1 हाः बेलाक कैसरिया सहरल तोबो कर्नेलियस यादोज़्‍याव मिँ इतालिया फौजीलाव कप्‍तान उलिज़्‍याव। 2 नो मिँ बनै धर्मी ओल्‍यो, उझ़िमलावरास परमेस्‍वरए ओमान नैज़्‍याव मिँ ओल्‍यो। उयुँ गराँव ओतावए गरीबरालाई ज़्‍यावर पैसार ब याव ज़ उलिज़्‍याव, परमेस्‍वरलाई ब पोंखारिउ ज़ ओनैज़्‍याव। 3 तछा लाकाव तीन बजेवाक कर्नेलियस झजल्‍किद परमेस्‍वरए ओचाकर्‍या ओल्‍योदा उहुज़्‍याव रँःक्‍यो। नो चाकर्‍याए कर्नेलियसए उमिन ओहाइक ते, 4 कर्नेलियस बनै छे·द ओल्‍योदा लँ लँ चिऊद, “काराव प्रभु?” है दोक्‍यो। हाःत ज़ नो चाकर्‍याए, “परमेस्‍वरलाई नपोंखारिज़्‍याव स़ोनो गरीबराए ल्‍योदा नयुँ य़ाल्‍द नदोज़्‍याव य़ेनर परमेस्‍वरए ओल्‍योक केस्‍के। 5 नँ तोबो ऩेब्‍लो नमींरालाई योप्‍पाल तोबो सिमोन पत्रुस यादोज़्‍यावलाई च़ानाव यापरींके। 6 नो मिँ समुन्‍द्र छ्योकाव स्‍यालोए य़ेन दाज़्‍याव सिमोनए उझ़िमक लिज़्‍या,” है दोक्‍यो।

7 नो चाकर्‍या ओबाव छींनी, कर्नेलियसए ओय़ेन दाज़्‍याव भरिरानी ओसेवा दोज़्याव तोबो धर्मी उसिपाईं स़ोनो ऩेब्‍लो ओनोकोरनिलाई खुल्‍द, 8 नो चाकर्‍याए है ओदोव पाँ भरी नोरालाई है दाद योप्‍पादा यापरींक्‍यो।

9 हो पराःती लाकाव बाह्र बजेवाक नो स़ोम्‍लो योप्‍पाल याकेस्‍नाव बेलाक ज़ पत्रुस थालात बाद परमेस्‍वरलाई ओपोंखारिज़्‍याव। 10 पत्रुस बनै करेद काँ ज़्‍युव ओपैंज़्‍याव। खाली काँ ओमाताताव, भर याजैज़्‍याव। हाःत ज़ पत्रुस झजल्‍किद, 11 नम फैसिउ रँःक्‍यो। नमतिन तोबो घ्‍योःव फेरवा स्‍यासो चार चोंच्‍यानी क्‍योःसिउ उझरिहुज़्‍याव रँःक्‍यो। 12 नो फेरवाल जै जन्‍तुर, ऱूइज़ा वान्‍ज़ार स़ोनो बाज़ा बिज़ार यालिज़्‍याव। 13 हाःत ज़ तोबो गाए, “अ पत्रुस, नँ सोद आवरालाई सैःद याकैके,” है ओदोज़्याव थैद, 14 पत्रुसए, “माता प्रभु, निताव कैन्‍या माताज़्‍यावर खर्क ज़ ङामाकैए,” है दोक्‍यो। 15 नो गा फरी ब हुद, “जोलाई परमेस्‍वरए चोखो थ·रैद नैव, होलाई नँ माछैंव थ·रैन्‍या माताए,” है दोक्‍यो। 16 निताव स़ोंखेप ओतावत नो फेरवा नमदा छींसिद मारैंःके।

17 पत्रुस बनै अचम्‍ब ताद, “आव ङारँःवए ओअर्थ काता ओताव?” लिद उयुँल ओखामिज़्याक ज़ कर्नेलियसए ओरापरींव मिँराए, “सिमोनए उझ़िम काङ्क उलिज़्‍याव?” लिद पैसी पैसी साँबिलाक हुकेर। 18 साँबिलाक च्‍याँःसिद, “सिमोन पत्रुस यादोज़्‍याव आल मालिज़्‍या?” है लिद क़िकेर। 19 हाःपै पत्रुस थालात च़ुसिद दर्सनलाव पाँ ओखामिज़्‍याव। हाःत ज़ परमेस्‍वरए उपुरूसए, “स़ोम्‍लो मिँराए नँलाई खिम्‍निज़्‍यार। 20 नँ च्‍याँःसिद मेल झरिद नयुँ धुक्‍क जैद नोरास बान्‍के। नोरालाई ङा ज़ ङारापरींव,” है दोक्‍यो।

21 है जैद पत्रुस मेल झरिद नोरास दैसिद, “जेखिम्‍नाज़्‍याव मिँ ङा ज़, काताए जूँनी जेहुव?” है ओरादोक ते, 22 नोराए, “तोबो कर्नेलियस यादोज़्‍याव रोमी कप्‍तानए गेलाई उपरींसिउ। नो मिँ बनै धर्मी, परमेस्‍वरए ओमान नैद्याज़्‍याव मिँ ज़, यहूदी भरिराए बनै चाव थ·रैज़्‍यार। नोलाई परमेस्‍वरए ओचाकर्‍याए, ‘योप्‍पाल लिज़्‍याव पत्रुसलाई नझ़िमक रैव यापरींके। नो मिँए नँलाई तोबो पाँ सथैनिरिज़्‍याव’ है दोक्‍यो दी,” है यादोक ते, 23 पत्रुसए नोरालाई उलिज़्याव झ़िमक चावस नैद नल ज़ याबासैक्‍यो। हो पराःती येसुए ओपाँत लिज़्याव योप्‍पालाव ओनैंरालाई तोबो ऩेब्‍लो लाँद नो खुल्‍ना हुवरास बाके।

24 हो पराःती पत्रुस ओनैंरास कैसरिया सहरल केस्‍केर। ओल कर्नेलियसए ते ओनैंर स़ोनो ओक्‍याँदाङावरालाई उझ़िमक दुप्‍द पत्रुसलाई कींद यानैज़्‍याव। 25 पत्रुस हुद झ़िमल उपसिज़्याक कर्नेलियस ओल्‍योक दैसिनाद उखँत फुलुप्‍सिद धो दोक्‍यो। 26 पत्रुसए नोलाई सोचोइद, “ङालाई धो दान्‍या माःक, च्‍याँःसिन्‍के। ङा मनी नँ स्‍यासो मिँ ज़ ची,” है दाद, 27 पाँए पाँए झ़िमल निपसिक नल मिँर बनै कुधु दुप्‍सिद यालिज़्‍याव रँःद, 28 नोरालाई, “गे यहूदीर जे मिताव छुत जातलावरास सिप लिन्‍या ब माताए, जेझ़िमल पसिन्‍या ब माताए लिन्‍या जे ज़ जेसैंज़्‍या। हितावत ब परमेस्‍वरए ङालाई, ‘सु मिँ ज़ माछैंव माले, अछुत्‍या ब माले’ है लिन्‍या सतैंद्याँक्‍यो। 29 है जैद ङालाई जेखुल्‍नाक ‘माता’ है मालिद ज़ ङाहुके। अब काताए जूँनी जेखुल्‍नाव, है दाँचिके,” है ओरादोक ते, 30 कर्नेलियसए, “चार दिन ङ़ादा लाकाव तीन बजेवाक ङाझ़िमक परमेस्‍वरलाई ङापोंखारिज़्‍याक तक तकौ क्‍वा क्‍वाइसिउ परमेस्‍वरए ओचाकर्‍या ङाङ़ाक सरैंःसिहुद, 31 ङालाई, ‘अ कर्नेलियस, परमेस्‍वरलाई नपोंखारिज़्‍याव स़ोनो गरीबराए ल्‍योदा नयुँ य़ाल्‍द नदोज़्‍याव य़ेन परमेस्‍वरए रँःक्‍यो। 32 नँ योप्‍पाल लिज़्‍याव सिमोन पत्रुस यादोज़्‍यावलाई नमींरालाई क़िनाव यापरींके। नो मिँ समुन्‍द्र छ्योकाव स्‍यालोए य़ेन दाज़्‍याव सिमोनए उझ़िमक लिज़्‍या,’ है दाँक्‍यो। 33 है जैद ङा नँलाई हतप्‍त ज़ ङाथानिके। नँ ब नयुँ नाद हुद नयासिके। गे परमेस्‍वरए ओपैनिउ पाँर थैन्‍याए जूँनी आव ङानैंरास दुप्‍सिद गेले,” है दोक्‍यो।

34 हाःत ज़ पत्रुसए अइ लिद यासथैक्‍यो, “साचो ज़ ओल्‍यो ङानैं ङामेंर, परमेस्‍वरए जात रँःद ओमादोज़्‍याव ओल्‍यो, ङा मनी आछिमकिन ज़ ङासैंके।10:34 ब्य १०:१७ 35 जो जातल तादी ब, जो मिँए परमेस्‍वरए ओमान नैज़्‍याव, चाव य़ेन ब दोज़्‍याव, होलाई ज़ परमेस्‍वरए चाव रँःज़्‍याव। 36 गे उमीं इस्राएलीरालाई ओज़ा येसु ख्रीसनी सखैन्‍या येम ब सतैंद्यासिक्‍यो — नो प़ाइँ मिँराए गेप्रभु ज़ लिज़्‍या। 37 ऱील सछैंज़्‍याव यूहन्‍नाए ओय़ेन उतुपैवकिन गालील खन्‍दनी सुरू ताद, यहूदिया खन्‍द भरिल रा·सिनाव पाँर जे मनी थैद जेनैज़्‍याखेहो। 38 नो पाँर आव ज़ — परमेस्‍वरए नासरतलाव येसुए ओक्‍याँत छैंव पुरूस ब झाःद्याद ओसक्तीर ब एक्‍यो। परमेस्‍वर ओलस ज़ उलिज़्‍यावए येसु आदा होदा बाद चाव य़ेनर दाद याजोरो हुवर स़ोनो माचाव पुरूसए क्‍योःद ओरानैज़्यावरालाई ब ओरासगराँज़्‍याव। 39 गे उसिसर फरी नो यरूसलेमल स़ोनो यहूदीराए यादेसलाव ओदोव य़ेनरात ओसाचीर ताद गेले। नोलाई झन तछा क्रुसत तङ्गैद सैःकेर। 40 हैदी ब उसिउ स़ोंलात परमेस्‍वरए नोलाई सोचोइद गेल्‍योक सरैंःद्यासिक्‍यो। 41 सरैंःद ओरायो प़ाइँ मिँरालाई माःक, परमेस्‍वरए गे ङ़ादाकिनकाव रूजिद ओनैसिउ ओसाचीरालाई वाज़ ची। सैंसिद ओसोव छींनी गेस सिप ज़ ज़्‍युक्‍यो, सिप ज़ ओक्‍यो। 42 गेलाई ओसाचीर जैद, ‘जे प़ाइँ मिँरालाई ङापाँ सथैद, ‘सिउ मासिउरालाई यान्‍याय फाल्‍न्‍या ओल परमेस्‍वरए ज़ ङा ओज़ालाई जैद नैनाव’ लिद यारासथैनाच्‍यो,’ लिद गेलाई अर्थैसिक्‍यो। 43 अगमबक्ता भरिराए मनी नो हुरिज़्‍याव येसुए उजूँनी ज़ पाँकेर। नोराए यापाँल मनी, ‘जोए नोलाई उयुँ हुप्‍ज़्‍या, हो नोए उमिननी ज़ ओपापर क्‍याल्‍सिद परमेस्‍वरस खैरिज़्या,’ है लिद लेर।”

44 पत्रुस आव पाँर ओपाँज़्‍याक ज़ नो ओपाँ थैज़्‍यावराए याक्‍याँत छैंव पुरूस हुके। 45 नो पत्रुसस हुव येसुए ओपाँत बाज़्‍याव यहूदीराए, छुत जातलाव मिँराए याक्‍याँत मनी छैंव पुरूस उहुव रँःद, 46 “नोराए ते छुत छुत खामनी पाँद, परमेस्‍वरए उमिन ची सघ्‍योःज़्यार!” है लिद अचम्‍ब ताकेर। हाःत ज़ पत्रुसए ओनैंरालाई, 47 “आवरालाई गे काराव ऱील सछैंसिन्‍या भैंःद मायान्‍या? आवर मनी गे मिताव छैंव पुरूस दैवर ज़ लिज़्‍यार सानी,” है दाद, 48 येसु ख्रीसए उमिननी ऱील सछैंसिउ यापरींक्‍यो। नकिन कर्नेलियस ओनैंरास, “गेस जाँवा पै ल्‍यो ताके,” है यारादोक ते, नोर जाँवा पै लिकेर।