1 Khale inruoiya Christa'n einisik-ah apumtak-ah napoongpijei, han nangni-um ama malungroonle in-angrip kinnei tia ngaidon inlang ranak songru, ajarchu atu ka-ang in taksa poongna kanei mikha manu ah poong nunijei. 2 Halli atuun makheiya nangni'n ninglaringsik ringkhuo hi Pathian lungduo nuoiya ningring sikjei, khat-um manmasi ngai imanuom ringkhuoa ringnutunjei. 3 Khawale inruoiya nangni'n akatheng ringkhuoa zaatlop ngai'n inthozoot ka-emak omchan, zool-inthai, ju inrui, ka-emak katho, ju inruiya kahoi, khat-um miramil chubei katho ngaihi nangni'n ningthoa aphakha kahunna ningminthengjei. 4 Halli nangni'n inmani kathamak ringna khat-um chuon ka-uoimak khan ning inchelmak jarra inmani'n ngakna innei, halli inmani'n nangnikha narilthaina innei. 5 Akaring khat-um akathi chong katansik insuuk-ah kaom amadiang inmani'n intheinuoa inchuon thomankha Pathian diang inpeluutsik eii. 6 Khawajarra hiwasik bit-ah eii akathiya kaom inmani diang um chongkahoi inleirilpi, han inmani kha mi rakip taksa dungjuiya chong intan angnga inmani um chong intansik eii, takkha inmani'n ratha tiang Pathian angnga inringsik eii.

7 Angrakip aheknasik phakha anaijei. Khawajarra malung insurthei khat-um malung inringchak eru khawakha e-inchu nangni'n Pathian kanimator eningte. 8 Achungnga angrakip ngai neek ah, khatle inkhat malung inthiangnga inriangru, ajarchu minriang in manu angjet amakhu. Chongil 10:12

9 Inkhatli inkhat diang inrilse elekleiya indonthei eru. 10 Pathian silpu katha angnga mi rakip in inlak kutchoi ning imu ngaikha mi ngai sepa katha ah thonasik eii. 11 Atu ka-ang karil mi khan Pathian chongkha rilrase; halli atu ka-ang sepa katho mi khan Pathian in amadiang ipeii ranak khan sepa kha thorase, khale inruoiya angrakip inpaakna kha Jisu Christa diangnga inphut Pathian diang perasu, ajarchu lurna khat-um ranak hi kumsoot ah amata eii. Amen.

12 Minriang kaom ulenai ngai, nangni chungnga madanna poongna kanathei ning intongpui kaalkhan hiwahi nangnidiang suoksik ka-emak kasuok ti inlang ngakmaru. 13 Khawaneek achu Christa poongna kha kindeisuom eii ti-inlang rokna neiru, ama poina juo-inlarni nangnidiang rokna khan asipsik eii. 14 Nangni kha Christa ramingsik beiya innarilthai inchu, rawaam katha kha ning eii, ajarchu Ratha poinale Pathian ratha kha nangnidiang aom. 15 Nangni poongna ningnei khachu, mi kathat, emakli inruup, emakli kathamak angjet katho, emakli achuon eleiya mi ngai chuonna inchelraat enasik emak. 16 Ang ka-ang e-innum, nangni'n Christian ning ejarra ningpoong inchu injakkhai maru, takkha Christa raming ningroon jarra Pathian kha minpaakru.

17 Tichu Pathian kajet insuungkhur rakip diangnga inphut mansakhet chongtan nasik aphakha ajuotung sikjei; halli einidiang inphut masa-inle Pathian chongkahoi hi mi ngaidiang le angkachang omchanna esikme? 18 Chong inthiang in iti angnga,