9
जेस्यो·ज़्याव युँ कैद ताताक
1 परमेस्वरए उमिनतावरालाई चिऊन्या ङा है ङामादाचिदी ब जे ज़ जेसैंज़्या। 2 जे अखैयालावर आःर्तानीकिन ज़ थूसिद आव य़ेन दान्यात अझ मनी युँ जेदोज़्यावए माकेदोनियालावराए ङ़ाक जेमिन सघ्योःद ज़ ङापाँज़्या। है जैद नोराए जाँकोसै जे जेदोज़्याव रँःद ज़ दोकेर। 3 खाली ङा आङ सघ्योःद ङापाँव पाँ भरी अऩाकलाव ताताक लिद आव ङानैंरालाई ङाकिन ङ़ादा ज़ आव चिथीस जेल्योङ ङारापरींके। हो ताकिन ची ङा नोरालाई है ङारादोज़्याव मिताव झाःसिद लिन्या जेले। 4 आलाव माकेदोनियालावर मनी जेल्योदा ङास याहुकिन जे नङ झाःसिद जेमालिज़्याव गेदैहुचिकिन आङाव जेजूँनी ङापाँव पाँ ओमाथ॰रिकिन लाज मोर्नो तान्या गेले, जे ब जेलाज हुन्या ले। 5 है जैद आव ङानैंरालाई ङ़ादा ज़ परींन्या ङाजैके। हो ताकिन ची किताव ङ़ादा, “स्यो·द धोल पोगोल ज़ गेजैरिज़्या,” है जेदाँव मिताव ज़ नोराए गे गेमाहुद ज़ थिक थाक जैन्या लेर। है जैद नो जेस्यो·ज़्याव भिती युँ कैद माःक, युँ स्यानी ज़ ओताक।
कुधु वासोए कुधु ज़ सिम्ज़्याव
6 आव ब सैंच्यो, छ्या वासोए छ्या ज़ सिम्ज़्याव। कुधु वासोए कुधु ज़ सिम्ज़्याव। 7 है जैद जे मनी आःज़ ङाझाःरिज़्या लिद जेयुँल ज़ थ·रैच्यो। खाली नो करस ब ताताक, युँ कैद ब ताताक। उयुँ माकैद याज़्याव मिँलाई परमेस्वरए मया दोज़्याव। 8 परमेस्वरए जेल्योदा उयुँ गराँद जेलाई असिक दैवर जैन्या ओल उकुइत ज़ उलिज़्यावए, जेलाई एकम्न्या धोल पोगोल ताद माथैंवरालाई याधुन्यार तान्या जेले। 9 आवए उजूँनी धर्मसास्त्रल ब इताव सर्सिउ लिज़्या,
“माथैंव मायो·वरालाई उयुँ माकैद आदा होदा भाःज़्याव,
नोए उगुनर रहिद खर्क ज़ मामेंःसिए।”9:9 भज ११२:९
10 वास्न्या धुर स़ोनो ज़्यान्या ज़्यावर जोरैद्याज़्यावए नो जेस्यो·रिज़्यावलाई धुर माँःती सबा·द्याद ननी ज़ धर्मलाव जेय़ेनर जेगुनर झन ज़ घ्योःन्या ले।9:10 यसै ५५:१० 11 जेकुइर सघ्योःद यान्याए जूँनी परमेस्वरए जेलाई यो·वर जैचिज़्याव। ननी ज़ फरी नो गेल्योनी जेदोरिज़्याव य़ेनत परमेस्वरलाई धन्याबाद ब चरैःरिज़्यार। 12 है जैद आव जेदोज़्याव य़ेननी परमेस्वरए उमिनताव माथैंव मायो·वरालाई ओरासथैंज़्याव वाज़ माःक, परमेस्वरलाई ब कुधु ज़ धन्याबाद दैन्या जैज़्याव। 13 नो जेदोव य़ेन ज़ जेसाची तारिज़्या। जे ख्रीसए ओपाँ अऩाकलाव माजैद जेकुइ सघ्योःद जेस्यो·ज़्याव भिती नोराए यादैवत जेदोज़्याव य़ेन साचो थ·रैद जेजूँनी परमेस्वरए उमिन सघ्योःद्यान्या लेर। 14 जेक्याँताव परमेस्वरए ओअसिक नोराए ल्योङ ब ओतावए नोराए जेलाई मामेंःद जेजूँनी परमेस्वरलाई पोंखारिउ ज़ नैन्या लेर। 15 गेल्योदा उयुँ गराँद, गोइँद ब मागोइँसिधुन्या असिकर याज़्याव परमेस्वरलाई बनै धन्याबाद ओताक।