EPHESIA
Mi-ngaidiang Paul Chemajia
Chonglamsaat
Ephesia mi-ngaidiang Paul chemajia hi Colossia mi ngaidiang chemajia khale apha in-angrip-ah Jisu Christa inneisuo kum soomruk thengnga Paul in ileimajia eii. Kamajiapa hi Paul kei ka-eii tiya amalar (1:1). Colossia larik ah Paul apumtak in donna chong imajia ngaikha Ephesia larik hin insam om-innum kasing kathei katam in Paul imajia eii tiya inzootna innei. Paul imajia larik ejarra Ephesia ramsuungnga kaom koisuok katamlangdiang hiwa larik mintungsik hi ajar eii. Hiwa larik majia laikhan Paul hi mikhumna ah kaom tiya aril (3:1, 4:1, 6:20). Paul in hiwa larik hi Tychicus diang Ephesus koisuok kapha sik-ah ajuona lamma ajuominchoi (6:21-22).
Ephesus hi kalokthei khuopui kha alei-eii halli Asia Minor ramsuungnga kaom Rome ngai khuopuilai kha-um alei-eii. Ephesus hi Greek ngai Pathian juornu Artemis biak-inn omjarra araming kasi khuopui kha alei-eii (Chuon 13:23-31). Ephesus koisuok hi inphutna achu arajung kacheet koisuok kha inlei-eii takkha ahekna achu in-or koisuok kha injuo-eii (Chonglar 2:1-7).
Hiwa larik inphutna makheiya alai katunghin, Pathian in ama mi ngaihi angtho tholi Jisu Christa diang sanminringna apeme tijarra Paul in inthiarra rilcheenna anei. Paul in koisuok hi taksa pum eii halli Christa hi taksa lu kha eii khat-um koisuok hi inhongsak inn kha eii halli Christa hi lukchi miliya inhongsak inn kasur lungpui kha eii tiya minkhina anei. Larik lai makheiya ahekna katung khan Paul in christian ringkhuo khat-um nunchan jarra minchuna anei.
Asuungnga kaom Chong
1. Paul in apumtak jarra inrilsuok le inruoiya Ephesia mi ngaikha donna anei (1:1-2)
2. Hiwa thengnga Paul in koisuok hi Christa le injom eti jarra aril (1:3–3:21)
3. Hiwa thengnga paul in christian ringkhuo jarra aril (4:1–6:20)
4. Insuona chong (6:21-24)
1
1 Pathian lungdou nuoiya Christa Jisu tirton ka eii Paul kei'n,
Ephesia ah*Manuscript lekkhat achu Ephesia ah itihi majiamu. kaom inthiang Pathian mi ngai khat-um Christa Jisu diang huoikajou ah akaom ngaidiang: Chuon 18:19-21; 19:1
2 Nipa Pathian khat-um Pumi Jisu Christa diangnga inphut riangwai khat-um akahoi kadai kha nangnidiang omrase.
Christa diangnga inphut Ratha lamtiang Rawaan
3 Pathian khat-um eini Pumi Jisu Christa Pa ka eii, marwaanna inphut ratha lamma angrakip Christa diangnga inphut rawaan kanapeii ama kha minpaakrui. 4 Ajarchu ama'n manmasituol aboolmaklai amadiang inthiang khat-um kachok omlekleiya ama maikuungnga ami ka-esik ah eini inakadang kha ni-ejei.
Minriang jarra 5 Pathian in ama imanuom khat-um alungdou nuoiya, Jisu Christa diangnga inphut ama sangai enasik-ah, eini inakadang kha ni-ejei. 6 Iminriangkhet Asapa diangnga inphut alurna riangwai kha aman kaboiya einidiang anapeii jarra, eini'n Pathian kha minpaakrui.
7 Ajarchu Christa thisen khan†Christa thisen khan; emakli Christa in inphanna ithi khan. eini inakatan kha eii khachu, eini manu ngaikha inara-ngaidam kha eii. Pathian riangwai kha angtuk akalokme, Col 1:14
8 ama'n einidiang hituk kalok ah inapehi.
Ama lungsing lungwar khat-um ajetna pumpuiya 9 inphuumma kaom ama lungdoukha Christa diang i-ngaidon dungjuiya einidiang anaminjetjei. 10 Apha kha huui hongtung nikhan Pathian in amintungsik khachu, marwaan khat-um nuoipilla kaom ang rakip ngaihi Christa nuoiya inomwiaksik eii.
11 Ang rakip Pathian i-ngaidon khat-um lungdou nuoiya kasuok kha eii; ama lungdou dungjuiya Christa diang ami enasik-ah Pathian in eini nakadangjei, hiwahi inphutna makheiya ama imanuom dungjuiya eii. 12 Christa diang ngamna kaneimasa eini ngaihi ama lurna lianna minpaakrui.
13 Chong kadik khat-um sanminringna chongpui kajetjei, halli amadiang ngamna kaneijei nangni-um amadiang chong inkhitna kha Ratha Inthiang diang jetnabi inadeeng kha ning-ejei. 14 Eini in nichangsik kasuok kha nichangmak laiseng Ratha Inthiang khan sakhi eya na-ngirpi, khawa jarra ama lurna lianna kha minpaakrui.
Minpaakna khat-um Pathian diang Nina
15 Nangni in Pumi Jisu ningngamna khat-um Pathian kajet mi rakip ngaikha ningminriang itihi kajetniya inphut, hiwa jarra, 16 kei'n nangni sik-ah inchat lekleiya Pathian kaminpaak khat-um Pathian diang kananipi. 17 Ajarchu nangni'n ama kha kheella ningjet nasik-ah, Pumi Jisu Christa Pathian ka eii, kalurkhet Pa Pathian in lungsing lungwaar khat-um kamalar mator ratha kha nangnidiang napenasik kei'n inchat lekleiya Pathian diang kani. 18 Ningmalungnga inthiangnga ama'n nangni anakoina jarkha ningjet matornasik, khat-um Pathian kajet ngai changsik hi hituk kalok eii itihi munasik a-um kei'n Pathian diang kani, 19 halli ama ka-ngamnajei eini chungnga ama chuonthohi angtuk kalokme. Khawa ranak kha
20 inliingna ah Christa kha akathi makheiya aminring khat-um marwaanna akut changtiang amin-ong. Minpkla 110:1
21 Christa in marwaan na kaom waikaroon ngai, chuon karoon ngai, ranak ngai, reng ngai chungnga wai aroonjei, halli tuunna khangnga bit emak-ah akahongsik khangnga raming inthang rakip chungnga ama raming in wai roonjei.
22 Halli Pathian in ang rakip ngaihi Christa kenuoiya adajei halli koisuok sik-ah ama kha ang rakip ngai chungnga wai aminroonjei. Minpkla 8:6; Col 1:18
23 Koisuok hi Christa taksapum eii, ang rakip chungnga apum tak-in asipna ama puitungna kha eii.‡ang rakip chungnga apum tak-in asipna; emakli ama chungnga Pathian puitungna khan asip.