1 पाँच दिन ओतावत प्रधान पुजारी हननिया तोबो ऩेब्‍लो यहूदीराए यास़ेररास कैसरियाल हुद, हाकिमए ल्‍योक बाद पावलए उजूँनी उजुर दोनाकेर। नोरास तोबो तर्तुल्‍लस यादोज़्‍याव वकिल ब रैद यानैज़्‍याव। 2 है जैद मुद्दा चलैद पावललाई यारैवत तर्तुल्‍लसए अइ लिद पाँके, “माननिय फेलिक्‍स ज्‍यू, नँ गेपोङाव हाकिम ताद, नदयानी गेदेस बनैद नयासिउए गे प़ाइँङावरालाई बनै सन्‍च ताद फाबिउ ज़ गेलिज़्‍या। 3 होए उजूँनी गे प़ाइँनी ज़ नगुनर मामेंःद मानिउ ज़ गेलिज़्‍या। 4 खाली आछिम नर्च्‍या मासैःद गेल्‍योदा दया दाद आव तोबो ज़िम्‍ज़ा गेपाँ वाज़ थैद नयासिकिन ताखेहो है गेलिज़्‍या। 5 खास गेपाँ आव ज़ — आकाव नल्‍योक रैद यानैज़्‍याव मिँ ते बनै नाल क़्याव माचाव मिँ लिज़्‍या। नासरी दललाव यागुर्बा ताद संसार भरिल दुलिद यहूदीरालाई बनै ज़ यामचैज़्‍याव। 6 ध्‍यान झ़िमलाई झन झुथो जैव ओपैंज़्‍याक बल्‍ल गेक्‍योःके। [मोसाए ओकानुननी गे ज़ फालो गेपैंक ते, 7 कप्‍तान लुसियस हुद झन नोलाई गेल्‍योनी जबरज्‍यास्‍ती नैंद, 8 गे ओजगर्‍यारालाई मनी नँ नल्‍योदा हुव परींसिक्‍यो।] है जैद आवलाई नबिचारिक उजुर गेदोव पाँ भरी साचो ज़ ओल्‍यो लिन्‍या थ·रैन्‍या नले,” है दोक्‍यो।

9 नोस हुव यहूदीराए मनी ओपाँ जोर्दिकेर।

10 हाःत ज़ हाकिमए पावललाई सान दाद ओएक ते पावलए अइ लिद पाँके, “माननिय हाकिम, नँ आव राज्‍याल कुधु बर्सकिन ज़ मिँरालाई नराफाल्‍ज़्‍यावए ङा नङ़ाक ङायुँ हुप्‍द ज़ ङापाँज़्‍या। 11 ङा यरूसलेमदा परमेस्‍वरए ओध्‍यान दाना ङाबाव आछिम बाह्र दिन वाज़ ताके। आव ङापाँ साचो सैं माःक नँ ज़ थ·रैधुन्‍या नले। 12 नाः भरिल ङाकिन तँदाङावराए ना ङा सुरास ध्‍यान झ़िमल ङाखर्लेसिज़्याव यारँःनाव, ना धर्मसास्‍त्र झ़िमराल ना सहरल मिँरालाई ङारामचैज़्याव यारँःनाव। 13 है जैद आव ङाङ़ैताव झाःव यापैंज़्‍याव पाँर काता ज़ थ॰रिन्‍या माले। 14 खाली आव तोबो भन्‍या हैज़, गेजिज्‍यु बाज्‍युकिनकाव ओसेवा गेदोहुज़्‍याव परमेस्‍वरलाई ङा मनी साःरो येमनी ओसेवा ङादोज़्‍या। आवराए झन ‘तँनिकाव येम’ है दाँज़्‍यार। है यादाँदी ब मोसाए ओकानुन स़ोनो अगमबक्ताराए यासरो पाँ भरित ङायुँ हुप्‍ज़्या। 15 आवराए यादोज़्‍याव मिताव ङा मनी ‘तछा चाव माचाव दाज़्याव प़ाइँ मिँर परमेस्‍वरए ओङ़ाक च्‍याँःसिरिज़्‍यार,’ है लिद परमेस्‍वरए ल्‍योदा आस ङादोज़्‍या। 16 है जैद नो पाँर चेतैद ङा परमेस्‍वरए ओङ़ाक स़ोनो मिँराए याङ़ाक छैंव युँस दान्‍या वाज़ धामा ङादोज़्‍या।

17 “है जैद ङा छुत देस जीदा ऩेरिम स़ोंरिम भरी दुलिद, ‘ङादेसलाव दुखिरालाई सघैद परमेस्‍वरलाई मनी भिती चरैःन्‍या’ लिद फरी यरूसलेमल ङाहुके। 18 होए उजूँनी ध्‍यान झ़िमल ङालिज़्‍याव बेलाक यहूदीराए दैनाकेर। हो बेलाक ज़ भर चोखोइसिद ङालिज़्‍याव, ध्‍यान झ़िमल खैलानी बैला ब काता ज़ ओमालिज़्‍याव। हाःत ज़ एसिया खन्दनी हुव यहूदीराए ङालाई सरेस्‍द नलाव मिँरालाई यारामचैकेर। 19 नोराए ङाङ़ैत झाःन्‍या पाँ कातार ओल्‍यो ताकिन नोर याज़ आछिम हुद उजुर दाव परिन्‍या ओल्‍यो। 20 अथबा, यहूदीराए घ्योःव याकचरील काता ङागल्‍तीर यादैव ताकिन आकाव हुद लिज़्‍यावराए ओपाँरक ते। 21 सैं नो कचरीलाव सिउनी सैंसिन्‍याए जूँनी ङापाँवनी आछिमकाव मुद्दा याचलैज़्‍याव ओताव?” है यादोक्‍यो।

22 हाःत ज़ नो हाकिम फेलिक्‍सए नाः थैद, “ङा आव जेपाँ भरी कप्‍तान लुसियस उहुवत ङाबिचारिया,” है दाद भाःसिउ यापरींक्‍यो। ओल ते उपुर्कावराकिन येसुए ओपाँ सर्बा ज़ ओसैंज़्‍याव। 23 है जैद नोए पावललाई गुन्‍याए जूँनी सिपाईंराए याकमान्‍दरए उजिम्‍बाल नैद, “आवलाई जाँ आदा होदा ल्‍यो ब यान्‍या, दैसिना हुज़्‍याव ओनैंरालाई मनी तारावैंयो,” है लिद हुकुम एक्‍यो।

24 ऩेला स़ोंलावात फेलिक्‍स, यहूदी ओज्‍या द्रसिल्‍लास हुद, येसु ख्रीसनिकाव येम किताव उलिज़्‍याव लिद चावस थैन्‍याए जूँनी पावललाई खुल्‍द पलासो परींक्यो। 25 है जैद पावलए ओअर्थ भरी पलास्‍द्याद, परमेस्‍वरए उयुँलाव मिताव य़ेन दान्‍या, तहस लिन्‍या, स़ोनो परमेस्‍वरनिकाव फाल्‍न्‍या छ्यामए उजूँनी उनिसथैवत, फेलिक्‍सए उयुँल बनै छे·द, “आछिम नाःत ज़ नैकेदा बान्‍के। बुरू तछा फरी ङाधाःक ङाकिन्‍यादा नसथैना,” है दोक्‍यो। 26 हाःकिन, ‘पावलए ओल्‍योनी घुस ब ङादैए सैं’ लिद पावललाई घरी पाला ज़ खुल्‍द सिप सिप ज़ निपाँज़्‍याव।

27 ऩेरिम ओतावत फेलिक्‍सए ओपाला त़ोसिद तोबो पर्किअस फेस्‍तस हाकिम ताके। फेलिक्‍सए ते नो य़ेन ओऱास्‍क यहूदीरालाई खुसी जैन्‍याए जूँनी पावललाई माऱास्‍द कैतल ज़ नैक्‍यो।