15
पावलए ङ़ादाकिन ज़ ओरासथैज़्याव पाँ
1 अ ङानैं ङामेंर, ङासथैचिउ परमेस्वरए चाव ओथा फरी ब तोबो ऩेब्लो दोहोरैद ङायाचिरिज़्या। जे नो पाँर तीद आःपै नत ज़ जेलिज़्या। 2 फरी नो ङासथैचिउ पाँ साचो ज़ जेयुँल जेरैव ताकिन नो पाँलाई माऱास्द ननी ज़ जेबाँचिरिज़्या। म़ानी ते अऩाकल ज़ जेयुँ जेसुहुप्के।
3 ङा जेलाई ङासथैचिक प़ाइँरानी ओचाहित ल्यो ङा ङादैव पाँर जेलाई ब ङायाचिके। नो पाँर आवर ज़ — धर्मसास्त्रल ङ़ादाकिन सर्द यानैज़्याव मिताव ख्रीसए गेपापए जूँनी उजिउ झाःद्यासिक्यो। 15:3 यसै ५३:५-१२ 4 नकिन नोलाई यागादैव स़ोंलात सैंसिद सोके। नो ब धर्मसास्त्रल ङ़ादाकिन ज़ सर्सिउ उलिज़्याव। 15:4 भज १६:८-१० 5 ओसोव छींनी पत्रुसए ओङ़ाक सरैंःसिके। हुकिन बाह्र जना ओसाचीराए याङ़ाक ब सरैंःसिके। 6 नकिन तखेप्त ज़ पाँच सयकिन यादाङाव ओपाँत बाज़्यावराए याङ़ाक सरैंःसिके। नो रँःज़्यावर ख्वा ख्वार आःपै लिज़्यार, ख्वार सिधुकेर। 7 हुकिन याकूबए ओङ़ाक सरैंःसिके। हुकिन फरी ब तखेप ओसाचीराए याङ़ाक सरैंःसिके। 8 प़ाइँरानी छींत ङा ओमास मायो·द जर्मिउ* 15:8 ओमास मायो·द जर्मिउए ओअर्थ — ख्वा ख्वा मिँराए पावललाई प्रभुए ओसाची ताया लिन्या यामाचेतैज़्याव। मिँ मितावए ङाङ़ाक ब सरैंःसिके।
9 ओसाची भरिनी प़ाइँरानी ज़िम्ज़ा ङा ज़। परमेस्वरए ओमन्दलीए उखिरी पसिद दुख ङायोए ओसाची है लिन्या स्यासो ब ङामाले। 10 खाली ङाल्योदा परमेस्वरए उयुँ ओगराँवए ओल ओसाची ब जैनाक्यो। ङाल्योदा उयुँ गराँद ओयाँव य़ेनलाई फिस्को माजैद ज़ ङादोज़्या। उपुर्काव उसिसराकिन प़ाइँरानी धामा ङा ज़ ङादोके। खाली नो दोज़्याव ङा माःक, परमेस्वरए ङाक्याँताव ओयाँव ओल ओअसिकए ज़ ङादोके। 11 है जैद ङा तादी ब, नोराए तादी ब, गे गेसथैचिज़्याव पाँ तोबो ज़, जेयुँ हुप्द जेरैव मनी हो ज़।
सिद सैंसिन्या
12 तोबो गेसथैचिज़्याव पाँ आव ज़, ख्रीस सिउनी सैंसिद सोके। जे ख्वा ख्वाराए फरी कै जैद “सिद सैंसिन्या माताए,” है जेलिज़्याव? 13 सिद सैंसिन्या ओमाताकिन ख्रीस कै जैद सिद ओसैंसिउ? 14 ख्रीस सैंसिद ओमासोव ताकिन गे गेसथैचिज़्याव पाँ भरी ब अऩाकलाव ज़ ताखेहो, जे जेयुँ उहुबो मनी अऩाकलाव ज़ ताखेहो। 15-16 गे ते झन परमेस्वरए ओपाँताव साची गेय़ेनल पाजीर ज़ गेथ॰रिखेहो। जे जेपाँ मितावनी सिउर खर्क ज़ मासोन्या ताकिन ख्रीस ब मासोखेहो। निताव जेपाँए फरी ख्रीस ओमासोकिन गे परमेस्वरए ख्रीसलाई सिउनी सोचोइक्यो है गेलिज़्याव पाँ परमेस्वरकिन तँदाङाव पाँ ज़ ताखेहो। 17 फरी ख्रीस सिउनी ओमासैंसिउ ताकिन जे जेयुँ जेसुहुबो अऩाकलाव ज़ ताद आःपै जेपापए सजा धूँल ज़ जेलिज़्या। 18 ख्रीसए उमिनताव सिउर ब सिउका सिउ ज़ ताखेरहो। 19 गे ख्रीसए ल्योदा गेयुँ गेसुहुप्ज़्याव आस आव गेक्याँत वाज़ ओताकिन आव मानुवाताव प़ाइँरानी झुकिउर युँ नावज़ार गे ज़ गेताके।
20 खाली ख्रीस सिउनी मासैंसिए लिन्या सङ्खा ज़ माले। ख्रीस सिउनी सैंसिज़्याव भरिराए गेङ़ाताव ज़ ताके। 21 तोबो मिँए ल्योनी ज़ सिन्या सजाल बान्या ताके, फरी नो सजानी पुलुस्द अजम्बरी जुनील बान्या ब तोबो मिँए ल्योनी ज़ ताके। 22 किताव आदमए ल्योनी प़ाइँ सिन्याल परिकेर, फरी ख्रीसए ल्योनी प़ाइँ सैंसिन्या लेर। 23 खाली सु सु पाला लिज़्या। प़ाइँरानी ङ़ात ख्रीस सैंसिके। हुकिन ओल फरी उहुवत उमिनताव सिउ भरी ब सैंसिरिज़्यार। 24 नकिन प़ाइँ खेम्न्या बेला ताज़्या। हो बेलाक नाम नमलाव हकर सक्तीर ओपो·स ज़ खेम्द ओल ओराज्या वाज़ रहिन्या ले। नो राज्या ओबाबु परमेस्वरए उकुइत सूँपिन्या ले। 25 खाली उसुतुररालाई उखँ धूँल ओमाराझाःवा पै ओराज्या ओल ज़ चलैन्या ले। 15:25 भज ११०:१ 26 प़ाइँरानी छींत ओखेम्रिज़्याव उसुतुर ते ‘सिन्या सजा’ ज़। 27 धर्मसास्त्रल ब इताव सर्सिउ लिज़्या,
“परमेस्वरए प़ाइँ ख्रीसए उखँ धूँल यानैरिज़्याव।” 15:27 भज ८:६
खाली नो पाँल “प़ाइँ” है उलिदी ब ख्रीसए उखँ धूँल नैद्याज़्याव परमेस्वर ओल ते ख्रीसए उधूँल ते माले। 28 नो भरी प़ाइँ ख्रीसए उधूँल याताव प़ाइँना ओल ख्रीस ब ओबाबु परमेस्वरए उधूँल ज़ तारिज़्या। हाःकिन ओज़ाए धूँल प़ाइँ नैद्याज़्याव परमेस्वर ओल ज़ प़ाइँए ङ़ैताव तारिज़्या।
29 जे है जेलिज़्याव मिताव सिउ मिँ खर्क ज़ सैंसिद मासोए लिन्या साचो ज़ जेथ·रैज़्याव ताकिन ख्वा ख्वार काराव परमेस्वरए ओपाँ माथैदकाव सिउ मिँलाई परमेस्वरस सखैन्याए जूँनी नो सिउए उजूँनी यासछैंसिज़्याव? 30 सैंसिद सोन्या साचो ओमालिकिन, गे ओपाँ सथैज़्यावर काराव इताव ओछ्यास ल्यो य़ेनल लिन्या? 31 साचो ज़, ङानैं ङामेंर, गेप्रभु येसु ख्रीसए ओङ़ाक जे जेजूँनी ङासुनी च्याँःसिउ उलिज़्यावए है ङालिज़्या — ङा दिनकाव ज़ सिन्या स्यासो छ्यासल ङाबाज़्या। 32 ङालाई एफिससल ला मितावराए याज्याम्हुनाक ङा ङाय़ेन मिँए ओय़ेन मिताव वाज़ ताकिन ते निताव दुखर सहिद ङालाई काता ची ओतारिज़्याव? गेजूँनी सिउनी सैंसिद सोन्या ओमालिकिन काताए जूँनी निताव दुखर सहिन्या? बुरू, “ज़्याद ओद थाँतस लिकिन ताया, पराःतीदा सिन्या लिज़्या।” 15:32 यसै २२:१३ 33 इताव पाँरानी जोगोइसिद लिच्यो। निताव पाँ दोज़्यावरास जेबाऱिकिन जे ब बलेस्न्या जेले। 34 परमेस्वरए उमिनतावरालाई ज़्यास्न्या पाँर थ·रैद जे ब नो जेदोज़्याव पापर ऱासो ताके। जे ख्वा ख्वार आःपै परमेस्वरलाई मासरेस्ज़्याव मितावर जेलिज़्या। निताव य़ेनत जेलाज माहुज़्या?
फरिकाव गेक्याँ
35 जे ख्वा ख्वाराए है जेलिज़्याखेहो, “सिउ मिँ कै जैद फरी सैंसिद ओसोरिज़्याव? नो किताव क्याँस उहुरिज़्याव?” है ब जेलिज़्या। 36 काता जेपाँज़्याव निताव? जे ब धुर जेझाःक नो धुर ओमासिवा पै साःरो मापत्करिए। 37 फरी नो गम जींल जेझाःव धुर ताम तादी ब, जो तादी ब, नो साःरो हुन्याए ओक्याँ ते जेमाझाःए, नाङग्या ओगेदा वाज़ जेझाःज़्या। 38 परमेस्वरए नो धुरलाई किताव क्याँ जैद्याव ओपैंज़्याव हिताव ज़ जैज़्याव। सु सु याधुर सु सु याक्याँ ज़ जैद याएज़्याव। 39 क्याँताव स्या ब छुत छुत ज़ ताज़्या। मिँए ओस्या छुत ज़, बनलाव स्याराए स्या छुत ज़, बाज़ाराए स्या छुत ज़, ङाँःराए स्या ब छुत ज़ ताज़्या। 40 आव मानुवातावराए याक्याँ भरी छुत ज़ ताज़्या, स्वर्गतावराए याक्याँ ब छुत ज़ ताज़्या। याजोबन ब सु सु याजोबन ज़ ताज़्या। 41 हो मिताव ज़ निमीए ओज़गै ब छुत ज़, स़्यावैए ओज़गै ब छुत ज़ ताज़्या। सोरोराए याज़गै ब छुत छुत ज़ ताज़्या।
42 सिउनी सैंसिद सोवर ब हिताव ज़। चिन्या क्याँ गमल गेझाःज़्या, मासिन्या क्याँ परमेस्वरए सोचोइज़्याव। 43 ओजोबन माल्यो गमल बाज़्या, ओजोबन ल्यो हुज़्या। ओर्सा खेमो गमल बाज़्या, बनै ओर्सा ल्यो हुज़्या। 44 नो गमल बाज़्याव मानुवाताव क्याँ ज़, ननी हुज़्याव स्वर्गताव क्याँ ज़। गे किताव मानुवाताव क्याँ गेदैज़्या, हिताव ज़ स्वर्गताव क्याँ ब गेदैरिज़्या। 45 धर्मसास्त्रल ब इताव सर्सिउ लिज़्या,
“प़ाइँरानी ङ़ाताव आदम उस॰ ल्यो मिँ ताके।” 15:45 उत २:७
प़ाइँरानी छींताव आदम† 15:45 प़ाइँरानी छींताव आदमए ओअर्थ — ख्रीस। फरी अजम्बरी जुनी याज़्याव पुरूस ज़ ताके। 46 ननी ज़ रैंःज़्या, गमनिकाव क्याँ ङ़ात ताके, नकिन बल्ल परमेस्वरए उपुरूसनिकाव क्याँ ताज़्या। 47 उस॰कताव मिँ आदम गमनी जैसिउ मानुवाताव ताके, छींनीकाव मिँ ख्रीस स्वर्गनी हुके। 48 गमनी तावए ओथोर गम मितावर ज़ ताज़्यार, स्वर्गनी हुवए ओथोर स्वर्गताव मितावर ज़ ताज़्यार। 49 स़ोनो गे किताव गमनिकावए उसुरूप गेदैव, हिताव ज़ स्वर्गनिकावए उसुरूप ब गेदैरिज़्या।
गमे क्याँस परमेस्वरए ओराज्याल गेमापसिधुइ
50 अ ङानैं ङामेंर, आव पाँ ब सैंच्यो, गे आव मानुवाताव गमे गेक्याँस परमेस्वरए ओराज्याल गेमापसिधुइ। आव गेक्याँ खेम्न्या म़ान्याल वाज़ गनिसिउ लिज़्या। निताव क्याँस खर्क ज़ माखेम्न्या जुनील माबासिधुइ। 51 जेलाई तोबो म़ोंसिउ पाँ सतैंद ङायाचिरिज़्या — गे प़ाइँ गेमासिदी ब प़ाइँए गेक्याँ त़ोसिरिज़्या। 52 खेम्न्या बेलाकाव भोंकरए ओर्गा ओथासो प़ाइँना गे उमँःजानी मी चिकलामत ज़ गेक्याँर त़ोसिरिज़्या। नो भोंकरए ओर्गात सिधुवर ब खर्क ज़ मासिन्या जुनील सैंसिद सोरिज़्यार। 53 आव खेम्न्या म़ान्याल बाज़्याव गेक्याँ स़ोनो सिधुवराए याक्याँ ब खर्क ज़ मासिन्याल ओमात़ोसिवा पै माताए। 54 नो खेम्न्या म़ान्या भरी खर्क ज़ मासिन्याल ओत़ोसिउ प़ाइँना ज़ धर्मसास्त्रलाव सर्सिउ पाँ यो·न्या ले। नलाव सर्सिउ आव ज़,
“ओल परमेस्वर ज़ झेंःसिद,
सिन्यालाई हारैद नैव।” 15:54 यसै २५:८
55 “अब ते सिन्या सजा,
नमिन ज़ फ्या·के,
नसक्ती ब म़ाके।” 15:55 होसे १३:१४
56 सिन्या सजा पापनी ज़ ओसक्ती ल्यो ताके। पाप फरी परमेस्वरए ओजैव कानुननी ज़ ओसक्ती ल्यो ताके। 57 हैदी ब परमेस्वरलाई धन्याबाद लिज़्या, ओल गेप्रभु येसु ख्रीसए ल्योनी ज़ निताव सजानी पुलुस्न्या येम ब जैद्यासिक्यो। 58 है जैद ङायुँलाव ङानैं ङामेंर, जे ग्याल गिल माताद थ॰रिद एकतार ज़ गेप्रभुए ओय़ेन दाव ज़ नैच्यो। जे ब जेसैंज़्या, गेप्रभुए उजूँनी जेदोज़्याव भरी जेलाई अऩाकलाव तान्या माले।
15:3 15:3 यसै ५३:५-१२
15:4 15:4 भज १६:८-१०
*15:8 15:8 ओमास मायो·द जर्मिउए ओअर्थ — ख्वा ख्वा मिँराए पावललाई प्रभुए ओसाची ताया लिन्या यामाचेतैज़्याव।
15:25 15:25 भज ११०:१
15:27 15:27 भज ८:६
15:32 15:32 यसै २२:१३
15:45 15:45 उत २:७
†15:45 15:45 प़ाइँरानी छींताव आदमए ओअर्थ — ख्रीस।
15:54 15:54 यसै २५:८
15:55 15:55 होसे १३:१४