୧୩
ରେଣ୍ଡ୍ ଜନ୍ତୁ
୧ ✡ପ୍ରକାଶିତ୍ ବାକ୍ୟ ୧୭:3,୭-୧୨.ତାନ୍ପେର୍କେ ନାନେ ଉଡ଼୍ତାନ୍, ୱରଡ଼୍ ଜନ୍ତୁ ସମୁଦ୍ରତାଗାଙ୍କ୍ ତେଦି ୱାଦୁତ୍ । ତାନାୱୁ ଦଶ୍ଟାନ୍ କଅକ୍ ନୁ ସାତ୍ଟାନ୍ ତାଲା । ସାରେ କଅକ୍କିନାଗ୍ ୱେର ସହଜ୍ ମାତ୍ତା ନୁ ସାରେ ତାଲାନାଗ୍ ୱେର ଇଶ୍ୱର୍ତେ ନିନ୍ଦାଆତ୍ନଡ଼୍ ପେଦେରି ଲେକା ଆସ୍ମାନ୍ନୁ । ୨ ଆଦ୍ ଜନ୍ତୁ ଅଣ୍ଡୟ୍ ଚିତା ଡୁୱୁ ଇନା ତଅନ୍ଦ ମାତ୍ତେ । ଅଦିନ୍ ଡେକା ଏଡ଼୍ଜ୍ତେ ଡେକା ଲେକାମ୍ ମେଣ୍ଡେ ପାୟୁର୍ ଗଣ୍ଡ୍ରାସ୍ ପାୟୁର୍ ଲେକାମ୍ । ମୁନେଙ୍କ୍ ଲେକାଆତ୍ତାଦ୍ ନେତୁର୍ ଲେକ୍ତାଦ୍ ପାଃନ୍ତେ ତାଡ଼ାମ୍ ଆଦ୍ ଜନ୍ତୁତିଙ୍କ୍ ନିଜେତ୍ ଶକ୍ତି, ସିଂହାସନ ନୁ ନାର୍ଗେକ୍ଷମତା ଇତ୍ତେ । ୩ ପେର୍କେ ତାଦ୍ ୱେରଡ଼୍ ତାଲେ ଗୁରୁତ୍ୱ ଦେବ୍ ଆସ୍ମାନ୍ଦାନ୍ ଲେକାମ୍ ଏର୍କେ ଆସମାନ୍ନୁ । ଇତ୍କେ ପୁଣ୍ଡ୍ ପଡ଼ିୟେତାଗ୍ ଲେକେତ୍ ଆସ୍ମାନ୍ନୁଡ଼୍ ନୁ ପୃତିବିତେ ନାରୁଡ଼୍ ସାରେତଡ଼୍ ବକୁୱାଆସ୍ ଜନ୍ତୁତେ ପେର୍କେଆତ୍ତଡ଼୍ । ୪ ମେଣ୍ଡେ, ସାରେତଡ଼୍ ପେର୍କେ କ୍ଷମତାପନ୍ ମାଡ଼ିମାନ୍ଦାନ୍ ତାଡ଼ାମ୍ ତେ ପୂଜା ମାଡ଼୍ତଡ଼୍ । ଅଡ଼୍ ପେର୍କେ ମିକା ପୂଜା ମାଡ଼ି କେତ୍ତଡ଼୍, “ବେନ ଇଦ୍ ଜନ୍ତୁତେ ତଡ଼୍ ସାମାନ୍ ଆଦ୍ତନ୍ ? ବେନ ତାନ୍ତଡ଼୍ କାଇଲି ଯୁଦ୍ ମାଡ଼ିତନ୍ ?”
୫ ଜନ୍ତୁ ଅଦିକ୍ ମାଡ଼ି ଗଟି କେସମାତ୍ତେ ନୁ ଇଶ୍ୱର୍ ନିନ୍ଦାମାଡ଼ମାତ୍ତେ, ଆଗେବା ୪୨ ନେଲ୍ଞ୍ଜ୍ ଆୟ୍ନା ମୁନେକଞ୍ଜ୍ ମାଡ଼ାନ୍ ସେଙ୍ଗେ ଆଦିଙ୍କ୍ ଆନୁମତି ଦର୍କ୍ତେ । ୬ ଇଶ୍ୱର୍ତିଙ୍କ୍, ତାନ୍ ପେଦେର୍ ନୁ ତାନାଦ୍ ମାନ୍ଦାନ୍ ପଡ଼ିୟେ ନୁ ସ୍ୱର୍ଗବାସି ସାରେତଡ଼୍କ୍ ଅଣ୍ଡ୍ ଅବିଶାପ୍ ଇଦାଙ୍କ୍ ଆତ୍ତେ । ୭ ଇଶ୍ୱର୍ତେ ନାରୁଡ଼୍ ବିରୁଦ୍ଦତେ ଯୁଦ୍ ମାଡ଼ି ଅଡ଼୍କିଂଙ୍କ୍ ଆରା ମାଡ଼ାନଙ୍କ୍ ଅଣ୍ଡ୍ ଆନୁମତି ଦର୍ସ୍ତନ୍ ନୁ ସାରେ ନାକିନ୍, ରାଷ୍ଟ ନୁ ବାଷାବାସି ନୁ ଜାତିତ୍ ପରୁ ଅଙ୍କ୍ କ୍ଷମତା ଇତ୍ତଡ଼ । ୮ ପୃତିବିତେ ତିୟାର୍ ଆତ୍ତେ ମୁନେନ୍ ବେନଡ଼୍ ପେଦେର୍ତେ ଯୁଦ୍ ଆସ୍ମାତେ ମେକାଗଲାନଡ଼୍ ଜୀୱେ ବଇତାଗ୍ ଲେକା ଆସ୍ମାତେ, ଅଡ଼୍କିଂଙ୍କ୍ ୱିଡ଼୍ସି ପୃତିବି ତାଗ୍ ମେଣ୍ଡ ବେନଡ଼୍ ସାର୍ତଡ୍ ପଶୁନ୍ ପୁଜା ମାଡ଼ିତଡ଼୍ ।
୯ କେଞ୍ଜାନଙ୍କ୍ କେୱୁକ୍ ମାତ୍କେ, କେଞ୍ଜାଟ୍ ! ୧୦ ଇଶ୍ୱର୍ତେ ଇଚ୍ଛା ଲେକାମ୍ ବେନ ବନ୍ଦି ଆଦାନ୍ ମିନ୍ଦେ, ଅଣ୍ଡ୍ ନିଶ୍ଚିତ୍ ବନ୍ଦି ଆଦ୍ତଣ୍ଡ୍ । ବେନ ମେଣ୍ଡେ ୱେରେତଙ୍କ୍ କଡ୍ଗତଡ଼୍ ଆୱୁକିତଣ୍ଡ୍, ଅଣ୍ଡ୍ ନିଜେ ଚୁର୍ ତଡ଼୍ ଡଲିତଣ୍ଡ୍ । ଇଶ୍ୱର୍ତେ ନାରୁଡ଼୍ ସେଙ୍ଗେ ଦୈର୍ଯ୍ୟ ନୁ ବିଶ୍ୱାସ୍ ଅଣ୍ଡୟ୍ତାଗ୍ ମାନ୍ଦ୍ତେ ।
୧୧ ତାନ୍ପେର୍କେ ନାନେ ଉଡ଼୍ତାନ୍, ମେଣ୍ଡେ ୱେରଡ଼୍ ଜନ୍ତୁ ବୁମ୍ତାଗାଙ୍କ୍ ତେଦି ୱାଦୁତେ । ମେଣ୍ଢା ଲେକାମ୍ ତାନାୱୁ ରେଣ୍ଡ୍ କଅକ୍ ମାତ୍ତା ନୁ ଆଦ୍ ମୁନେତ୍ ତାଡ଼ାମ୍ ଇନା ଗଟି କେସମାତ୍ତା । ୧୨ ଇଦ୍ ଦ୍ୱିତିୟ ଜନ୍ତୁ ମୁନେତ୍ ଜନ୍ତୁ ପରୁ ତାନାଦ୍ କ୍ଷମତା ପ୍ରୟୋଗ୍ ମାଡ଼ି ପ୍ରତମ୍ ଜନ୍ତୁ ବେଦିନାଦ୍ ପୁଣ୍ଡ୍ ସାୟେ ଆସ୍ମାତ୍ତେ, ଅଦିନ୍ ପୁଜା ମାଡ଼ାନ୍ ସେଙ୍ଗେ ପୃତିବିତେ ନାରୁଡ଼୍ ସାରେତଡ଼୍କ୍ ବାଦ୍ୟ ମାଡ଼୍ତେ । ୧୩ ଦ୍ୱିତିୟ ଜନ୍ତୁ ନାର୍ଗେ ଆଶର୍ଯ୍ୟ କାମ୍ସାରେ ମାଡ଼୍ତେ । ସାରେତଡ଼୍ ମୁନେ ସ୍ୱର୍ଗତାଗାଙ୍କ୍ ପୃତିବିତେ ପରୁ କିସ୍ ୱାନେ ମାଡ଼୍ତେ, ୧୪ ପ୍ରତମ୍ ଜନ୍ତୁତ୍ ଗାରେ ଇଦ୍ଲେକାମ୍ ନାର୍ଗେ ଆଶର୍ଯ୍ୟ କାମ୍ ମାଡ଼ି ପୃତିବିତେ ସାରେତଡ଼୍ ନାରୁଡ଼୍କ୍ ପ୍ରତାରନ୍ ମାଡ଼୍ତେ । କଡ଼୍ଗତଡ଼୍ ଆଗାତ୍ ଆସ୍ ଆରୋଗ୍ୟ ଆସ୍ ମାନ୍ଦାନ୍ ପ୍ରତମ୍ ଜନ୍ତୁ ସମ୍ମାନ ସେଙ୍ଗେ ତାନ୍ ଲେକାତ୍ ୱେରଡ଼୍ ମୁର୍ତି ତିଆର୍ ମାଡ଼ାନ୍ ସେଙ୍ଗେ ଦ୍ୱିତିୟ ଜନ୍ତୁ ନାରୁଡ଼୍କିଙ୍କ୍ ଆଦେଶ୍ ଇତ୍ତେ । ୧୫ ପ୍ରତମ୍ ଜନ୍ତୁତେ ମୁର୍ତି ଲେକାମ୍ ଜିୱୁଣ୍ଡ୍ ଇସ୍ ଉଦ୍ତଣ୍ଡ୍ ଆଦିଙ୍କ୍ ଜିୱେ ମାଡ଼ାନାଦ୍ ଉପାୟ୍ ଦ୍ୱିତିୟ ଜନ୍ତୁ ପୁଞ୍ଜ୍ମାତ୍ତେ । ସାରେଦିନାତ୍ ମୁର୍ତି ଗଟି କେତ୍ତେ ନୁ ବେନଡ଼୍ ତାଂଙ୍କ୍ ପୁଜା ମାଡ଼ଡ଼୍, ଅଡ଼୍କିଂଙ୍କ୍ ସଂହାର୍ ମାଡ଼ାନଙ୍କ୍ ପାର୍ଦ୍ତେ । ୧୬ ବେଡ଼ିୟନ୍ ସୁଦୁନନ୍ କ୍ରୀତଦାସ ବା ସ୍ୱାଦିନ୍, ସାଉକାର୍ ଗରିବ୍ ସାରେତ୍ତେ ପେର୍କେ ସାରେତଡ଼୍ ତିନ୍ଦେକାଇଦେ ପାକେ ବା ମୁଞ୍ଜିନାଗ୍ ୱେରଡ଼୍ ସଙ୍କେତ୍ ମାଡ଼ାନଙ୍କ୍ ଆଦ୍ ନାରୁଡ଼୍ ବାଦ୍ୟ ମାଡ଼୍ତେ । ୧୭ ଜନ୍ତୁତେ ପେଦେର୍ ବା ଅଦିନ୍ ପେଦେର୍ତେ ସାରେତିଙ୍କ୍ ଅଣ୍ଡ୍ ସଂକ୍ୟା ଦାରନା ମାଡ଼୍ୱେ ମାନ୍ଦାନ୍ ବେନ ୱାମାନ୍ ଆସାନ୍ ମାଡ଼େ ପାର୍ୱଡ଼୍ ଇଞ୍ଜ ଜନ୍ତୁ ଆଦେଶ୍ ଇତ୍ତେ ।
୧୮ ଇଦିନ୍ ସଂକ୍ୟାତେ ତାତ୍ପର୍ଯ୍ୟ ବୁଜେମ୍ ଆଦାଙ୍କ୍ ଜ୍ଞାନ ପ୍ରୟୋଜନ୍ । ବୁଦ୍ଦ୍ତେ ନାରୁଡ଼୍ ଆଦ୍ ବୁଜେମ୍ ଆଦ୍ତଡ଼୍ । ଆଦ୍ ୱେରଡ଼୍ ନାରିନ୍ ପେଦେର୍ ଲେକାମ୍ । ଆଦ୍ ସଂକ୍ୟା ଆଦୁତ୍, ୬୬୬ ।