TITUS
Diang Paul Chemajia
Chonglamsaat
Titus chemajia hi Paul in koisuok diang ka-emak miring diang imajia chemajia mili ngai karra chemajia inkhat kha eii. Chemajia inthum ngai khachu 1 Timothy, 2 Timothy khat-um Philemon kha in-eii. Hiwa Chemajia hi Titus diang imajia eii takkha mipui diang-um inringnga teelro tia majiana anei. Hiwa Chemajia hin Paul hi tirton eii tiya Titus in leijetjeite. Hiwa chemajia hi Paul in Jisu Christa inneisuo thengnga kum soomruk leithum li soomruk leira-nga kongkarra imajia eii.
Paul in Titus diang tuiramma kaom Crete ramsuungnga kaom koisuok ngaikha katha-ah keiruoiro tiya minchu mindikna anei. Paul in Titus diang chemajia hi amajiana jarchu Titus in koisuok karoonsik ngaikha katha-ah akadang li aminchunasik jarra eii. Hiwale in-ang minchu mindikna ngaihi Paul in Timothy diang imajia chemajia khannum amajia. Paul in hiwa chemajia hin koisuok karoon ngaikha pham kalok in-eii tia amajia. Tuun tuunna koisuok khat-um koisuok karoon ngai-um hiwa chemajia hinna injia inmani thosik chuon khat-um nunchan ngaihi katha-ah injetsik arei eii tiya majiana anei.
Asuungnga kaom Chong
1. Paul in Titus diang koisuok karoonsik ngaikha Pathian kajet mi kadangro tia minchu mindikna anei (1:1-16)
2. Hiwa thengnga Paul in Titus diang mi ngai kha-um Pathian jetnasik jarra katha-ah minchu mindikro tia majiana anei (2:1–3:11)
3. Paul Chongminsuona (3:12-15)
1
1 Paul, Pathian suok ka-eii khat-um Jisu Christa tirton um ka-eii.
Pathian ikadang mi ngai ngamna kha kasansik khat-um eini biaklam in iminchu akadik khan inmani kakeiruoi sik-ah kei hi inakadang khat-um inatir kha eii. 2 Khawa khachu hektik kaboi ngamna ringkhuo jarra eii. Maleisei karilmak Pathian khan hiwa ringkhuo hi kanapesik eii tia manmasituol abool ma-ah chong inkhitna aneijei, 3 halli tuun ama'n imadan apha takkha heitung dungjuiya ama chongkha amalarra kei kutchungnga anapeii, halli eini Nakatanpa Pathian chongpeii nuoiya kei'n karil.
4 Eini le ngamna in-ang kasapa tak ka-eii Titus diang kei'n kimajia eii.
Pa Pathian khat-um eini Nakatanpa Christa Jisu in riangwai khat-um kadai kha innapeii erase. 2 Cor 8:23; Gal 2:3; 2 Tim 4:10
Crete tuiramma Titus Chuontho
5 Kei'n nang kha tuiramma kaom Crete ah kanada, kanadana jarchu thosik kalaom chuon ngaikha amason kaomma naminhek nasik khat-um khuopui rakip-ah koisuok karoonsik upa ngaikha nabeii nasik kinada eii. Kei chongpeii ngaikha ngaidonro.
6 Koisuok karoonsik upa kha noonkuung kaboi mi esik eii; numei inkhatbit kanei mi esik eii,*numei inkhatbit kanei; emakli inn woikhatbit kanei. halli ama sangai kha Pathian kajet in-esik eii, lamkathuoi khat-um chongkajuimak sangai in-eii tia inril mi khan etheinuni. 1 Tim 3:2-7
7 Koisuok karoon upa kha Pathian chuon kathosik mi ejarra, ama kha noonkuung kaboi mi esik eii. Ama kha in-or emakli karaang innot echamak, ju inrui emakli miringkhat chungnga kut kamachun emakli sial kamanuom mi etheinuni. 8 Ama kha mi ngai kadonthei khat-um akatha kamanuom mi esik eii. Apum insur mator, kadik katho, inthiang khat-um nunchan katuun mi esik eii. 9 Ngamna kaom chongpui khat-um Pathian chong le injom chong ngaikha kacheet-ah amahuumsik eii. Hiwa lamma ama khan akadik minchuna khan mi ngaikha masok matorte halli akadik kazootmak mi ngaidiang nangni itho ngaikha dikmak tia minmu matorte.
10 Ajarchu akadik kazootmak mi katamtak inom, khawa ngai khachu aru ekhet-ah Judaism makheiya malung kaheithuul inmani ngai'n aleiilaak mi ngaidiang maleisei khat-um chongriam inril. 11 Inmani ngaikha chong minril maksik hi arei eii, ajarchu inmani ngai'n minchusik ka-emak ngaikha inminchu halli insuungkhur pumpui kha inminhaang, khawa ngai rakip kha jakna kaom inmani nemnasik sial loutheina kha inmin-eii. 12 Apumtak Crete mi ka-eii Pathian chongkachoi inkhat in aleiti: “Crete mi ngaihi maleisei kathobit kha in-eii, chikaom ramsa ngaikha in-eii, akatan khat-um mahaam kalian mi ngaikha in eii.” 13 Hiwa sakhi hi adik, hiwa jarra nang in inmani ngaikha akadik ngamna kha inmunasik-ah kana tak-ah narakooksik eii, 14 khawa nirakook khan inmani ngaikha Jihudi ngai thiming khat-um akadik kazootmak ngai'n inbool sinadan ngaikha inmathaansik eii. 15 Inthiang mi ngai diangchu angrakip inthiang; takkha inthiangmak khat-um ngamna kaneimak mi ngai diangchu angrakip achok. Ajarchu inmani kase katha jetna khat-um ngaidonna ngai kha-um achokjei. 16 Inmani ngai'n Pathian kinjet inti, takkha inchuon thokhan zootmak. Inmani ngaikha matir kaom khat-um chong kajuimak in insip, akatha kathosik-ah iteii rahoi emu.