1 Ʊpyu ʊnʊng, Iyesu ni bi idɔɔ ubyen Ʊnʊng asu mɛr orokru asu tanamo iring ididima, ogu ubyen Ʊnʊng adarha avʊwa ʊmɛr ogro Imusa kǝni ɔrɔkɔng ka ba owroo. 2 Aka sani ngɛ ni, “Tana arʊ akina edei igumoyo ʊni iyoo imusa ʊring men? Iyaa minw ikrʊ yen?” 3 Okɔ yoro mo ni, “Imye ma Ini gyurhony kam inyi tanami 4 Ibaptisma Iyohana ikuni baa yaya wɔ, ki baa ɔwroo orokru?”

5 Ekǝ tere asu pya onuo ni ʊkamɔ ka sani, “Arʊ ba sani, ‘Ba ayaya,’ anu sani, ‘Ikisi inyi no yoronyi ni ngɛ?’ 6 Yip arʊ ba yoro asani, ‘Ikuni baa ɔwroo orokru,’ kukum ɛkǝri orokru nʊ ta arʊ ni atari ɛpyerhe. Kii oyori ngɛ asani Iyohana ni arʊ pɛrɛ onuo Ʊnʊng ngɛ.”

7 Okɔ yoro ngɛ asani “Arʊ ne kperhimo ikuni baa ube wo.”

8 Iyesu ka sa nɔmɔni, “Imyɛ kam ina tanamo nyi, arʊ sini amim ikrʊ ʊsa ʊring men.”

9 Ikpara dang Iyesu ko suno ngɛ ni ʊtana orokru ushosho wen, “Opyo arʊ puri inabi aka ma opyo arʊ ʊta ɛkǝri abya ka kyaa okyoro ki opyo apya kikǝkarha ekǝ dɛrhɛ ngɛ. 10 Sini akywa ʊkana fwa aka tuma agara ngɛ kya owro arʊ sini amimo abya ʊta, akya ayirha ngɛ osumo inabi sini akani.Yip ɛkǝri arʊ sini ayirhi orumo ʊta aka kraa ɛkǝri agara ɛyɛri ngɛ avu akʊrʊ. 11 Ekǝ jo tuma opyoo agara ngɛ, aka kraa amaa ʊwaa, ayeri ngɛ avu akʊrʊ. 12 Aka tuma ʊmang ataru ngɛ aka saa onuru ɛfɛn ngɛ ke esing.

13 “Ekpara dang ɔkɔrɔ ɛkǝri abya, ka sani, ‘Ikimo ini sa nɛchiyɛn? Ini tuma ɔnɔm sini ipri ni ʊwaa ngɛ, oboroo anushe maa imimoru ngɛ.’

14 “Yip akywa sini erie, aka sani opyomo ni. ‘Ekǝri ɔnɔ ɔkɔrɔ ari orumo we, inyi ba arʊ pɛrɛ ngɛ, aki abya shoo amaru.’ 15 Aka kraa ɛfɛn ngɛ bi esing kǝ pɛrɛ ngɛ.

“Ikimɔyoɔ nɛchiyɛn ɔkɔrɔ ɛkǝri abya nʊsa ni ɔmɔ? 16 Eyeba ebe epyerhe ɛkǝri arʊ sini amimo abya ʊta ama opyo arʊ ɛkǝri abya.”

Sini orokru kung ʊring men, akani, “Ʊnʊng sa ibe kya shoo kǝna!”

17 Iyesu ko komo ikra ka sani,“Nɛchiyɛn ikimoyo ini imisini ɔwori bi idɔɔ iring Ʊnʊng asani:

19 Avʊwa ʊmɛr ogro kǝni ogu ubyen Ʊnʊng, kawaa apara sini anu kpin Iyesu ngɛ ba kywakywaa, kii ekperhi asani atani ushosho wen bi ikywimowo.Yip aka kung irung orokru.

20 Akasu yara ngɛ asu waa apara sini anu kpin ngɛ ni ʊya aka tuma opyoo orokru aki oyovuno nge kǝni imɔ ni arʊ ʊbrʊbrʊmɔ ni. Akʊ tiri ikwyi imɔ nʊ kpin ngɛ ni iririma sini ɛpɛri, aki imɔ naa ngɛ bavu ari igumo Iroma. 21 Ɛkǝri arʊ sini atumimɔ ko gyurho Iyesu ngɛ asani “Avuwa, arʊ kpɛrhi ngɛ asani ʊringnwʊ kǝni ʊmɛrgnwʊ ʊbrʊbrʊwɔɔ. Une pyerhe ite ararʊ, use mɛr ʊtira Ʊnʊng nɛmɛr kǝni ushoyo ni. 22 Ini idima arʊ kpura ikaisar ngɛ ʊfɛ ogon kii isayo nɛmɛr?”

23 Iyesu kperhi ʊwɔrɔfomo ngɛ wo aka sani mo ni, 24 “Yen mi ikiri ʊfɛ. Uwurowu iyang wɔ ʊni ba yaa adarha ɔwɔri ni ikin?”

Oko yoro ngɛ ni, “Imi Ikaisar”.

25 Aka sani omo ni, “Nyi ma Ikaisar ngɛ ima sini ini mi Ikaisar, ama Ʊnʊng ngɛ ima sini ini mi Ʊnʊng.”

26 Akana bramo ʊkpin ngɛ bekai iring ye bite orokru, ekǝ jijire sini oyori mo ka sa na kprukpring.

27 Akywa dang opyo arʊ sini ayirhimo ni Asadukiya (arʊ sini ono yoromo ni ʊshinɛ arʊ sini okpuimo), aka ba ɔwroo Iyesu ko gyurho ngɛ asani.

28 “Avuwa, Imusa wori arʊ bi idɔɔ ogro asani, arupya orokru bo kpoo eshere eree asamo ni ɔnɔ ngɛ, itɔɔyo arupya nʊ lorho ubara ɛkǝri erere okro ebyere ɔnɔ bi ʊka arupya. 29 Nɛchiyɛn opyo arʊpya nuwo ani etensara, ɔrɔkɔng mɔ ko lorho ubara ngɛ ko kpoo asaa ni ɔnɔ ngɛ. 30 Arʊ ʊmang pari ko lorho ubara ngɛ ko kpoo baa ʊkyepen ɔnɔ kaa. 31 Kǝnawo arʊman taru ngɛ ko lorhi ubara ngɛ. Ima iying dang kukum mo ere tensara dang olorho ubara ɛkǝri erere okpomo ekɛne penmo ɔnɔ. 32 Bakurha ngɛ kukum ɛkǝri erere ko kpoo kaa. 33 Ʊnʊng ʊshinɛ eyesing kǝni sini arʊ pya etensara dang olorho ubara ngɛ anu shoo ere iyaa bi idɔɔmo?”

34 Iyesu ko yoro, “Orokru ipyoo yen ku lorhi ubara asu ma ibara. 35 Yip ɛrɛrimɛ kǝni erere arʊ sini amaa ʊshinɛ bi ukpo akiki be ipyoo ukyeba ana su lorhomo ubara anasu mamɔ ubara. 36 Anasu jo kpomo kii ani kǝni atina Ʊnʊng ni. Ani ɔnɔ Ʊnʊng mo, bekai sini ani ɔnɔ ʊshinɛ bai idɔɔ ukpowo. 37 Yip bidɔɔ ushosho ʊpya orumo, Imusa yen napʊpʊrhi asani arʊ sini okpuimo anu shinɛ, kii ayirhi ɛkǝri Ete ngɛ ni, ‘Ʊnʊng Ibraim, Ʊnʊng Ishaku, adarhi Ʊnʊng Iyakubu.’†20:37 Uku 3:6 38 Asaa Ʊnʊng arʊ sini okpomo, yip ani Ʊnʊng arʊ sini ani akrʊmɔ, kii bekai ngɛ wɔ kukum ni akrʊ.”

39 Opyo avʊwa ʊmɛr ogro Imusa ka sani “Avʊwa ʊpɛrɛ ne mɛr!” 40 Aka samɔ ni ikywi sini anu jo gyurho ngɛ ipyoo ima ngɛ.

41 Iyesu ko gyurhomo asani, “Ikisi orokru yirhi Ikristi ngɛ ni ɔnɔ Idouda? 42 Ekǝri Idouda kaa wori bidɔɔ ʊyaa ʊsha ete uber:

45 Sini orokru kukum aku kung Iyesu ngɛ, akasani ɔnɔ ʊmɛr ngɛ ni, 46 “Inyi sa noshong ni avʊwa ʊmɛr ogro Imusa men. Ese waa ukyeng kǝri nʊ ʊgbe ʊgbʊgbang ɛwɛi orokru fomo ngɛ bi idɔɔ Ize, awaa uwro kikii ɔmɔmɔrʊ bi owro utuno Ayaudiya kǝni owro ipara. 47 Ɔmɔmɔ ani arʊ ra ni ina ere ukpo. Ʊwaa uyen ʊkamɔ okong otuturo ngɛ bo owro ʊsɔrhɔ Ʊnʊng. Ɔmɔmɔ anu yirha igara irɛ.”