ରୋମୀୟ ଲୋକମାନଙ୍କ ନିକଟକୁ ପାଉଲଙ୍କ ପତ୍ର
ରୋମୀୟ ନାରୁଡ଼୍ ଗାର୍ରେ ପାଉଲ୍ତେ ଚିଟି
ରୋମୀୟ ବଇ ବିଷୟ୍ତେ ଅଣ୍ଡୟ୍ ପଦ୍
ରୋମୀୟ ବଇ ଆଦୁତ୍ ପ୍ରେରିତ୍ ପାଉଲ୍ନ୍ ତଡ଼୍ ସମ୍ୱାବନା ୫୪ ତାଗାଙ୍କ୍ ୫୮ କ୍ରିଷ୍ଟାଦ୍ଦତେ ଲୋପେ କ୍ରିଷ୍ଟନ୍ ଜନମ୍ ପେର୍କେ ଲେକା ଆସ୍ମାତ୍ତେ । ପାଉଲ୍ ରୋମ୍ତାଗ୍ ଆଦାନ୍ ମୁନେଙ୍କେ ରେଣ୍ଡ୍ ଯହୁଦୀ ନୁ ଅଣଯିହୁଦୀ କ୍ରିଷ୍ଟିୟାନ୍ ନାରୁଡ଼୍କ୍ ନିର୍ଦ୍ଦେଶ୍ ଇଦାନଙ୍କ୍ ଇଦ୍ ଚିଟି ଲେକିମାତ୍ତଣ୍ଡ୍ । ସାର୍ରେତଡ଼୍ ବେଲା ଜିସୁ କ୍ରିଷ୍ଟଙ୍କ୍ ବିଶ୍ୱାସ୍ ନୁ ମାନ୍ୟ ମାଡ଼ିତଡ଼୍ ୧୬:୨୬ ଅଦିନ୍ ସେଙ୍ଗେ ଅଣ୍ଡ୍ କରିନ୍ଥି ଟାୱୁନ୍ତାଗ୍ ମାନ୍ଦାନ୍ୱେଲେ ରୋମୀୟ କ୍ରିଷ୍ଟିୟାନ୍ ନାରୁଡ଼୍କ୍ ଆଦେଶ୍ ଇଦାନ୍ ସେଙ୍ଗେ ଇଦ୍ ଚିଟି ଲେକିମାତ୍ତଣ୍ଡ୍ ।
ସାର୍ରେ ଜାଗାତାଗ୍ ସାର୍ରେ କ୍ରିଷ୍ଟିୟାନ୍ ନାରୁଡ଼୍ ସେଙ୍ଗେ ରୋମୀୟ ବଇ ଆଦୁତ୍ ଅଣ୍ଡୟ୍ ଗୁରୁତ୍ୱପୂର୍ଣ୍ଣ ବଇ, ବାତେଙ୍କ୍ଇତ୍କେ ମାନାଡ଼୍ ବେଲା ଜିସୁ କ୍ରିଷ୍ଟନ୍ ତଡ଼୍ ମୁକ୍ତି ପାଏମ୍ ଆଦେପାର୍ଦ୍ତାଡ଼୍ ପାଉଲ୍ ଗାଟି ସାୟେ ନୁ ଲେକେତ୍ ବୁଜା ମାଡ଼୍ତଣ୍ଡ୍ । ପାଉଲ୍ ପାଃନ୍ତେ ନିୟମ୍ତିଙ୍କ୍ ମିକା ଜିସୁ କ୍ରିଷ୍ଟନ୍ ସୁସମାଚାର୍ ତଡ଼୍ କାଲ୍ପିତଣ୍ଡ୍ । ବଇତ୍ ୧:୧୬ ପଦତିଙ୍କ୍ ଅସ୍ ନାର୍ଗେ ପଣ୍ଡିତ୍ ନାରୁଡ଼୍ ଯୁକ୍ତି ମାଡ଼ି କେତିତଡ଼୍ ଯେ, ଇଦ୍ ଗୁରୁତ୍ୱପୂର୍ଣ୍ଣ ନାଡ଼େମେତେ ଜାଗେ । ବାତ୍ ଇଗେ କେତାନଙ୍କ୍ ଆଦ୍ତେ, “ନାନ୍ ସୁସମାଚାର୍ ସେଙ୍ଗେ ସିଗ୍ ଆୟନ୍ ବାତେଙ୍କ୍ଇତ୍କେ ବେନଡ଼୍ ବିଶ୍ୱାସ୍ ମାଡ଼ିତଡ଼୍, ସାର୍ରେତଡ଼୍ ସେଙ୍ଗେ ଇଦ୍ ଇଶ୍ୱର୍ତେ ଶକ୍ତି । ମୁନେନ୍ ଯିହୁଦୀ ତାନ୍ପେର୍କେ ଅଣଯିହୁଦୀ ନାରୁଡ଼୍ ସେଙ୍ଗେ ଗାଲା ।” ମୁନେତ୍ ଦୁଡ଼େ ୧–୧୨ ଗାଟି ପାରମାର୍ତକ ନୁ ଦ୍ୱିତୀୟ୍ ଦୁଡ଼େ ୧୩–୧୫ କ୍ରିଷ୍ଟିୟ ଜିୱୁଣ୍ଡ୍ତାଗ୍ ନାର୍ଗେ ବ୍ୟବହାର୍ ନିର୍ଦ୍ଦେଶନା ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ
୧. ପାଉଲ୍ ସାଦାରଣତ ନିଜର୍ ପରିଚୟ୍ ଇସ୍, ବେନଙ୍କ୍ ଚିଟି ଲେକିତଣ୍ଡ୍ ଆଦ୍ କେସ୍ ଚିଟି ଆରାମ୍ ମାଡ଼ିତଣ୍ଡ୍ । ୧:୧-୧୫
୨. ନାରୁଣ୍ଡ୍ ଜାତିତ୍ ରାଜ୍ୟ ନୁ ଜିସୁ କ୍ରିଷ୍ଟନ୍ ତଡ଼୍ ମୁକ୍ତି ସମ୍ଭବ୍ । ୧:୧୬–୧୧:୩୬
୩. କ୍ରିଷ୍ଟିୟାନ୍ ଜିୱୁଣ୍ଡ୍ ବାଦ୍କାନ୍ ସେଙ୍ଗେ ପାଉଲ୍ତେ ନାର୍ଗେ ବ୍ୟବହାର୍ ନିର୍ଦ୍ଦେଶନା । ୧୨:୧–୧୫:୧୩
୪. ଅଣ୍ଡ୍ ରୋମୀୟ ମଣ୍ଡଲିତେ ନାରୁଡ଼୍କିଙ୍କ୍ ଗାଟି ନମସ୍କାର୍ ମାଡ଼ି ଲେକା ତେର୍ସ୍ପିତଣ୍ଡ୍ । ୧୬
୧
ପାଉଲ୍ତେ ଅବିନନ୍ଦନ୍
୧ ପାଉଲ୍, କ୍ରିଷ୍ଟ ଜିସୁନ୍ ଦାସ ନୁ କାର୍ଙ୍ଗି ୱାତ୍ତେନଣ୍ଡ୍ ୱେରଣ୍ଡ୍ ପ୍ରେରିତ୍, ମେଣ୍ଡେ ଇଶ୍ୱର୍ ତାନ୍ ମାର୍ ମାନ୍ ପ୍ରବୁ ଜିସୁ କ୍ରିଷ୍ଟନ୍ ବିଷୟ୍ତେ ନିଜେତାଦ୍ ଆଦ୍ ସୁସମାଚାର୍ ମାୟ୍ଦିଙ୍କ୍ ଲେକ୍ତାଦ୍ ପାଉଲ୍ତେ ଚିଟି, ୨ ପବିତ୍ର ଦର୍ମଶାସ୍ତ୍ରତାଗ୍ ଲେକ୍ତାଦ୍ ଲେକାମ୍ ଇଦ୍ ସୁସମାଚାର୍ ନାର୍ଗେ ଦିନାମ୍ ମୁନେତ୍କେ ତାନ୍ ବାବବାଦିଡ଼୍ ତଡ଼୍ ପ୍ରତିଜ୍ଞା ମାଡ଼ିମାତ୍ତଣ୍ଡ୍ । ୩ ଇଦିନ୍ ନାଡ଼୍ମ୍ ଜାଗେ ଆଦୁତଣ୍ଡ୍, ଇଶ୍ୱର୍ତେ ମାର୍, ମାନ୍ ପ୍ରବୁ ଜିସୁ କ୍ରିଷ୍ଟ । ମାନେୟ୍ ରକମ୍ ଅଣ୍ଡ୍ ଦାଉଦ୍ନ୍ ବଂଶତଣ୍ଡ୍, ୪ ଇତ୍କେ ଦର୍ମତାଦ୍ ଆତ୍ମା ବିଷୟ୍ତେ ଡଲ୍ତଡ଼୍ ଲୋପେଙ୍କ୍ ମେଣ୍ଡନ୍ନ୍ଦାମ୍ ଜିୱେ ଆସ୍ ଇଶ୍ୱର୍ତେ ମାର୍ ଇଞ୍ଜ ଶକ୍ତିତଡ଼୍ ପେଦେର୍ ଆତ୍ତଣ୍ଡ୍; ୫ କ୍ରିଷ୍ଟନ୍ ସେଙ୍ଗେ ଇଶ୍ୱର୍ ନାକିଙ୍କ୍ ପ୍ରେରିତ୍ ଶିଷ୍ ଲେକାମ୍ ଏଞ୍ଚି ସାର୍ରେ ଅଣଯିହୁଦୀଡ଼୍ ନାରୁଡ଼୍ ଲୋପେ ପ୍ରଚାର୍ ମାଡ଼ାନଷଙ୍କ୍ ସୁଯୋଗ୍ ଇତ୍ତଣ୍ଡ୍; ବେଲାକି ଅଡ଼୍ କ୍ରିଷ୍ଟ ଜିସୁନାଗ୍ ବିଶ୍ୱାସ୍ ମାଡ଼ି ଅନ୍ ଗଟି ମାନେମ୍ ଆଦ୍ତଡ଼୍ । ୬ ରୋମ୍ତେ ଆଦିବାସିଡ଼୍ ! ମିଡ଼୍ ଗାଲା ଜିସୁ କ୍ରିଷ୍ଟନାଗ୍ ୱାଦାନ୍ ମାୟ୍ଦିଙ୍କ୍ କାର୍ଙ୍ଗିଅସ୍ ମିନ୍ଦେଡ଼ି । ୭ ଆଦିଙ୍କ୍ ରୋମ୍ତେ ବେନଡ଼୍କିଂଙ୍କ୍ ଇଶ୍ୱର୍ ପ୍ରେମ ମାଡ଼ିତଣ୍ଡ୍ ମେଣ୍ଡେ ତାନ୍ ନିଜର୍ ନାରୁଣ୍ଡ୍ ଆଦାନଙ୍କ୍ କାର୍ଙ୍ଗ୍ତଣ୍ଡ୍, ଅଡ଼୍ ସାରେତଡ଼୍କିଙ୍କ୍ ନାନ୍ ଇଦ୍ ଚିଟି ଲେକୁତାନ୍ । ମାନ୍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
ଦନ୍ୟବାଦ୍ ପ୍ରାର୍ତନା
୮ ମୁନେନ୍, ନାନ୍ ମିଡ଼୍ ସାର୍ରେତଡ଼୍ତେ ମାୟ୍ଦିଙ୍କ୍ ଜିସୁ କ୍ରିଷ୍ଟନ୍ ତଡ଼୍ ନା ଇଶ୍ୱର୍ତିଙ୍କ୍ ଦନ୍ୟବାଦ୍ ଇଦୁତାନ୍, ବାତେଙ୍କ୍ ଇତ୍କେ ମିୟାଦ୍ ବିଶ୍ୱାସ୍ତାଦ୍ ସାୟେତ୍ କାବୁର୍ ଯେ ସାରେ ଜଗତ୍ତାଗ୍ କେଞ୍ଜାନଙ୍କ୍ ଆଦୁତ୍ତେ । ୯ ସାରେଦାମ୍ ନାନ୍ ବେନ୍ ଇଶ୍ୱର୍ତିଙ୍କ୍ ସେବା ମାଡ଼ୁତାନ୍ ନୁ ବେନ୍ ଇଶ୍ୱର୍ତେ ମାରିନ୍ ସାୟେତ୍ କାବୁର୍ ନାନ୍ ପ୍ରଚାର୍ ମାଡ଼ୁତାନ୍, ଆ ଇଶ୍ୱର୍ ନା ସାକ୍ଷି । ୧୦ ପ୍ରାର୍ତନା ମାଡ଼ାନ୍ୱେଲେ ନାନ୍ ସାରେଦାମ୍ ମିକିଂଙ୍କ୍ ଏର୍କେ ମାଡ଼ିତାନ୍ ନୁ ମି ବକେତ୍ ୱାଦାନ୍ ସେଙ୍ଗେ ନାକିଙ୍କ୍ ସୁଯୋଗ୍ ଇଦାନ୍ ମାୟ୍ଦିଙ୍କ୍ ଇଶ୍ୱର୍ତାଗ୍ ନିମେଦନ୍ ମାଡ଼ି ୱାଦୁତାନ୍ । ୧୧ ମି ବକେତ୍ ୱାସ୍ ନାନ୍ ଦର୍ସ୍କି ମାନ୍ଦାନ୍ ଆତ୍ମିକ୍ ଦାନ୍ ବିଷୟ୍ତେ ମିକିଂଙ୍କ୍ କର୍ତ୍ତାନ୍ ତଡ଼୍ ମିୟାଦ୍ ବିଶ୍ୱାସ୍ତିଙ୍କ୍ ଡୁଟାଙ୍ଗ୍ ମାଡ଼ିତାନ୍, ଇଦ୍ ନାୟାଦ୍ ଅଣ୍ଡୟ୍ ଇଚ୍ଛା । ୧୨ ଇଦିନ୍ ତଡ଼୍ ମାନାଡ଼୍ ନିଜର୍ନିଜର୍ ଲୋପେ ବିଶ୍ୱାସ୍ତିଙ୍କ୍ ଡୁଟାଙ୍ଗ୍ ମାଡ଼େପାର୍ଦ୍ତାଡ଼୍ । ୧୩ ✡ପ୍ରେରିତ ୧୯:୨୧.ହୋ ଦାଦାଲଡ଼ି ନୁ ଏଲାସ୍କ୍, ମି ବକେତ୍ ୱାଦାନଙ୍କ୍ ନାନ୍ ନାର୍ଗେଦାମ୍ ଇଚ୍ଛା ମାଡ଼୍ତାନ୍, ଇତ୍କେ ବାତ୍ଆୟି କାରନ୍ ମାୟ୍ଦିଙ୍କ୍, ଇଞ୍ଜେକ୍ଆନା ୱାଦାନଙ୍କ୍ ପାର୍ୱନ୍ । ଆନ୍ୱେ ଜାଗାକିନାଗ୍ ଅଣଯିହୁଦୀଡ଼୍ ଲୋପେ ପ୍ରଚାର୍ ମାଡ଼ି ବେଲା ସଫଲ୍ ଆତ୍ତାନ୍, ମି ଜାଗାକିନାଗ୍ ଗାଲା ଆଲା ମାଡ଼ାନଙ୍କ୍ ନାୟାଦ୍ ଇଚ୍ଛା । ୧୪ ଗ୍ରୀକ୍ ନାରୁଡ଼୍ ଆୟି କି ବର୍ବର୍ ନାରୁଡ଼୍ ଆୟି, କାର୍ତେନଣ୍ଡ୍ ଆୟି କି କାର୍ୱେନଣ୍ଡ୍ ଆୟି, ସାର୍ରେତଡ଼୍ ବକେତ୍ ନାନ୍ ଋଣୀ । ୧୫ ଆଦିଙ୍କ୍ ରୋମ୍ଦେଶ୍ତଡ଼ି ଆତ୍କେ ମିକା, ମିଇ ବକେତ୍ ଗାଲା ସୁସମାଚାର୍ ପ୍ରଚାର୍ ମାଡ଼ାନଙ୍କ୍ ନାୟାଦ୍ ଇଚ୍ଛା ମିନ୍ଦେ ।
ସୁସମାଚାର୍ତାଦ୍ ଶାତ୍ୱାମ୍
୧୬ ✡ମାର୍କ ୮:3୮.ବାତେଙ୍କ୍ଇତ୍କେ ନାନ୍ ସୁସମାଚାର୍ତିଙ୍କ୍ ସିଗ୍ ମାଡ଼ନ୍, ଆଦ୍ ସାର୍ରେ ବିଶ୍ୱାସିଡ଼୍କିଂଙ୍କ୍ ପରିତ୍ରାଣ୍ ସେଙ୍ଗେ ଶାତ୍ୱାମ୍, ମୁନେନ୍ ଯିହୁଦୀଡ଼ାଗ୍, ମେଣ୍ଡେ ଗ୍ରୀକ୍ ନାରୁଡ଼ାଗ୍ । ୧୭ ଆଗେ ତ ଇଶ୍ୱର୍ ଇତ୍ତାଦ୍ ଦାର୍ମାମ୍ ମିନ୍ଦେ, ଆଦ୍ ବିଶ୍ୱାସ୍ତାଦ୍ ନୁ ବିଶ୍ୱାସ୍ ମାଡ଼ାନାଦ୍, ବେଦ୍ପୁଟୁଙ୍କ୍ ଲେକାମିନ୍ଦେ, “ଦର୍ମାମ୍ ନାରୁଡ଼୍ ବିଶ୍ୱାସ୍ତଡ଼୍ ବାଦ୍କିତଣ୍ଡ୍ ।”
ନାରୁଡ଼ାଦ୍ ପାପ୍
୧୮ ବାତେଙ୍କ୍ଇତ୍କେ ବେନ୍ ନାରୁଡ଼୍ ଅଦର୍ମତଡ଼୍ ସତ୍ତିଙ୍କ୍ ବିରୁଦ୍ ମାଡ଼ିତଡ଼୍, ଅଡ଼ାଦ୍ ସାର୍ରେ ଅପବିତ୍ର ନୁ ଅଦର୍ମ ବିରୁଦ୍ତେ ସ୍ୱର୍ଗତାଗ୍ ଇଶ୍ୱର୍ କପାମ୍ ଆଦୁତନ୍, ୧୯ ଆଦିଙ୍କ୍ ଇଶ୍ୱର୍ତେ ବିଷୟ୍ ବାତ୍ ପୁତ୍ତଡ଼୍, ଆଦ୍ ତାମ୍ ଜିୱୁଣ୍ଡ୍ତାଗ୍ ପୁତ୍ତଡ଼୍; ଇଶ୍ୱର୍ ତ ତାମ୍ ବକେତ୍ ଆଦ୍ କେତ୍ତଣ୍ଡ୍ । ୨୦ ଜଗତ୍ ତିଆର୍ ଆତ୍ତେକନ୍ସ୍ ଅନାଦ୍ ଲୋପେ ମାନ୍ଦାନ୍ ଗୁନାମ୍ ସାର୍ରେ, ଇତ୍କେ ଅନାଦ୍ ନାର୍ଗେ ତେର୍ୱାଦ୍ ଶକ୍ତି ନୁ ଇଶ୍ୱର୍ ଗୁନାମ୍, ତିୟାର୍ ମାଡ଼୍ତେ ଜିନିଷ୍ତଡ଼୍ ଜ୍ଞାନି ଆସ୍ ସାୟେ ଲେକାମ୍ ତଅନ୍ଦୁତ୍, ବେଲାକି ଅଡ଼୍ ଉତ୍ତର୍ ଇଦାନଙ୍କ୍ ଆର୍ର୍ ଇଲ୍ଲେ । ୨୧ ✡ଏଫିସିୟ ୪:୧୭,୧୮.ବାତେଙ୍କ୍ଇତ୍କେ ଅଡ଼୍ ଇଶ୍ୱର୍ତିଙ୍କ୍ ପୁଞ୍ଜ୍ ଅଂକିଙ୍କ୍ ଇଶ୍ୱର୍ ଇଞ୍ଜ ଗୌରବ୍ ମାଡ଼ଡ଼୍ କି ଦନ୍ୟବାଦ୍ ଇୱଡ଼୍, ଅଡ଼୍ ତାମ୍ତାମ୍ ଯୁକ୍ତିତର୍କ ଆଦ୍ତଡ଼୍ ନୁ ଅଡ଼ାଦ୍ ବୁଦ୍ଇଲ୍ୱାଦ୍ ମନ୍ ଇକାଡ଼୍ ଆତ୍ତେ; ୨୨ ଅଡ଼୍ ନିଜେ ନିଜେତିଙ୍କ୍ ଜ୍ଞାନି ଇଞ୍ଜ ମନେ ମାଡ଼ିତଡ଼୍, ଇତ୍କେ ଅଡ଼୍ ନିଜାମ୍ ମୁର୍କ ଆଦ୍ତଡ଼୍, ୨୩ ଅନନ୍ତ ଇଶ୍ୱର୍ତିଙ୍କ୍ ଗୌରବ୍ ମାଡ଼୍ୱେକଟ ଅଡ଼୍ ନଷ୍ଟ ଆଦାନ୍ ନାରୁଡ଼୍, ପିଟ୍ଟେ, ପଶୁ, ତାଡ଼ାକ୍ ରକମ୍ ଜିୱାକ୍ ଲେକାମ୍ ମୁର୍ତ୍ତି ତିୟାର୍ ମାଡ଼ି ଆୱିଙ୍କ୍ ପୁଜା ମାଡ଼ୁତଡ଼୍ । ୨୪ ଆଦିଙ୍କ୍ ଇଶ୍ୱର୍ ଅଡ଼୍କିଂଙ୍କ୍ ୱିଡ଼୍ସ୍ତଣ୍ଡ୍ ନୁ ଅଡ଼୍ ନିଜର୍ନିଜର୍ ଲାଲସା ଲେକାମ୍ ଅଶୁଚି ପାଡ଼୍ୟି ମାଡ଼ିତଡ଼୍, ଅଡ଼୍ ନିଜର୍ନିଜର୍ ଲୋପେ ସିଗ୍ୱାଦାନ୍ ସମ୍ପର୍କ ନେଃତିତଡ଼୍ । ୨୫ ବାତେଙ୍କ୍ଇତ୍କେ ଅଡ଼୍ ଇଶ୍ୱର୍ତେ ସତ୍ ବଦଲ୍ତେ ମିଚ୍ ଗ୍ରହନ୍ ମାଡ଼୍ତଡ଼୍ ନୁ ତିୟାର୍ ମାଡ଼୍ତେନଣ୍ଡ୍ ବଦଲ୍ତେ ତିୟାର୍ ମାଡ଼୍ତେ ଜିନିଷ୍ତିଙ୍କ୍ ପୁଜା ମାଡ଼୍ତଡ଼୍ ନୁ ସେବା ମାଡ଼୍ତଡ଼୍; ଅଣ୍ଡ୍ ଯୁଗ୍ଯୁଗ୍ ଦନ୍ୟ । ଆମେନ୍ । ୨୬ ଇଦିନ୍ ସେଙ୍ଗେ ଇଶ୍ୱର୍ ଅଡ଼୍କିଂଙ୍କ୍ ଗୃନାତାଦ୍ ପାପ୍ ଇତ୍ତନ୍, ବାତେଙ୍କ୍ଇତ୍କେ ତାମ୍ ନାଟାଙ୍କ୍ ସାୟେତ୍ ବ୍ୟବହାର୍ ମାଡ଼ାନ୍ ବଦଲ୍ତେ କାରାପ୍ ବ୍ୟବହାର୍ ମାଡ଼୍ତା, ୨୭ ଆଦେରକମ୍ ମାନେୟ୍ ଗାଲା ନିଜେତ୍ ମୁତେଙ୍କ୍ ୱିଡ଼୍ସି ମିକା ତାମ୍ତାମ୍ ଲାଲ୍ସା ମାଡ଼୍ତଡ଼୍, ମାନେୟ୍ ତଡ଼୍ ମାନେୟ୍ତେ କାରାପ୍ ପାଡ଼୍ୟି ମାଡ଼୍ତଡ଼୍, ମେଣ୍ଡେ ନିଜେ ନିଜେତାଦ୍ କାରାପ୍ ପାଡ଼୍ୟି ସେଙ୍ଗେ କଷ୍ଟ ପାଏମ୍ ଆଦ୍ତଡ଼୍ । ୨୮ ମେଣ୍ଡେ ଅଡ଼୍ ଇଶ୍ୱର୍ତେ ବିଷୟ୍ତାଦ୍ ବୁଦ୍ ଗ୍ରହଣ୍ ମାଡ଼ାନଙ୍କ୍ ପାର୍ୱଡ଼୍, ଆଦେରକମ୍ ଇଶ୍ୱର୍ କାରାପ୍ ପାଡ଼୍ୟି ମାଡ଼ାନ୍ ସେଙ୍ଗେ ଅଡ଼୍କିଂଙ୍କ୍ କାରାପ୍ ବୁଦ୍ ଇତ୍ତନ୍ । ୨୯ ଅଡ଼୍ ସାର୍ରେପ୍ରକାର୍ ଦୁଷ୍ଟ, ଅଦର୍ମ, ଲବି, ଇଂସା, ଇର୍ଷା, ହାଉକାଙ୍କ୍, ଗଲ୍କ୍, ମିଚ୍, କାରାପ୍ ନୁ ନିନ୍ଦାତଡ଼୍ ବର୍ତ୍ତି ଆଦ୍ତଡ଼୍; ୩୦ ଅଡ଼୍ ପେର୍ଲେ, ନିନ୍ଦ୍ ମାଡ଼ିତଡ଼୍, ଇଶ୍ୱର୍ତିଙ୍କ୍ ପାସ୍କିତଡ଼୍, ଅତ୍ୟାଚାର୍, ଅହଂକାରି, କାରାପ୍ ପାଡ଼୍ୟି ତିୟାର୍ ମାଡ଼ାନଡ଼ି, ୟାୟବାବାନ୍ ଗଟି କେଞ୍ଜଡ଼୍, ୩୧ ଅଡ଼୍ ମୁର୍କ, ନିୟମ୍ ପାଲନ୍ ମାଡ଼ଡ଼୍, ସ୍ନେହ ମାଡ଼ଡ଼୍ ନୁ ନିଷ୍ଠୁର୍ ଆଦ୍ତଡ଼୍ । ୩୨ ଅଡ଼୍ ପୁତ୍ତଡ଼୍ ଯେ, ଇଶ୍ୱର୍ ବିଦାନ୍ ଲେକାମ୍ ବେନଡ଼୍ ଇଦ୍ ରକମ୍ ବ୍ୟବହାର୍ ମାଡ଼ିତଡ଼୍, ଅଡ଼୍ ଡଲିତଡ଼୍, ଇଶ୍ୱର୍ତାଦ୍ ଇଦ୍ ନିୟମ୍ ପୁତ୍କେ ଗାଲା ଅଡ଼୍ ଇଦ୍ରକମ୍ ବ୍ୟବହାର୍ ମାଡ଼ିତଡ଼୍ ଆଦ୍ ଆୟ୍ୟ, ମେଣ୍ଡେ ଇଦ୍ ରକମ୍ ମାଡ଼ାନ୍ ନାରୁଡ଼୍କିଂଙ୍କ୍ ୱେଡ଼୍କେତେ ସପଟ୍ ମାଡ଼ିତଡ଼୍ ।