2 Timotius
Horok Lirna La'an
Nano Paulus nin horok lolo Horok Lapeni na'akeme, an hi'i horok eniyeni kauli'ur wake'e. An hi'i horok eni lere min bui raram lolo kota Roma (1:8; 16-18; 2:9). Ai nauroin nahenia lo'o ka nalo'olala hir hukumesne ai (4:6), de an hi'ie aku laa Timotius. Timotius eni ma na'ikaka ma namwali Paulus nin man howok walie. Ainin honowok namwali man leluwai makrana lolo kerei raramne ma aile kota Epesus.
Lolo horok eniyeni Paulus nala nin napanak man horu laa Timotius. Ai napanak Timotius pelekleke mai ka'ar ai (4:9, 21), ono an horokedi ai me'e (1:3-5). Paulus na'alap ai akin leke an hi'i wewhe Makromod Nin honowok nodi aki man mou (1:6-7), leke an wakuku hi wanakuku ma namlolo (1:13; 2:2; 3:14), la dadiyala ri ma nodi wanakuku ma ka namlolo (2:14, 16-18). Ai na'alap ai akin leke nampe'el naderre nadaul Yesus Lirna Wawa'an, la hi'i wewhe Makromod Nin honowok na'akeme haenhi (4:1-2).
Lolo horok enie, Paulus wekel ri woro'o man rodi wanakuku ma ka namlolo. Rir wanakuku na'ahenia, “Lere ri na'akeme man makiyedi la mori wali'ur onne namwaliyedi me'e,” (2:17-18). Rir panaeku heheni: Makromod Lalap nala or'ori dardari worworu huri ika raram lere ik holi mai noho wawan eni mehe, maa Ai ka na'amori ika wali'ur lere ik maki. Paulus na'okul hi na'aheni rir wanakuku onne ka namlolo. Lere man mai, Makromod na'amori wali'ur ri na'akeme nano makimaki enie. (Po'on 1Kor. 15:12, 19-23; 1Tes. 4:16-17 haenhi.)
Horok Ihin
1. Paulus nala wanakunu man hari horok (1:1-2).
2. Paulus napanak trimkasi laa Makromod Lalap ono Timotius akin naili'il wawa'an Yesus (1:3-5).
3. Ai na'alapa ai akin leke howok wawa'an Makromod Nin honowok (1:6-4:8).
4. Ai napanak Timotius pelek mai ka'ar ai (4:9-15).
5. Kade Paulus min bui raram la ka nalo'olala lo'o hukumesne, maa ai nauroin Makromod Lalap kan huri we'er ai (4:16-18).
6. Paulus nala nin tape masi (4:19-22).
1
Paulus nala nin hiyene arore
1-2 Konohiyala Timotius! Ya'u, Paulus hi'i horok eni aku ki o ma namwali ya an'u man ya aramyaka rehi. Makromod Lalap Nin raram nodi kikan ya amwali Nin hophopon ma nodi Yesus Kristus Lirna Wawa'an eni leke loikaru Nina nou ma na'ono. Nano nou onneni ik kauroin ik lernala or'ori dardari ma kan horu ono Yesus Kristus du'ul kaliyedi ik koro Ai me'e.
Timotius! Ya apanak ik Amad Makromod Lalap, noro ik Makromod Yesus Kristus rala rere'e haharu, ampun, noro wawa'an rara'e ki o.
Paulus na'alapa Timotius akin leke namkene naili'il Yesus
3 Ya apanak trimkasi laa Makromod Lalap man ya a'uli ya asa'a odi honorok aki man mou, naise yu up'u ya a'uhe ra'uli rasa'e nonolu eni. Ya apanak trimkasi laa Makromod Lalap mamani, la ka'u hamlinu wekel o naran lelere a'alam lolo ainu'u lir napanak onne. 4 Ya'u ka'u hamlinu num mak'oir man dupue, de ya'u raram nodi rehi ik pakromo wali'ur leke ya akin nahuwa'anala.
5 Ya'u horhorok o akim ma namkene naili'il kokkoo Makromod Yesus Kristus. O upum Lois, noro o inum Eunike akin naili'il Ai kokkoo haenhi, la ya auroin o akim namkene naili'il Ai naise hi. 6 Onne penia ya a'ori honorok o, Timotius, ma'alapa o honorok akim leke mampe'el howok honowok modi woroin Makromod Lalap naledi ki o me'e. Ai nala woroin onne ki o lere ya ala i lim'u parhu o uluwakun wawan. 7 Yono mamkauk hi'i honowok onne ono Makromod Lalap naledi Nin Roh Kudus maika, la kan hi'i ik kamka'uk, maa Ai nala ruri pe'el maika leke ik kampe'el howok, la ik kararamyaka ri namehin, la ik kadiyaka ik kemen yon hi'i ha man yaka.
8 Ende yono mawawa konohi ri inhawa ik Makromod hi'iyedi me'e, la yono mawawa maya'u ono ya'u ai bui raram! Ya'u peni min bui raram ono yo odi Makromod Lalap Lirna Wawa'an eni! Ende modi molollo Makromod Lalap nanala ki o, leke o mamkene lernala wewerek pananaka ono loikaru Lirna Wawa'an eni naise maya'u. 9 An huri we'eredi ika nano dohohala nin molollo la niliyedi ika kamwali Nina ri mememen. Ai kan hi'i onne ono ik hi'i ha man wa'an, maa An hi'i onne lernohi Nin re're'e haharu noro Nin panaeku aimehi. Ai kan hi'i noho wawan makun, An paekuwedi nala leken maika leke koro Yesus kadinu'ul kakinali me'e. 10 Enla lere eni Ai na'amou na'aropedi Nin panaeku onne lolo ik Makromod Yesus Kristus Nin mamai eni. Kristus eni peni namwali Rai Ma Nala Or'ori Dardari maika, la ma na'ahoruwedi makimaki nina mololle, la lolo Ai Lirna Wawa'an eni Ai nalhari Nin or'ori dardari ma kan horu eni.
11 Onne penia Makromod Lalap niliyedi ya amwali Yesus Nin hophopon noro idewe meser leke ya'u loikaru Lirna Wawa'an eni. 12 Onne penia ya'u lernala apipinha minle bui raram, maa, ka awawa, ono ya auroin Inhoi ya akin naili'il, la ya auroin Ai penia nodi molollo nadiyaka inhawa Ai nanala maya'u*‘Nadiyaka inhawa Ai nanala maya'u’, ee ‘Nadiyaka ya'u ono ya ala ainu'u morimori Ai’. hehen nanumene rakan lere alam man horu eni.
13 Timotius, masala kerkere wanakuku ya a'ala ki o eni. Ainu'u wanakuku ma namlolo onne namwali panaeku man kuku kalla ki o. Ma'alapa o akin leke namkene naili'il Yesus la maramyaka ri namehin, ono Yesus Kristus du'ul kaliyedi ika leke koro Ai kamwali mahaku me'e. 14 Modi Roh Kudus Nin molollo man minle ik honorok akin, madiyaka hahaa man Makromod Lalap nanala ki o wawa'an, la yono hurinohi ri namehin herre.
15 O mauroinedi me'e nahenia ri man min lolo propinsi Asia na'akeme ramhenedi ya'u me'e, Figelus noro Hermoganes haenhi. 16-18 Maa, Onesiforus onne, lere romromo an mai na'alapa ya akin lolo bui raram. Ai ka nawawa de man ka'ara'u. An rakan mai Roma, ai nahehe nanoin ya'u hehen nanumene am pakromedi. Enla o, Timotius, mehe mauroinedi me'e nahenia an paku ya'u nammori lere ya'u minle Epesus makun. Ende ya apanak Makromod Lalap nodi nala nina nakar raram na'akeme, la na'amoli An kukul Nin aki man wa'an Onesiforus rakan lere alam An ho'ok kail ri mormori na'akeme.