଣ୍ଡେ ଇଶ୍ୱର୍ତେ ଆଜ୍ଞା ଏକିଇତାୱ ରେଣ୍ଡ୍ ଚାପେ କାଲକ ମାତ୍ତା । ୫ ଆ ବାକ୍ସତେ ପର୍ର ଇଶ୍ୱରନ୍ ମାଟା ନିଦର୍ଶନ୍ ଲେକାମ୍ ରେକା ପେୟତାୱ୍ ରେଣ୍ଡ୍ ଜନ୍ତୁତ୍ ପୁତ୍ଲାମ୍ ମାତ୍ତା । ଇୱୁ ପାପ୍ କ୍ଷମା ପଡ଼୍ୟେ ପରୁ ତାମ୍ ରେକା ଓଡ଼ି ମାତ୍ତା, ଇତ୍କେ ଇଞ୍ଜେ ଇୱୁସାରେତାୱୁ ବାକ୍ୟା ମାଡ଼ାନ୍ ଦର୍କାର୍ ଆୟ । ୬ ଆଗେ ଇଦ୍ରକମ୍ ନିୟମ୍ ମିନ୍ଦେ, ପୁଜାରିଡ଼୍ ସାରେଦିନେ ତମ୍ବତେ ମୁନେତ୍ ବାକ୍ଡ଼େତାଗ୍ ନେଙ୍ଗି ଅଡ଼୍ୱାଦ୍ କର୍ତବ୍ୟ ସାଦନ୍ ମାଡ଼ିତଡ଼୍ । ୭ ଲୋପେତ୍ ମେଣ୍ଡେୱେରଟ୍ ବାକରାତାଗ୍ ବେଡ଼ିୟଡ଼୍ ପୁଜାରି ଆଦେପାର୍ଦାତଣ୍ଡ୍, ଅଣ୍ଡ୍ ଇଗା ଏଣ୍ଡତେ ଅରଟ୍ଦାମ୍ ନେଙ୍ଗିତଣ୍ଡ୍, ଅଣ୍ଡ୍ ତାନ୍ ମାଇଦିଙ୍କ୍ ନୁ ନାରୁଡ୍ ପୁନୱାକଟ୍ ମାଡ଼୍ତାଦ୍ ପାପ୍ତେ ମାଇଦିଙ୍କ୍ କାୟ୍ତାଗ୍ ନେତୁର୍ ପୋଇସ୍ ଇଶ୍ୱରନ୍ ସାଙ୍ଗ୍ ପୁଜାନଙ୍କ୍ ଆନତ୍ତଣ୍ଡ୍ । ୮ ଇ ସାର୍ରେ ବିଷୟତିଞ୍ଚ ପବିତ୍ର ଆତ୍ମା ଇଦ ଗଟ୍ ଗାଟି ଲେକେତ୍ ନାଡ଼୍ସ୍ପିମିନ୍ଦେ ଯେ, ମୁନେତ୍ ବେଦି ମାନ୍ଦାନ୍ ଯାକ, ବାଡ଼ିୟା ପବିତ୍ର ଡ଼େଡାତାଗ୍ ଆଦାନ୍ ଆର୍ ତନ୍ଦିଲେ । ୯ ଇଞ୍ଜେତ୍ କାଲାତିନ୍ ଉଡ୍କେ ଇଦ୍ ଅରଟ୍ ୱେଷଡ଼୍ତେ ଲେକେତ୍ । ଇତ୍କେ, ଇଶ୍ୱରନ୍ ସାଙ୍ଗ୍ ଇତ୍ତାଦ୍ ପୁଜାସାମାନ୍ ନୁ ପଶୁ ପୁଜକେ ଉପାସନ୍ ମାଡ଼ାନ୍ ନାରୁନ୍ ହୃଦୟ୍ତିନ୍ ସାୟେ ମାଡ଼େପାର୍ୱ । ୧୦ ଇୱୁ ସାର୍ରେ ତିନ୍ଦାନାୱ୍, ଉଣ୍ଡନାୱ୍, ପବିତ୍ର ଆଦାନ୍ ସେଙ୍ଗେ ବାୟ୍ଦେତ୍ କ୍ରିୟାକର୍ମ୍; ଇଶ୍ୱର୍ତେ ପୁନାଦ୍ ନିୟମ୍ତାଦ୍ ପ୍ରତିଷ୍ଟା ଯାକ ଇୱୁ ସାରେତାୱିନ୍ ଦର୍କାର୍ ମାତ୍ତେ । ୧୧ ଇତ୍କେ ଇଞ୍ଜେ ମାମ୍ ବେନ୍ ସାୟେ ବିଷୟ ଦର୍କସ୍ତମ୍, କ୍ରିଷ୍ଟ ଆୱସାର୍ରେତାୱିନ୍ ବାଡ଼ିୟା ପୁଜାରି ଇନା ୱାସ୍ମିନ୍ଦେନ୍ । ଅଣ୍ଡ୍ ବେନ୍ ଉପାସନା ତମ୍ବୁତାଗ୍ ପାଡ଼୍ୟି ମାଡ଼ୁତଣ୍ଡ୍, ଆଦ୍ ଶ୍ରେଷ୍ଟ ନୁ ଗାଟି ପବିତ୍ର । ଆଦ୍ ନାରୁଡ୍ ମାଡ଼୍ତାଦ୍ ଆୟ । ଆଦ୍ ଇଦ୍ ବୁମ୍ତାଗ୍ ଅରଟ୍ ଦୁଡ଼େ ଆୟ । ୧୨ କ୍ରିଷ୍ଟ ଆ ତମ୍ବୁତାଲେ ଆ ବେଡ଼ିୟଡ଼୍ ପବିତ୍ର ବେଦିତାଗ୍ ଅଣ୍ଡୟ୍ଦାମ୍ ନେଙ୍ଗାନ୍ୱେଲେ ଆଗା ବଲି ଇଦାନ୍ ମାଇଦିଙ୍କ୍ ମେକା ନୁ ପେୟେ ନେତୁର ଆସ୍ ଆନୱେ ମାତ୍ତଣ୍ଡ୍ । ଅଣ୍ଡ୍ ମାନାଙ୍ଗ୍ ତାନ୍ ନିଜର୍ ନେତୁର ଇସ୍ ସାରେଦିନେତ୍ ମାଇଦିଙ୍କ୍ ଗେଲ୍ସ୍ପିତଣ୍ଡ୍ । ୧୩ ପଅନ୍ତେ ପଦତି ତଡ଼୍ ବେନଡ଼୍ ପୁଜ୍ ମାଡ଼୍ୱାଙ୍କ୍ ସାୟେ ଇଲେଡ଼୍, ଅଡ଼୍ ପର୍ର ମେକା ନୁ କଅନ୍ଦାତାଦ୍ ନେତୁର୍ ମେଣ୍ଡେ ଗଡ୍ ପଡିସ୍ତାଦ୍ ନିର୍ ଇସ୍କେ, ଅଡ଼୍ ପବିତ୍ର ଆଦ୍ତଡ଼୍ । ୧୪ ଇଦ୍ ଯଦି ନିଜାମ୍ ଆସ୍ମାନ୍ତ୍ତା, ଆଲେଇତ୍କେ କ୍ରିଷ୍ଟନାଦ୍ ନେତୁର୍ ମେଣ୍ଡେ ବେସର୍ ପେର୍କେ ଦର୍କାର୍ ଆୟ ? ଆଚୟ ତେର୍ୱାଦ୍ ଜିୱୁତ୍ ତଡ୍ଦେ ଅଣ୍ଡ୍ ତାନାକ୍ ଇଶ୍ୱରନ୍ ମାଇଦେ ଅଣ୍ଡ୍ ନିର୍ଦୋଷ୍ ପୁଜ୍ତାଗ୍ ମନ୍ ଇଦୁତଣ୍ଡ୍ । ତାନାଦ୍ ଆଦ୍ ନେତୁର୍ତେ ସାଙ୍ଗ୍ କାରାପ୍ ପାଡିୟନୁଞ୍ଚ ୱେରେ ଆସ୍ ମାୟାଦ୍ ଜିୱୁ ନେଲ୍ଲା ମାନ୍ତା ନୁ ମାମ୍ ଜିୱୁ ମାନ୍ଦାନ୍ ଇଶ୍ୱରନ୍ ସେୱା ମାଡା ପାର୍ଦାତମ୍ । ୧୫ ଆଦେନ୍ ସାଙ୍ଗ୍ କ୍ରିଷ୍ଟ ପୁନା ନିୟମ୍ ମାଡ଼୍ତଣ୍ଡ୍, ବେଲାକି ବେନଡ଼୍କ୍ ଇଶ୍ୱର କାର୍ଙ୍ଗ୍ତଣ୍ଡ୍, ଓଡେ ଇଶ୍ୱର ପ୍ରତିଜ୍ଞା ମାଡ଼୍ତାଦ୍ ଅନନ୍ତ ଆର୍ଶିବାଦ୍ ଦର୍କାକିଦ୍ତଡ୍ । ମୁନେତ୍ ନିୟମ୍ ପାଡ଼୍ୟି ମାଡ଼ାନାସୁଟ, ନାରୁଡ୍ ବେନ୍ସାରେ ପାପ୍ ମାଡ଼୍ମାତ୍ତଡ଼୍, ଅଡ୍ ସାର୍ରେ କ୍ରିଷ୍ଟ ଡଲ୍ତା ସେଙ୍ଗେ ଗେଲ୍ସି ମିନ୍ଦେଡ଼୍ ।
୧୬ ଅଣ୍ଡୟ୍ ଚୁକ୍ତି ନିୟମ୍ ଲେକାମ୍ ଆଦ୍ ପାଡ଼୍ୟି ମାଡ଼ାନ୍ ସେଙ୍ଗେ ଚୁକ୍ତି ମାଡ଼ିମାନ୍ଦାନ୍ ନାରୁନାଦ୍ ଡଲାନାଦ୍ ଦର୍କାର୍ । ବେନଡ଼୍ ନାରୁଡ୍ ତାନାକ୍ ଡଲ୍ତା ପାୟ୍ ତାନ୍ ବୁମ୍ ନେଲ୍ ବେନନ୍ ଅଦ୍ତଡ଼୍ ଇଞ୍ଜ ଲେକା ମାଡି ତାତିତଡ୍; ଆର୍ ଡଲ୍କେ; ଆସ୍କେ ଆଦ୍ ଚାଲେମ୍ ଆତା । ୧୭ ଆର୍ ଡଲ୍ତାପାୟ୍ ଆଦ୍ କାଗଜ୍ ଚାଲେମ୍ ଆତା । ଆର୍ ଜିୱୁ ମାନ୍ଦାନ୍ୱେଲେ ଆଦ୍ ଚାଲେମ୍ ଆୟ୍ । ୧୮ ଆଦେନ୍ମାଇଦେ ମୁନେତ୍ ନିୟମ୍ ଗାଲା ନେତୁର୍ତେନ୍ ଚାଲେମ୍ ଆସମାତ୍ତା । ୧୯ ବାତେଙ୍କ୍ଇତ୍କେ ମୁନେନ୍ ମୋଶାନ୍ ନିୟମ୍ତେ କାନୁନ୍ତାଗ୍ ମାନ୍ଦାନ୍ ନାରୁଡାଗ୍ କେତ୍ତଣ୍ଡ୍ । ତାନ୍ପେର୍କେ ଅଣ୍ଡ୍ ପେୟେ ନୁ ମେକା ନେତୁର୍ତିନ୍ ଏର୍ଦାଗ୍ କାଲ୍ପି ଏର୍ରେ ରଙ୍ଗ୍ତାଦ୍ ମେଣ୍ଢେ କେଲ୍କ୍ ନୁ ଜୁପା କାରାତା ରଟ୍ଟତେ କାନୁନ୍ ଲେକେମ୍ ଆସ୍ ମାନ୍ଦାନ୍ ବଇତ୍ ପର୍ର, ମେଣ୍ଡେ ନାରୁଡ୍ ପର୍ର ସାଚନ୍ ମାଡ଼୍ତନ୍ । ୨୦ ଅଣ୍ଡ୍ କେତ୍ତଣ୍ଡ୍, “ବେନ୍ ନିୟମ୍ ପାଲନ୍ ମାଡ଼ାନଙ୍କ୍ ଇଶ୍ୱର୍ କେସ୍ମିନ୍ଦେଣ୍ଡ୍, ଇଦ୍ ନେତୁର୍ ଆଦ୍ ନିୟମ୍ ବିଷୟ୍ କେତିତ୍ ।” ୨୧ ମଶାଲ୍ ଆଦ୍ ଲେକେମ୍ ନେତୁର୍ ଆସ୍ ତମ୍ବୁ ମନ୍ଦିର୍ ନୁ ଉପାସନାତାଗ୍ ବ୍ୟବହାର୍ ଆଦ୍ନ୍ ସାର୍ରେ ଜିନିଷ୍ତେ ପର ଇସ୍କ୍ତଣ୍ଡ୍ । ୨୨ ମେଣ୍ଡେ ମୋଶାନ୍ ନିୟମ୍ ଲେକାମ୍ ସାର୍ରେ ବିଷୟ୍ ନେତୁର୍ତଡ଼୍ ପବିତ୍ର ଆଦ୍ତା ନୁ ନେତୁର୍ ତଡ଼୍କେ କ୍ଷମା ପାଏମ୍ ଆଦ୍ତେ ।
କ୍ରିଷ୍ଟନ୍ ବଲିଦାନ୍ ପାପାମ୍ତିଙ୍କ୍ ଦୁରାମ୍ ମାଡ଼ିତ୍
୨୩ ବେନ୍ ବିଷୟ୍ ସ୍ୱର୍ଗତେ ମୂଲ ବିଷୟ୍ ଲେକେମ୍, ଆୱୁସାରେ ନେତୁର୍ ତଡ଼୍ ପବିତ୍ର ଆଦାନ୍ ଦର୍କାର୍ ମାତ୍ତେ, କିନ୍ତୁ ସ୍ୱର୍ଗୀୟ ବିଷୟ୍କି ସେଙ୍ଗେ ବେଡ଼୍ୟେ ବଲିଦାନ୍ ଦର୍କାର୍ । ୨୪ ବାତ୍ ନାରୁଡ଼୍ ତିଆର୍ ମାଡ଼ଡ଼୍, ଇଦ୍ରକମ୍ ଅଣ୍ଡୟ୍ ପବିତ୍ର ପଡ଼୍ୟେତାଗ୍ କ୍ରିଷ୍ଟ ଆତ୍ତଣ୍ଡ୍ । ଆଦ୍ ବାତ୍ବା ନିଜାତାଦ୍ ବିଷୟ୍ତେ ଅନୁରୁପ୍ ଆୟ । ଅଣ୍ଡ୍ ସ୍ୱର୍ଗତାଗ୍ ଆତ୍ତଣ୍ଡ୍ । ଆଗେ ଅଣ୍ଡ୍ ମାନ୍ ପାକେ ଇଞ୍ଜେ ଇଶ୍ୱର୍ତେ ମୁନେ ମିନ୍ଦେଣ୍ଡ୍ । ୨୫ ଇହୁଦିଡ୍ ବାଡ଼ିୟା ପୁଜାରିଡ଼୍ ବେଦ୍ଲେକାମ୍ ୱାଡ଼୍ଷାତେ ୱେରଟ୍ଦାମ୍ ପଶୁ ନେତୁର୍ ଆସ୍ ବାଡ଼ିୟା ପବିତ୍ର ଜାଗାତାଗ୍ ଅନ୍ତଡ୍ । ଆଦେରକମ୍ କ୍ରିଷ୍ଟ ନିଜେତିଙ୍କ୍ ସେନେମାନ୍ ଉତ୍ସର୍ଗ ମାଡ଼ାଙ୍କ୍ ଆନନ୍ । ୨୬ ଆଲେଇତ୍କେ, ଅଙ୍କ୍ ବୁମ୍ ମାଡ୍ତାଗାନୁଞ୍ଚ୍ ନାର୍ଗେଦାମ୍ ଦୁଃକକଷ୍ଟ ମାଡ଼ାନାଦ୍ ମାତ୍ତା । ମାତି ଅଣ୍ଡ୍ ଯୁଗାନ୍ତ ସମୟତେ ତାନାକେ ପୁଜିଆତ୍ତେ ମାଇଦିଙ୍କ୍ ସାରେଦିନେତ୍ ମାଇଦିଙ୍କ୍ ଅଣ୍ଡୟ୍ଦାମ୍ ପାପ୍ତାଦ୍ ଲାୱଦିନ୍ ଲୋପ୍ମାଡ଼ାନଙ୍କ୍ ୱାସ୍ମାତଣ୍ଡ୍ । ୨୭ ସାର୍ରେତଡ୍ ଅରଟ୍ଦାମ୍ ଡଲିତଡ଼୍ ମେଣ୍ଡେ ତାନ୍ ପେର୍କେ ଇଶ୍ୱରନ୍ ବିଚାରତା ମୁନେ ଆଦାଙ୍କ୍ ଆଦ୍ତେ । ୨୮ ଆଦେଲେକାମ୍ ନାର୍ଗେମୁଲ୍ଦାଦ୍ ପାପ୍ ଦୁରାମ୍ ମାଡ଼ାନଙ୍କ୍ କ୍ରିଷ୍ଟ ଅରଟଦାମ୍ ପୁଜିଆତ୍ତଣ୍ଡ୍ । ଅଣ୍ଡ୍ ମେଣ୍ଡେ ୱାଦ୍ତଣ୍ଡ୍ । ଆସୁଙ୍ଗ୍ ମେଣ୍ଡେ ପାପ୍ତେ ସାଙ୍ଗ୍ କାଇଲାନ୍ ମାଇଦିଙ୍କ୍ ଅଣ୍ଡ୍ ୱାୱଣ୍ଡ୍ । ଅଣ୍ଡ୍ ୱାଦ୍ତଣ୍ଡ୍, ଅନ୍ ସେଙ୍ଗେ କେପିମାନ୍ଦାନ୍ ନାରୁଡ଼୍କିଙ୍କ୍ ପରିତ୍ରାଣ ମାଡ଼ାନ୍ ସେଙ୍ଗେ ।
*୯:୪ ଉସ୍କ ନେଲ୍ତାଗ୍ ମାନ୍ଦାନ୍ୱେଲେ ସ୍ୱର୍ଗକନ୍ସ୍ ତିନ୍ଦାନାଦ୍ କାଦି ଇଶ୍ୱର୍ ଇତ୍ତଣ୍ଡ୍ । ଆଦିନ୍ ଅର୍ତ ବାଆତେ ?