JOHN
Inkhat Changna Chemajia
Chonglamsaat
1 John larik hi tirton John in Jisu Christa inneisuo thengnga kum soomriat li rajakhat suungnga imajia eii. John apumtak in kei imajia eii tiya malarmak takkha hiwa larik arup inkhat khan ama hi Jisu ringkhuo khat-um athi makheiya kahongringnook ngai kamu miring inkhat eii tiya injia (1 Jn 1:1-3). 1 John imajia omchan hi John Dungjuiya Chongkahoi imajia khale innaithei. John Dungjuiya Chongkahoi, 1 John, 2 John khat-um 3 John hi tirton John in Ephesus ah omlai imajia eii tiya inlei.
Hiwa larik hi “Gnostics” inti mi rahooi ngai'n koisuok suungnga minpoongna inleinei pha-ah John in christian rakip ngaisik imajia eii. Hiwa mi rahooi ngai'n Jisu hi Pathian eii takkha taksa li thisen karoon manmasi chu emak hiwa manmasituolla omlai tia ngamna inleinei. Hiwa jarra Jisu ringkhuo kha amit tak-ah kamu John in Jisu kha kakut tak-ak kakatookjei tia amajia (1:1-3). John in hiwa larik amajiana jarchu eini rokna kha huui tungnasik (1:4), ngamna kaneijei mi ngai'n manu inthomaknasik (2:1), ngamna kanei mi ngaikha kadikmak minchuna makheiya sannasik (2:26), halli ngamna kanei mi ngaikha sanminringna kamu ning-ejei tiya minthiarnasik eii (5:13).
Asuungnga kaom Chong
1. John in ama larik hi i-malar le inruoiya amajiana ajar kha-um aminthiar (1:1-4)
2. John in Jisu hi War eii halli eini um Jisu iring ringkhuo angnga niringsik suok tia amajia (1:5–3:10)
3. John in chongpeii, inkhatli inkhat inriangru iti kha naminjet tharna anei (3:11–5:12)
4. Insuona Chong (5:13-21)
1
Ringna Chong
1 Inphutna makheiya eini'n nijetjei, nimit-ah nimujei, eini'n nimujei khat-um nikut-ah nikatookjei ringna Chong jarra eii keini'n nangnidiang kinmajiahi. Jn 1:1
2 Ringna kha inlarjei; eini'n nimujei halli nirillarjei, khat-um Pa Pathian le kaom halli einidiang inlarjei hektik kaboi ringna kha keini'n nangnidiang kinril kha eii. Jn 1:14
3 Keini'n kinmu kinjet ngaikha nangnidiang kinril eii ajarchu nangni um keinile inchun thanasik eii halli eini inchunnahi Pa Pathian khat-um ama sapa Jisu Christa diang eii. 4 Hiwa kinmajiana jarchu eini*eini; manuscript lekkhat achu hintia injia nangni. hoina kha huui mintungnasik eii.
Pathian hi War eii
5 Hiwa chongpui hi eii keini'n Asapa diangnga inphut kinjet halli nangnidiang kinril kha: khachu Pathian hi war eii; halli amadiang iteii kaziing ommak. 6 Eini'n amale kin-inchun nitili kaziingnga niomtit inchu, eini'n maleisei niril halli akadik kha thomakmi. 7 Takkha eini'n warkhan niring inchu, ama'n warkhan i-om keengnga, eini inkhatli inkhat ni-inchun halli Asapa Jisu thisen khan manu rakip makheiya inphut anaminthiang.
8 Eini'n manu roonmung niti inchu, nipum takdiang maleisei nitho halli akadik kha einidiang ommak. 9 Takkha eini manu ngaikha amadiang nirilsuok inchu, ama'n eini manu ngaikha na-ngaidam pisik eii halli kadikmak nichuontho rakip makheiya naminthiangsik eii ajarchu ama hi ngamna kaom khat-um katuun kha eii. 10 Eini'n manu thomung niti inchu ama kha maleisei katho nimin eii halli ama chong kha einidiang ommak.