୧୭
ବେସ୍ୟା ପଡ଼୍ୟିଦାଗ୍ ପେଦେର୍ ଆତ୍ନଣ୍ଡ୍
୧ ତାନ୍ପେର୍କେ ସାତ୍ଟାନ୍ ଗିନା ପଇତ୍ତେ ସାତ୍ଟାନ୍ ଦୂତନାଗାଙ୍କ୍ ୱେରଣ୍ଡ୍ ନାୟାଗ୍ ୱାସ୍ କେତ୍ତନ୍, “ୱାଡ଼େ ! ନାର୍ଗେ ଇଲ୍କେ ଗାର୍ରେ ତିଆର୍ ଆତ୍ତେ ବେସ୍ୟା ଲେକାମ୍ ଆଦ୍ ବାଡ଼୍ୟେ ନଗର୍ତିଙ୍କ୍ ବେଲା ଶାସ୍ତି ଆଦ୍ତେ, ଆଦ୍ ତଅତିତାନ୍ । ୨ ପୃତିବିତେ ରାଜାନଡ଼୍ ଆ ବେସ୍ୟାନ୍ତଡ଼୍ ବ୍ୟବିଚାର୍ ମାଡ଼୍ତଡ଼୍ ନୁ ପୃତିବିତେ ନାରୁଡ଼୍ ମାନ୍ଦେ ତାନାଦ୍ ବ୍ୟବିଚାର୍ତେ ସୁରାମ୍ ଉଞ୍ଜ୍ ମାତ୍ୱାର୍ ଆତ୍ତଡ଼୍ ।”
୩ ✡ପ୍ରକାଶିତ୍ ବାକ୍ୟ ୧3:୧.ଆସୁଙ୍ଗ୍ ପବିତ୍ରଆତ୍ମା ନାୟାଗ୍ ଅଦିଷ୍ଟାନ୍ ମାଡ଼୍ତେ ନୁ ଆଦ୍ ଦୂତ ନାକିଙ୍କ୍ ୱେରଡ଼୍ ଉସ୍କ ନେଲ୍ଦାଗ୍ ଆତ୍ତେ । ଆଗେ ନାନେ ଉଡ଼୍ତାନ୍, ୱେରଡ଼୍ ନାଟାଡ଼୍ ୱେରଡ଼୍ ଏର୍ରେ ରଙ୍ଗ୍ତେ ପଶୁତ୍ ପରୁ କୁଦ୍ତେ । ପଶୁତେ ସାରେପାକ୍ ମେନ୍ଦୁଲ୍ତାଗ୍ ଇଶ୍ୱର୍ତେ ନିନ୍ଦ୍ତଡ଼୍ ପେଦେର୍ରି ଲେକା ଆସ୍ମାନ୍ନୁଡ଼୍ । ନୁ ତାନ୍ଉ ସାତ୍ଟାନ୍ ତାଲ୍ଲା ନୁ ଦଶ୍ଟାନ୍ କଅକ୍ମିନ୍ଦେ । ୪ ନାଟାଡ଼୍ ଆପେ କଲର୍ ନୁ ଏର୍ରେ ରଙ୍ଗ୍ଦେ ସିଲେ କେର୍ସ୍ ମାନ୍ନୁଡ଼୍ ନୁ ଆଦ୍ କେର୍ସ୍ ମାନ୍ଦାନ୍ ସୁନା, ନାର୍ଗେ ଦାମ୍ତାଉ ନେଡ଼େକ୍ ମୁକ୍ତାତେ ଜିଗ୍ଜାଗ୍ ତନ୍ଦମାନ୍ନୁଡ଼୍ । ତାନାଦ୍ କାଇଦାଗ୍ ୱେରଡ଼୍ ସୁବର୍ଣ୍ଣ ପାତ୍ର ମାତ୍ତା । ତାନ୍ ବ୍ରଷ୍ଟାଚାର୍ତେ କାୟା ଲେକାମ୍ ଅଶ୍ଲୀଲ ନୁ ଅଶୁଚି ପୁର୍ଣ୍ଣ ଅଣ୍ଡୟ୍ ସୁନ୍ନତ୍ ଗିନେ ପୟସ୍ ମାତ୍ତେ ୫ ତାନ୍ ମୁଞ୍ଜିନାଗ୍ ୱେରଡ଼୍ ରଅସ୍ୟତେ ମିଞ୍ଜିମାନ୍ଦାନ୍ ପେଦେର୍ ଲେକା ଆସ୍ମାନ୍ନୁଡ଼୍; “ମହାନ୍ ବାବିଲନ୍, ପୃତିବିତେ ସାରେତଡ଼୍ ବେସ୍ୟା ନୁ ବ୍ରଷ୍ଟାସାର୍ତେ ଜନିନି ।” ୬ ନାନେ ମେଣ୍ଡେ ଉଡ଼୍ତାନ୍, ଆଦ୍ ନାଟାଡ଼୍ ସାଦୁନଡ଼୍ ନୁ ଜିସୁନ୍ ସେଙ୍ଗେ ବିଶ୍ୱାସ୍ତେ ମାଞ୍ଜ୍ ଡଲିମାନ୍ଦାନ୍ ନାରୁଡ଼୍ତେ ନେତୁର୍ ଉଞ୍ଜ୍ ମାତ୍ୱାରି ଆସ୍ମାତ୍ତନ୍ । ଅଙ୍କ୍ ଉଡ଼ି ନାନେ କାବାଆସ୍ ନାୟାଦ୍ ବୁଦ୍ ମାୟି ଆତ୍ତେ । ୭ ଦୂତ କେତ୍ତେ, “ବାତ୍ତିଙ୍କ୍ କାବା ଅଦୁତିନ୍ ?” ଆଦ୍ ନାଟାଡ଼୍ ମେଣ୍ଡେ ସାତ୍ଟାନ୍ ତାଲା ନୁ ଦସ୍ଟାନ୍ କଅକ୍ ସାରେ ତାନ୍ ୱାଦାନ୍ ପଶୁତେ ମିଞ୍ଜ୍ତେ ରଅସ୍ୟ ନାନେ ମିକିଙ୍କ୍ କେତୁତାନ୍, କେଞ୍ଜା ! ୮ ✡ପ୍ରକାଶିତ୍ ବାକ୍ୟ ୧୧:୭.ପଶୁ ଅନ୍ଦିନେ ଗେଲ୍ସି ମାତ୍ତେ; ଇଞ୍ଜେ ମେଣ୍ଡେ ଗେଲ୍ସ, କିନ୍ତୁ ଗାଟି ଜାପେ ପାତାଲ୍ପୁରିତାଗାଙ୍କ୍ ତେଦି ୱାଦ୍ତେ ନୁ ମେଣ୍ଡନ୍ ଦାମ୍ ବିନଷ୍ଟ ଆଦ୍ତେ । ସୃଷ୍ଟିତ୍ ମୁନେଙ୍କ୍ ବେନଡ଼ାଉ ପେଦେର୍ ଜୀୱେ ବଇତାଗ୍ ଲେକା ଆୟ, ପୃତିବିତେ ନାରୁଡ଼୍ ଆଦ୍ ସାରେ ପଶୁତିଙ୍କ୍ ଉଡ଼ି ବକୁୱା ଆଦ୍ତଡ଼୍ । ଆଦ୍ ଦିନେ ଜିୱେ ମାତ୍ତେ, ଇଞ୍ଜେ ମେଣ୍ଡେ ଇଲା, କିନ୍ତୁ ମେଣ୍ଡନ୍ଦାମ୍ ତଅନ୍ଦିତେ ।
୯ “ଇଦ୍ ସାରେ ବିଷୟ ବୁଜେମ୍ ଆଦାଙ୍କ୍ ଜ୍ଞାନ୍ ଦର୍କାଡ଼୍ । ପଶୁତେ ସାତ୍ଟାନ୍ ତାଲା ନିଜାମ୍ ସାତ୍ଟାନ୍ ମେଟା, ବେନିନ୍ ପରୁ ନାଟାଡ଼୍ କୁଦିମିନ୍ଦେ । ଆୱୁମିକା ସାତ୍ଟାନ୍ ରାଜାନ୍ ପ୍ରତିକ । ୧୦ ଅଡ଼୍ ଆଗାଙ୍କ୍ ଏୟ୍ୱୁଡ଼୍ ମଦଲ୍ ରାଲ୍ତଡ଼୍ । ଇଞ୍ଜେ ୱେରଣ୍ଡ୍ ରାଜତ୍ୱ ମାଡ଼୍ତନ୍, ବାଗାତଡ଼୍ ଇଞ୍ଜେ ଆୟ୍ନା ୱାଡ଼ଣ୍ଡ୍ । ଅଣ୍ଡ୍ ୱାସ୍ ମାତର୍ ସୁଦୁଟ୍ ସମୟ ଯାକ ରାଜତ୍ୱ ମାଡ଼ିତନ୍, ୧୧ ବେନ୍ ପଶୁ ଅନ୍ଦିନ୍ ଜିୱେ ମାତ୍ତେ, କିନ୍ତୁ ଇଞ୍ଜେ ମେଣ୍ଡେ ଇଲା, ଆଦ୍ ଅଦୁତ୍ ଅଷ୍ଟମ୍ ରାଜା; ଆୱୁ ସାତ୍ଟାନ୍ ରାଜାନଡ଼୍ ଆଗାଙ୍କ୍ ୱେରଣ୍ଡ୍ ନୁ ଅଣ୍ଡ୍ ମିକା ଯାପେ ବିନଷ୍ଟ ଆଦ୍ତନ୍ ।”
୧୨ “ମିଡ଼୍ ଉଡ଼ିମାନ୍ଦାନ୍ ଦଶ୍ଟାନ୍ କଅକ୍, ଦଶ୍ଟାନ୍ ରାଜାନଡ଼୍ ପ୍ରତିକ୍, ଅଡ଼୍ ଇଞ୍ଜେ ଆୟ୍ନା ରାଜତ୍ୱ ମାଡ଼ଡ଼୍ । କିନ୍ତୁ ପଶୁତଡ଼୍ ରାଜତ୍ୱ ମାଡ଼ାନ୍ ସେଙ୍ଗେ ଅଣ୍ଡୟ୍ ଗଣ୍ଟା ସେଙ୍ଗେ ଅଡ଼୍କିଂଙ୍କ୍ କ୍ଷମତା ଇଦ୍ତନ୍ । ୧୩ ଅଡ଼୍ ଦଶ୍ଜାନ୍ ରାଜାନ୍ ଇଚ୍ଛା ଅଣ୍ଡୟ୍ । ଅଡ଼୍ ନିଜେତ୍ ସାରେ ଶକ୍ତି ନୁ କ୍ଷମତା ପଶୁତିଙ୍କ୍ ସର୍ପଣ ମାଡ଼ିତଡ଼୍ । ୧୪ ଅଡ଼୍ ମେଣ୍ଢାଗଲାଲ୍ ବିରୁଦ୍ଦତେ ଯୁଦ୍ ମାଡ଼ିତଡ଼୍; କିନ୍ତୁ ମେଣ୍ଢାଗଲାଲ୍ ତାମାଦ୍ ଆଉତ, ଏଞ୍ଚିମାନ୍ଦାନ୍, ପେର୍କେୱାଦାନ୍ ନୁ ବିଶ୍ୱାସ୍ସ୍ତେ ନାରୁଡ଼୍ ସାଆଯ୍ୟତେ ଅଡ଼୍କିଂଙ୍କ୍ ଜିଡ଼ିତଡ଼୍ । ବାତ୍ତିଙ୍କ୍ ଇତ୍କେ ରାଜାନଡ଼୍ ରାଜାଲ୍ ନୁ ଅଣ୍ଡ୍ ପ୍ରବୁନଡ଼୍ ପ୍ରବୁ ।”
୧୫ ଦୂତ ନାକିଙ୍କ୍ ମେଣ୍ଡେ କେତ୍ତେ, “ନିମେ ବେନ୍ ଜଲରାଶି ଉଡ଼ିତିନ୍, ବେନିନ୍ ପରୁ ଆ ବେସ୍ୟା କୁଦ୍ତେ, ଆଦ୍ ଅଦୁତ୍ ବେନ୍ ରାଷ୍ଟ, ଜାତି, ନାଚିଟି ନୁ ବାଷାବାଦିନଡ଼୍ ସମାବେସ । ୧୬ ମିଡ଼୍ ଉଡ଼ିମାନ୍ଦାନ୍ ସାତ୍ଟାନ୍ କଅକ୍ ନୁ ଆଦ୍ ପଶୁ, ବ୍ୟାସାଙ୍କ୍ ଗୃଣା ମାଡ଼ିତେ; ଅଡ଼୍ ତାନାଗାଙ୍କ୍ ତାନାୱୁ ସାରେ ୱିର୍ପ୍ତି ଆସ୍ ଆଦିଙ୍କ୍ ବାଣ୍ଡି ମାଡ଼ି ୱିଡ଼୍ସିଦ୍ତଡ଼୍ । ଅଡ଼୍ ତାନ୍ ଆୱୁଙ୍ଗ୍ ତିନ୍ତଡ଼୍, ମେଣ୍ଡେ ଆଦିଙ୍କ୍ କିସ୍ତାଗ୍ ୱାଟି ଦଂସ ମାଡ଼ିତଡ଼୍ । ୧୭ ବାତ୍ତେଙ୍କ୍ଇତ୍କେ, ଇଶ୍ୱର୍ ନିଜେତ୍ ଉଦ୍ଦେଶ୍ୟତେ ସାଦନ୍ ମାଡ଼ାନ୍ ସେଙ୍ଗେ ଅଡ଼୍କିଂଙ୍କ୍ ଇଦ୍ ପ୍ରେରଣା ଇତ୍ତନ୍ । ଅଡ଼୍ ଅଣ୍ଡୟ୍ ମାନ୍ଆସ୍ କାମ୍ ମାଡ଼ିତଡ଼୍ ନୁ ଇଶ୍ୱର୍ତେ ବାକ୍ୟ ବେସୁଙ୍କ୍ ମିକା ପରିଣତ ଆୟ୍ୱେ ଯାକ ରାଜ୍ୟତେ ଶାସନ୍ ମପ୍ ଆଦ୍ ପଶୁତ୍ କାଇଦାଗ୍ ୱିଡ଼୍ସିଦ୍ତଡ଼୍ ।”
୧୮ “ମିଡ଼୍ ବେନ୍ ନାଟାଡ଼୍ତିଙ୍କ୍ ଉଡ଼୍ତିଡ଼୍, ଆଦ୍ ଅଦୁତ୍, ପୃତିବିତେ ରାଜାନଡ଼୍ ପରୁ ଶାସନ୍ ମାଡ଼ମାନ୍ଦାନ୍ ଆଦ୍ ବେଡ଼ିୟ୍ ନଗର୍ ।”