ଯାକୁବ ଲିଖିତ ପତ୍ର
ଯାକୁବ ଲେକ୍ତାଦ୍ ଚିଟି
ଯାକୁବ ବଇ ବିଷୟ୍ତେ ଅଣ୍ଡୟ୍ ପଦ୍
ଯାକୁବ ବଇ ଯାକୁବ ପେଦେର୍ତେ କାର୍ଙ୍ଗମାନ୍ଦାନ୍ ୱେରଣ୍ଡ୍ ନାରୁଣ୍ଡ୍ ତଡ଼୍ ଲେକା ଆତ୍ତେ । ଇ ଯାକୁବ ସମ୍ବାବନା ଜିସୁ କ୍ରିଷ୍ଟନ୍ ତାମୁଣ୍ଡ୍ ମାତ୍ତଣ୍ଡ୍, ବେନ କି ମୁନେତ୍ ମଣ୍ଡଲିତେ ଅର୍ତୁଣ୍ଡ୍ ନେତାଲ୍ ନୁ ଜିରୁସାଲେମ୍ ସବାତେ ସବ୍ୟ ମାତ୍ତଣ୍ଡ୍ ପ୍ରେରିତ ୧୫:୧୩। ପ୍ରେରିତ୍ ପାଉଲ୍ ଗାଲା ଯାକୁବଙ୍କ୍ ମଣ୍ଡଲିତେ ଦିମା ଇଞ୍ଜ କାର୍ଙ୍ଗିତଡ଼୍ ଗାଲାତୀୟ ୨:୯ । ଯାକୁବ ବଇ ଜିସୁ କ୍ରିଷ୍ଟ ଜନମ୍ତେ ପାଚାଶ୍ ଏଣ୍ଡ୍କ୍ ପେର୍କେ ଲେକାଆତ୍ତେ ଇଞ୍ଜ ବାଇବଲ୍ ପଣ୍ଡିତିଡ଼୍ ବିଶ୍ୱାସ୍ ମାଡ଼ିତଡ଼୍ । ଯାକୁବ ଜିରୁସାଲେମ୍ତେ ମଣ୍ଡଲି ନେତାଲ୍ ମାତ୍ତଣ୍ଡ୍ ଆଦିଙ୍କ୍ ସମ୍ବାବନ୍ ଆଗେ ବାସେ ମାଡ଼ମାନ୍ଦାନ୍ୱେଲେ ଅଣ୍ଡ୍ ଇଦ୍ ବଇ ଲେକିମାତ୍ତଣ୍ଡ୍ । ଯାକୁବ ଦେଶ୍ତାଗ୍ ୱେରେ ୱେରେ ଆସ୍ମାନ୍ଦାନ୍ ବାରଟାନ୍ ଗୋଷ୍ଠୀକିଙ୍କ୍ ତାନ୍ ବଇତାଗ୍ ପରିଚୟ ଇସ୍ ମିନ୍ଦେଣ୍ଡ୍ ୧:୧ ।
ଆଦ୍ପାର୍ଦ୍ତେ ବ୍ୟବହାର୍ ଯୋଗ୍ୟ ବିଷୟ୍ ସାର୍ରେ କ୍ରିଷ୍ଟିୟାନ୍ ନାରୁଡ଼୍ ସେଙ୍ଗେ ଆଦ୍ତେ, କିନ୍ତୁ ବାରଟାନ୍ ଗୋଷ୍ଠୀ ବିଷୟ୍ତେ ବ୍ୟବହାର୍ ମାଡ଼ିମାନ୍ଦାନ୍ ଶଦ୍ଦ ସମ୍ବାବନ୍ ଯାକୁବ ସିଦା ଯିହୁଦୀ କ୍ରିଷ୍ଟିୟାନ୍ ନାରୁଡ଼୍କିଙ୍କ୍ ଲେକିମାତ୍ତଣ୍ଡ୍ । ବାତେଙ୍କ୍ଇତ୍କେ ଇଦ୍ ବଇ ଏକାମ୍ ମାନ୍ଦାନ୍ କାର୍ତାନଡ଼୍କିଙ୍କ୍ ଏୱୁସାନ୍ ବିଷୟ୍ତେ ଟିକଣା ଇଦ୍ତେ । ଯାକୁବ, ବିଶ୍ୱାସ୍ ନୁ ପାଡ଼୍ୟିତାଦ୍ ଗାଟି ସମ୍ପର୍କ ପର ତହଃସ୍ କେତିତଣ୍ଡ୍ ଯେ ପ୍ରକୃତ ବିଶ୍ୱାସ୍ ପାଡ଼୍ୟିତାଗ୍ ତଅନ୍ଦିତ୍ ୨:୧୭ । ଅଣ୍ଡ୍ ସାୱୁକାର୍ ନାରୁଡ଼୍ ସେଙ୍ଗେ ପକ୍ଷପାତ୍ ବିଷୟ୍ତେ ସତର୍କ ମାଡ଼ିତଡ଼୍ ୨:୧-୪ । ସଞ୍ଜତ ମାଞ୍ଜ୍ ଗଟିତିର୍ୟାନ୍ ବିଷୟ୍ତେ ଗାଲା ସତର୍କ ଆଦାନଙ୍କ୍ କେତିତଣ୍ଡ୍ । ୩:୧-୧୨
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ଯାକୁବ ତାମ୍ କାର୍ତାନଡ଼୍କିଙ୍କ୍ ଅବିବାଦନ୍ କେତିତଣ୍ଡ୍ । ୧:୧
୨. ଅଣ୍ଡ୍ କ୍ରିଷ୍ଟିୟାନ୍ ନାରୁଡ଼୍କିଙ୍କ୍ ଦୁଃକାମ୍ୱେଲେ ଗାଡ଼୍ସ୍ ମାନ୍ଦାନଙ୍କ୍ ସାହାସ୍ ଇଦ୍ତଣ୍ଡ୍ । ୧:୨-୨୭
୩. ପାଡ଼୍ୟିତଡ଼୍ ବେଲା ବିଶ୍ୱାସ୍ ତଅତାନ୍ ଦର୍କାର୍ ଆଦ୍ ବିଷୟ୍ତେ କେତିତଣ୍ଡ୍ । ୨:୧-୨୬
୪. ବାକ୍ୟ ବେଲା ଶକ୍ତି ଆଦ୍ତେ ଆଦ୍ ଅଣ୍ଡ୍ ଲେକ୍ତଣ୍ଡ୍ । ୩:୧-୧୨
୫. ଯାକୁବ ଇଶ୍ୱର୍ତେ ଜ୍ଞାନ୍ ଜାଗତିକ୍ ଜ୍ଞାନ୍ତାଗାଙ୍କ୍ ୱେରେ ଆଦ୍ପାର୍ତେ ଆଦ୍ ବର୍ଣ୍ଣନା ମାଡ଼ିତଣ୍ଡ୍ । ୩:୧୩–୪:୧୦
୬. ପେର୍କେ ଅଣ୍ଡ୍ କାର୍ତାନଡ଼୍କିଙ୍କ୍ ଗର୍ବ ମାଡ଼୍ମାଟ୍ ଇଞ୍ଜ ସତର୍କ ମାଡ଼ିତଣ୍ଡ୍ । ୪:୧୧–୫:୬
୭. ମାଡ଼େଙ୍ଗ୍ ଯାକୁବ ବେସ୍କେ ସାଦାରନ୍ ନିର୍ଦ୍ଦେଶନା ଇସ୍ ତାନ୍ ଲେକା ତେର୍ସ୍ପିତଣ୍ଡ୍ । ୫:୭-୨୦
୧
୧ ✡ମାତିଉ ୧3:୫୫; ମାର୍କ ୬:3; ପ୍ରେରିତ ୧୫:୧3; ଗାଲାତୀୟ ୧:୧୯.ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ଦାସ ଯାକୁବନ୍ ୱେଏକ୍ ୱେଏକ୍ ଆତ୍ତେ ଇଶ୍ୱର୍ତେ ନାରୁଡ଼୍କିଙ୍କ୍ ନମସ୍କାର୍ ।
ବିଶ୍ୱାସ୍ ନୁ ବୁଦ୍
୨ ହୋ ନା ଦାଦାଲଡ଼ି ନୁ ଏଲାସ୍କ୍, ମିଡ଼୍ ବେସୁଟ୍ ନାର୍ଗେ ପରିକ୍ଷାତାଗ୍ ପରିକ୍ଷା ଇଦ୍ତିଡ଼୍, ଆସୁଟେ ଆଦ୍ ୱେଡ଼୍କେତ୍ ବିଷୟ୍ ଇଞ୍ଜ ଏର୍କା ମାଡ଼ାଟ୍; ୩ ପରିକ୍ଷା ଇତ୍ତେ ବିଶ୍ୱାସ୍ ଇ ଶକ୍ତିତଡ଼୍ ମାଡ଼ିତ୍, ଇଦ୍ ତ ପୁତ୍ତିଡ଼୍ । ୪ ମେଣ୍ଡେ, ମିଡ଼୍ ବେଲାକି ବାତ୍ ଗାଲା ବିଷୟ୍ତାଗ୍ କମ୍ ଆୟ୍ୟକଟ ସାୟେ ନୁ ସାରେ ମାଡ଼ିତିଡ଼୍, ଆଦିନ୍ ସେଙ୍ଗେ ଶକ୍ତିତଡ଼୍ ପାଡ଼୍ୟିଦିଙ୍କ୍ ସାରେ ମାଡ଼ିତିଡ଼୍ । ୫ ଇତ୍କେ ମିଇ ଲୋପେଙ୍କ୍ ବେସୁଟ୍ ବେନ ବୁଦ୍ ଅବାବ୍ ଆତ୍କେ, ଆସୁଟେ ବେନ୍ ଇଶ୍ୱର୍ ଦଷ୍ ପୟକଟ କମ୍ଟି ଆୟକଟ୍ କାୟ୍ଦେ ସାରେତଡ଼୍କିଂଙ୍କ୍ ଇଦ୍ତଣ୍ଡ୍, ଅନ୍ ମୁନ୍ନେ ଅଣ୍ଡ୍ ପ୍ରାର୍ତନା ମାଡ଼ିଣ୍ଡ୍, ଆସୁଟେ ଅଂକିଙ୍କ୍ ଇଦ୍ତଡ଼୍ । ୬ ବାତେଙ୍କ୍ ଇତ୍କେ ଅଣ୍ଡ୍ ଆଦ୍ତେ କି ଆୟ ଇଞ୍ଜ ଏର୍କା ମାଡ଼କଟ୍ ପ୍ରାର୍ତନା ମାଡ଼ାଟ୍, ଆଦ୍ ରକମ୍ ନାରୁଣ୍ଡ୍, ଅଣ୍ଡ୍ ଗାଆଲ୍ଦ ଚାଲେମ୍ ଆଦାନ୍ ସମୁଦ୍ରତେ ତଲ୍କଡ଼୍ ଲେକାମ୍ । ୭ ଆଦ୍ ରକମ୍ ନାରୁଡ଼୍ ପ୍ରବୁନାଗାଙ୍କ୍ ବାତ୍ ପାଏମ୍ ଆଦ୍ତନ୍ ଇଞ୍ଜ ଆଲ୍ସ୍ମାକିଣ୍ଡ୍; ୮ ଅଣ୍ଡ୍ ତ ରେଣ୍ଡ୍ ମନ୍ଦେ ନାରୁଡ଼୍, ନିଜେତାଦ୍ ସାର୍ରେ ବିଷୟ୍ତାଗ୍ ଇକ୍ ଚିଟିକେ ଆଦ୍ତଣ୍ଡ୍ ।
ଗରିବ୍ ନୁ ସାଉକାର୍
୯ ଗରିବ୍ତେ ମାନ୍ଦାନ୍ କ୍ରିଷ୍ଟିୟାନ୍ ନାରୁଡ଼୍ ଉନ୍ନତି ଆତ୍କେ ୱେଡ଼୍କେ ଆୟିଣ୍ଡ୍, ୧୦ ସାଉକାର୍ କ୍ରିଷ୍ଟିୟାନ୍ ବିଶ୍ୱାସି ନିଜେ ଗରିବ୍ ଆଦାନଙ୍କ୍ ଆଲ୍ସିଣ୍ଡ୍, ବାତେଙ୍କ୍ଇତ୍କେ ଅଣ୍ଡ୍ ଗାଡ୍ତେ ପୁଙ୍ଗାର୍ ଲେକାମ୍ ଦୁଲ୍ଲିତଣ୍ଡ୍ । ୧୧ ପଡ଼୍ଦ୍ କାମ୍କେତେ ପେୟ୍କେ, ଗାଡ୍ ବେଲା ୱାସି ଆଦ୍ତେ ନୁ ତାନ୍ ପୁଙ୍ଗାର୍ ଦୁଲ୍ଲି ରାଲିତ୍ ମେଣ୍ଡେ ତାନାଦ୍ ସୁନ୍ଦର୍ ମାୟି ଆଦ୍ତେ, ଆଦେରକମ୍ ସାଉକାର୍ ନାରୁଡ଼୍ ତାନ୍ ସାର୍ରେ ବିଷୟ୍ତାଗ୍ ୱାସି ଆଦ୍ତନ୍ ।
ପରିକ୍ଷା ନୁ ଲବ୍
୧୨ ବେନ ନାରୁଣ୍ଡ୍ ପରିକ୍ଷାତାଗ୍ ଜିଡ଼ିତଣ୍ଡ୍, ଅଣ୍ଡ୍ ବାଗ୍ୟବାନ୍, ବାତେଙ୍କେଇତ୍କେ ପ୍ରବୁ ତାନ୍ ପ୍ରିୟ ନାରୁଡ଼୍କ୍ ବେନ୍ ଜିୱେତାଦ୍ ସହଜ୍ ଇଦାନଙ୍କ୍ ଗଟ୍ ଇତ୍ତନ୍, ପରିକ୍ଷା ଇତ୍ତେ ପେର୍କେ ଆ ନାରୁଡ଼୍ ଜିୱେତାଦ୍ ସାୟେ ପ୍ରେମତେ ସହଜ୍ ପାଏମ୍ ଆଦ୍ତନ୍ । ୧୩ ବେନଙ୍କ୍ ପରିକ୍ଷା ଆତ୍କେ, ଅଣ୍ଡ୍ ଇଦ୍ ପରିକ୍ଷା ଇଶ୍ୱର୍ତାଗାଙ୍କ୍ ଆଦୁତ୍ତେ ଇଞ୍ଜ କେଲ୍ମାଟ୍, ବାତେଙ୍କ୍ଇତ୍କେ ଇଶ୍ୱର୍ କାରାପ୍ତାଗ୍ ପରିକ୍ଷା ଆୟ୍ୟଣ୍ଡ୍, ମେଣ୍ଡେ ଅଣ୍ଡ୍ ନିଜେ ବେନଙ୍କ୍ ପରିକ୍ଷା ମାଡ଼ଣ୍ଡ୍ । ୧୪ ଇତ୍କେ ସାର୍ରେ ନାରୁଡ଼୍ ନିଜେତ୍ କାରାପ୍ ପାଡ଼୍ୟି ଆଲ୍ସି ନୁ କାରାପ୍ ଚିନ୍ତେ ମାଡ଼ି ପରିକ୍ଷା ଆଦ୍ତନ୍; ୧୫ ତାନ୍ ପେର୍କେ କାରାପ୍ କାମ୍ତେ ଡଙ୍କେତ୍ ଆସ୍ ପାପତିଙ୍କ୍ ଜନମ୍ ମାଡ଼ିତ୍, ମେଣ୍ଡେ ପାପ୍ ସାରେ ପେର୍ସି ଡଲାନାଦିଙ୍କ୍ ଜନମ୍ ଇଦ୍ତେ ।
୧୬ ହୋ ନା ପ୍ରିୟ ଦାଦାଲଡ଼ି ନୁ ଏଲାସ୍କ୍, ମିଡ଼୍ ଦାନ୍ଦେ ଆୟ୍ମାଟ୍ । ୧୭ ସାର୍ରେ ସାୟେତ୍ ଦାନ ନୁ ସାର୍ରେ ସାୟେତ୍ ଉପହାର୍ ସ୍ୱର୍ଗତେ ବାବାନାଗାଙ୍କ୍ ୱାଦ୍ତେ, ଅଣ୍ଡ୍ ସାରେ ୱେସ୍ତେ ମାବିନ୍ କର୍ତ୍ତାଲ୍ । ଅନ୍ ୱେରେନାରୁଡ଼୍ ଲେକାମ୍ ଆୟନ୍; ମାବ୍ ନିଡ଼୍କେ ମାଡ଼ି ବେସୁଙ୍କ୍ ଇକାଡ଼୍ ସୃଷ୍ଟି ମାଡ଼ଣ୍ଡ୍ । ୧୮ ମାନାଡ଼୍ ବେଲା ଅନ୍ ନିଜାମ୍ ସତ୍ ତିୟାର୍ ମାଡ଼୍ତେ ଜିୱାକ୍ ଲୋପେଙ୍କ୍ ଅଣ୍ଡୟ୍ ମୁନେନ୍ ଆଦ୍ତେ କାୟେ ରକମ୍ ଆଦ୍ତାଡ଼୍, ଆଦିନ୍ ସେଙ୍ଗେ ଅଣ୍ଡ୍ ତାନ୍ ଇଚ୍ଛାତେ ନିଜାତେ ଗଟ୍ ତଡ଼୍ ମାନାଙ୍କ୍ ସୃଷ୍ଟି ଇତ୍ତନ୍ ।
କେଞ୍ଜିତାଡ଼୍ ନୁ ପାଡ଼୍ୟି ମାଡ଼ିତାଡ଼୍
୧୯ ହୋ ନା ପ୍ରିୟ ଦାଦାଲଡ଼ି ନୁ ଏଲାସ୍କ୍, ମିଡ଼୍ ଇଦ୍ ପୁତ୍ତିଡ଼୍ । ସାର୍ରେ ନାରୁଡ଼୍ କେଞ୍ଜାନଙ୍କ୍ ସିଟ୍ପାଟ୍ ଆୟ୍ମୁଟ୍, କେତାନାଗ୍ ଜାମ୍, ମେଣ୍ଡେ କପାମ୍ ଆଦାନଙ୍କ୍ ଜାମ୍ ଆୟିଣ୍ଡ୍, ୨୦ ବାତେଙ୍କ୍ଇତ୍କେ ନାରୁଡ଼ାଦ୍ କପାମ୍ ଇଶ୍ୱର୍ତେ ଇଚ୍ଛା ଦାର୍ମାମ୍ କାମ୍ ମାଡ଼ାନଙ୍କ୍ ପାର୍ୱ । ୨୧ ଆଦିଙ୍କ୍ ମିଡ଼୍ ସାର୍ରେ କାରାପ୍ ବିଷୟ୍ ନୁ ସାର୍ରେ କାରାପ୍ ପାଡ଼୍ୟି ୱିଡ଼୍ସି, ଇଶ୍ୱର୍ତେ ପାକେ ନିଜେତିଙ୍କ୍ ସମର୍ପଣ ମାଡ଼ାଟ୍ ନୁ ମୀଇ ହୃଦୟତାଗ୍ ଅଣ୍ଡ୍ ବେନା ବାକ୍ୟ ଉର୍ସ୍କ୍ତଣ୍ଡ୍ ନୁ ବାତ୍ ମିକିଙ୍କ୍ ରକ୍ଷା ମାଡ଼ାନଙ୍କ୍ ପାର୍ତନ୍, ଆଦ୍ ଗ୍ରହନ୍ ମାଡ଼ାଟ୍ ।
୨୨ ବାତେଙ୍କ୍ଇତ୍କେ ଆସାମ୍ କେଞ୍ଜି ନିଜେ ନିଜେତିଙ୍କ୍ ବୁସା ମାଡ଼୍ୱେ କଞ୍ଚ୍ ବାକ୍ୟତାଦ୍ ପାଡ଼୍ୟି ମାଡ଼ାଟ୍ । ୨୩ ବାତେଙ୍କ୍ଇତ୍କେ ଯଦି ବେନ ବାକ୍ୟତାଦ୍ ପାଡ଼୍ୟି ମାଡ଼୍ୱେ କନ୍ସ୍ ଆସାମ୍ କେଞ୍ଜିତଣ୍ଡ୍, ଅଣ୍ଡ୍ ଦର୍ପନ୍ତାଗ୍ ନିଜେତ୍ ମକମ୍ ଉଡ଼ାନ୍ ନାରୁନ୍ ଲେକାମ୍, ୨୪ ଆଦିଙ୍କ୍ ଅଣ୍ଡ୍ ନିଜେତିଙ୍କ୍ ଉଡ଼ି ଆତ୍ତେ ପେର୍କେ, ଅଣ୍ଡ୍ ବେସତ୍ ନାରୁଡ଼୍, ଆଦ୍ ଆସୁଟେ ମାର୍ଙ୍ଗିତଣ୍ଡ୍ । ୨୫ ଇତ୍କେ ବେନ ନିଜାମ୍, ସ୍ୱାଦିନ୍ତାଦ୍ ନିୟମ୍ତିଙ୍କ୍ ଉଡ଼ି ଅଦିନ୍ତଡ଼୍ ଗାଡ଼୍ସ୍ ମାନ୍ତଣ୍ଡ୍, ମେଣ୍ଡେ ବିସ୍ମରଣଡ଼୍ ଲେକାମ୍ ଆୟକଟ୍ ବରଂ କାମ୍ମାଡ଼ାନଣ୍ଡ୍ ଆଦ୍ତନ୍, ଅଣ୍ଡ୍ ତାନ୍ ପାଡ଼ୟିତାଗ୍ ଦନ୍ୟ ।
୨୬ ଯଦି ବେନ ନିଜେତିଙ୍କ୍ ଦାର୍ମାମ୍ ନାରୁଡ଼୍ ଇଞ୍ଜ ଏର୍କା ମାଡ଼ି, ମେଣ୍ଡେ ନିଜେତ୍ ୱାଞ୍ଜେର୍ତିଙ୍କ୍ ଆୟତ୍ ମାଡ଼ାନଙ୍କ୍ ପାର୍ୱ କନ୍ସ୍ ନିଜେତ୍ ଜିୱୁଣ୍ଡ୍ତିଙ୍କ୍ ଦଷ୍ ମାଡ଼ିତନ୍, ଅନ୍ୱାଦ୍ ଦାର୍ମାମ୍ ସାରେ ଆସାମ୍ । ୨୭ ବେନ୍ ଦାର୍ମାମ୍ କାର୍ମାମ୍ ବାବାଲ୍ ଇଶ୍ୱର୍ତେ କଣ୍ଡେତେ ବିଶୁଦ୍ଦ ନୁ ଉତାର୍ତ, ଆଦ୍ ଅଦୁତ୍ ଦୁର୍ଦ୍ଦଶା ଲେକାମ୍ ଅନର୍ତ ନୁ ରାଣ୍ଡିକିନ୍ ଯତନ୍ ଆଦାନ୍ ସେଙ୍ଗେ ଜଗତ୍ କଷ୍ଟ ତାଗାଙ୍କ୍ ନିଜେତିଙ୍କ୍ ମୁକ୍ତ ନେହେତିକାଡ଼୍ ।
✡୧:୧ ମାତିଉ ୧3:୫୫; ମାର୍କ ୬:3; ପ୍ରେରିତ ୧୫:୧3; ଗାଲାତୀୟ ୧:୧୯.