JUDE
Chemajia
Chonglamsaat
Jude larik hi Jude imajia eii. Jude apum tak-in James naipa ka-eii tiya arillar. James hi Jisu naipa ejarra Jude hi-um Jisu naipa eii tiya inlei (1:1). Hiwa larik hi koisuok inkhatdiang imajia be tihi inthiarmak takkha Inzootna Maruo (Old Testament) chong katamtak inchel jarra hiwa larik hi Jihudi ngaidiang imajia ete tia inlei. Kha e-innum Jude larik hi “Pa Pathian in iminriang khat-um Jisu Christa in sansik-ah ikoi” ngaisik-ah imajia eii (Jud 1). Hiwa larik hi Jisu inneisuo kum soomruk pheiweiya imajia eii.
Jude in hiwa larik amajiana jarchu akadikmak ocha ngai'n christian ngaihi lamleiitiang inroimak nasik-ah imajia eii (1:4). Jude in Inzootna Maruo (Old Testament) chong ngaihi aheichoiya halli itizoot chong ngaihi kheella mincheetna anei. Jude larik hi 2 Peter larik khale in-ang atam, akadikmak ocha ngai chungnga chongthak (1:4; 2 Pet. 2:1), hile inruoiya marwaan tirton ngai khat-um Sodom li Gomorrah jarra um injia.
Asuungnga kaom Chong
1. Jude in mansakhet-ah tu ngaidiang imajiame tikha amalar (1:1-2)
2. Jude in akadikmak ocha ngai chungnga chongthakna anei (1:3-4)
3. Jude in Inzootna Maruo (Old Testament) mi ngai khat-um kaleisuok chuon ngaikha aheichoiya minkhina anei (1:5-16)
4. Jude chongthak ngaihi angtho tholi nijui sikme jarra majiana anei (1:17-23)
5. Jude in Pathian minpaak ah minhekna anei (1:24-25)
1
1 Jude, Jisu Christa suok, khat-um James naipa ama'n,
Pathian in ikoijei inmani ngaidiang, Pa Pathian minriangna nuoiya karing khat-um Jisu Christa sanna nuoiya kaom inmani ngaidiang: Matt 13:55; Mk 6:3
2 Inriang, kadai, khat-um minriang hi nangnita erase.
Akadikmak Ocha ngai
3 Minriang kaom kasap ngai, eini rakip in nimusuom sanminringna jarra kei'n nangni diang majia nasik-ah kamalung aluutthei, Pathian in ami ngaidiang apha rakip sik-ah ipejei ngamna kha mathaan maru tihi kei'n nangnidiang majiamak khat-um namasokmak kathamak kha ejei. 4 Ajarchu Pathian kajetmak miring lekkhat in jetlei theileiya eini karra inheiluutjei, inmani'n eini Pathian riangwai chongpui kha aleiitiang inchoiya akadikmak chuontho nasik-ah lam inminchang jei, halli inkhatbit ka-eii eini Karu khat-um Pumi Jisu Christa kha inmani'n zootmu. Inmani'n mangna inmunasik eii tikha Pathianchong khan apha matiang aleirilsuokjei.
5 Hiwa rakip hi nangni'n ningjetjei innum, kei'n woikhat nangnidiang minjet tharritna kinei kha eii, khachu Pumi'n*Pumi; Manuscript lekkhat achu hitia injia Jisu, Greek chongnga injia khale in-ang Joshua. Israel mi ngaikha apha inkhat-ah Egypt ramsuung makheiya aheikatan, takkha ngamna kaneimak mi ngaikha aheikatansuo nuk-ah aminmang. Suok 12:51; Teelna 14:29-30
6 Marwaan tirton ngai'n inmani diang ipeii ranak ngaikha inrakaanna halli inmani omna mun kamathaan ngaikha Pathian in khawa chongtan kalok Nikhuoni sikbit-ah kumsoot sik-ah thirruiya khuop-ah halli aziingna munna khumma ida ejei tikha ngaidonru. 7 Sodom li Gomorrah, khat-um asir apangnga kaom khuopui ngaikha ngaidonru, inmani ngaikha taksa lamma zool-inthai chuon ngaikha inleitho: halli inmani ngaikha kumsoot meikhurra rachaak nakha inmu khawa kha miring rakip diang chongthak eya kasuok kha eii.
8 Hiwale in-angnga, hiwa mi ngai'n akadikmak mangtalar inmu dungjuiya manu intho-ah inpum ngaikha inminchok; inmani'n Pathian wairoon kha zootmu, halli chungtiangnga kalurra kaom inmani ngaikha kase-ah inril. 9 Marwaan tirton ngai karra kalokkhet Michael li Seitan in Moses kaluongkha inlei-inchu phakhan Seitan diang hiwa ka-ang rilsena chongkha rilmak, takkha hin thoa aleiti, “Pumi'n nangkha nazootmak!” 10 Takkha hiwa mi ngai'n injetmak angrakip ngaikha kase-ah inril; halli ramsa ngai'n a-ngaiya in-ijet angnga in-ijet khan inmani ngaikha aminmangsik eii.
11 Inmani sik-ah poongna esik eii! Inmani'n Cain omchankha inleijei. Inmani nemna sik-ah akadikmak Balaam ileitho kha injuijei, inmani'n Korah itho angnga inthojei halli Korah kha inminmang angnga inmani ngaikha minmangjei. Inphut 4:3-8; Teelna 22:1-35; Teelna 16:1-35
12 Nangni ning-inchun suomma bubak nakhan inmani ngaikha injak omlekleiya injuobak-ah bubakna kha akachok inminchang. Inmani sikbit in-ngaidon. Inmani ngaikha thiraang khan wuongpuinarei iwuongpui halli ruochu karuoimak ziingkhum ka-ang kha in-eii. Akara pha-ah kakaramak, arajung inphukjei, acharra akathijei thingkuung ka-ang kha in-eii 13 Inmani jakna kaom chuon ngaikha tuipui phuksaan tuiphuon ka-ang in-eii. Inthonnarei inthon arsi ngai ka-ang kha in-eii. khawa jarra Pathian in inmani sik-ah hektik kaboi inthuukkhet aziingna munkha ahooiya dapijei.
14 Adam makheiya miruol sari huuina Enoch†Sari huuina: Hiwa teelna hi inphutna makheiya insuona Adam makheiya Enoch katung raming sari teelna kha eii. in apha matiang inmani jarra aleirilsuok: “Pumi'n ama inthiang marwaan tirton lising lising ngaile juota Teelna 5:18,21-24
15 mi rakip chungnga chong tansik, halli inmani ngaikha jakna kaom inchuontho khat-um Pathian chungnga karilse manu karoon inmani ngaikha aminmangsik eii!”
16 Hiwa mi ngai'n apha rakip-ah num intia inkhatli inkhat noonkuung inpeii; Inmani taksa manuom kathamak kha injuijei; inmani inpum takkha inminpaak halli inmani nemna sik-ah mileiilaak ngaikha akadikmak lamma inminpaak.
Chongthak li Minchu mindikna
17 Takkha kasap ngai, apha matiangnga eini Pumi Jisu Christa tirton ngai'n nangni diang inleiril ngaikha ngaidonru.
18 Inmani'n nangni diang inleiti, “Ahekna nikhuo ngai aheiwani, nangni kana-innuipuisik, inmani taksa imanuom kajui mipui katamtak inhongsuoksik eii.” 2 Pet 3:3
19 Inmani ngaihi in-eii inkhoithenna kamasuok, Ratha kha inmani diang ommak halli inmani taksa manuom nakhan inmani ngaikha akeiruoi. 20 Takkha kasap ngai nangni chu, inthiang ngamna khan kacheet-ah ngir inlang insoonru. Ratha Inthiang ranak ah Pathian diang niru, 21 Pumi Jisu Christa in ama minriang na jarra hektik kaboi ringna inapeii kha ningngaak le inruoiya Pathian minriang nakhan nangni omchakru.
22 In-ngamsam mi ngaidiang minriang chuonkha thoru; 23 meikhur makheiya mi ngaikha kasut inlang sanru, kachile inruoiya mi leiilaak ngaidiang minriang chuonkha thoru, takkha taksa imanuom manu innootjei inret inruo ngai khachu matirru.
Pathian Minpaakna
24 Naminpur lekleiya kanamin-ngir mator halli kachok omlekleiya khat-um karok le inruoiya ama lurna maikuungnga kanaheiruoi mator— 25 inkhatbit ka-eii Pathian eini Nakatanpa, Jisu Christa eini Pumi diangnga inphut, lurna, lianna, raatna khat-um wairoon kha akatheng khang rakip, tuun, halli kumsoot sik-ah erase! Amen.