3
Yohanis ma nodi oir ulutade ri loikaru Makromod Lirna Wawan
(Mat. 3:1-12; Mrk. 1:1-8; Yoh. 1:19-28)
1 Kaisar Tiberius nodi molollo Roma anna idaweli wolima mene Pontius Pilatus namwali gubernur lolo Yudea. Lere onne rai Herodes nodi molollo Galilea, mo'oniwalla Pilipus nodi molollo Iturea noro Trakonitis, la Lisanias nodi molollo Abilene. 2 Enla ma namwali imam man kulu narehi, Hanas noro Kayapas. Lere onne Makromod Lalap nalhari Lirna Zakaria anan Yohanis lolo noho mamun ma napro'uk. 3 Ende an laa oir wauwau Yordan arkan wali-wali loikaru Makromod Lalap Lirna Wawan. Yohanis wakau na'ahenia, “Heih! Herredi minim morimori ma ka namlolo, wali derne makani Makromod Lalap, la mai mapanak yo odi oir ulutada mi leke Makromod Lalap na'ohu nahala minim dohohale.” 4 Yohanis onne na'akuku na'anokor horhorok ma aile nabi Yesaya nina horok ma na'ahenia,
“Ri ida aile lolo noho mamun ma napro'uk wakaukau, na'aheni,
‘Ma'ahari kalla, la ma'anehe,
leke Makromod lole.
5 Onno ma na'umokmoko ra'enuwedi,
ma nawo'wo'or ra'anehedi.
Kalla ma naple'ule'u ra'aduduwedi
la kalla ma na'ohu nakepe ra'anehedi.
6 Hi'i heheni leke ri na'akeme lolo noho wawan do'on rauroin hi'ihewi Makromod Lalap huri we'er ri nano dohohala nin molollo.’ ”*Yes. 40:3-5
7 Ri nammori mai Yohanis leke ulutade, la ai na'aheni, “Heih, mi eniyenihe ailanna maisa haimoke! Yon makoto nahenia lo'o mim mai ulutade leke mahinuriyedi nano hunukum lere man mamai eni, 8 maa lam hi'i ha man wa'an leke ri nauroin kokkoo mim herredi minima morimori ma ka namloleni, la lernohi Makromod Lalap Nin honorok panaeku mehe. Yon pene'ek mi mamwali Abraham upun ananne de kam lernala hunukum. Makromod Lalap peni nodi molollo hi'i waku eniyenihe herre mi namwali Abraham upun anan. 9 Makromod Lalap Nin hunukum na'akeki rakan me'e. Lere eni Ai na'akenedi Nin he'i aile au onno me'e. Inhawa au'ono ma woin ka namlolo, An keri, sopol laedi aiye raram.”
10 Ri nammori ra'ukani Yohanis, “Ende lo'o am hi'i inhawa?”
11 Yohanis walha, “Ri ma nin rain woro'o aile, nala ida laa ri ma na'alehe, la ma nin hanana'an aile, ha'ar noro ri ma na'alehe.”
12 Man ra'uk paipaire me'e ne mai Yohanis leke ulutade lolo oir. Hi ra'ukani, “Papa Meser, lo'o am hi'i inhawa?”
13 An walhe, “Lere mim ra'uk paipaire, yon larlewen ma nodi molollo paipair nin kenekrohu.”
14 Ma nasala ke'urauk mai haenhi, ra'ukanie, “Emene am hi'i inhawa ho'o?”
An walhe, “Yon kerne dalha ri leke hi rala kupan ki mi, yon kuku sala ri ma kan hi'i yaksala leke lernala kupan, maa modi aki ma namkene mori noro minim naiwe'el herme'e.”
15 Lere onne ri nammori mahar lalapan Ai man Makromod Lalap kikanedi namwali Rai laa ewi-ewi, de hir derne Yohanis nina wanakunu eni ne, lolo akinhe ra'aheni, “Ai eni lo'o Kristus man Makromod Lalap nouwedi maika eni.” 16 Onne penia Yohanis walhe na'ahenia, “Ka nalo'ol Ri ma nodi molollo narehi ya'u mai, Nin pakpak ei nin kali me'ene, kan wa'an ya'u we'er. Yo odi oir ulutada mi, maa Ri man mamai onne nodi Roh Kudus noro aiye ulutada mi. 17 Ai nodi kokopo ka'i na'amou Nina gandum, loiwuku ihin dakar raram, la osorne, sopol laedi aiye man mori mamani raram.” 18 Yohanis nodi panaeku ma naise onne nammori nounaku heri lere ai na'amou na'aropo Lira Wawa'an hi.
19 Enimaa ler ida Yohanis dadiyala rai Herodes ma nodi molollo Galilea ono an ho mo'oniwalla Pilipus hono Herodias, la hi'i panaeku namehin man ailanna haenhi. 20 Herodes kan ren nin ailanna, maa hi'i eren ailalanna, de kele Yohanis nale laa bui raram.
Yohanis nodi oir ulutada Yesus
(Mat. 3:13-17; Mrk. 1:9-11)
21 Lere Yohanis mahan ulutade ri nammori lolo oire, Yesus mai napanak ulutade haenhi. (Lere onne Herodes kan kelewuku Yohanis makun.) Ai mahan hi'i lir napanak, a'am nahinariyedi, 22 la Roh Kudus molmolo merpati ida kopur mai Yesus wawan. Enla lira ida namhara a'am raram na'ahenia, “Ya An'u O! Ya amre'e amharu O rehi. Om hi'i Ya akin nahuwa'an rehi!” *NN. 22:2, Mzm. 2:7, Yes. 42:1, Mat. 3:17, Mrk. 1:11, Luk. 9:35
Yesus upun a'an kanakarne
(Mat. 1:1-17)
23-38 Lere Yesus naderre nadaul Makromod Lalap Lirna Wawan dedesne Ainina anna lo'o welikelu la rin pene'ek Ai onne Yusup anan la Eli upun.
Eli aman Matat, Matat aman Lewi,
Lewi aman Malki, Malki aman Yanai,
Yanai aman Yusup, Yusup aman Matica,
Matica aman Amos, Amos aman Nahum,
Nahum aman Hesli, Hesli aman Nagai,
Nagai aman Ma'at, Ma'at aman Matica,
Matica aman Simei, Simei aman Yosek,
Yosek aman Yoda, Yoda aman Yohanan,
Yohanan aman Resa, Resa aman Zerubabel,
Zerubabel aman Sealtiel, Sealtiel aman Neri,
Neri aman Malki, Malki aman Adi,
Adi aman Kosam, Kosam aman Elmadam,
Elmadam aman Er, Er aman Yesua,
Yesua aman Eliezer, Eliezer aman Yorim,
Yorim aman Matat, Matat aman Lewi,
Lewi aman Simeon, Simeon aman Yehuda,
Yehuda aman Yusup, Yusup aman Yonam,
Yonam aman Eliyakim, Eliyakim aman Melea,
Melea aman Mina, Mina aman Matata,
Matata aman Natan, Natan aman Daud,
Daud aman Isai, Isai aman Obet,
Obet aman Boas, Boas aman Salmon,
Salmon aman Nahason, Nahason aman Aminadab,
Aminadab aman Admin, Admin aman Arni,
Arni aman Hezron, Hezron aman Peres,
Peres aman Yehuda, Yehuda aman Yakup,
Yakup aman Isak, Isak aman Abraham,
Abraham aman Tera, Tera aman Nahor,
Nahor aman Seruk, Seruk aman Rehu,
Rehu aman Peleg, Peleg aman Eber,
Eber aman Salmon, Salmon aman Kenan,
Kenan aman Arpaksad, Arpaksad aman Sem,
Sem aman Nuh, Nuh aman Lamek,
Lamek aman Metusalah, Metusalah aman Henok,
Henok aman Yared, Yared aman Mahalaleel,
Mahalaleel aman Kenan, Kenan aman Enos,
Enos aman Set, Set aman Adam.
Adam aman Makromod Lalap.