12
पत्रुस झ्यालखानानी उपुलुसो
1 हाः बेलाक हेरोद राजाए मन्दलीलाव ख्वा ख्वारालाई क्योःद बनै दुख याएक्यो। 2 यूहन्नाए ओदाज्यु याकूबलाई ते झन खोर्च्योए पल्द सैःक्यो। 3 यहूदीर ननी बनै खुसी याताव रँःद हेरोदए पत्रुसलाई मनी क्योःव यापरींक्यो। नो बेलाक माँदा भरेस ज़्यान्या पर्ब ताद उलिज़्याव। 4 पत्रुसलाई क्योःद, झ्यालखानाल झाःद सोह्र जना सिपाईंराए याजिम्बाल नैद, ‘पर्ब ओखेमोत ची जनताराए याङ़ाक ङासतैंया ब’ है उलिज़्याव। 5 पत्रुस झ्यालखानाल उलिज़्याक मन्दलीए नोए उजूँनी परमेस्वरलाई बनै पोंखारिउ ज़ यानैज़्याव।
6 हेरोद राजाए जनताराए ङ़ाक पत्रुसलाई सतैंव ओपैंज़्याव ओङ़ालाव छ्याम रील, पत्रुस झ्यालखाना जींल ऩेब्लो सिपाईंनी निखार्ल साँगलए किसिउ स्याँद उलिज़्याव। य़ामक मनी पाल्यार च्याँःसिद गुद यानैज़्याव।
7 हाःत ज़ उमँःजानी परमेस्वरए ओचाकर्या सरैंःसिद ओज़गैए झ्यालखानाल पलाँ जैद, पत्रुसलाई कोतैद, “सोद घल्सिन्के,” है दाद ओसोचोइव प़ाइँना ज़ ओसाँगलर यानी ज़ पला·सिद तेकेर। 8 हाःत ज़ नो चाकर्याए, “नवाँःफोर पो·सिद नपोलार जासिन्के,” है ओदोक ते, पत्रुसए हैज़ जैक्यो। नकिन, “नबर्की क्वाइसिद ङाछींत हुन्के,” है ओदोक ते, 9 पत्रुस लाँःदा पुलुस्द उछीं उछीं ज़ बाके। खाली उयुँल ते, ‘आव भरी झजल्किद ङारँःज़्याव ज़ ताखेहो’ लिद नो साचो ज़ ओल्यो लिन्या ओमासैंज़्याव। 10 नोनी उस॰कताव पाल्यालाई बलेंद, फरी हुकिनकाव पाल्यालाई ब बलेंद सहरल बाज़्याव झँए य़ामक निकेस्क नो य़ाम ओलनी ज़ फैसिके। ननी पुलुस्द येमत निबाज़्याक नो चाकर्या उमँःजानी सम़ैसिके।
11 हाःत ज़ पत्रुसए ओचेत फर्किद, “साचो ज़ ओल्यो, परमेस्वरए ङाल्योक ओचाकर्यालाई परींद ओयाँव ची ओल्यो। नोए ङालाई राजा हेरोद स़ोनो यहूदीराए याजालनी जोगोइद ओपले·नाव ची ओल्यो!” है लिके। 12 है जैद आव पाँ भरी चेतैद पत्रुस मरियमए उझ़िमक बाके। नो मरियम मर्कूस यादोज़्याव यूहन्नाए ओआमा ओल्यो। नल हो बेलाक कुधु मिँर दुप्सिद परमेस्वरलाई यापोंखारिज़्याव। 13 पत्रुस य़ामक हुद कोतो कोतो ओजैक तोबो रोदा यादोज़्याव नोकोर्नी मेंमाए य़ामक चिऊनाक्यो। 14 रोदाए पत्रुसए ओर्गा ओसरेसो प़ाइँना ओरेंतए य़ाम माफैद झन झ़िमल धोंःनाद, “दे, पत्रुस हुद य़ामक च्याँःसिद ले,” है ओरादोक ते, 15 प़ाइँए, “काता नपाँज़्याव निताव स्यावदिनी ब्यावदी?” है यादोक ते, नो ल़ुज़ाए, “हो ज़ ब्याँ, हो ज़,” है यादोक्यो। नोराए झन, “उपुरूस नरँःव ताखेहो,” है दोकेर।
16 नाः भरिल पत्रुस य़ामक च्याँःसिद कोतोका कोतो जैव ज़ ओनैज़्याव। बल्ल नोराए य़ामक बाद याफैनाक पत्रुसलाई रँःद बनै अचम्ब ताकेर। 17 पत्रुसए ‘झ्याउँ तालिच्यो’ लिद उकुइए सान दाद परमेस्वरए झ्यालखानानी ओपले·काव पाँ भरी है यादोक्यो। नकिन, “आव पाँ भरी याकूब स़ोनो उपुर्काव गेनैंरालाई मनी है यारादोच्यो,” है दाद ओल ननी पुलुस्द छुतङ बाके।
18 हो पराःती झ्यालखानाल ‘पत्रुस काना ओबाव’ लिद पाल्याराए याखार्ल राउँनी झ्याउँ ताके। 19 हेरोदए उसिपाईंरालाई नोलाई सापो ओरापरींक यामादैवए नो पाल्यारालाई तोबो तोबोनी खोले·द, नोरालाई सैःन्या सजा याएक्यो।
हेरोद राजा उसिउ
नकिन हेरोद राजा यहूदियानी पुलुस्द कैसरिया सहरल बाद नल ज़ उलिज़्याव। 20 हाः बेलाक तुरोस स़ोनो सीदोन सहरलाव मिँरास हेरोद बनै रसिद उलिज़्याव। खाली नोराए याज़्याव भरी हेरोदए ओपोनी उहुज़्यावए नोराए होस सखैसिउ यापैंज़्याव। है जैद याघेप्पार हेरोदए ल्योक हुद तोबो उयुँ हुबो ओकर्मचारी बलस्तसलाई याल्योदा जैद राजास पाँव यापैंज़्याव। 21 जलफल दान्या याथ·रैव छ्याम, हेरोद बनै तह महौ जैसिद उसिंहासनत च़ुसिद ओपाँ यासथैक्यो। 22 ओपाँ थैज़्यावराए, “आव पाँ ते मिँए ओपाँ माःक, ईस्वरए ओपाँ ची,” है लिद बनै ज़ क़िकेर। 23 हाःत ज़ हेरोद स॰द परमेस्वरलाई ओमान नैद ओमायोए प्रभुए तोबो ओचाकर्याए फार्लाप फुर्लुप ओख्याक ऱूइद सिके।
24 परमेस्वरए ओपाँ झन ज़ बा·द प़ाइँदा ज़ रा·सिनाके। 25 बारनाबास स़ोनो साऊलनी यरूसलेम मन्दलीलाव पैसा भाःन्या निय़ेन निखेमोत, यूहन्ना यादोज़्याव मर्कूसलाई ब नीस ज़ लाँद एन्तिओखियादा ओल्द बाकेर।