10
इस्राएलीराए ल्योनी चेतावनी
1 अ ङानैं ङामेंर, जेलाई जोगोइन्याए जूँनी तोबो पाँ है ङादाचिज़्या। भाःक गेसाखा पुर्खार इजिपनी यापुलुस्ज़्याक नो धोइ धोइव बादलस समुन्द्र खार्लाव घ्याँ बाकेर।10:1 प्रस १३:२१-२२; १४:२२-२९ 2 नोर बादल स़ोनो समुन्द्रनी यापुलुसोत मोसाए उमिनत यासछैंसिउ मिताव ताके। 3 नोराए परमेस्वरए सवाद ओरायो तोबो ज़्याव ज़ प़ाइँए ज़्युकेर।10:3 प्रस १६:३५ 4 फरी परमेस्वरए सपरीद ओरायो बाँचिन्या ऱी ब प़ाइँए ज़ ओकेर। नो ऱी पो पोक परमेस्वरए जोरैद ओरायो पहरनी ज़ ओकेर। नो पहर ओल ख्रीस ज़ ओल्यो।10:4 प्रस १७:६; गन्ती २०:११ 5 नाः चाव दैज़्यावत ब नोराए परमेस्वरए उयुँ कोला कोला जैदिकेर। है जैद परमेस्वरए नो बनल ज़ नोरालाई सोतोर्यान याख्याक्यो।10:5 गन्ती १४:२९-३०
6 गे परमेस्वरए ओपाँत हुवरालाई आव पाँ भरी सतैंसिउ मिताव लिज़्या। है जैद गे मनी नोराए माँःती माचाव य़ेनदा युँ झाःन्या माःक।10:6 गन्ती ११:४ 7 नोर ख्वाराए अङग्या पुजा यादोव मिताव ब दान्या माःक। धर्मसास्त्रल ब नोराए जूँनी इताव सर्सिउ लिज़्या,
“मिँर बनै थाँतस ज़्याद ओद, स़्याद धापा धामें जैसिनाकेर।”10:7 प्रस ३२:६
8 गे ते नोरानी ख्वा ख्वाराए यादोव मिताव पातर्या पातर्नी जैसिन्या माःक। ननी ज़ नोर तछात ज़ तेईस हजार सिकेर।10:8 गन्ती २५:१-१८ 9 नोरानी ख्वा ख्वाराए यादोव मिताव गेप्रभुलाई जाँचिन्या माःक। ननी ज़ कुधु मिँर घुलराए दा·द सिकेर।10:9 गन्ती २१:५-६ 10 फरी नोरानी ख्वा ख्वाराए परमेस्वरलाई गन गन यादोव मिताव ब दान्या माःक। ननी ज़ नो सैःज़्याव परमेस्वरए ओचाकर्या हुद यासैःक्यो।10:10 गन्ती १६:४१-४९ 11 नोराए याक्याँत ताव भरी गे आव संसार खेम्न्या बेला दैहुवरालाई चेतावनीए जूँनी सतैंद नैसिउ मिताव सर्सिउ लिज़्या।
12 है जैद “ङा ते परमेस्वरए ओपाँत बनै थ॰रिउ मिँ ची” है लिज़्याव मिँ जोगोइसिद उलिक, म़ानी धलिन्या ओछ्यास लिज़्या। 13 आःपै ते जेक्याँत मिँराए मासहिधुन्या जाँचर माहुताए। बुरू जेसहिधुन्या जाँचराकिन आगल्या जाँचर परमेस्वरए हुव मारायो। परमेस्वर युँ हुबो लिज़्या। फरी कैताराक जाँचर उहुकिन पुलुस्न्या येम याद नो जाँचराल सहिधुन्या ब जैचिरिज़्याव।
अङग्या पुजा स़ोनो प्रभु-भोज
14 है जैद ङायुँलाव ङानैं ङामेंर, अङग्या पुजानी अछतङ लिच्यो। 15 जे पाँ माबुझिधुन्यार जेमाले। है जैद आव है ङादाचिज़्याव पाँ साचो सैं माःक जे ज़ जेयुँल खामिच्यो। 16 प्रभु-भोजल परमेस्वरलाई धन्याबाद चरैःद खुरीनी गेओक ख्रीसए उझीस तोबो झी ज़ गेताज़्या। फरी नो भरेस केःद गेज़्युक ब ख्रीसए ओक्याँस तोबो क्याँ ज़ गेताज़्या। 17 नो तोबो भरेसलाई प़ाइँए गेज़्युवए गे माहोल्या गेलिदी ब प़ाइँ तोबो क्याँ गेताज़्या।
18 इस्राएलीर ब हिताव ज़ यालिज़्याव। थानताव तोबो ज़्याव प़ाइँए याज़्युवए या भरी ब प़ाइँ खैद तोबो ज़ ताकेर।10:18 लेबी ७:६ 19 नो है ङादाचिज़्यावए ओअर्थ आव ज़, अङग्या स़ोनो थानत चरैःसिउ ज़्याव काता ज़ माःक। 20 नताव चरैःसिउ ज़्याव भरी परमेस्वरलाई माःक, झ़्या मोंराए जूँनी ची। है जैद जे झ़्या मोंरास ताखैच्यो लिद है ङादाचिज़्या।10:20 ब्य ३२:१७ 21 जे प्रभु-भोज स़ोनो अङग्यालाई चरैःसिउ ज़्याव ऩेथोनी कै जैद जेज़्युधुरिज़्याव? ऩेय़ेन सुए ज़ मादोधुव। 22 काता परमेस्वरए उयुँ कोला कोला जैद्यान्या रो? सैं ओलकिन घेप्पार गेलिज़्याव?10:22 ब्य ३२:२१
क्याँए तिर वाज़ दान्या माःक
23 जे ख्वाराए है जेलिज़्याखेहो, “गेलाई कानुननी वैंसिउ य़ेन काता ज़ माले।” हैदी ब ङा फरी जेलाई है ङादाचिज़्या, प़ाइँ य़ेन क्याँए जूँनी माले। ङाकुइत प़ाइँ य़ेन उलिदी ब ख्वा य़ेनए नैं मेंलाई ब बले·ज़्याव। 24 जो य़ेनत तादी ब क्याँए तिर वाज़ दान्या माःक, नैं मेंलाई ब चिऊव ताके।
25 दोकानल थाँसिउ स्याकरी जेलँःक, “आव स्याकरी कैन्या ताके सैं माताकेमा?” है लिन्या मासम्जिद ज़ लँःच्यो। 26 काराव ल्यो ताकिन धर्मसास्त्रल इताव सर्सिउ लिज़्या,
“नाम स़ोनो नलाव लिज़्याव भरी
परमेस्वरए उमींर ज़।”10:26 भज २४:१
27 फरी परमेस्वरलाई उयुँ माहुबो मिँए ज़्यास्न्याए जूँनी उखुल्चिक, बान्या जेयुँ उलिकिन, जेङ़ाक झाःद ओयाचिउ ज़्याव भरी जेयुँल “आव ज़्यान्या ताके सैं माताकेमा?” है लिन्या मासम्जिद घाइ मालिद ज़ ज़्युच्यो। 28 खाली नो मिँए, “आव पुजाल चरैःसिउ ज़्याव,” है ओदाचिकिन नो मिँलाई चाव माचाव छुतैव परींन्याए जूँनी नो ज़्यावलाई छु ज़ ताछुच्यो। 29 नो ‘चाव माचाव छुतैन्या’ है ङालिज़्याव जे जेजूँनी माःक, नो है लिज़्याव मिँए उजूँनी ची। जे फरी है जेलिज़्याखेहो, “गे प़ाइँनी फुर्सुल तावर क्याँए माहाँत लिज़्यावरालाई कै जैद छुतए उयुँलाव पाँए गेलाई कैन्या माकैन्या ओजैसिज़्याव?” 30 जे ते झन, “नो ज़्याव धन्याबाद चरैःद गेज़्युकिन नो मिँए गेलाई कातानी गेमिन बले·द ओयासिरिज़्याव?” है जेलिज़्याखेहो। 31 ङा फरी है ङादाचिज़्या, जे नै तालिच्यो। बुरू जेदोज़्याव भरित, ज़्यान्यात तादी ब, ओन्यात तादी ब, ‘कातानी परमेस्वरए उमिन सघ्योःद ङाएके’ लिन्यानी वाज़ दोच्यो। 32 यहूदीरालाई तादी ब, ग्रीकरालाई तादी ब, परमेस्वरए ओमन्दलीलाई तादी ब, सुलाई ज़ जे यायुँ केःद्यान्या पाँ तादोच्यो। 33 बुरू ङा मनी ङालाई तान्यानी मादाद प़ाइँए अजम्बरी जुनी ओदैरक लिद प़ाइँलाई तान्याए जूँनी सेवा ङादोज़्या। जे मनी नितावनी ज़ दोच्यो।
10:1 10:1 प्रस १३:२१-२२; १४:२२-२९
10:3 10:3 प्रस १६:३५
10:4 10:4 प्रस १७:६; गन्ती २०:११
10:5 10:5 गन्ती १४:२९-३०
10:6 10:6 गन्ती ११:४
10:7 10:7 प्रस ३२:६
10:8 10:8 गन्ती २५:१-१८
10:9 10:9 गन्ती २१:५-६
10:10 10:10 गन्ती १६:४१-४९
10:18 10:18 लेबी ७:६
10:20 10:20 ब्य ३२:१७
10:22 10:22 ब्य ३२:२१
10:26 10:26 भज २४:१