2 Tesalonika
Horok Lirna La'an
Kerei raramne man minle kota Tesalonika akinhe ka namnehe na'alono panaeku ida woro'o. Hir derne nahenia lere man mai Makromod Yesus mai noho wawan wali'ur, maa hi ka rauroin lere onne naise inhawe (2:1-2). Heruwali ra'aheni Yesus mai wali'uredi me'e, la heruwali kar howok haida me'e ono ra'aheni Yesus na'akeki mai me'e, de yon ik howok me'e (3:6, 11-12).
Paulus hi'i horok eni aku laa kerei raramne manin Tesalonika, la nin panaeku hi'i horok rewro'o nineni na'akeki namnenehe noro nin horok dedesne. An ken na'alap hi akin leke hi akin namkene naili'il Yesus lolo rir wewerek pananaka man hir lernala lere onne (1:4-10). An wakuku hi inhawe namwali lere Makromod Yesus mai wali'ur (2:1-12), la an nounaku hi leke hi akin namkene naili'il ik Makromod (2:13-15). An hopon hi yon raprehen howok, maa rampe'el leke lernala hanana'an (3:6-15). Lolo horok eni, Paulus wekel Makromod Yesus Nin mamai wali'ur rew'ira (1:7-10; 2:1-12).
Horok Ihin
1. Paulus nala wanakunu man hari horok eni (1:1-2).
2. Paulus napanak trimkasi, la ai na'alap hi akin leke ramkene lernohi Makromod, kade hir lernala wewerek pananaka (1:3-12).
3. An wakuku hi inhawa ma namwali lere alam ma na'uraniyedi Makromod Yesus Nin mamai wali'ur (2:1-17).
4. Ai napanak manin Tesalonika hi'i lir napanak ai, la nou hi yon raprehen howok (3:1-15).
5. Ai nala hiyene arore noro hi'i lir napanak Makromod nodi nala hi (3:16-18).
1
1 Horok eni nano ai ri wokelu, Paulus, Silas noro Timotius.
Am aku horok eniyeni laa kota Tesalonika nin kerei raramne ma na'uli ma nasa'a ik Amad Makromod Lalap, noro ik Makromod Yesus Kristus. 2 Ai mapanak na'amoli Makromod Lalap nala Nin rere'e haharu noro wawa'an rara'e ki mi.
Paulus napanak trimkasi Makromod Lalap ono manin Tesalonika rira hini'i man wa'an
3 I wal'u na'ahoru, ai mapanak trimkasi mamani Makromod Lalap ono minim hini'i wenewhe man wa'an eni. Memen am hi'i heheni ono mi akim eren naili'il Makromod Yesus Kristus, la mi na'ahoru eren ida ma naramyaka ida 4 Enpenia lere am laliwewer Makromod Lalap Nin kerei-kerei ai modi aki ma nahuwa'anedi ma'uli masa'a minim hini'i onne ma'aheni, “Eih! Ik walin manin Tesalonika rira hini'i wenewhe ma'aruru. Kade hir lernala wewerek pananaka, maa ramkene lernohi Makromod Yesus la akinhe ka rahinuri Ai.”
5 Lere eni mim kerhu wewerek pananaka ono mi mamkene hurinohi Makromod Lalap nodi molollo mi. Maa Makromod Lalap nair minim wewerek pananakeni leke nodi kunukunohi nahenia Nin hono'ok kanail na'akeme namlolo. Mi mamkene kerhu apinpinha eniyeni, penia Ai na'aheni wa'an rehi mi mamwali Nin ri mememen. 6 Makromod Lalap kukul Nin hono'ok kanail ma namlolo eni ono Ai nala wanalhan ri man hi'i sus mi, 7 la An huriyedi mi noro idewe mayai nano wewerek pananaka haenhi. Ha onne na'akeme namwali lere ik do'on Makromod Yesus noro Nina hophopon man lewlewen enihe kopur nano a'am raram. 8 Lere onne Ai nodi aiye man lerlere nala hunukum ri ma ka nauroin Makromod Lalap. Ri onnenihe kar derne rakani Makromod Yesus Lirna Wawa'an eni. 9 Ai lo'o nala hunukum man werek hi laa ewi-ewi, la sopol hi ko'u nano Makromod Lalap miminlole, de kar do'on Nina siksika lerlere me'e. 10 Ha onne na'akeme namwali lere Makromod Yesus wali mai noho wawan wali'ur. Lere onne Nina pipi unulu wawi tanma'a na'akeme ra'uli rasa'e la rahiyene arore. Lere onne ai walinhe moro hi ma'uli masa'a Ai haenhi, ono mi akim naili'iledi Yesus Lirna Wawa'an man am loikaruwedi ki mi me'eni.
11 Onne peni ai kam hamlinu mi, maa hi'i lir napanak Makromod Lalap mamani leke nodi nala mi hi'i wewhe naise ri ma akin naili'il Yesus kokkoo, ono ai Ammu penia napoluwedi mi mamwali Nina ri me'e. Ai mapanak ai Ammu nodi Nin molollo na'akuku na'anokor minim honorok panaeku man wa'an na'akeme, la na'akuku na'anokor Nin honowok man mim hi'i eni ono mi akim naili'il Yesus. 12 Ai mapanak heheni leke ri na'akeme man po'on rauroin minim hini'i man wa'an onneni ra'akulu ra'alapa Yesus Oin Naran, la mi naran ra'akulu ra'alapa lolo Ai haenhi. Onneni na'akeme namwali ono Makromod Lalap noro Makromod Yesus Kristus rala rir rere'e haharu ki mi.