ମାଥିଉ ଲିଖିତ ଜିସୁ କ୍ରିଷ୍ଟଙ୍କ୍ ସୁସମାଚାର୍
ମାତିଉ ଲେକ୍ତାଦ୍ ଜିସୁ କ୍ରିଷ୍ଟନ୍ ସୁସମାଚାର୍
ମାତିଉ ବଇ ବିଷୟ୍ତେ ଅଣ୍ଡୟ୍ ପଦ୍
ମାତିଉ କେତ୍ତାଦ୍ ସୁସମାଚାର୍ ପୁନେ ନିୟମ୍ତାଗ୍ ଜିସୁ କ୍ରିଷ୍ଟନ୍ ଜିୱୁଣ୍ଡ୍ତିଙ୍କ୍ ତିଆର୍ ମାଡ଼ମାନ୍ଦାନ୍ ନାଲୁ ବଇକିନ୍ ଲୋପେକେ ୱେରଡ଼୍ । ଇୱୁ ସାରେତିଙ୍କ୍ ଜିସୁ କ୍ରିଷ୍ଟନ୍ ଲେକେତାଦ୍ ସମାଚାର୍ ଇତ୍କେ ନେଲ୍ତାଦ୍ କବର୍ ଇଞ୍ଜ କେତିତଡ଼୍ । ଇୱୁ ସାରେ ଜିସୁନ୍ ଡଲ୍ତେ ଅଦିକ୍ ମାତିଉ, ମାର୍କ, ଲୁକ ନୁ ଯୋହନ୍ ଲେକିମାତ୍ତଡ଼୍ । ମାତିଉ କେତ୍ତାଦ୍ ସୁସମାଚାର୍ କେତ୍ତାଦ୍ ଟିକ୍ ତାରିକ୍ ପୁନ୍ୱେମାତ୍କେ ମିକା ପଣ୍ଡିତିଡ଼୍ କେତିତଡ଼୍, ଇଦ୍ କ୍ରିଷ୍ଟନ୍ ଜନମ୍ତେ ମାତର୍ ୬୦ ଏଣ୍ଡ୍କ୍ ଅଦିକ୍ ଲେକ୍ତାଦ୍ ଅସ୍ମାତ୍ତେ । ଇଦ୍ ମିକା ବିଶ୍ୱାସ୍ ମାଡ଼ାଙ୍କ୍ ଆଦ୍ତେ ଯେ ଇଦ୍ ବଇ ପାଲେଷ୍ଟାଇନ୍ ଦେଶ୍ତେ ଯିରୁଶାଲେମ୍ ସହର୍ତାଗାଙ୍କ୍ ଲେକାଆସ୍ ମାତ୍ତେ ।
ମାତିଉ ଇଦ୍ ସୁସମାଚାର୍ତେ ଲେକ୍ତେନଣ୍ଡ୍ । ଜିସୁ ଅଂକିଙ୍କ୍ ଶିଷ୍ୟ ଇଞ୍ଜ କାର୍ଙ୍ଗାନାଦ୍ ମାଡ଼ାନ୍ ମୁନେଙ୍କ୍ ଅଣ୍ଡ୍ ୱେରଣ୍ଡ୍ କରଗ୍ରାହୀ ମାତ୍ତଣ୍ଡ୍ । ଅନାଦ୍ ମେଣ୍ଡେଅନ୍ ପେଦେର୍ ଲେବୀ ମାତ୍ତେ । ଅଣ୍ଡ୍ ବାରଜାନ୍ ପ୍ରେରିତଡ଼୍ ଲୋପେଙ୍କ୍ ୱେରଣ୍ଡ୍ ମାତ୍ତଣ୍ଡ୍ । ଅଣ୍ଡ୍ ମୁକ୍ୟତ୍ ଯିହୁଦିଡ଼୍ ସେଙ୍ଗେ ଇଦ୍ ସୁସମାଚାର୍ ଲେକିମାତ୍ତଣ୍ଡ୍ । ଆଦ୍ ଅଣ୍ଡ୍ ତାନାଦ୍ ଲେକାତାଗ୍ ପାଃନେ ନିୟମ୍ତାଗ୍ ୬୦ ଟା ପଦ୍ ମୂଲ୍ୟାଙ୍କନ ଆଦାନାଦ୍ ପ୍ରମାନିତ୍ ଆଦ୍ତେ । ଜିସୁ ଯେ କ୍ରିଷ୍ଟ ଇତ୍କେ ମସିହ ଇଶ୍ୱର୍ ହେଞ୍ଚିମାନ୍ଦାନ୍ ଉଦ୍ଦାର୍ କର୍ତ୍ତାଲ୍ ନୁ ରାଜାଲ୍ ବେନ ୱାଦାନ୍ ବିଷୟ୍ତେ ପାନ୍ନ୍ତେ ନିୟମ୍ତାଦ୍ ଦର୍ମଶାସ୍ତ୍ରତାଗ୍ ବବିଷ୍ୟବାଣି ଆସ୍ମାତ୍ତେ ଇଦ୍ ମାତିଉ ସାୟେ ଲେକାମ୍ ଲେକାଙ୍କ୍ ଇଚ୍ଛା ମାଡ଼ମାତ୍ତଣ୍ଡ୍ । ଯିହୁଦିଡ଼୍ କ୍ରିଷ୍ଟ ଇତ୍କେ ମସୀହଙ୍କ୍ ରାଜନୀତି ରାଜ୍ୟତାଗ୍ ରାଜାଲ୍ ଆଦ୍ତନ୍ ଇଞ୍ଜ ଆଶେ ମାଡ଼ିତଡ଼୍ । ମାତିଉ ଆଦ୍ ବିଶ୍ୱାସ୍ତିଙ୍କ୍ ମେଣ୍ଡନ୍ଲେକାମ୍ ମାଡ଼ି ଆତ୍ମିକ ଇଶ୍ୱର୍ତେ ରାଜ୍ୟ ବିଷୟ୍ତେ ତିଆର୍ ମାଡ଼ାଙ୍କ୍ ଗାଟି ସାୟେ ଗୁରୁତ୍ୱ ହିତ୍ତଣ୍ଡ୍ ।
ମାତିଉ କେତ୍ତାଦ୍ ସୁସମାଚାର୍ତେ ପୁନେ ନିୟମ୍ତାଗ୍ ପ୍ରାତମିକ୍ ବଇ ଲେକାମ୍ ଦର୍କାର୍ ଆଦ୍ତେ ବାତେଙ୍କ୍ ଇତ୍କେ ପାଃନେ ନିୟମ୍ତାଦ୍ ବାକ୍ୟତିଙ୍କ୍ ନାର୍ଗେ ମାତ୍ରାତେ ଉଦ୍ଦୃତ ମାଡ଼ିମିନ୍ଦେଣ୍ଡ୍ । ଇଦ୍ ବଇ ପାଃନେ ନିୟମ୍ ନୁ ପୁନେ ନିୟମ୍ତିଙ୍କ୍ ଅଣ୍ଡୟ୍ ମାଡ଼ିତନ୍ । ପଣ୍ଡିତିଡ଼୍ ମିକା କେତିତଡ଼୍ ମାତିଉ ତାନ୍ ଲେକାତାଗ୍ ମୋଶାନ୍ ବ୍ୟବସ୍ଥା ବଇକିଂଙ୍କ୍ ଲେକାମ୍ ମାଡ଼ାନ୍ ମାଇଦିଙ୍କ୍ ଆଲ୍ସି ମାଡ଼ିମିନ୍ଦେଣ୍ଡ୍ । ଜିସୁନ୍ ମେଟେତ୍ ପର୍ରତ୍ କେତାନାଦିଙ୍କ୍ ୫–୭, ଇଶ୍ୱର୍ ମୋଶାନ୍ ବ୍ୟବସ୍ଥା ହିଦାନ୍ ବିଷୟ୍ ତଡ଼୍ ମିକା ସାମାନ୍ ମାଡ଼ିତଡ଼୍ ବିବରଣ ୧୯:୩; ୨୩ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ଜିସୁ କ୍ରିଷ୍ଟନ୍ ଜନମ୍ ନୁ ଅନ୍ ସେବାକାମ୍ ଆରାମ୍ । ୧–୪
୨. ଜିସୁ କ୍ରିଷ୍ଟନ୍ ସେବାକାମ୍ ନୁ ଶିକ୍ଷା । ୫–୨୫
୩. ଜିସୁ କ୍ରିଷ୍ଟନ୍ ଡଲ୍ନାଦ୍ ନୁ ପୁନରୁତ୍ତାନ୍ । ୨୬–୨୮
୧
ଜିସୁ କ୍ରିଷ୍ଟନ୍ ବଂଶତଡ଼୍
(ଲୁକ ୩:୨୩-୩୮)
୧ ଇଦ୍ ଆଦୁତ୍ତେ ଜିସୁ କ୍ରିଷ୍ଟନ୍ ଆନିଦାଦିଡ଼୍ତେ ପେଦେର୍ । ଅଣ୍ଡ୍ ଦାଉଦ୍ତେ ବଂଶତଣ୍ଡ୍ ନୁ ଦାଉଦ୍ ଅବ୍ରାହାମ୍ତେ ବଂଶତଣ୍ଡ୍ ମାତ୍ତଣ୍ଡ୍ । ୨ ଅବ୍ରାହାମ୍ ତେ ମାର୍ ଇସ୍ହାକ୍; ଇସ୍ହାକ୍ତେ ମାର୍ ଯାକୁବ୍; ଯାକୁବ୍ତେ ମାର୍ ଯିହୁଦା ନୁ ତାନ୍ ତାମୁଣ୍ଡୁକିଡ଼୍; ୩ ଯିହୁଦା ତାମର୍ତେ ଜେରହନ୍ ବାବାଲ୍ । ମେଣ୍ଡେ ତାମ୍ ମାର୍ ଅଡ଼୍ ୟାୟ୍ ମାତ୍ତେ; ମାଲ୍ତନ୍ ହେସ୍ରନତେ ବାବାଲ୍ ମାତ୍ତଣ୍ଡ୍; ୪ ହେସ୍ରନତେ ମାର୍ ଆରାମ୍; ଆରାମ୍ତେ ମାର୍ ଅମିନାଦାବ; ଅମିନାଦାବ୍ତେ ମାର୍ ନହଶୋନ; ନହଶୋନତେ ମାର୍ ସଲ୍ମନ୍; ୫ ସଲ୍ମନ୍ତେ ମାର୍ ବୟଜ ମେଣ୍ଡେ ରାହାବ ତାମ୍ ୟାୟ୍ ମାତ୍ତେ; ବୟଜତେ ମାର୍ ଓବେଦ୍ ମେଣ୍ଡେ ଋତ୍ ତାମ୍ ୟାୟ୍ ମାତ୍ତେ; ଓବେଦ୍ତେ ମାର୍ ଯେଶୀ; ୬ ଯେଶୀତେ ମାର୍ ଦାଉଦ୍ ରାଜା । ଦାଉଦ୍ତେ ମାର୍ ଶଲୋମନ୍; ଶଲୋମନ୍ତେ ୟାୟ୍ ମୁନେନ୍ ଉରିୟତେ ମୁତ୍ତେ ମାତ୍ତେ; ୭ ଶଲୋମନ୍ତେ ମାର୍ ରହବୟାମ୍; ରହବୟାମ୍ତେ ମାର୍ ଅବିୟ; ୮ ଅବିୟତେ ମାର୍ ଅସା; ଅସାନ୍ ମାର୍ ଜିହଶାପାଟ୍; ଜିହଶାପାଟ୍ତେ ମାର୍ ଜରାମ୍; ଜରାମ୍ତେ ମାର୍ ଉଜିୟ; ୯ ଉଜିୟତେ ମାର୍ ଜତାମ୍; ଜତାମ୍ତେ ମାର୍ ଅହାଜ; ଆହାଜତେ ମାର୍ ହିଜକିୟ; ୧୦ ହିଜକିୟତେ ମାର୍ ମନଶେହ; ମନଶେହତେ ମାର୍ ଆମନ୍; ୧୧ ଆମନ୍ତେ ମାର୍ ଜଶିୟ; ଜଶିୟତେ ମାର୍ ଜିକନିୟ ନୁ ତାମ୍ ଦାଦାଲଡ଼୍; ଇଦ୍ ସମୟ୍ତେ ଇସ୍ରାଲୀୟଡ଼୍କିଂଙ୍କ୍ ବାବିଲନ୍ ଦେଶ୍ତାଗ୍ ତଅସ୍ମେଣ୍ଡେ ଆତ୍ତଡ଼୍ ଆଦ୍ ସମୟ୍ତେ ଜିକନିୟ ଜନମ୍ ଆସ୍ ମାତ୍ତଣ୍ଡ୍ । ୧୨ ବାବିଲନ୍ତାଗ୍ ତଅସ୍ ଆତ୍ତେ ପେର୍କେ ଜିକନିୟନ୍ ମାର୍ ଶଆଲ୍ତୀୟେଲ୍ ବାବିଲନ୍ତାଗ୍ ଜନମ୍ ଆତ୍ତଣ୍ଡ୍ । ଶଆଲ୍ତୀୟେଲ୍ତେ ମାର୍ ଜିରୁବାବେଲ୍; ୧୩ ଜିରୁବାବେଲ୍ତେ ମାର୍ ଅବୀହୁଦ୍; ଅବୀହୁଦ୍ତେ ମାର୍ ଏଲିୟାକମ; ଏଲିୟାକମତେ ମାର୍ ଅଜ୍ଜୁର; ୧୪ ଅଜ୍ଜୁରତେ ମାର୍ ସାଦକ; ସାଦକତେ ମାର୍ ଜାକୀନ; ଜାକିନତେ ମାର୍ ଏଲୀହୁଦ୍; ଏଲୀହୁଦ୍ତେ ମାର୍ ଲାଜାର୍; ଲାଜାର୍ତେ ମାର୍ ମତ୍ତାନ୍; ୧୫ ମତ୍ତାନତେ ମାର୍ ଯାକୁବ୍; ଯାକୁବ୍ତେ ମାର୍ ଜସେପ୍ । ୧୬ ହି ଜସେପ୍ ମରିୟମ୍ତିଙ୍କ୍ ପେଣ୍ଡୁଲ୍ ମାଡ଼ିମାତ୍ତଣ୍ଡ୍ । ମରୀୟମ୍ ତେ ଡଙ୍କେତାଗାଙ୍କ୍ ଜିସୁ ଜନମ୍ ମାଡ଼ିମାତ୍ତଣ୍ଡ୍ । ଜିସୁ କ୍ରିଷ୍ଟ ମସିହ ପେଦେର୍ତେ ମିକା ପୁତ୍ତଣ୍ଡ୍ । ୧୭ ଇଦ୍ରକମ୍ ଅବ୍ରାହାମ୍ ତାଗାଙ୍କ୍ ଦାଉଦ୍ତାଗ୍ ହେୱୁନା ଚଉଦଟାନ୍ ପିଡ଼ି; ଦାଉଦତାଗାଙ୍କ୍ ବାବିଲନ୍ ବନ୍ଦି ହେୱୁନା ଚଉଦଟାନ୍ ପିଡ଼ି ନୁ ବାବିଲନ୍ ବନ୍ଦିତାଗାଙ୍କ୍ କ୍ରିଷ୍ଟନ୍ ଜନମ୍ ହେୱୁନା ଚଉଦଟାନ୍ ପିଡ଼ି ।
ଜିସୁ କ୍ରିଷ୍ଟନ୍ ଜନମ୍ କାବୁର୍
(ଲୁକ ୨:୧-୭)
୧୮ ✡ଲୁକ ୧:୨୭.ଇଦ୍ ଆଦୁତ୍ତେ ଜିସୁ କ୍ରିଷ୍ଟନ୍ ଜନମ୍ କବର୍ । ତାମ୍ ୟାୟ୍ ମରୀୟମ୍ ତାଦ୍ ଜସେପ୍ ତଡ଼୍ ନିର୍ବନ୍ଦ୍ ଆସ୍ମାତ୍ତେ । ବାତେଙ୍କ୍ ଇତ୍କେ ଅଡ଼ାଦ୍ ପେଣ୍ଡୁଲ୍ ଆଦ୍ଦାନ୍ ମୁନେଙ୍କ୍ ମରୀୟମ୍ ପୁତ୍ତେ ଯେ ପବିତ୍ର ଆତ୍ମାତେ ଆଦ୍ ଡଙ୍କେତ୍ ଆତ୍ତେ । ୧୯ ଜସେପ୍ ସାରେଦାମ୍ ନେଲେତାଦ୍ ପାଡ଼୍ୟି ମାଡ଼ମାତ୍ତଣ୍ଡ୍ । ଆଦ୍ଦିଙ୍କ୍ ମରିୟମ୍ତିଙ୍କ୍ ନାରୁଡ଼ାଦ୍ ନିନ୍ଦ୍ତାଗାଙ୍କ୍ ରକ୍ଷା ମାଡ଼ାନ୍ ମାଇଦିଙ୍କ୍ ମିଞ୍ଜି ନିର୍ବନ୍ଦ୍ତିଙ୍କ୍ ମନାମାଡ଼ାଙ୍କ୍ ଚିନ୍ତେ ମାଡ଼୍ତଣ୍ଡ୍ । ୨୦ ଅଣ୍ଡ୍ ଇଦ୍ରକମ୍ ଆଲ୍ସାନ୍ ୱେଲେ ୱେରଣ୍ଡ୍ ଇଶ୍ୱର୍ତେ ଦୂତ ଅଂକିଙ୍କ୍ ସପ୍ନତେ ତନ୍ଦି କେତ୍ତଣ୍ଡ୍, “ହୋ ଦାଉଦ୍ ବଂଶତନି ଜସେପ୍ ! ମରୀୟମ୍ ତିଙ୍କ୍ ମୁତ୍ତେ ଇଞ୍ଜ ଗ୍ରହନ୍ ମାଡ଼ାଙ୍କ୍ ୱେର୍ମା, ବାତେଙ୍କ୍ ଇତ୍କେ ପବିତ୍ର ଆତ୍ମା ତଡ଼୍ ଆଦ୍ ଡଙ୍କେତ୍ ଆତ୍ତେ । ୨୧ ✡ଲୁକ ୧:3୧. ତାଂକିଙ୍କ୍ ୱେରନ୍ ମାର୍ ଜନମ୍ ଆଦ୍ତଣ୍ଡ୍ । ନିମ୍ ଅନ୍ ପେଦେର୍ ‘ଜିସୁ’ ୱାଟିତି, ବାତେଙ୍କ୍ ଇତ୍କେ ଅଣ୍ଡ୍ ତାମ୍ ନାରୁଡ଼୍କ୍ ତାମାଦ୍ ପାପ୍ତାଗାଙ୍କ୍ ରକ୍ଷା ମାଡ଼ିତନ୍ ।” ୨୨ ଇଶ୍ୱର୍ ୱେରଣ୍ଡ୍ ବାବବାଦିନ୍ ତଡ଼୍ ବେନ୍ ବବିଷ୍ୟବାଣି କେସ୍ମାତ୍ତଣ୍ଡ୍, ଆଦ୍ ସାରେ ଆଦାନ୍ ମାଇଦିଙ୍କ୍ ଇଦ୍ସାରେ ଗଟେମ୍ ଆତ୍ତେ । ୨୩ ଆଦ୍ ବବିଷ୍ୟବାଣି ଆଦୁତ୍ତେ, “ଅଣ୍ଡୟ୍ ପିକିଡ଼୍ ଡଙ୍କେତ୍ ଆସ୍ ମାର୍ ଜନମ୍ ମାଡ଼୍ତେ । ଅଣ୍ଡ୍ ମାର୍ ‘ଇମାନୁୟେଲ୍’ ଇତ୍କେ ଇଶ୍ୱର୍ ମାନ୍ତଡ଼୍ ମିନ୍ଦେଣ୍ଡ୍ ।” ୨୪ ଜସେପ୍ତେ ଉସ୍କାଡ଼୍ ତେର୍ତେ ପାୟେ ଅଣ୍ଡ୍ ଇଶ୍ୱର୍ତେ ଦୂତତେ ଗଟ୍ ଲେକାମ୍ ପାଡ଼୍ୟି ମାଡ଼୍ତଣ୍ଡ୍ । ଅଣ୍ଡ୍ ମରିୟମ୍ତିଙ୍କ୍ ପେଣ୍ଡୁଲ୍ ଆତ୍ତଣ୍ଡ୍ । ୨୫ ✡ଲୁକ ୨:୨୧.ବାତେଙ୍କ୍ ଇତ୍କେ ଆଦିନ୍ ଆଦ୍ ମାର୍ ଜନମ୍ ଆଦାନ୍ ଯାକ ତାନ୍ ତଡ଼୍ ଉଞ୍ଜଣ୍ଡ୍ । ଜସେପ୍ ଆ ମାର୍ରିଙ୍କ୍ ଜିସୁ ପେଦେର୍ ହିତ୍ତଣ୍ଡ୍ ।