୧୩
ଶାସନ୍ ମାଡ଼ାନଡ଼୍ୱାଦ୍ ଗଟ୍ କେଞ୍ଜାନାଦ୍
୧ ଶାସନ୍ ମାଡ଼ାନଡ଼୍ୱାଦ୍ ଗଟ୍ କେଞ୍ଜାନାଦ୍ ସାର୍ରେତଡ଼୍ୱାଦ୍ ଦାୟିତ୍, ବାତେଙ୍କ୍ଇତ୍କେ ଇଶ୍ୱର୍ ଗଟ୍ ଇଲ୍ୱେ ବେନ ଶାସନ୍ ମାଡ଼ାନଣ୍ଡ୍ ଆୟ୍ୟଣ୍ଡ୍ । କ୍ଷମତା ତଡ଼୍ ମାନ୍ଦାନ୍ ଶାସନ୍ ମାଡ଼ାନଡ଼୍କ୍ ଇଶ୍ୱର୍ ଏଞ୍ଚିମିନ୍ଦେଣ୍ଡ୍ । ୨ ଆଦିଙ୍କ୍ ବେନ କ୍ଷମତାତଡ଼୍ ଶାସନ୍ ମାଡ଼ାନଡ଼୍କିଙ୍କ୍ ବିରୁଦ୍ ମାଡ଼ିତଡ଼୍, ଅଣ୍ଡ୍ ଇଶ୍ୱର୍ ତଡ଼୍ ତିୟାର୍ ଆତ୍ତେ ଅନୁଷ୍ଟାନ୍ତାଦ୍ ବିରୁଦ୍ ମାଡ଼ିତନ୍ । ବେନ ଇଲା ମାଡ଼ିତନ୍ ଅଣ୍ଡ୍ ବିଚାର୍ ଆଦ୍ତନ୍ । ୩ ବେନଡ଼୍ ସାୟେତ୍ ପାଡ଼୍ୟି ମାଡ଼ିତଡ଼୍, ଅଡ଼୍ ଶାସନ୍ ମାଡ଼ାନଡ଼୍କିଙ୍କ୍ ୱେର୍ତାନାଦ୍ ବାତ୍ ଇଲ୍ଲେ, କାରାପ୍ ପାଡ଼୍ୟି ମାଡ଼ାନଡ଼ି ୱେର୍ତିତଡ଼୍ । ଶାସନ୍ ମାଡ଼ାନଡ଼୍କିଙ୍କ୍ ୱେର୍ତାନାଦ୍ ଆୟ୍ୟ ଇଞ୍ଜ ମିୟାଦ୍ ଇଚ୍ଛା କି ? ଆଲେକେ ସତ୍ ପାଡ଼୍ୟି ମାଡ଼ାଟ୍, ଅଣ୍ଡ୍ ମିୟାଦ୍ ପ୍ରସଂଶା ମାଡ଼ିତନ୍ । ୪ ମିୟାଦ୍ ଲେକେତ୍ ମାଡ଼ାନ୍ ସେଙ୍ଗେ ଅଣ୍ଡ୍ ଇଶ୍ୱର୍ ତଡ଼୍ ନିଯୁକ୍ତି ଆତ୍ତଣ୍ଡ୍ । ଇତ୍କେ ମିଡ଼୍ ଯଦି କାରାପ୍ ପାଡ଼୍ୟି ମାଡ଼ମାନ୍ତିଡ଼୍, ଆଲାଇତ୍କେ ଶାସନ୍ ମାଡ଼ାନଡ଼୍କିଙ୍କ୍ ୱେର୍ମୁଟ୍, ବାତେଙ୍କ୍ଇତ୍କେ ମିକିଂଙ୍କ୍ ଦଣ୍ଡ୍ ଇଦାନ୍ ସେଙ୍ଗେ ନିଜାମ୍ ଅଡ଼ାଦ୍ ଅଦିକାର୍ ମିନ୍ଦେ । ଅଣ୍ଡ୍ ଇଶ୍ୱର୍ ତଡ଼୍ ନିଯୁକ୍ତି କର୍ମଚାରୀ । କାରାପ୍ ପାଡ଼୍ୟି ମାଡ଼ାନଡ଼୍କିଙ୍କ୍ ଦଣ୍ଡ ଇଦାନ୍ ସେଙ୍ଗେ ଅଣ୍ଡ୍ ଇଶ୍ୱର୍ତେ ଗଟ୍ ପାଲନ୍ ମାଡ଼ିତନ୍ । ୫ ଆଦିଙ୍କ୍ ମିଡ଼୍ ଶାସନ୍ ମାଡ଼ାନଡ଼୍ୱାଦ୍ କେଞ୍ଜାନାଦ୍ ସାୟେ, ଆସାମ୍ ଇଶ୍ୱର୍ତେ ୱେର୍ରେତ୍ ସେଙ୍ଗେ ଆୟ୍ୟ, ମାତର୍ ନିଜେତ୍ ବିବେକ୍ତାଦ୍ ଦଂସତାଗାଙ୍କ୍ ରକ୍ଷା ପାଏମ୍ ଆଦ୍ଦାନ୍ ସେଙ୍ଗେ ।
୬ ✡ମାତିଉ ୨୨:୨୧; ମାର୍କ ୧୨:୧୭; ଲୁକ ୨୦:୨୫.ଆଦିନ୍ ସେଙ୍ଗେ ମିଡ଼୍ ସିସ୍ତୁ ଇଦୁତିଡ଼୍, ବାତେଙ୍କ୍ଇତ୍କେ ଶାସନ୍ ମାଡ଼ାନଡ଼ି ଦାୟିତ୍ ପାଲନ୍ ମାଡ଼ାନ୍ୱେଲେ ଇଶ୍ୱର୍ତେ ସେବା ମାଡ଼ୁତଡ଼୍ । ୭ ଆଦିଙ୍କ୍ ଅଡ଼୍କିଂଙ୍କ୍ ବାତ୍ ଦର୍କାଡ଼୍ ଆଦ୍ ଇଦୁତିଡ଼୍ । ସିସ୍ତୁ ବା ସିସ୍ତୁ ମିୟାଦ୍ ବାତ୍ ଇଦାନ୍ ମାନ୍ତେ, ଆଦ୍ ଇଦ୍ତିଡ଼୍ ମେଣ୍ଡେ ଅଡ଼୍କିଂଙ୍କ୍ ୱେଡ଼୍କ୍ ମାଡ଼ିତିଡ଼୍ ନୁ ସମ୍ମାନ୍ ତଅତିତିଡ଼୍ ।
ନିଜର୍ନିଜର୍ ଲୋପେ ପ୍ରେମ
୮ ନିଜେତ୍ ନିଜେତ୍ ଲୋପେ ପ୍ରେମ ମାଡ଼ାନାଦ୍ ୱିଡ଼୍ସି ମେଣ୍ଡେ ବାତ୍ ବିଷୟ୍ତାଗ୍ ଉଦାର୍ ଆସ୍ ମାନ୍ମାଟ୍ । ବେନ ମେଣ୍ଡେ ଅର୍ତୁଙ୍କ୍ ପ୍ରେମ ମାଡ଼ିତନ୍, ଅଣ୍ଡ୍ ନିୟମ୍ ପାଲନ୍ ମାଡ଼ିତନ୍ । ୯ “ବେବିଚାର୍ ମାଡ଼୍ମାଟ୍, ନାରୁଡ଼୍କ୍ ଆୱୁକ୍ମାଟ୍, ଡଙ୍ଗ୍ମାଟ୍, ଲୋବ୍ ମାଡ଼୍ମାଟ୍, ମେଣ୍ଡେ ବେନେ ଗଟ୍ ମାନ୍ନ୍ତେ, ଆଦିଙ୍କ୍ ସାର୍ଲେକାମ୍ ଇଦ୍ ବାକ୍ୟତେ ଗାରେତାଦ୍ ଆଦ୍ତେ ମିଡ଼୍ ଗାର୍ରେତଡ଼୍କିଂଙ୍କ୍ ନିଜେତ୍ ନାରୁଡ଼୍ ଇନା ପ୍ରେମ ମାଡ଼ାଟ୍ ।” ୧୦ ମିଡ଼୍ ଅଡ଼୍କିଂଙ୍କ୍ ପ୍ରେମ ମାଡ଼ମାତ୍କେ, ଅଂକିଙ୍କ୍ ବେସୁଟ୍ ଅନ୍ୟାୟ୍ ମାଡ଼୍ମାଟ୍ । ଆଦିଙ୍କ୍ ପ୍ରେମ୍ ମାଡ଼୍କେ କେ ସାର୍ରେ ନିୟମ୍ ପାଲନ୍ ମାଡ଼ାନାଦ୍ ଆଦ୍ତେ ।
୧୧ ଇଞ୍ଜେ ଇୱୁ ସାର୍ରେ ମିକିଂଙ୍କ୍ ମାଡ଼ାନଙ୍କ୍ ଆଦ୍ତେ, ବାତେଙ୍କ୍ଇତ୍କେ ଉସ୍କାଡ଼୍ତାଗାଙ୍କ୍ ତେଦାନାଦ୍ ଦିନାମ୍ ଏୱୁତ୍ତେ । ପରିତ୍ରାଣ ପାଏମ୍ ଆଦାନ୍ ଦିନାମ୍ ମୁନେନ୍କନ୍ସ୍ ଇଞ୍ଜେ ଗାଟି ଗାର୍ରେ ଏୱୁତ୍ତେ । ୧୨ ନାର୍କେ ତେରିୱାଦୁତ୍, ଦିନାମ୍ ଆସଡ଼୍ୱାଦୁତ୍ । ୱାଡ଼ାଟ୍, ନାର୍କେତାଦ୍ ପାଡ଼୍ୟି ସାର୍ରେ ୱିଡ଼୍ସିକାଡ଼୍ ନୁ ୱେସିନାଗ୍ ସାୟେତ୍ ପାଡ଼୍ୟି ମାଡ଼ାନ୍ ସେଙ୍ଗେ ତିଆର୍ ଆଦ୍ତାଡ଼୍ । ୧୩ କାରାପ୍ ବଗ୍ବିଲାସ୍, କାଲ୍ ଉଞ୍ଜ୍ ଅସିମାନ୍ଦାନାଦ୍, ନିତିନିୟମ୍ ମାନେମ୍ ଆୟ୍ୱାଦ୍, କାରାପ୍ ବ୍ୟବହାର୍, ଇର୍ଷା, ଗଲ୍କ୍ ସାର୍ରେତାୱ୍ ମାଡ଼କଟ୍ ୱାଡ଼ାଟ୍, ୱେସିନାଗ୍ ସାୟେତ୍ ପାଡ଼୍ୟି ମାଡ଼ାନ୍ ନାରୁଡ଼୍ ଲେକାମ୍ ବଦ୍ର ଇନା ବ୍ୟବହାର୍ ମାଡ଼ିକାଡ଼୍ । ୧୪ କିନ୍ତୁ ପ୍ରବୁ ଜିସୁ କ୍ରିଷ୍ଟଙ୍କ୍ ଚରିତ୍ର ଲେକାମ୍ ବ୍ୟବହାର୍ ମାଡ଼ାଟ୍, ପାପ ନୁ ମେନ୍ଦୁଲ୍ତେ କାରାପ୍ ଇଚ୍ଛାତିଙ୍କ୍ ପୁରା ମାଡ଼ାନ୍ ସେଙ୍ଗେ ମନ୍ତାଗ୍ ତାଡ଼୍ମାଟ୍ ।