1 हो बेलाक इस्राएलीराए याखार्ल ख्वा ख्वार परमेस्‍वरए उमिन हाइद धुतनी पैज़्यावर ब यालिज़्‍याव। जे जेखार्ल ब हितावर तोबो ऩेब्‍लो तान्‍या लेर। नितावराए याबाथैंनी बले·न्‍या धुत पाँर पैद यालाई फुर्सुल जैज़्याव यार्गेलाई मनी ऱास्‍न्‍या लेर। ननी ज़ यालाई खेम्‍न्‍या सजा यानी ज़ रैरिज़्यार। 2 हितावत ब लाज हुव य़ेन यारापैज़्‍यावदा कुधु ज़ बान्‍या लेर। ननी ज़ साचो येम ब बलेस्‍न्‍या ले। 3 नो पैज़्‍यावराए लोभ वाज़ दाद, ‘कसा मिँर गेल्‍योदा गेमाराजैए’ लिद जो थैव पैंज़्‍यार हो ज़ यारासथैज़्‍यार। नितावरालाई यासजाए याछीं याछीं खेपैहुद जप जप ओराजैहुव मिताव ज़ लिज़्‍या।

4 परमेस्‍वरए ओचाकर्‍यार ब ओलकिन तँदा याजैसिक नोरालाई बाँखी मानैद नर्गल याख्याक्‍यो। नल सजा यान्‍या छ्यामकावए जूँनी तल्‍ना नामलाव चुम चुमोल थुनैद यानैव।

5 नोआए ओपालाक ब पापीराए जूँनी परमेस्‍वरए संसारल बनै घ्योःव भल झाःद सुलाई ज़ बाँखी मारानैक्‍यो। नो धर्मलाव पाँ सथैज़्‍याव नोआलाई वाज़ उझ़िमलाव सात जनारास यानैक्‍यो।2:5 उत ६:१–७:२४

6 सदोम स़ोनो गमोरा सहरलावरालाई सफ्या·न्‍या सजा परींद ओराएक नलाव लिज़्याव भरिलाई चुयाप याजैक्‍यो। ननी ज़ अधर्म दाज़्‍यावरालाई किताव ओताज़्याव लिन्‍या सतैंसिउ मिताव लिज़्‍या।2:6 उत १९:२४ 7 परमेस्‍वरए नलावरानी तोबो धर्मी लोतलाई वाज़ बाँचैक्‍यो। लोत नो यार्ती माल्‍यो लाज मोर्नो य़ेन दोज़्‍यावर रँःद ओसोगो ओलागिज़्‍याव।2:7 उत १९:१-१६ 8 नो धर्मी नितावरास उलिज़्‍याक दिनकाव ज़ माचाव याय़ेन रँःद थैद उयुँ घरो ज़ उलिज़्‍याव।

9 है जैद परमेस्‍वरए ओल उमिनत लिज़्‍यावरालाई धो सहिउनी ओरापले·धुज़्याव ननी ज़ रैंःज़्‍या। अधर्मीरालाई फरी फाल्‍न्‍या छ्याम ओमाहुवा पै सजा धूँल यानैज़्‍याव। 10 नो सजा धूँल लिज़्‍यावर यायुँनी हुज़्‍याव भरित यायुँ मानैधुद मादान्‍या य़ेन दाद परमेस्‍वरए ओहक धूँल मालिज़्‍यावर ज़।

नोर झन बनै स॰द स्‍वर्गताव यासक्ती ल्‍योरालाई रँःद माछे·द झन हसैद ल़॰ज़्यार। 11 स्‍वर्गताव परमेस्‍वरए ओचाकर्‍यार ते आव मिँराकिन झन यासक्ती ल्‍योर यामान ल्‍योर लिज़्‍यार। हितावत ब परमेस्‍वरए ओङ़ाक स्‍वर्गताव यासक्ती ल्‍योरालाई यापाहा ब झाःद माराएर, यामिन ब बले·द माराएर। 12 खाली आव मिँराए ते स्‍वर्गतावर इतावर ची याल्‍यो लिन्‍या ब मासैंद यामिन बले·द्याद ल़॰ज़्यार। है जैद आवर च़ेंल सगैद सैःन्‍या याग्‍यान माल्‍यो पुसु स्‍यासोर ताद फ्या·न्‍या म़ान्‍यादा बाद, 13 मादान्‍या यादोव भरी याज़ भुगिरिज़्‍यार। इतावर लाक ब दुलिद यायुँनी जो हुज़्‍या हो ज़ दाद रेंव ज़ लिज़्‍यार। इताव माछाँवर प्रभु-भोजल जेस ज़्‍यान्‍या ते युँ माजामो ज़ लिज़्‍या। 14 नोर मेंमाराए ल्‍योदा यामी कुँ खर्क ज़ मावाँःद पाप दाव ज़ नैज़्‍यार। यायुँ तोबो पोक माल्‍योरालाई पापल यारापारैज़्‍यार। निताव याफ्या·हुवराए लोभ दान्‍या ते बनै सैंज़्‍यार। 15 साचो येमलाई ऱास्‍द झन बिप्‍यादा बाद लेर। नोर मादान्‍या य़ेनर दाद रूप्‍या कमैव पैंज़्याव बओरए ओज़ा बालामए ओयेमल ज़ बाकेर। 16 नो बालामए माचाव य़ेन दोव ओपैंज़्‍यावए गाल तोबो दैक्‍यो। ओगधाहाए ज़ मिँए ओर्गानी पाँद मादान्‍या दाव ओपैंज़्‍याव य़ेनलाई वैंदिक्‍यो।2:15-16 गन्‍ती २२:४-३५

17 निताव मिँर ऱी माल्‍यो सा·व ऱीमुल मिताव रितो ज़ लिज़्‍यार, स़ोनो बतासए उसुभुर्ज़्‍याव कोहो मितावर ब लिज़्‍यार। नितावराए याजुँ चुम चुमोल नैसिउ लिज़्‍या। 18 अऩाकलाव पाँर वै वै जैद, मिँरालाई याल्‍योदा जैन्‍याए जूँनी, ‘जेयुँनी जो हुज़्‍या हो ज़ घदोच्‍यो’ है दाद यारामोहोनैज़्‍यार। ख्वार ते भर यापापलाई ऱास्‍द परमेस्‍वरए ल्‍योदा बाज़्‍यावरालाई ब फरी निताव माचावल यारापारैज़्‍यार। 19 नोराए, ‘गे परमेस्‍वरए ओकानुननी पुलुसोर गेलिज़्‍या, जो गेदोदी ब ताए’ है यालिदी ब माचाव याय़ेनए उधूँल ते किसिउ लिज़्‍यार। जोलाई उयुँए ओपैंज़्‍याव भरिए उस्‍किउ मायो, नो मिँ नल ज़ बाँदा ताज़्‍या।

20 जो गेलाई बाँचैज़्याव गेप्रभु येसु ख्रीसए उजूँनीकाव पाँ सैंद आव मानुवाताव मादान्‍या य़ेननी पुलुस्‍द ब फरी ओल्‍द होल ज़ ओबाकिन, नोलाई ङ़ादाङावकिन झन छींनीकाव माचाव ताज़्‍या। 21 नितावर परमेस्‍वरए छैंव ओपाँ दैद ब फरी याछींदा याओलोए नोराए बुरू परमेस्‍वरए ल्‍योदा बान्‍या येम सैं ज़ यामासैंकिन तान्‍या ओल्‍यो। 22 नितावरालाई घर्तीलाव सर्सिउ स्‍यासो ज़ ताद ले। नल, “काःए ओवैः ओल ज़ ओल्‍द ज़्‍युहुज़्‍याव,”2:22 हितो २६:११ स़ोनो, “ऊलाई छेद ब हिलाल ज़ लुइसिनाज़्‍या।”