14
Keelngamteii khat-um Ama Mi ngai
1 Hiwa thengnga kei'n kalei-en, khawa phakhan Keelngamteii khan Zion chingbungnga ngirra aleiom; ama le inruoiya kangir mi ngaikha ama raming khat-um Apa raming kha inmachalla injia, miring ngai teelramol khachu lakhkhat le lising soommili leimili (144,000) in-eii. Ezek 9:4; Chonglar 7:3
2 Halli kei'n toongtui tarasa inring khat-um ruo inri rasa inring ka-ang rasa inkhat marwaan makheiya kaleijet. Khawa rasa kha saraangdar kasai ngai'n indai saraangdar rasa kha ang. 3 Miring lakhkhat le lising soommili leimili (144,000) ngai'n reng in-ongna mun, akaring khouring mili, khat-um upa ngai ma-ah inngirra laa kathar kha inleisak, laa kathar kha inmani bit-in inleijet. Inmani ngaihi nuoipil chungnga ikatan ngaibit kha in-eii. 4 Hiwa mi ngaihi numeisa le pum la-inchunmak inthiangnga kaom ngaikha in-eii; inmani ngaihi pum inthiang pasal ngaikha in-eii. Inmani ngai'n Keelngamteii sinarei injui. Manmasi rakip karra ikatan ngaikha in-eii halli Pathian khat-um Keelngamteii diang inpe masa ngaikha in-eii.
5 Inmur makheiya maleisei rilmu; kadikmak iteii thomu. Zeph 3:13
Marwaan Tirton Inthum
6 Hiwa thengnga lairalak ah aleiilaak marwaan tirton inkhat insaangnga wuongnga i-om kha kei'n kaleimu, ama'n hektik kaboi chongkahoi kha nuoipil chungnga kaom miring rakip, phung rakip, chong rakip, khat-um zaat rakip diang rilsik ah achoi. 7 Ama'n rasa inringnga aleiti, “Pathian kha khoya thoru halli ama raatna kha minpaakru! Ajarchu mi rakip chungnga chong tannasik phakha aheitungjei. Marwaan, nuoipil, tuipui, khat-um tuiring rakip ngai kamajir ama kha chubei thoru!”
8 Inni huuina marwaan tirton khan aleiti, “Apurjei! Inthang Babylon kha apurjei! Ama'n mi rakip zool-inthai ithopui ama theibomju kangar khan aminrui!” Isa 21:9; Jer 51:8; Chonglar 18:2
9 Inthum huuina marwaan tirton khan rasa inringnga aleiti, “Ramsa khat-um ama ramil chubei katho halli inkut khat-um inmachalla jetnabi kadeeng inmani ngaikha
10 Pathian in araangna rabing suungnga abunna idajei Pathian theibomju kha in-insik eii! Meikakaang sulfur khan inmani ngaikha inthiang marwaan tirton ngai khat-um Keelngamteii maikuungnga poongna inmusik eii. Isa 51:17; Inphut 19:24; Ezek 38:22
11 Inmani karachaak meikakaang meikhu kha hektik omnuni, ramsa khat-um ama ramil chubei katho emakli ama raming kha jetnabi kadeeng inmani ngaisik suun zaan boiya poongmachum ti omnuni.” Isa 34:10
12 Hiwa koinahi kadei karaat Pathian mi ngai, Pathian chongpe ngai kajui khat-um Jisu diang kangamna inmani ngaisik eii.
13 Hiwa thengnga marwaan makheiya rasa inkhat in ijuoti kha kei'n kaleijet, “Hiwahi majiaro: Tuun makheiya Pumi chuonna akathi inmani ngaikha rawaan katha in-eii!”
“Inthiangnga eii!” tia Ratha khan aleimasang. “Inmani'n inchuon kangar makheiya inphut poong inmachumsik ejei, ajarchu inchuontho khan inmani kha ajuisik ejei.”
Nuoipilchung Rakhoolna
14 Hiwa thengli kei'n kalei-en, khawa phakhan kama-ah suumphai kabang kaleimu, suumphai chungnga in-ong ama kha miring sapa ang, soonna renglukhu kha alu chungnga inkhu halli akut-ah kooiteii ka-ngei inkhat achoi. Dan 7:13
15 Hiwa thengnga aleiilaak marwaan tirton inkhat biak-inn makheiya aheisuok-ah halli suumphai chungnga in-ong amadiang khan rasa inringnga aleiti, “Nang kooiteii kha inliingna inlang rakhooltaro, ajarchu rakhool nasik apha kha aheitungjei; nuoipilchung hi rakhool sik-ah aminjei.” Jo 3:13
16 Suumphai chungnga in-ong ama'n kooiteii kha inliingna ah nuoipilchung kha aleirakhool.
17 Hiwa thengnga marwaanna kaom biak-inn makheiya aleiilaak marwaan tirton inkhat iheisuok kha kei'n kaleimu, ama innum kooiteii ka-ngei inkhat aleichoi.
18 Hiwa thengli mei ka-ensin aleiilaak marwaan tirton inkhat maichaam inn makheiya iheisuok kha kei'n kaleimu. Ama'n kooiteii ka-ngei kachoi marwaan tirton diang rasa inringnga aleiti, “Nang kooiteii kha inliingnataro, halli nuoipil chungnga kaom theibomkuung makheiya theibomkara ngaikha rakhooltaro, ajarchu theibomkara ngaikha inminjei!” 19 Khawa jarra marwaan tirton khan ama kooiteii kha nuoipil chungnga alei-inliingna, theibomkuung makheiya theibomkara ngaikha aleirakhool, halli theibomkara ngaikha Pathian raangna theibomtui soomna khan aleideengluut.
20 Theibomkara ngaikha khuopui raaltiang kaom theibomtui soomna khan inleisoom, halli thisen kha tuipui kalian angnga theibomtui soomna makheiya aleisuok-ah kilometer rajathum (300 km) kalaak halli feet kuruk inthuuk-ah aleiluong. Isa 63:3; Ruoithi 1:15; Chonglar 19:15