1 Sardis koisuok karoon marwaan tirton diang majiaro:

“Pathian ratha sari khat-um arsi sari kamahuum ama diangnga inphut chongpui kha hi-eii. Nangni angme ningtho tikha kei'n kajet; nangni akathi ning-ejei innum, kinlaring iti inpaakna kha nangni diang om tikha kei'n kajet! 2 Intheitru, halli tuun katung ningnei sengkha kha athimaknasik minngartru. Nangni chuontho kha kei Pathian maikuungnga huui latungmak tihi kei'n kajet.

3 Ngaidonru, nangni diang naminchu khat-um ningjet ngaikha juiru halli manu ah inphut ningmalung thuulru. Nangni ning-intheimak inchu, kei'n nangni diang inruup kajuo angnga kajuosik eii, halli nangni angtik pha ah kajuosikme tikha jetnutun. Matt 24:43,44; Luk 12:39,40; Chonglar 16:15

4 Takkha Sardis ah kaom nangni lekkhatchu ningpuon ningdiar ngaikha minchok makchu. Nangni ngaikha kei le puon kabang thoningta ningsi suomsik eii, ajarchu khawa sik-ah rahooi ningsuok.

5 Raal kamator ngaikha inmani itho angnga puondiar kabang inthosik eii, halli kei'n inmani raming ngaikha ringna larik makheiya khainuning. Kapa khat-um ama marwaan tirton ngai maikuungnga kei'n inmani ngaihi kei kami in-eii tikata kamalarsik eii.”” Suok 32:32,33; Minpkla 69:28; Chonglar 20:12; Matt 10:32; Luk 12:8

6 Nangni ningkuor indou inchu, Ratha in koisuok ngaidiang iti ngaikha rangairu!

7 Philadelphia koisuok karoon marwaan tirton diang majiaro:

“Inthiang li akadik ama diangnga inphut chongpui kha hi-eii. David sousung kha amadiang om, ama'n kot akhar pha, tuteii innum malong theinunu, halli ama'n kot amalong pha, tuteii innum khartheinunu. Isa 22:22; Job 12:14

8 Nangni itho kha kei'n kajet; nangni ningranak neem; kha e-innum nangni'n kei minchuna ngaikha ningjui halli keidiang ngamna kacheet-ah ningom tikha kei'n kajet. Kei'n nangni ma-ah tuteii innum inkhar matormaksik kot kha kamalongjei.

9 Rangairu! Seitan mi ka-eii Jihudi chu ka-emak takkha Jihudi kin-eii tia maleisei katho inmani rahooi ngaikha, kei'n nangni kekuungnga chubei katho sik-ah kaheiminwasik eii. Kei'n nangni kanaminriang tihi inmani rakip in injetsik eii. Isa 49:23; 60:14; Isa 43:4

10 Nangni'n kei chongpeii kha ningmahuum le inruoiya ningdei jarra, kei innum nuoipil chungnga kaom miring rakip malung ennasik ah akahongsik poongna makheiya kanasansik eii. 11 Kei innottheiya kajuosik eii. Tuteii innum nangni renglukhu kha nakasut theimaknasik, nangni diangnga kaom kha kacheet-ah mahuumru.

12 Raal kamator inmani ngaikha kei'n ka Pathian Biak-inn khan kachou ngaikha kamin-esik eii, halli inmani'n khawa Biak-inn kha mathaan nunujei. Kei'n inmani chungnga kei Pathian raming kha kamajia sik eii halli kei Pathian khuopui, marwaan makheiya kei Pathian diangnga inphut kajuosik akathar Jerusalem raming kha-um inmani chungnga kamajiasik eii. Inmani chungnga kei raming kathar kha-um kei'n kamajiasik eii.”” Chonglar 21:2; Isa 62:2; 65:15

13 Nangni ningkuor indou inchu, Ratha in koisuok ngaidiang iti ngaikha rangairu!

14 Laodicea koisuok karoon marwaan tirton diang majiaro:

“Ngamna li Akadik sakhi ka-eii Pathian kutbool rakip chungnga wai karoon Amen diangnga inphut chongpui kha hi-eii.”” Chongil 8:22

15 Kei'n nangni ithokha kajet; nangni kadai um emakchu kalum um emakchu tihi kajet. Hiwa inni karra inkhatchu ning-ekha kei'n kamanuom! 16 Nangni kadai um kalum um ning-emak keengnga, kamur makheiya inphut kanaphu suoksik ejei! 17 Nangni'n ningti, “Kei ki-inchong hek; keidiang iteii insam ommak.”” Takkha nangni ngaihi ratongna, minriang kaom, sara ka-eii, mit kacho khat-um puondiar kathomak ning-eii tihi ngaidon makchujei. 18 Kei'n nangni diang nati kate, nangni ning-inchong nasik, kei kadiang makheiya soonna inthiang kha rachoru. Jakpui karuoi ningpum kha-um makhunasik puondiar kabang kha-um rachoru. Ningmit ningkanootli nangni'n ningmu nasik-ah sariak kha-um rachoru.

19 Kiminriang mi ngaikha inthanasik kei'n karan khat-um karachaak. Innottheiya nangni manu ah inphut ningmalung thuulru. Chongil 3:12; Heb 12:6

20 Rangairu! Kei'n kot kuungnga kangirra kot kha karakhoong; tu ka-ang in karasa kha injet-ah kot kha inmalong inchu, kei'n innsuung kha luutkata inmani le kabaksuom sik-eii, halli inmani'n kei le inbak suomsik eii. 21 Raal kamator inmani diang kei'n raal kamatorra tuun kei Kapa reng in-ongna koolla kei'n kin-ong angnga inmani um kei reng-in-ongna munkhan kakoolla in-ongnasik kazootpisik eii.

22 “Nangni ningkuor indou inchu, Ratha in koisuok ngaidiang iti ngaikha rangairu!””