3
Yone Hano Toliyetisene Senayewi Kote Solo Walo Seyawa Wekeye
Ma:tiu 3:1-12; Make 1:1-8; Yone 1:19-28
1 Puwano Lome sena ili pisei sena Taipiliasi Sisa ewamo enene. Ikila ewa ili pisei sena yapene papoipe tepela: sikape emi Kote E sowa Yone e salo mina. Aputa: ikila emi Ponitiase Pailete amoke pisei sena Yutia ili pisei enene. Aputa: ikila emiwa Kalili peleya: emiwa Helote ene pisei kolotea epela: enene. Aputa: Itulia peleya: alapulu, Takonitisi peleya: alapulu Heloteyewi e ma:e Filipiyewi pisei kolotea epela: potapola: enene. Aputa: ikila emiwa A:pilini peleya:wane Laiseniaseyewi pisei kolotea epela: potapola: enene. 2 Aputa: ikila emiwa Anase Kaiafase elipei amoke pilisiti pisei sena wa:pa:se sita: enene. Ikila emiwa Sekalaiya e sa:le Yone, peleya: senanama emi, Kote E sowa Yone E salo mina. 3 Aputa: Yone ewa hano Yota:ne hema emi sisa:nene Kote solo se tiye kina:sela: enene. Eye au seya, “Ke matana olokeyatela iya:pela: notoloyetipela: inapola: hano toliyeti. Alusaleke:, Koteyawa ke olokeyatelawa itapa tepesa.” 4 Puwano solo sepapo weyamowa sepatosene sena Aisaia eyewi pukawemi momateyawa weyamo,
“Sena nowamoke peleya: senanama emi hola:sela: ene,
‘Sosolo mina:na:wane isu selipa:.
E isuwa koakena elapetawa hekepa:.
5 Kokeya sopoke peleya:wa selalesa: feyetiyepe.
Fapolo tokomo koloteawalapulu sosowalapulu sopoke hotolose fela apola:pa:.
Isu koakena elapitewa isu hekeya napolo tepesa.
Isu etewa apula: nano ketea noka elapitewane Kote Eyewi papaya tepesakeye.
6 Sena kesale peleya: sopoke potakamake
Kote Eyewi sena kesale olokeyatela sita:newa mene tiyaposakeye.’ ” *Isa 40:3-5
7 Alanase, Yone eyewi sena kesale iwa ine tese hano toloyetima:na: matanase mina, eye ima selese, “Kiwa heseke salakeye! Koteyawa kiwa sopoke konomonose falasipesakeye. Kimawa eta: seyala? 8 Kiyawa fo napolo helepa: amokiyawa kiwa heneye matana notoya walopesakeye. Alanase, kiyawa ma au selapesakeye, ‘Niwa Epalahame e sa:le, alanase, Kote Eyawa niwa mafalasi epesa.’ Alamakeye, Neye kima selakeye, Kote Eyawa etewa epa eleyetipela: Epalahame e sa:le tepesa. 9 Kapiwa i mouwemi tuwapolo elakeye. Alanase, i sopoke fo napo mahelesaleke amowa kene tiyapola: tei wa:lawemi sotukepilaposakeye.”
10 Yoneyewi au selapita:, sena kesale sopoke ema mene ta:potese selese, “Alanase, niyawa ko:lu timinima:na:napa?”
11 Aputa:, eyewi ima mene selese, “Sena eta:wiye setiwa elipei elaleke nowa tiyapola: sena itapama kina:pa:. Sena eta:wiye eyawa ma:na: elaleke, sena itapama sakopa:.
12 Takese tisene sena noka Yone salo inapola: hano toliyetimita: minakeye. Aputa: iyewi ema ta:potose, “Walosene sena, niyawa ko:lu timinima:na:napa?”
13 Aputa: eye ima selese, “Kiyawa sena kesale moweniwa wa:ke me palesekiwa tiyapa. Kamani senayewi kima sela kamunuse tiya:pa:.”
14 Aputa:, Ami sena nokamoke Yonema ta:potose sela:sela: enene, “Niyawa ko:lu timinima:na:napa? Apula: eyewi ima mene selese, “Kiyawa nowamo moweniwa mokopo tinenisekiwa tiyapa. Kiyawa sena nowa mokopo timiyamawa selapa. Kiyawa seli epelesa: kili tima:na: ti moweniwa tikeye.”
15 Ikila emiwa, sena kesale sopoke, Keleso mina:na: amo yesipela: sita:ne. Aputa: sena kesale ili himu fa:nemi matana penaiya tesi tiyapola:. Iwa sopoke matanawa kalikali esa: matanawa ilima aluse, “Amowa Yone ewa Kelesowa?” 16 Aputa: Yoneyewi ima sopoke selese, “Neyawa kiwa sopoke mokopo hano toliyetiyakeye. Alawamona, Sena Ewa opola Ewamoke opola niwa me helepe inaposakeye. Alanase, newa ununamanase, E tima:na: tisene senawamuna tese E tamaka kalawa neyawa eta: ka:ma:na: telamakeye. Eyawa kiwa sopoke Ho Napowalapulu tei wa:lawalapulu toliyetiyaposakeye. 17 Solo semetei weyamowa pale seya solo selakeye. Sena Sosolo inisekiwa, Eyawa sipiti epapula foke tiye inaposakeye. Tiye inisekiwa peleya: pakia witi e sa:le tuwapo fokeyewi paseyalapepela: witi henewa seli sululupoiyawa amowa tiyalapepela: E koanewemi tuwataposakeye. Witi tapo alopoyewi tiyapola: ha:na: nokemi sululupolusaleke amowa tiyapola: tei wa:la eta: sekakolosema emi kilipesakeye. 18 Aluse, Yoneyewi solo se tiye mi aluse, solo nowanapulu se tiye kine, wa:ke me se tiye kine, wa:ke me se tiye kine, aluse Yoneyewi Kote E solo napolo eyewi sena kesalema solo se tiye mikeye. Iyewi seli ta:tapola: matanemita: se tiye mikeye.
19 Aputa: Heloteyewi Kalili peleya:wemi potapola: ene ikila emiwa, e mae Filipiyewi e kesale, Helotiase ewa, Heloteyewi o:sulu tiyapola: enene. Yoneyewi nano olokeyatela sopoke tiyapita:, potapola:, Eyewi konomonose selese, “Kewa olokeyatelalapo. Apowo, e seya.” 20 Aputa: Heloteyewi ene puwano olokeyatela timiya, kamunuse wa:ke wala me timinipita: Yone ewa tipolo selawapo.
Yesuwa Hano Toliyetikeye
Ma:tiu 3:13-17; Make 1:9-11; Yone 1:29-34
21 Sena kesale sopoke hano toliyetiya:sela: elapita:. Aputa: Yesu Ewala hano toliyeti. Ewa hano toliyetipela: Yesuyewi Kotema kulukulula:sela: enewanapulu hepene isuwa kola:pe. 22 Aputa: hepene isuwa kola:tapita: potapola: Ho Napowa E salowemi a:nema: tumu epapula sinapita: papo. Aputa: Kote E sowa hepene falemi Yesuma selese, “Kewa Ni Sa:keye. Kewa matana sosolo telakeye apula: epeya ilima telakeye.”
Yesu E Mei Senawa Wekeye
Ma:tiu 1:1-17
23 Ikila emiwa, Yesu Ewa yapene talo usulupe tepela: emi ma:ta: tiye E tima:na: tiye hapakeye.
Sena kesale sopoyawa Yesuwa Yosepe e Sa:keye e seyakeye.
Aputa: Yosepe ewa Ilai e sa:keye.
24 Ilai ewa Matate e sa:keye.
Matate ewa Lifai e sa:keye.
Lifai ewa Meleki e sa:keye.
Meleki ewa Yonai e sa:keye.
Yonai ewa Yosepe e sa:keye.
25 Yosepe ewa Matatiase e sa:keye.
Matatiase ewa Emose e sa:keye.
Emose ewa Nehume e sa:keye.
Nehume ewa Hesili e sa:keye.
Hesili ewa Nakai e sa:keye.
26 Nakai ewa Ma:tane e sa:keye.
Ma:tane ewa Matatiase e sa:keye.
Matatiase ewa Semeine e sa:keye.
Semeine ewa Yoseke e sa:keye.
Yoseke ewa Yota e sa:keye.
27 Yota ewa Yoanane e sa:keye.
Yoanane ewa Lesa e sa:keye.
Lesa ewa Selapapeo e sa:keye.
Salapapeo ewa Siatio e sa:keye.
Siatio ewa Neli e sa:keye.
28 Neli ewa Meleki e sa:keye.
Meleki ewa Ati e sa:keye.
Ati ewa Kosame e sa:keye.
Kosame ewa Elematame e sa:keye.
Elematame ewa Eli e sa:keye.
29 Eli ewa Yo:sua e sa:keye.
Yo:sua ewa Eliesa e sa:keye.
Eliesa ewa Yolime e sa:keye.
Yolime ewa Matati e sa:keye.
Matati ewa Lifai e sa:keye.
30 Lifai ewa Simione e sa:keye.
Simione ewa Yuta e sa:keye.
Yuta ewa Yosepe e sa:keye.
Yosepe ewa Yoname e sa:keye.
Yoname ewa Elaiyakime e sa:keye.
31 Elaiyakime ewa Melea e sa:keye.
Melea ewa Mena e sa:keye.
Mena ewa Matata e sa:keye.
Matata ewa Netane e sa:keye.
Netane ewa Tepiti e sa:keye.
32 Tepiti ewa Yesi e sa:keye.
Yesi ewa Opete e sa:keye.
Opete ewa Poase e sa:keye.
Poase ewa Salamone e sa:keye.
Salamone ewa Na:sione e sa:keye.
33 Na:sione ewa Aminatape e sa:keye.
Aminatape ewa Atimine e sa:keye.
Atimine ewa Lame e sa:keye.
Lame ewa Hesilone e sa:keye.
Hesilone ewa Pelese e sa:keye.
Pelese ewa Yuta e sa:keye.
34 Yuta ewa Yakope e sa:keye.
Yakope ewa Aisake e sa:keye.
Aisake ewa Epelehame e sa:keye.
Epelehame ewa Tela e sa:keye.
Tela ewa Nehole e sa:keye.
35 Nehole ewa Seluke e sa:keye.
Seluke ewa Leu e sa:keye.
Leu ewa Peleke e sa:keye.
Peleke ewa Hipelo e sa:keye.
Hipelo ewa Sela e sa:keye.
36 Sela ewa Keinane e sa:keye.
Keinane ewa Afasate e sa:keye.
Afasate ewa Seme e sa:keye.
Seme ewa Noa e sa:keye.
Noa ewa Lameke e sa:keye.
37 Lameke ewa Metusala e sa:keye.
Metusela ewa Inoke e sa:keye.
Inoke ewa Ya:lete e sa:keye.
Ya:lete ewa Mahalaleli e sa:keye.
Mahalaleli ewa Keinane e sa:keye.
38 Keinane ewa Ino:se e sa:keye.
Ino:se ewa Sete e sa:keye.
Sete ewa Atame e sa:keye.
Atame ewa Kote e sa:keye.