3
Moses neek-ah Jisu Alok
1 Pathian in ikoi, Christian ulenai ngai! Pathian ijuotir Thiampu Kaliankhet ningamna-ah nirilsuok Jisu kha eini'n ngaidonru.
2 Pathian innsuung pumpui sik-ah Moses kha achuon katho ngamna kaom angnga ama chuon katho sik-ah kakadangpa Pathian diang Jisu hi ngamna kaom eii. Teelna 12:7
3 Innkasak mi inkhat kha khawa inn kha neek-ah khoya intho angnga, khawa angnga Moses neek-ah Jisu kha kheella khoya thosik rahoi asuok. 4 Inn rakip hi, tu ka-ang mi inkhat in isak eii, takkha angrakip ngai kabool chu Pathian kha eii. 5 Pathian innsuungnga Moses hi suok inkhat eya ngamna kaom alei eii, halli Pathian in nuktiangnga arilsik ngaikha ama'n aleiril. 6 Takkha Sapa khan Pathian innsuung iroon angnga Christa hi ngamna kaom kha eii. Eini ningaidonna khan kacheet-ah inngamna khat-um ni-in-orpuiya ahekna katung nimahuum inchu, eini ama innsuung mi kha ni-ejei.
Pathian Mi ngai Soongmachumna
7 Ajarchu, Ratha Inthiang in iril angnga,
“Awini nangni'n Pathian rasa ningjet inchu,
8 ningpi-ningpu ngai'n Pathian inhalpui angnga, malung minngar maru,
inmani'n khawani neelramma ama kha in-ensin angnga.
9 Khawa khan inmani'n kum soommili kachuontho inmu innum,
kei hi ensuinale enminna innaleinei, Pathian in ati.
10 Khawajarra kei'n khawa mi ngai chungnga karaangnga kati,
‘Inmani'n apha rakip-ah kayana naneimu
halli kei kachongpeii ngaikha juimu.’
11 Kei karaang halli chong-inkhitna inkhat kaneijei:
‘Kei'n inmani diang kapesik soongmachumna ramkhan inmani'n angtikniteii luutkhai marasu!’ ” Minpkla 95:7-11
12 Ulenai ngai, akaring Pathianna inphut nangni tu inkhat nuktiang kirmak nasik, khatuk malung kathamak khat-um kangamnamak nangni karra ommak nasik insingtheiru. 13 Khawa rathuulla, ning karra tu inkhat um manu matheemna khan ningchulmak nasikle malung kangar ninghong emak nasik, “Awini” inti nikhuo hi omlaiseng nangni inkhatli inkhat nisuo-ah insanru. 14 Ajarchu eini'n inphutni makheiya ninngamna kha ahekni katung kacheet-ah ninmahuum tit inchu, eini niraya-ah Christa le tum kachangsuom ngaikha ni-ejei.
15 Chong-inthiang iril kha hi eii:
“Awini nangni'n Pathian rasa ningjet inchu,
ningpi-ningpu ngai'n Pathian inhalpui angnga
malung minngar maru.” Minpkla 95:7,8
16 Pathian rasa kajet-ah ama inhalpui mi ngaikha tu ngaime? Moses in Egypt makheiya iheiruoi inmani rakip ngaikha in-eii. 17 Kum soommili Pathian in iraangpui ngaikha tu ngai khame? Manu inthoa neelramma kathi mi ngaikha in-eii. 18 Pathian in ama chong-inkhitna anei phakhan, “Inmani'n angtikniteii kei'n inmani diang kapesik soongmachumna ram kha hongluut theinunu”—iti kha tu ngai diangnga irilme? Tu ka-ang chongkajuimak ngai diangnga iril eii. Teelna 14:1-35
19 Inmani'n inngamnamu jarra khawa ramkha leiluut matormu, tihi eini'n nimu.