ଯୋହନ ଲିଖିତ ପ୍ରକାଶିତ ବାକ୍ୟ
ଯୋହନ୍ ଲେକ୍ତାଦ୍ ପ୍ରକାଶିତ୍ ବାକ୍ୟ
ପ୍ରକାଶିତ୍ ବାକ୍ୟ ବଇ ବିଷୟ୍ତେ ଅଣ୍ଡୟ୍ ପଦ୍
ପ୍ରକାଶିତ ବାକ୍ୟ ପୁଃନେ ନିୟମ୍ତେ ମାରେଙ୍ଗ୍ ବଇ । ଇଦ୍ ମିକା ଯୋହନ୍ ତଡ଼୍ ଲେକା ଜିସୁକ୍ରିଷ୍ଟନ୍ ଜନମ୍ତେ ଗାରେଗାରେ ୯୫ କ୍ରିଷ୍ଟାଦ୍ଦତେ ଲେକା ଆସ୍ମାତ୍ତେ ୧:୧ । ଅଣ୍ଡ୍ ଯୋହନ୍ ସୁସମାଚାର୍ତେ ମୁଣ୍ଡ୍ ଚିଟି ମୁନେ ଲେକା ଆସ୍ମାତ୍ତେ ଇୱୁ ୧ ଯୋହନ୍, ୨ ଯୋହନ୍, ୩ ଯୋହନ୍ । ଯୋହନ୍ ଅଙ୍କ୍ ଜିସୁ ନାର୍ଗେ ବଲ୍ପାଏମ୍ ଆସମାତ୍ତନ୍ ଇଞ୍ଜ ମିକା ପୁନ୍ଦାନଙ୍କ୍ ଅଦୁତ୍ ଯୋହନ୍ ୧୩:୨୩ । ଯୋହନ୍ ଆଇସ୍ଲାଣ୍ଡ୍ତେ ପାତ୍ମସ୍ ତାଗ୍ ମାନ୍ଦାନ୍ ୱେଲେ ଇଦ୍ ପ୍ରକାଶିତ ବାକ୍ୟ ଲେକିମାତ୍ତନ୍ । ବାତେଙ୍କ୍ଇତ୍କେ ଜିସୁ କ୍ରିଷ୍ଟନ୍ ସୁସମାଚାର୍ ପ୍ରଚାର୍ ସେଙ୍ଗେ ଅଂକିଙ୍କ୍ ଆଗେ ରସ୍ ମାତ୍ତଡ଼୍ ୧:୯।
ଜିସୁନ୍ ୱାଦାନ୍ ସମୟ ହେଉସ୍ ମାନାଙ୍କ୍ ଜିସୁ କ୍ରିଷ୍ଟନାଗ୍ ବିଶ୍ୱସ୍ତ ମାନ୍ଦାନଙ୍କ୍ କାର୍ତାନଡ଼୍କିଙ୍କ୍ ସାହାସ୍ ନୁ ଆଶେ ଇଦାନ୍ ସେଙ୍ଗେ ଯୋହନ୍ ଇଦ୍ ପ୍ରକାଶିତ୍ ବାକ୍ୟ ଲେକ୍ତଣ୍ଡ୍ ୧:୩; ୨୨:୭ । ଅଣ୍ଡ୍ ସାରେ ବିଶ୍ୱାସି ମେଣ୍ଡେ ନିଜର୍ ଇଚାପ୍ତେ ସାତ୍ଟାନ୍ ମଣ୍ଡଲିକିଙ୍କ୍ ଇଦ୍ ଲେକ୍ତଣ୍ଡ୍ ୨–୩ । ଯୋହନ୍ ତାନ୍ଲେକ୍ତାଦ୍ ବାବବାଣି ୧:୩ମେଣ୍ଡେ ଅଣ୍ଡ୍ ଉଡ଼ିମାନ୍ଦାନ୍ ନାର୍ଗେ ଆକୃତୀ ବିଷୟତେ ଲେକ୍ତଣ୍ଡ୍ । ଇଦ୍ ବଇତେ ବେସ୍କ୍ ଜାଗାନାଗ୍ ପାଃନ୍ତେ ବଇତେ ବେସ୍କ୍ ଜାଗେତଡ଼୍ ସାମାନ୍ ମିନ୍ଦେ, ଆଦ୍ଲେକାମ୍ ଜିକରିୟ ୬:୧-୮ ତାଗ୍ ଉଡ଼ିତମ୍ ।
ଆଉ ଆଦୁତେ ସାତ୍ଟାନ୍ ମହାମାରି ମେଣ୍ଡେ ସାତ୍ଟାନ୍ ଗିନା ବେଗେ ଇଶ୍ୱର୍ ମିସର୍ତେ ନାରୁଡ଼୍କ୍ ଦଣ୍ଡ୍ ଇଦାନ୍ ସେଙ୍ଗେ ମହାମାରୀ ରଅତିତଣ୍ଡ୍ ଯାତ୍ରା ୭–୯ । ପ୍ରକାଶିତ ବାକ୍ୟ ମାଡ଼େଙ୍ଗ୍ ସମୟ ତତିତେ ଜିସୁ ମାଡ଼େଙ୍ଗ୍ ଜିଡ଼ିତଣ୍ଡ୍ ମେଣ୍ଡେ ବେନଡ଼୍ ଅନାଗ୍ ନିର୍ବର୍ ମାଡ଼ିତଡ଼୍ ଅଡ଼୍ ସାରେ ଦାମ୍ ଅନ୍ତଡ଼୍ ମାନ୍ତଡ଼୍ । ଇଦ୍ ବଇ ମିକିଙ୍କ୍ ସତର୍କ ମାଡ଼ିଦ୍ତେ ମେଣ୍ଡେ ଆଶେ ଇଦ୍ତେ ଯେ, ଜିସୁ ଚିଟ୍ପାଟ୍ ମାଲ୍ସ୍ୱାଦୁତଣ୍ଡ୍ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ
୧. ଯୋହନ୍ତେ ପରିଚୟ ମେଣ୍ଡେ ତାନ୍ ବବିଶ୍ୟତ୍ ଦର୍ଶନ୍ । ୧:୧-୨୦
୨. ଜିସୁକ୍ରିଷ୍ଟନ୍ ନାଗାଙ୍କ୍ ସାତ୍ଟାନ୍ ମଣ୍ଡଲି ସେଙ୍ଗେ ଯୋହନ୍ତେ ଗଟ୍ । ୧:୧–୩:୨୨
୩. ସାତ୍ଟାନ୍ ରୁପି ୪:୧–୮:୫ ସାତ୍ଟାନ୍ ମୟିର୍ ବିଷୟତେ ଲେକ୍ତଣ୍ଡ୍ । ୮:୬–୧୧:୧୯
୪. ମାର୍ ମାୟାସ୍କ୍ ମେଣ୍ଡେ ସାତ୍ଟାନ୍ ତାଲେ ମାନ୍ଦାନ୍ ପାଃନ୍ତେ ତାଡ଼ାମ୍ ତଡ଼୍ ଯୁଦ୍ । ୧୨:୧–୧୪:୨୦
୫. ସାତ୍ଟାନ୍ କପାମ୍ ଗିନା ବିଷୟତେ ଲେକ୍ତଣ୍ଡ୍ । ୧୫:୧–୧୬:୧୮
୬. ଇଶ୍ୱର୍ ସ୍ୱର୍ଗତାଗ୍ ତାନ୍ ଶତ୍ରୁଙ୍କ୍ ଜିଡ଼ିତଣ୍ଡ୍ । ୧୭:୧–୨୦:୧୫
୭. ପୁଃନାଦ୍ ସ୍ୱର୍ଗ ନୁ ପୁଃନାଦ୍ ପୃତିବି । ୨୧:୧–୨୨:୨୧
୧
୧ ବାତ୍ସାରେ ଯାପେ ଗଟେମ୍ ଆଦାଙ୍କ୍ ଅଦୁତ୍, ଇଶ୍ୱର୍ ଜିସୁ କ୍ରିଷ୍ଟନ୍ ପାକେ କେସ୍ମାନ୍ଦାନ୍ ଅନାଦ୍ ୱେରଡ଼୍ ବିବରଣି ଇଦ୍ ବଇତାଗ୍ ଲେକାଆତ୍ତେ । ଆଦ୍ ସାରେ ବିଷୟ ତାନ୍ ଦାସନଡ଼୍କ୍ କେତାନ୍ ସେଙ୍ଗେ କ୍ରିଷ୍ଟ ୱେରଣ୍ଡ୍ ସ୍ୱର୍ଗଦୂତଙ୍କ୍ ରସ୍ମିକା ତାନ୍ ଦାସ ଯୋହନ୍ତିଙ୍କ୍ ଆଦ୍ କେତ୍ତଡ଼୍ । ୨ ମେଣ୍ଡେ ଯୋହନ୍ ନିଜେ ବାତ୍ ସାରେ ଉଡ଼୍ତନ୍, ଆଦ୍ ଇଗେ କେସ୍ମିନ୍ଦେନ୍ । ଇଦ୍ ବଇତାଗ୍ ଇଶ୍ୱର୍ତେ ଗଟ୍ ନୁ ଜିସୁ କ୍ରିଷ୍ଟଟନ୍ ତଡ଼୍ ପ୍ରକାସିତ୍ ସତ୍ୟ ବାକ୍ୟ ଲେକା ଆତ୍ତେ । ୩ ବେନ୍ ନାରୁଣ୍ଡ୍ ଇଦ୍ ବଇ କାର୍ତିତନ୍ ନୁ ବେନଡ଼୍ ଇଗେ ପ୍ରକାସିତ୍ ବବିଷ୍ୟତ୍ ଗଟି କେଞ୍ଜି ଆଦ୍ କେତ୍ତେ ଲେକାମ୍ ପାଲନ୍ ମାଡ଼ିତନ୍, ଅଡ଼୍ ବାସ୍ତବିକ୍ ବାଗ୍ୟବାନ, ଇତ୍କେ ଆଦ୍ ସାରେ ଗଟେମ୍ଆଦାନ୍ ସମୟ ଏୱୁତେ ।
ସାତ୍ଟାନ୍ ମଣ୍ଡଲିକିଙ୍କ୍ ନମସ୍କାର୍
୪ ✡ପ୍ରକାଶିତ୍ ବାକ୍ୟ ୪:୫.ଯୋହନ୍ ଏସିଆ ପ୍ରଦେଶ୍ତାଗ୍ ମାନ୍ଦାନ୍ ସାତ୍ଟାନ୍ ମଣ୍ଡଲିକିଙ୍କ୍ ନମସ୍କାର୍ କେତୁତଣ୍ଡ୍ । ବବିଷ୍ୟତ୍, ମୁନେତ୍ ନୁ ଇଞ୍ଜେତାଦ୍ ଜିୱେମାନ୍ଦାନ୍ ଇଶ୍ୱର୍, ତାନ୍ ସିଂହାସନ୍ ମୁନେ ସାତ୍ଟାନ୍ ଆତ୍ମା, ୫ ଡଲ୍ତାଗାଙ୍କ୍ ମେଣ୍ଡେ ପୁନରୁତ୍ତିତ୍ ସାରେଦାମ୍ ମୁନେ, ବିଶ୍ୱାସ୍ତେ ସାକ୍ଷଦାତାଲ୍ ନୁ ପୃତିବିତେ ରାଜାଦିରାଜା ଜିସୁ କ୍ରିଷ୍ଟଟନ୍ ଅନୁଗ୍ରହ ନୁ ଶାନ୍ତି ମିଇ ପରୁ ଆୟି । ଅଣ୍ଡ୍ ମାନାଙ୍କ୍ ପ୍ରେମ ମାଡ଼ୁତନ୍ ନୁ ଅନ୍ ଡଲ୍ତାଦିନ୍ତ ମାନାଙ୍କ୍ ପାପ ତାଗାଙ୍ଗ୍ ପରିତ୍ରାନ୍ ମାଡ଼୍ତନ୍ । ୬ ✡ପ୍ରକାଶିତ୍ ବାକ୍ୟ ୫:୧୦.ତାମ୍ ବାବାଲ୍ ଇଶ୍ୱର୍ତେ ସେବା ମାଡ଼ାନ୍ ସେଙ୍ଗେ ମାନାଙ୍କ୍ ଅଣ୍ଡୟ୍ ଯାଜକ ବଂଶ ମାଡ଼୍ତନ୍ । ସାରେ ଗଉରବ୍ ନୁ ପରାକ୍ରମ୍ ସାରେଦିନାମ୍ ଜିସୁ କ୍ରିଷ୍ଟନାଦ୍ ଆୟି ଆମେନ୍ ।
୭ ✡ମାତିଉ ୨୪:3୦; ମାର୍କ ୧3:୨୬; ଲୁକ ୨୧:୨୭; ୧ ଥେସଲନିୟ ୪:୧୭; ଯୋହନ୍ ୧୯:3୪,3୭; ମାତିଉ ୨୪:3୦.ଉଡ଼ାଟ୍, ଅଣ୍ଡ୍ ମୟଲ୍ତାଗେ ୱାସମିନ୍ଦେନ୍ ପୃତିବିତେ ସାରେତଡ଼୍ ଅଙ୍କ୍ ଉଡ଼ିତଡ଼୍; ଇଦ୍ଲେକାମ୍ ଯେ ବେନଡ଼୍ ଅଙ୍କ୍ ୱିଡ଼୍ସି ମାତ୍ତଡ଼୍, ଅଡ଼୍ଆନ୍ତେ ଅଙ୍କ୍ ଉଡ଼ି ୱେର୍ସ୍ ମିକା କେୟିତଡ଼୍ । ଇଦ୍ଚାରେ ନିଜାମ୍ ଗଟେମ୍ ଆଦ୍ତେ । ଆମେନ୍ ।
୮ ✡ପ୍ରକାଶିତ୍ ବାକ୍ୟ ୨୨:୧3.ପ୍ରବୁ ସାରେତିଙ୍ଗ୍ ଶକ୍ତିମାନ୍ ଇଶ୍ୱର୍ କେତିତନ୍, “ନାନେ ଆରାମ୍ ନୁ ମାଡ଼େଙ୍ଗ୍,” ଅଣ୍ଡ୍ ମୁନେଙ୍କ୍ ମାତ୍ତନ୍, ମେଣ୍ଡେ ଇଞ୍ଜେବା ମିନ୍ଦେନ୍, ମେଣ୍ଡେ ବବିଷ୍ୟତ୍ତେ ୱାଦ୍ତନ୍ ।
କ୍ରିଷ୍ଟ ତନ୍ଦ୍ତଣ୍ଡ୍
୯ ନାନେ ଯୋହନ୍, ମିଇ ୱେରନ୍ ଦାଦାନ୍, ଜିସୁନ୍ ଶିଷ୍ୟ ଲେକାମ୍ ତାନ୍ ରାଜ୍ୟତେ ନାରିଡ଼୍ ପରୁ ଆସମାନ୍ଦାନ୍ ଦରାତ୍ମ୍ୟ ଦର୍ଯ୍ୟତେ ସହ୍ୟ ମାଡ଼୍ନଙ୍କ୍ ନାନେ ମିୟାଦ୍ ୱେରନ୍ ବାଗିଦାର୍ । ଜିସୁ କେସ୍ମାନ୍ଦାନ୍ ସତ୍ ନୁ ଇଶ୍ୱର୍ତେ ବାକ୍ୟ କେତାନ୍ ସେଙ୍ଗେ ନାନେ ପାତ୍ମସ୍ ଗପ୍ତାଗ୍ ବନ୍ଦିଆସ୍ ଆଞ୍ଜ୍ମାତ୍ତାନ୍ । ୧୦ ପ୍ରବୁନ୍ ଦିନାମ୍ତେ ପବିତ୍ରଆତ୍ମା ନାୟାଗ୍ ୱାତ୍ତେ ନୁ ନା ପେର୍କେତ୍ପାକ୍ ତୁରି ଲେଙ୍ଗ୍ ଇନା ଗାଟିଲେଙ୍ଗ୍ କେଞ୍ଜ୍ତାନ୍ । ୧୧ ବେନମାତି ନାକ୍ କେତ୍ତନ୍, “ମିଡ଼୍ ବାତ୍ ଉଡ଼ୁତିଡ଼୍, ଆଦ୍ ୱେରଡ଼୍ ବଇତାଗ୍ ଲେକିୱାଟେ ନୁ ଏପିସସ୍, ସ୍ମର୍ଣ୍ଣା, ପର୍ଗାମମ୍, ତୁୟଟୀରା, ସାର୍ଦ୍ଦିସ୍, ପିଲାଦେଲ୍ଫିଆ ନୁ ଲାଉଦିକିଆତାଗ୍ ମାନ୍ଦାନ୍ ମଣ୍ଡଲିକିଙ୍କ୍ ବଇତିଙ୍କ୍ ରହସିମୁଟ୍ ।”
୧୨ ବେନ ନା ତଡ଼୍ ଗଟି କେତ୍ତନ୍, ଉଡ଼ାନଙ୍କ୍ ନାନେ ପେର୍କେ ମାଲ୍ସ୍ ଉଡ଼୍ତାନ୍, ସାତ୍ଟାନ୍ ସୁନାତାୱୁ କୁପି, ୧୩ ନୁ କୁପିତ୍ ନାଡ଼୍ମେ ନାରିନ୍ ପିଲେ ଲେକାମ୍ ୱେରଣ୍ଡ୍ । ଅନ୍ ଚକା ଡେକେ ଏୱୁନା ମାନ୍ଦାନ୍ ଲାଟିଲାଦ୍ ସକେ ନୁ ଅନ୍ ଗୁଣ୍ଡେତାଗ୍ ଅଣ୍ଡୟ୍ ସୁନାତାଦ୍ ଗୁଣ୍ଡେତାଗ୍ କେର୍ଦାନାଦ୍ । ୧୪ ଅନ୍ ତାଲେତ୍ କେଲ୍କ୍ ନୁଲ୍ ନୁ ବରପ୍ ଲେକାମ୍ ପାଣ୍ଡ୍ରି ମାତ୍ତା ନୁ ଅନ୍ କଣ୍ଡା କିସ୍ ଲେକାମ୍ ନିଡ଼୍ସ ମାତ୍ତା । ୧୫ ଅନ୍ ଡେକା ରେଣ୍ଡ୍ କିସ୍ତାଗ୍ କାଣ୍ଟି ପିତଳ ଲେକାମ୍ ଜିଗ୍ଜାଗ୍ ତଅନ୍ଦମାତ୍ତା ନୁ ଅନ୍ କେତାନ୍ ଲେଙ୍ଗ୍ ପରକଞ୍ଚ୍ ରାଲାନାଦ୍ ଏର୍ ଲେକାମ୍ ଲେଙ୍ଗ୍ ଆସମାତ୍ତେ । ୧୬ ଅଣ୍ଡ୍ ତାନ୍ ତିନ୍ଦେକାଇଦେ ପାକେ ସାତ୍ଟାନ୍ ଉକାମ୍ ପଇସ୍ ମାତ୍ତନ୍ ନୁ ୱେରଡ଼୍ ଗାଟି ୱାୟେ ମାନ୍ଦାନ୍ ଚୁର୍ ଅନ୍ ମକତାଗାଙ୍କ୍ ପେୟ୍ତେ । ଅନ୍ ମକମ୍, ପାୟାଲ୍ତାଦ୍ ପଡ଼୍ଦ୍ ଲେକାମ୍ ଗାଟିୱେସ୍ ମାତ୍ତେ । ୧୭ ✡ପ୍ରକାଶିତ୍ ବାକ୍ୟ ୨:୮; ୨୨:୧3.ଅଙ୍କ୍ ଉଡ଼୍ତେ ସାଙ୍ଗେ ସାଙ୍ଗେ ନାନେ ଚିମ୍କାସ୍ ଅନ୍ ଡ଼େକାନ୍ ମଦଲ୍ ରାଲ୍ତାନ୍ । ଅଣ୍ଡ୍ ତାନ୍ ଡ଼େବେକାଇ ନା ପରୁ ୱାଟି କେତ୍ତନ୍, “ୱେର୍ମା, ନାନେ ଆରାମ୍ ନୁ ମାଡ଼େଙ୍ଗ୍ ।” ୧୮ ନାନେ ଜିୱୁଣ୍ଡ୍ ମାନ୍ଦାନଣ୍ଡ୍; ଡଲିମାତ୍ତାନ୍, ଇତ୍କେ ନାନେ ଇଞ୍ଜେ ଜିୱେ ମିନ୍ଦେନ୍, ଅନନ୍ତ କାଲ ଜିୱେ ମାନ୍ତାନ୍ । ଡଲାନାଦ୍ ନୁ ନର୍କତାଦ୍ କୁଚ୍କାଇ ନା କାୟ୍ଦାଗ୍ ମିନ୍ଦେ ।
୧୯ ଆଦିଙ୍କ୍ ନିମେ ବେନ୍ସାରେ ବିଷୟ ଉଡ଼ୁତିନ୍, ବେନ୍ ସାରେ ବିଷୟ ଇଞ୍ଜେ ଗଟେମ୍ ଆଦ୍ତା ନୁ ବାତ୍ ସାରେ ବବିଷ୍ୟତ୍ତେ ଗଟେମ୍ ଆଦ୍ତା, ଆଦ୍ ଲେକି ୱାଟାଟ୍ । ୨୦ ନାୟାଦ୍ ଡେବେକାଇଦାଗ୍ ମାନ୍ଦାନାୱ୍ ସାତ୍ଟାନ୍ ଉକାମ୍ ନୁ ସାତ୍ଟାନ୍ ସୁନାତାୱୁ ଦୀପନ୍ ଅର୍ତ ଆଦୁତ୍, ସାତ୍ଟାନ୍ ଉକାକ୍ ମଣ୍ଡଲିତେ ଦୂତ ନୁ ସାତ୍ଟାନ୍ କୁପି ଆଦୁତେ ମଣ୍ଡଲି ।