यूहन्नाए
उस॰कताव ओसरो चिथी
आव चिथी येसुए उसिस यूहन्नाए यायुँ हुबोरालाई धुतनी पैज़्यावराए ल्योनी जोगोइन्याए जूँनी ओसरो ज़। नो धुतनी पैज़्यावराए येसु परमेस्वरए साचो ओज़ा माःक, मिँ मिन्सिद उहु ब माःक है यालिज़्याव। अजम्बरी जुनी दैन्या ते युँ हुप्न्यानी माःक, मिँए बुद्धीनी वाज़ दैसिज़्या है ब यालिज़्याव। है जैद मिँराए यायुँनी जो हुज़्या हो ज़ दादी ब ताए है यालिज़्याव। निताव पाँरालाई उल्तैद्याद यूहन्नाए येसु ख्रीस परमेस्वरनी मिँ मिन्सिद हुव साचो ओज़ा ज़ लिद सर्द नैव (१ यूहन्ना १:१-३; ४:२-३)। फरी गे परमेस्वरए उमींर जैसिन्या ताकिन, युँ सुहुप्द ओय़ेनर दाद ओललाई मया दाव ताके (२:३-६; ५:१-५)। ओल परमेस्वर ज़गै ज़गैव ओतावए गे उमींर मनी चुम चुमोल मालिद सतस ज़ ल्यो ताके (१:५-७; २:७-११)। परमेस्वर फरी उयुँ गराँव, ओमया ल्यो ओतावए गे गेल ब हिताव ज़ ताव परिके (३:११-२४; ४:७-२१)। है जैद परमेस्वरलाई मया दाज़्याव मिँए अजम्बरी जुनी दैन्या आस ब दोज़्याव (३:१-३)।
1
अजम्बरी जुनी यान्या पाँ
1 नो ङ़ादाकिन ज़ लिज़्याव, आव गेर्नाए गे ज़ गेथैव, गेमीए ज़ गेरँःव, गेचिऊव, गेकुइए गेछापो अजम्बरी जुनीलाव पाँए जूँनी ज़ है गेदाचिज़्या। 2 नो अजम्बरी जुनी ओरैंःवए गे नोलाई गेरँःके स़ोनो गे गोहाई गेएज़्या। है जैद जेलाई नो अजम्बरी जुनीए था गेसथैचिज़्या। नो ङ़ादा परमेस्वर बाबुए ल्योङ ओल्यो, हो ज़ गेल्योक रैंःके। 3 जेस सिप गेताया लिद गेथैव गेरँःव पाँ ज़ जेलाई गेसथैचिज़्या। हो ताकिन ची परमेस्वर बाबु स़ोनो ओज़ा येसु ख्रीसस मनी सिप गेताज़्या। 4 आव चिथी गेयुँ होलाँ घताक लिद सर्द गेनै।
ज़गैवलाव येमदा बान्या
5 ओल ओल्योनी जो थैद गेनै, हो ज़ जेलाई गेसथैचिज़्या। हो पाँ आव ज़ — परमेस्वर ज़गैव लिज़्या, नोस चुम चुमो जात्त ज़ माले। 6 गे ओलस सिप गेलिज़्या है गेलिज़्यावत ब चुम चुमोलाव येमदा गेबाकिन ते साचो पाँ मादाद धुत गेपाँव ज़ थ॰रिके। 7 खाली ओल ज़गैवल उलिज़्याव मिताव गे ब ज़गैवल गेबाकिन परमेस्वरए उमिनताव भरिरास खैद तोबो नैं में ब गेताज़्या। परमेस्वरए ओज़ा येसु ख्रीसए गेदोव पापए जूँनी उझी सोभोद उजिउ झाःद ओयासिउए छैंवर गेताज़्या। 8 गे सुवाराए ‘ङास काता पाप ज़ माले’ है गेलिकिन ते गेक्याँलाई गे ज़ धोका याद साचो पाँ गेस माताए। 9 फरी, ‘ङा पापी ज़ ङालिज़्या’ लिद गेमाम़ोंसिकिन ते परमेस्वरए गेदोव पापर प़ाइँ ऱास्द्याद मादान्या गेदोव य़ेनरानी छैंवर जैसिज़्याव। नो य़ेनत परमेस्वरए अधर्म मादोव, युँ हुबो ज़ लिज़्या। 10 फरी, ‘ङा पाप ज़ ङामादोए’ है गेलिकिन परमेस्वरए ओपाँ गेस माताद ओपाँ पल्तैद गेयो मिताव ज़ ताके।