୩
ୱାଞ୍ଜେର୍
୧ ଆ ନା ଦାଦାଲଡ଼ି ନୁ ଏଲାସ୍କ୍, ମିଡ଼୍ ନାର୍ଗେ ମେସ୍ତେରିଡ଼୍ ଆୟ୍ମାଟ୍; ମେସ୍ତେରି ଯେ ମାନାଡ଼୍, ମାନାଡ଼୍ ନାର୍ଗେ ଦଣ୍ଡ୍ ପାଏମ୍ ଆଦ୍ତାଡ଼୍, ଇଦ୍ ପୁଞ୍ଜ୍ମାନୁଟ୍ । ୨ ଆଦିଙ୍କ୍ ମାନାଡ଼୍ ନାର୍ଗେ ବିଷୟ୍ତାଗ୍ ମଦଲ୍ ଆଦ୍ତାଡ଼୍ । ଯଦି ବେନ ବାକ୍ୟତାଗ୍ ମଦଲ୍ ଆନଣ୍ଡ୍, ଆଲେକେ ଅଣ୍ଡ୍ ନିଜାତେ ନାରୁଡ଼୍, ସାର୍ରେ ମେନ୍ଦୁଲ୍ତିଙ୍କ୍ ଗାଲା ନିଜେତ୍ ଆଦିନ୍ ମାଡ଼େ ପାର୍ଦ୍ତଣ୍ଡ୍ । ୩ ମାନାଡ଼୍ ଗୁରାକିଂଙ୍କ୍ ନିଜେତ୍ ଆଦିନ୍ ମାଡ଼ାନ୍ ସେଙ୍ଗେ ଆ ପାୟୁର୍ତାଗ୍ ଲଗାମ୍ ଇତ୍କେ, ତାନ୍ ପେର୍କେ ଆୱୁ ସାର୍ରେ ମେନ୍ଦୁଲ୍ତିଙ୍କ୍ ଗାଲା ଉଡ଼୍ସ୍ପ ପାର୍ତାଡ଼୍ । ୪ ଉଡ଼ାଟ୍, ଏର୍ ଜାହାଜ୍ ଇସର୍ ବାଡ଼୍ୟାଦ୍ ଆସ୍ ଗାଟି ଗାଲ୍ ତଡ଼୍ ଆତ୍କେ ଗାଲା ଅଣ୍ଡୟ୍ ସୁଦୁରାଦ୍ ମଙ୍ଗ*(ମଙ୍ଗ) ବାଡ଼ିୟାଦ୍ ଜାଜ୍ତିଙ୍କ୍ ଉଡ଼୍ସ୍ପାନାଦ୍ ବା ମାଲ୍ପାନାଦ୍ ହେଣ୍ଡେଲ୍, ଆଦିଙ୍କ୍ ମଙ୍ଗ ଇଞ୍ଜ କେତିତଡ଼୍ କଅତାନ୍ ଉକୁଡ଼୍ ତଡ଼୍ ଉକୁଡ଼୍ତିଙ୍କ୍ ପୟ୍ତେନଣ୍ଡ୍ତେ ଇଚ୍ଛାତେ ଆଦ୍ତେ । ୫ ଆଦେ ରକମ୍ ୱାଞ୍ଜେର୍ ଗାଲା ଅଣ୍ଡୟ୍ ସୁଦୁରାଦ୍ ଆୱୁଙ୍ଗ୍, ଇତ୍କେ ବାଡ଼୍ୟା ଗଟି କେତିତ୍ । ଉଡ଼ାଟ୍, ବେସର୍ ସୁଦୁର୍ କିସ୍ ତାଡ଼୍ମି ତଡ଼୍ ଗାଟି ବେଡ଼୍ୟାଦ୍ ଗୁପ୍ପେତାଗ୍ କିସ୍ ନିଡ଼୍ତିତ୍ ।
୬ ୱାଞ୍ଜେର୍ ଗାଲା କିସ୍ ଲେକାମ୍; ନାର୍ଗେ କାରାପ୍ କାମ୍ଦେ ନିଣ୍ଡିମିନ୍ଦେ; ମେଣ୍ଡେ ଆଦ୍ ମାନ୍ ମେନ୍ଦୁଲ୍ ତାଗେ ମାନ୍ନାଙ୍କ୍ ଆସତ୍ ପ୍ରବାବ ହେକାମ୍ ମାଡ଼ି ମାନାଦ୍ ସାରେ ବିଶ୍ୱାତିଙ୍କ୍ କଲୁଷିତ ମାଡ଼ିତେ । ୱାଞ୍ଜେର୍ତେ ନର୍କ କିସ୍ ମାନାଦ୍ ସାରେ ଜିୱେତିଙ୍କ୍ ନିଡ଼୍ସ୍ପିଦେ । ୭ ଇତ୍କେ ସାର୍ରେ ଲେକାତ୍ ଜିୱାକ୍, ପିଟେ, ଚିଟିକ ଆଦାନ୍ ଜୀୱାକ୍ ନୁ ଏର୍ଦାଗ୍ ମାନ୍ଦାନ୍ ଜିୱୁକିଂଙ୍କ୍ ନାରୁଡ଼୍ ତଡ଼୍ ଆଦିନ୍ ମାଡ଼ାନଙ୍କ୍ ଆଦ୍ତେ, ମେଣ୍ଡେ ଅଦିନ୍ତାଗ୍ ନେଃଏସ୍ ମିନ୍ଦେ; ୮ ଇତ୍କେ ୱାଞ୍ଜେର୍ତିଙ୍କ୍ ବେନ ଅଦିନ୍ତାଗ୍ ନେଃଏତାନଙ୍କ୍ ପାର୍ୱଣ୍ଡ୍, କାରାପ୍ ଗଟି କେତାନଙ୍କ୍ ଆଦ୍ ନିତ୍ତ, ଗାଟି ବୟଙ୍କାର୍ ୱିସାମ୍ ତଡ଼୍ ଆଦ୍ ବର୍ତ୍ତି ଆତ୍ତେ । ୯ ମାନାଡ଼୍ ୱାଞ୍ଜେର୍ ତଡ଼୍ ପ୍ରବୁ ନୁ ବାବାଙ୍କ୍ ଦନ୍ୟବାଦ୍ ମାଡ଼ିତାଡ଼୍, ମେଣ୍ଡେ ଇଶ୍ୱର୍ ଲେକାମ୍ ତିୟାର୍ ଆତ୍ତେ ନାରୁଡ଼୍କିଂଙ୍କ୍ ଅବିଶାପ୍ ଇଦ୍ତାଡ଼୍; ୧୦ ଅଣ୍ଡୟ୍ ପାୟୁର୍ତେ ଆଲା ଦନ୍ୟବାଦ୍ ନୁ ଅବିଶାପ୍ ପେୟ୍ତିତ୍ । ଆ ନା ଦାଦାଲଡ଼ି ନୁ ଏଲାସ୍କ୍, ଇଦ୍ ରକମ୍ ଆଦାନାଦ୍ ଟିକ୍ ଆୟ୍ୟ । ୧୧ ବେଡ଼େମ୍ ବାତ୍ ଅଣ୍ଡୟ୍ ଦନ୍ଦ୍ ଇସ୍ ମିଙ୍ଗ୍ତାଦ୍ ନୁ କାୟ୍ତାଦ୍ ରେଣ୍ଡ୍ ଲେକାତ୍ ଏର୍ ପେସ୍ପିତ୍ ? ୧୨ ଆ ନା ଦାଦାଲଡ଼ି ନୁ ଏଲାସ୍କ୍, ତୟେ ମାଡ଼େତାଗ୍ ବାତ୍ ଜୀତ କାୟା ଆଦିତା, କି ଅଙ୍ଗୁର୍ ଟଣ୍ଡେତାଗ୍ ବାତ୍ ତୟେ କାୟା ଆଦାନଙ୍କ୍ ପାର୍ଦ୍ତେ ? ଅୱଡ଼୍ ବେଡ଼େଡ଼୍ ମିକା ମିଙ୍ଗ୍ତାଦ୍ ଏର୍ ଇଦାନଙ୍କ୍ ପାର୍ୱ ।
ସ୍ୱର୍ଗତାଦ୍ ବୁଦ୍
୧୩ ମିଇ ଲୋପେ ଜ୍ଞାନି ନୁ ବୁଦ୍ଦିମାନ୍ ବେନ ମିନ୍ଦେଣ୍ଡ୍ ? ଅଣ୍ଡ୍ ତାନ୍ ବୁଦ୍ଦ୍ ତଡ଼୍ ସାୟେ ବ୍ୟବହାର୍ ମାଡ଼ି ନିଜେତ୍ ପାଡ଼୍ୟି ମାଡ଼ିଣ୍ଡ୍ । ୧୪ ଇତ୍କେ ଯଦି ମିଇ ଜିୱୁଣ୍ଡ୍ ଲୋପେ ଗାଟି ଇର୍ଷା ମିନ୍ଦେ ନୁ ସ୍ୱାର୍ତପର ମିନ୍ଦେ, ଆଲେକେ ନିଜାମ୍ ବିରୁଦ୍ତେ ଗର୍ବ ମାଡ଼୍ମାଟ୍ ନୁ ମିଚ୍ କେଲ୍ମାଟ୍ । ୧୫ ଇଦ୍ ରକମ୍ ବୁଦ୍ଦ୍ ଇଶ୍ୱର୍ କନ୍ସ୍ ୱାଡ଼, ମାତର୍ ଆଦ୍ ପୃତିବିତାଦ୍, ମେନ୍ଦୁଲ୍ତାଦ୍ ନୁ ବୁତିକ ପାଡ଼୍ୟି; ୧୬ ବାତେଙ୍କ୍ଇତ୍କେ ବେନ୍ ପଡ଼୍ୟେତାଗ୍ ଆଙ୍କାର୍ ନୁ ସ୍ୱାର୍ତପର ମାନ୍ତେ, ଆଦ୍ ପଡ଼୍ୟେତାଗ୍ ବିଶୃକଲା ନୁ ସାର୍ରେ ରକମ୍ କାରାପ୍ ପାଡ଼୍ୟି ମାନ୍ତେ । ୧୭ ଇତ୍କେ ପର୍ର କନ୍ସ୍ ୱାତ୍ତେ ବୁଦ୍ଦ୍ ପବିତ୍ର, ଶାନ୍ତି, ସାୟେ, ମାଡ଼ାଙ୍କ୍ ୱେୟ୍ତିତ୍, ଦୟା ନୁ ଲେକେତ୍ ଆସ୍ମାନ୍ତେ, ଡାୱୁଟ୍ ଇଲ୍ଲେ ନୁ ଆଦ୍ ଚଲନା ଇଲ୍ଲେ । ୧୮ ମେଣ୍ଡେ ଆଦ୍ ଶାନ୍ତି ଇଦାନ୍ ନାରୁଡ଼୍ ତଡ଼୍ ଦାର୍ମାମ୍ ଲେକାମ୍ କାୟେତ୍ ପେଡ଼େମ୍ ୱିତାନଙ୍କ୍ ଆଦ୍ତେ ଦାର୍ମାମ୍ ୱିଜେ କୟ୍ତିତଡ଼୍ ।
*୩:୪ (ମଙ୍ଗ) ବାଡ଼ିୟାଦ୍ ଜାଜ୍ତିଙ୍କ୍ ଉଡ଼୍ସ୍ପାନାଦ୍ ବା ମାଲ୍ପାନାଦ୍ ହେଣ୍ଡେଲ୍, ଆଦିଙ୍କ୍ ମଙ୍ଗ ଇଞ୍ଜ କେତିତଡ଼୍