1 ङा जेल्‍योङ ङाहुव आथ पालाकावस स़ोंखेप ताज़्‍या। है जैद आव धर्मसास्‍त्रलाव पाँ ब सैंद नैच्‍यो, “काता गोहाईराल ऩेब्‍लो स़ोम्‍लोए यासाची ओखैकिन नो पाँ ज़ थ॰रिउ ताज़्‍या।” 13:1 ब्य १७:६; १९:१५ 2 आथ पाला जेल्‍योङ माहुद ज़ ङ़ादाङाव ङाहुकाव है ङादाचिउ मिताव फरी ब है ङादाचिज़्‍या, ङा जेल्‍योक ङाहुक नो ङ़ादाकिनकाव पाप दाज़्‍यावर स़ोनो छींनी दोवरालाई ब हिताव ज़ यालिकिन नोरालाई बाँखी नैन्‍या ङामाले। 3 हो ताकिन ची ङाक्‍याँताव जेखिम्‍ज़्‍याव मिताव ख्रीसए ओसक्तीलाव सरेसर रँःन्‍या जेले। नो बेलाक ज़ ङास लिद पाँज़्‍याव ख्रीस जेल्‍योदा ओर्सा माल्‍यो मिताव माताद, बनै ओर्सा ल्‍यो तान्‍या ले। 4 ख्रीस क्रुसत तङ्गैसिद ओर्सा माल्‍यो मिताव ताद उसिदी ब, ओसोवत परमेस्‍वरए ओसक्तीर दैद बाँचिउ ज़ लिज़्‍या। है जैद गे ख्रीसस लिज़्‍यावर मनी गेर्सा गेमिन माल्‍यो मितावर गेलिदी ब, गे ख्रीसस सिप ज़ परमेस्‍वरए ओसक्तीर दैद जेल्‍योदा गेहक गेचलैरिज़्या।

5 जे परमेस्‍वरए ओपाँत जेलिज़्‍याव सैं जेमालिज़्‍याव जे ज़ जाँचिसिउ ताके। निताव जेजाँचिसिक येसु ख्रीस जेस उलिज़्‍याव सैंव परिके। जेमासैंकिन परमेस्‍वरए ओपाँतावर जेमाताए। 6 गेलाई ते ‘परमेस्‍वरए ओपाँत काम लागिउर ज़’ जेथ·रैसिज़्‍याखेहो है गेलिज़्‍या। 7 जेल्‍योङ माचाव य़ेन काता ज़ तापुलुस्‍क लिद परमेस्‍वरलाई पोंखारिउ ज़ गेनैज़्‍या। जेल्‍योङाव गेय़ेन ओफाबिउ घरँःरक लिद गेपोंखारिउ ते माःक, गे सुए याङाः यामील गेमाहुदी ब चाव य़ेन घदोरक लिद ची। 8 गे जो मिताव गेरैंःदी ब परमेस्‍वरए साचो ओपाँलाई गेमाबले·धुइ, किताव लिज़्‍या हितावनी ज़ गेदोज़्‍या। 9 गे सुए याङाः यामील गेमाहुदी ब जे परमेस्‍वरए ओपाँत बनै थ॰रिउर चावर जेताकिन गे खुसी ज़ गेलिज़्‍या। या याल ज़ उसुधारैसिरक लिद जेजूँनी पोंखारिउ ज़ गेनैज़्‍या। 10 आव पाँर ङा ङामाहुद ङ़ादा ज़ सर्द ङापरींज़्‍या। हो ताकिन ची जेल्‍योङ ङाहुक प्रभुए ओयाँव हकरानी जेल्‍योदा कर्रा जैसिउ परिन्‍या माले है ङालिज़्‍या। नो प्रभुए ओयाँव हकर बले·न्‍याए जूँनी माःक, बनैन्‍याए जूँनी ची।

11 ङानैं ङामेंर, प़ाइँरानी छींनीकाव ङापाँ आव ज़ — बलेसोर थिक थाक जैद जेयुँर होलाँ जैच्‍यो। जे भरी प़ाइँ तयुँ जैद खैद लिच्‍यो। हो ताकिन ची गेल्‍योदा उयुँ थू जैद गेयुँर होलाँ जैद्याज़्‍याव परमेस्‍वर जेस ज़ तान्‍या ले। 12 जे जेल मयास* 13:12 रोम १६:१६ चिऊन्‍या। जेरो दासिच्‍यो। 13 आङाव परमेस्‍वरए छैंव उमींराए मनी जेरो है दाचिज़्‍यार।

14 जे जेल्‍योदा गेप्रभु येसु ख्रीसए उयुँ ओगराँक, परमेस्‍वरए उयुँ जेल्‍योदा ओताक, गेलाई तोबो जैज़्‍याव छैंव पुरूस ब जेस ओताक।