1 हाःत ज़ राजा अग्रिपासए पावललाई, “नपाँ काता उलिज़्‍याव, पाँनिके,” है ओदोक ते, पावलए उकुइए सान दाद अइ लिद जवाप एक्‍यो,

2 “ङालाई यहूदीराए ङाङ़ैत झाःद यायाँव खतए ओजवाप नँ राजा अग्रिपासए नङ़ाक पाँव ङादैवए, ङा आछिम बनै ङाभागी ल्‍यो ज़ ङालिज़्‍या। 3 नँ यहूदी चलन भरी बनै सैंन्‍या मिँ ज़ नलिज़्‍या। है जैद आछिम पै ङालाई सहिद ङापाँ भरी चावस थैयो लिद बिन्‍ती ङाचरैःनिज़्‍या।

4 “ङा ङाजर्मिउ पो स़ोनो यरूसलेम सहरल यहूदी जातलावराए याखार्ल ज़ ङाघ्योःके। है जैद यहूदी भरी प़ाइँए ज़ ज़िम्ज़ाकिन ङादोहुज़्‍याव य़ेनर चावस सैंज़्यार। 5 हाः बेलाक फरिसी ब ङाजैसिके। गेधर्म मानिज़्‍याव भरिरानी फरिसीराकिन कर्रा सु ज़ मालेर। है जैद ङालाई नो य़ेनत ङ़ादाकिन ज़ सरेस्‍द नैनार। नो पाँए उजूँनी है यालिकिन है लिधुन्‍या ज़ लेर। 6 नोराए झन आछिम ङा ‘गेसाखा पुर्खारालाई परमेस्‍वरए ओरायो य़ाका सयो·द्यासिक्‍यो’ है ङारादोवनी ज़ ङालाई सजा याव पैंज़्‍यार। 7 नो य़ाकाए उजूँनी ज़ गेमीं बाह्र थरलाव मिँराए आस दाद लाकनी रील ध्‍यान दाद खिमो ज़ नैज़्‍यार। अ राजा, ङा नो खिमो ज़ यानैज़्‍यावलाई थ·रैद ङारायोनी ज़ यहूदीराए माभैंःद आछिम नल्‍योक रैद नैनार। 8 ‘परमेस्‍वरए सिउरालाई यासोचोइज़्याव’ है ङालिज़्याव पाँत कै जैद अचम्‍ब ताद जेमापतिज़्‍याव?

9 “ङा मनी ङ़ादा नासरतलाव येसुए उमिन बनै सोद ओपाँलाई जुनी ब वैंव ङापैंज़्‍याव। 10 है जैद यरूसलेमल नोए उउपर्त बनै धामा दाद, मुख्या पुजारीराए ल्‍योनी क्‍योःन्‍या हक रैद येसुए छैंव उमीं कुधुरालाई झ्यालखानाल ब ङाराझाःके। सैःन्‍या याथ·रैक ङा मनी ‘हैज़’ लिद यापाँ जोर्द ङाराएज़्‍याव। 11 कैताक धर्मसास्‍त्र झ़िम झ़िमक बाद नोरालाई दुख याद, कसा माऱास्‍र लिद कर ब ङारालैज़्‍याव। ङारिस बनै माचाव ओतावए छुत देसलाव सहर जीदा मनी दुलिद नोरालाई सापे सापे याखिरी ङापसिज़्‍याव।

12 “अ राजा, तछा निताव य़ेनए जूँनी मुख्या पुजारीराए ल्‍योनी हक रैद दमस्‍कसदा ङाबाज़्‍याव बेलाक, 13 अधमर लाक निमीकिन ब ओझ़ार ल्‍यो ज़गै नमतिन हुद, ङानैंरास गेल्‍योक म्‍याल्‍याकनी मिलिक रैंःहुके। 14 गे भरी प़ाइँ नामक गेधलिउत तोबो गा हिब्रू खामनी ङास, ‘अ साऊल, अ साऊल, नँ काराव ङाखिरी नपसिज़्‍याव? नँ सैंज़्‍यावत ब ज़पत लातए थेंद ननैज़्‍याव मिताव ज़ नलिज़्‍या,’ है ओदाँक ते, 15 ङा, ‘नँ सु प्रभु?’ है ङादोके। प्रभुए फरी, ‘ङा नो ङाखिरी नपसिज़्‍याव येसु ज़। 16 नँ सोद च्‍याँःसिन्‍केदा, ङा नँलाई ङानोकोर जैन्‍याए जूँनी आछिम नल्‍योक ङासरैंःसिके। आछिम ङालाई नरँःनावए नँ ङासाची ताद, छींनी सतैंद ङाईंरिज़्‍याव पाँए ओसाची ब नतारिज़्‍या। 17 यहूदीराए ल्‍योदा स़ोनो छुत जातलावराए ल्‍योदा ङापरींनिक नोराए ल्‍योनी ङाजोगोइनिरिज़्‍या। 18 नँ होरालाई ङापाँ सथैद यामी फैद्यान्‍या नले। चुम चुमो सैतानए ओराज्‍यानी पले·द, ओज़गै ल्‍यो परमेस्‍वरए ओराज्‍याल लाँन्‍या नले। हुनी ज़ नोर ङालाई यायुँ हुप्‍द यापापर क्‍याल्‍सिद, परमेस्‍वरस खैवरास स्‍वर्गताव बताहा दैन्‍याकावर तान्‍या लेर,’ है दाँक्‍यो।

19 “है जैद, राजा अग्रिपास, ङा नो नमतिन हुव पाँकिन तँदा माबाद, 20 दमस्‍कसल येसुए ओपाँ सथैन्‍यात ङाथूसिके। नकिन यरूसलेमलावर, यहूदिया खन्‍द जीदाङावर, स़ोनो छुत जातलावराए याल्‍योदा मनी बाद, ‘जेपापलाई ऱास्‍द, परमेस्‍वरए ल्‍योदा जेयुँ फर्कैद, साचो हो मिताव य़ेन ब दोव ताके,’ लिद सथैव ज़ ङारानैज़्‍याव। 21 होए उजूँनी ज़ ङा ध्‍यान झ़िमल ङालिज़्‍याव बेलाक यहूदीराए ङालाई क्‍योःद सैःव पैंकेर। 22 खाली परमेस्‍वरए ङालाई पाथस ओनैनावए आछिम पै घेप्‍पा ज़िम्‍ज़ारालाई ओसाची याव ज़ ङालिज़्‍या। नो ङापाँल मोसा स़ोनो अगमबक्ताराए, ‘इताव इताव तारिज़्‍या’ है याल्‍यो पाँकिन ङा छुत काता ज़ चरैःद ङामापाँए। 23 होराए पाला, ‘ख्रीस दुखर सहिद, सिउनी सैंसिउ प़ाइँरानी ङ़ात ताद, यहूदीर स़ोनो छुत जातलाव मिँरालाई अजम्‍बरी जुनील बान्‍या येम सतैंद याएरिज़्‍याव,’ है लिद मिँरालाई यारासथैकेर।”26:23 यसै ४२:६; ४९:६

24 पावल निताव ओपाँज़्‍याक ज़ फेस्‍तस बनै चोइस क़िद, “पावल, नँ दासानी बिसा ताद नले। कुधु प़रिद चबनै बूलिउ स्‍यासो नताके,” है ओदोक ते, 25 पावलए, “माननिय फेस्‍तस ज्‍यू, ङा बूलिउ माःक। साचो थ॰रिउ पाँ ज़ ङापाँज़्‍याव ची। 26 आव पाँ भरी राजा अग्रिपासए मनी सैंज़्‍याखेहो लिद ओङ़ाक ङायुँ हुप्‍द ज़ ङापाँज़्‍या। आव म़ोंसिउलाव पाँ स्‍यासो ते माःक। है जैद ‘ओमासैंव ब काता ज़ मालिखेहो’ लिद ङायुँ हुप्‍द ले,” है दाद, 27 राजा अग्रिपासलाई मनी, “अ राजा, अगमबक्ताराए यासरो पाँ नमापतिज़्‍या? नपतिज़्‍याखेहो,” है ओदोक ते, 28 अग्रिपासए, “आव छ्यावा नपाँए ङालाई ब ख्रीस्‍त्‍यान जैव नपैंज़्‍याव रो?” है ओदोक ते, 29 पावलए फरी, “परमेस्‍वरए ओङ़ाक ङाबिन्‍ती आव ज़ लिज़्‍या — छ्यावानी तादी ब, कुधुनी तादी ब, जे आछिमकाव ङापाँ थैज़्‍याव भरिए, ङालाई सुर्सिउ साँगलराकिन बाहेक, ङा स्‍यासो जेताकिन ताखेहो है ङालिज़्‍या,” है यादोक्‍यो।

30 हाःत ज़ राजा अग्रिपास, हाकिम फेस्‍तस, बरनिकी स़ोनो यास च़ुसिद लिज़्‍याव भरी च्‍याँःसिद लाँःदा पुलुस्‍द, 31 या या पाँसिद, “साचो ज़ ओल्‍यो, आवलाई सैःन्‍या सजा अथबा झ्यालखानाल झाःन्‍या सजा यान्‍या स्‍यासो ते माले,” है लिकेर। 32 नकिन राजा अग्रिपासए फेस्‍तसलाई, “आव मिँए माहाराजाए ल्‍योदा बिन्‍ती दान्‍या ओमापैंव ताकिन गे नोलाई ऱास्‍न्‍या गेल्‍यो,” है दोक्‍यो।