2 Korintus
Horok Lirna La'an
Paulus namwali ri dedesne man loikaru Lira Wawa'an laa manin kota Korintus (HN. 18:1-17). Paulus laa Korintus wakuku manin Korintus nanumene namhara laa onno namehin. Lere Paulus aile noho namehin, manin Korintus heruwali ra'okuledi Paulus noro nin molollo, de hi ra'aheni ai ka namwali Makromod Yesus Nin hophopon ma namlolo. Ende Paulus hopon nin man howok wali Titus laa Korintus. Titus nodi Paulus lirna man apinha rodi nounaku manin Korintus ma na'okuledi nin molollo me'e. Lere Titus wali mai nano Korintus pakromo noro Paulus lolo Makedonia, an konohi Paulus nahenia ri Kristen lolo Korintus nammori herredi rir honorok panaeku ma ka namlolo de ka ra'okul Paulus nin molollo me'e, maa hi rapanak an'anhedi leke Paulus lan ka'arala hi wali'ur. Enimaa ri Kristen heruwali akin kerhe. Kade hir derne Paulus nin nounaku, maa hi ramhene derne rakani Paulus nin molollo.
Titus mai Paulus wakunu wanakunu onne mene Paulus hi'i horok eniyeni man rin wekel horok rewro'o nine man Paulus aku laa kerei raramne ma aile Korintus.
Lolo horok eniyeni an konohi hi'ihehewi an loikaru Lira Wawa'an lolo noho nammori (2:14-6:10). An wakunu nahenia ai naramyak hi rehirehi (6:11-13; 7:2-4, 13-16), la ai na'aheni ai akin nahuwa'anedi ono derne nahenia hir herredi rir honorok panaeku ma ka namlolo la wali wali'ur derne rakani nin molollo me'e (7:5-13).
Onne horu, ai napanak hir puli kupan leke lere an rakan rir kote, kupan ra'akenedi leke rodi laa ri Kristen ma na'alehe naulinu man minle noho Yudea (pnk. 8-9). Lolo horok honon, ai nodi lira apinha wali'ur nounaku ri ma kan derne rakani ai makun enihe (pnk. 10-13).
Horok Ihin
1. Paulus nala lira man hari horok la konohi hi'ihehewi Makromod Lalap na'alap ik akin lere ik lernala wewerek pananaka (1:1-11).
2. Paulus konohi hi'ihehewi an herredi nin panaeku laa ka'ar hi, an konohi nin honowok loikaru Makromod Lalap Lirna Wawa'an eni, la napanak hi herredi rir honorok panaeku ma ka namlolo leke rahuwa'an wali'ur noro ai (1:12-7:16).
3. An wakunu panaeku puli kupan aku laa ri ma na'alehe haida-haida lolo noho Yudea (pnk. 8-9).
4. Paulus wakunu panaeku ma na'ono hi'ihepe ai namwali Makromod Yesus Nin hophopon ma namlolo, laa an nounaku wali'ur ri ma na'okuledi nin molollo (10:1-13:10).
5. Paulus nala tape masi man horu (13:11-13).
1
Paulus nala nina hiyene arore laa manin Korintus
1 Konohiyala kerei raramne ma aile Korintus noro idewe Makromod Lalap Nin ri mememen ma aile nohorai Akhaya na'ahoruwedi! Ya'u eni Paulus. Makromod Lalap kikan ya amwali hophopon ma nodi Kristus Yesus Lirna Wawa'an lernohi Nina honorok panaeku aimehi. Yo oro ik walin Timotius aku horok eni maiyala ki mi.
2 Ai mapanak Makromod Lalap ma namwali iknik Ame, noro ik Makromod Yesus Kristus na'amoli rala rere'e haharu noro wawa'an rara'e ki mi.
Makromod Lalap namkene na'alapa ika ma akin naili'il Ai
3 Ka'uli kasa'a Makromod Lalap, ik Makromod Yesus Kristus Aman. Mai ka'uli kasa'a Ai ono Ai penia ik Amad ma namkene kukul Nina aki man wa'an maika, la ik Makromod Lalap ma namkene na'alapa ik akin mamani. 4 Lolo ainima sus wo'ira, Ai na'alapa ai akim mamani, leke ai maruri ma'alapa ri namehin akin lolo hirira wewerek pananaka haenhi. 5 Memen, naisa Kristus lernaledi apinpinha mamani, am lernala mamani haenhi, maa Makromod Lalap na'alapa ai akim nammori rehi haenhi, ono ai moro Kristus mamwali mahaku. 6 Ende lere am lernala wewerek pananaka, Makromod Lalap nair wewerek pananaka onne leke ai mauroin hi'ihehewi leke ma'aruri ma'alapa mi akim la paku mi lernala or'ori dardari. Lere Makromod Lalap na'alap ai akim, onne na'alap mi akim haenhi ono mi mauroinedi An paku mayai lolo ainim wewerek pananaka onne. Enpenia mi akim namkene kerhu apinpinha naise mayai haenhi. 7 Enla ai mauroinedi mim kerhu lolo minim wewerek pananaka wo'ira, ono ai mauroin nahenia lere mim lernala apinpinha naisa mayai, Makromod Lalap lo'o na'alapa mi akim naise mayai haenhi.
8 Ai walin na'ahoru, ai raram nodi mi mauroin nahenia am lernala wewerek pananaka nammori lolo propinsi Asia. Wewerek pananaka am lernanala onne werek wake'e, penia ai mauroin nahenia lo'o am maki me'e, ono ai ka maruri kerhu me'e. 9 Namlolo kokkoo, am pene'ek ka nalo'ol am maki me'e, maa onne na'akeme namwali leke yono am pu'ik ainima ruri aimehi, maa pu'ik mehe Makromod Lalap ma nodi molollo na'amori ri man makiyedi me'e. 10 Lere onne Ai penia ma nahaledi mayai nano wewerek pananaka onne, penia ka resnai, la am pu'ik heli Ai mamani, ono ai mauroin Ai namkene nahalai nano wewerek pananaka na'akeme rakan lere li'ur haenhi. 11 I wal'uhe, ya apanak mim hi'i lir napanak Makromod Lalap mamani leke An paku mayai lolo wewerek pananaka onne. Ai mauroin nahenia lo'o ri nammori hi'i lir napanak mayai, Makromod Lalap namre'e namharu mayai penia ri nammori rapanak trimkasi Ai haenhi.
Paulus herre wali'ur nina panaeku nala'a laa Korintus
12 I wal'u na'ahoru! Ai kam nair ri mormori rir woroin hi'i ha man wa'an lolo mi kalarna, maa am nair woroin man Makromod Lalap kan ren nala mayai lolo Nin rere'e harharu eni. Ai akim nahuwa'an ono ai mauroin nahenia ai honorok akim moumou, la ai mauroin ainim hini'i wenewhe lolo mi noro idewe ainim ri mormori wali leken kalarna nahuwa'an Makromod Lalap akin. 13-14 Enpenia ainim horok man am a'aku ki mi eniyeni kan sus mi mauroin, maa am horok ha man mouropo leke mauroin idewe. Kade am hi'i horok ma kan sus mi mauroin, maa ors eni mi lo'o ka mauroin ha ida woro'o makun, de ai mapanak nahenia lere man mai mi mauroroin ainu'u panaeku eniyeni mouropo. Ai mapanak eniyeni leke lere Makromod Yesus mai noho wawan wali'ur, mi akim nahuwa'anedi ono mi mauroinedi mayai ri ma namlolo, naise ai akim nahuwa'anedi ono mauroin ai walinhe ri ma namlolo haenhi.
15-16 Ya auroinedi mi akim nahuwa'an noro mayai, de nonolu ainu'u panaeku ki ka'arala mi nanumene ya'u laa Makedonia, la ainu'u panaeku wali nano Makedonia mene ka'arala mi wali'ur, leke paku mi. Ainu'u panaeku lolala minim noho leke lo'o mim pakuwala'u lolo ainu'u kalla laa Yudea haenhi. 17 Enimaa ainu'u panaeku onne herredi me'e! Enpenia lo'o mi mahinorok nahenia ainu'u honorok panaeku ka namkene? Lo'o mi mauroin nahenia ya'u lernohi ainu'u honorok panaeku aimehi? Lo'o mim pene'ek ler ida ya a'aheni, “Ya'u hi'ie,” maa lolo honorok akin, “Ka'u hi'i me'e!” 18 Ka'u paeku heheni! Makromod Lalap penia namkene hi'i Nin nou maika namwali. Namnenehe onne haenhi, ai mamkene hi'i ainim nou ki mi namwali, la ai kam ken paipudi mi.
19 I wal'u na'ahoru, yo oro Timotius noro Silas loikaru Lira ma na'ono Makromod Lalap Anan Yesus Kristus,*Po'onala HN. 18:5. la Ai namkene hi'i lernohi Makromod Lalap Nin panaeku mamani, de ler ida Ai ka na'ahenia, “Onne namlolo,” la lere namehin herredi Nin panaeku na'aheni, “Onne ka namlolo.” 20 Makromod Lalap nala nou nammori rehi†Leke mauroin nou onne wekel inhawa nou po'onala: NN. 12:1-3; Ul. 18:15: 1Taw. 17:11-14; Yes. 9:6-7; Mzm. 2:6-7; Dan. 9:25. maika, la ik kauroin Nin nou na'akeme onne namwali ono An hi'i Nin nou na'akeme namwali kokkoo lolo Yesus Kristus Nin hini'i wenewhe! Onne penia ik ka'aheni, “Namlolo kokkoo! Amin!” leke ka'akulu ka'alapa Makromod Lalap Oin Naran. 21 Enla Makromod Lalap penia man hi'i ik akin namkene naili'il Kristus, la hi'i ik koro Ai kamwali mahaku. Ai mehen kikan ika kamwali Nina ri mememen, 22 la Ai nala Nina Roh minle ik akin leke namwali tanada nahenia ik kamwaliyedi Nin ri. Nin Roh onne na'ono nawinauwedi Nin nou maika, leke ik kauroin kokkoo lere man mai Ai nala ha wo'ira na'akeme man An nouwedi me'eni maika.
Ri Korintus hi'i ha ma ka namlolo de hi'i Paulus akin sus wake'e
23 I wal'u na'ahoru, namlolo kokkoo lere nonolu onne ka'u wali wali'ur ki Korintus leke yon yo odi lira apinpinha dadiyala mi de hi'i mi akim sus. Makromod Lalap namwali man kuku maka nahenia ainu'u wanakunu eniyeni namlolo, ono Ai mehe nauroin ya akin. 24 Ai mamhene modi lir apinpinha hopon mim hi'i ha man wa'an, ono ai mauroin nahenia mi akim namkene naili'il Yesus ma namwali Kristus me'e, maa ainim panaeku pakuwala mi leke mi akim nahuwa'an la eren namkene nailili'il.