5
है जैद जे परमेस्‍वरए उयुँलाव ओज़ार जेतावए ओल ओदोज़्‍याव य़ेन स्‍यासो ज़ जे ब दाव ताके। किताव ख्रीसए गेलाई उयुँ नाद परमेस्‍वरस सखैन्‍याए जूँनी उजिउ झाःद ओयासिउ, हिताव ज़ जे ब छुतए ल्‍योदा जेयुँ नाद दाव ताके। ख्रीसए गेजूँनी निताव य़ेन ओदोव परमेस्‍वरलाई चाव सी ङरो धुप ओचरैःव मिताव ज़ लिज़्या। 5:2 प्रस २९:१८; भज ४०:६
मादान्‍या य़ेन दाज़्‍यावरास खदेप मालिन्‍या
खाली पातर्‍या पातर्नी जैसिन्‍या, प़ाइँत लोभ दान्‍या, निताव फुरी य़ेनर जेल्‍योङ उमिन ज़ तारैंःक। निताव य़ेनर परमेस्‍वरए छैंव उमींरालाई मासहिउ। उर्ती माल्‍यो माचाव ल़॰न्‍या पाँर ब ताताक, आव ब माचाहिउ ज़। बुरू परमेस्‍वरए उगुनर मामेंःद धन्‍याबाद याव ज़ नैच्‍यो। जे ब जेसैंज़्‍या, युँ माजामो य़ेन दाज़्‍यावर, लोभ वाज़ दोज़्‍यावर परमेस्‍वर स़ोनो ख्रीसनी निराज्‍याल काता ज़ दैन्‍या मालेर। लोभ दान्‍या ते अङग्या पुजा दाज़्याव स्‍यासो ज़। जेलाई निताव अऩाकलाव पाँरानी सुवाराए ताझुकैचिरक। परमेस्‍वरए आव पाँरानी ज़ ओलकिन तँदाङाव लिज़्‍यावरालाई उरिस चोज़्‍या। है जैद जे निताव पाँ दाज़्‍यावरास खदेप ब तालिच्‍यो।
पलाँवलाव य़ेन दान्‍यार
जे ब ङ़ादा चुम चुमोलाव य़ेन दाज़्‍यावर जेल्‍यो। अब ते प्रभुए ओपलाँलाव य़ेन दान्‍यार जेतावए हो मिताव ज़ दोनाच्‍यो। पलाँवलाव य़ेनर आवर ज़ — साचो सतलाव चाव य़ेनर दाद, 10 ‘प्रभुए उयुँ कातानी होलाँ जैद ङाएके’ लिन्‍या लिज़्‍या। 11 जे चुम चुमोलाव अऩाकलाव य़ेनरानी अछतङ लिद, ‘नो य़ेन ते चाव माःक’ लिद सतैंद्याव ताके। 12 नो चुम चुमोलाव म़ोंसिद दाज़्‍यावराए याय़ेन याःनी हाइन्‍या ब लाज हुव लिज़्‍या। 13 खाली म़ोंसिद यादोदी ब पलाँवए सतैंद याएज़्‍याव। पलाँवए मारैंःवर ब यासरैंःज़्‍याव। 14 है जैद अइ ब लिज़्‍यार,
“अ सिउ स्‍यासो ङ़ल्‍द लिज़्‍याव मिँ,
सैंसिद सोनिकेदा,
ख्रीसए ओज़गै नक्‍याँत ज़गै तारिज़्‍या।”
15 है जैद आव जेजिउत जोगोइसिद दाव ताके। मासैंन्‍याराए यादोज़्‍याव मिताव माःक, सैंसिद दाव ताके। 16 आव गेसमय बनै माचाव ओतावए परमेस्‍वरए ओय़ेन दान्‍यात मौका भरी छुपिउ ताके। 17 है जैद सैंसिद मालिज़्‍याव मितावर ताताच्‍यो। बुरू परमेस्‍वरए उयुँलाव य़ेनर सैंधुन्‍यार ताच्‍यो। 18 मद छोकोराए तासमँःसिच्‍यो। नोए मुर्ख य़ेन वाज़ पले·ज़्‍याव। बुरू छैंव पुरूसए सब्याल्‍सिद, 19 जे जेल खैद प्रभुए उमिनत भजनर गैद, जेयुँल उमिन सघ्योःद्यान्‍या गितर गैद रेंच्‍यो। 20 गेबाबु परमेस्‍वरलाई प्रभु येसु ख्रीसए उमिननी प़ाइँल ज़ धन्‍याबाद चरैःव ज़ नैच्‍यो।
ज्‍या-रीलाव पाँर
21 किताव जे ख्रीसए उधूँल लिद ओमान नैद जेएज़्‍याव, हिताव ज़ जे जेल ब जेमान नैसिच्‍यो। 22 जे रे दाव मेंमार मनी जेरेराए यामान नैद्याद यापाँ धूँल लिच्‍यो। नो मनी ‘प्रभुए उजूँनी ज़ ङादोज़्‍या’ लिद सम्जिउ ताके। 23 ख्रीस गे उमिनतावरालाई बाँचैज़्याव ज़। किताव गे मन्‍दलीए गेङ़ैताव ख्रीस लिज़्‍या, हिताव ज़ जे जेङ़ैत जेरेर लिज़्‍यार। 24 है जैद किताव मन्‍दली ख्रीसए उधूँल उलिज़्‍याव, हिताव ज़ जे रे दाव मेंमार ब प़ाइँत ज़ जेरेराए यापाँ धूँल ल्‍यो ताके।
25 स़ोनो जे ज्‍या दाव खेपार किताव ख्रीसए ओमन्‍दलीलाई उयुँ नाद उजिउ झाःद ओयासिउ, हिताव ज़ जे ब जेज्‍यारालाई जेयुँ ओनाक। 26 गेजूँनी ख्रीसए उजिउ झाःद्याद ओपाँनी स़ोनो ऱील सछैंद गे ओमन्‍दलीलाई छैंव जैसिक्‍यो। 27 किताव ज्‍या दाज़्‍याव खेपाए ज्‍या ओरैक ओज्‍यालाई चाव चाव क्‍वार क्‍वाइद पाताला पुतुलु ओजैज़्‍याव, हिताव ज़ गेलाई ब ख्रीसए उच़िहुसिरिज़्‍याव छ्यामए उजूँनी छैंव, खत माल्‍यो स़ोनो ज़गै ज़गैव ओमन्‍दली जैसिज़्‍याव। 28 जे ज्‍या दाव खेपाराए जेक्‍याँलाई किताव जेसमारिज़्‍याव, हिताव ज़ जेज्‍यारालाई ब समारिउ ताके। जोए ओज्‍यालाई समारिज़्‍याव, होए ओक्‍याँलाई ओसमारिज़्‍याव मिताव ज़ लिज़्‍या। 29 क्‍याँए क्‍याँलाई सुए ज़ मासोव, बुरू किताव ख्रीसए गे ओमन्‍दलीलाई ओसमारिसिज़्‍याव, हिताव ज़ मिँए ओक्‍याँलाई समारिद पाथस नैज़्‍याव। 30 नो ख्रीसए ओसमारिसिज़्याव ते गे ओक्‍याँर गेतावनी ज़। 31 धर्मसास्‍त्रल ब इताव सर्सिउ लिज़्‍या,
“खेपाए ओबाबु ओआमालाई ऱास्‍द ओज्‍यास सिप ताद,
नोनी तक्‍याँ ज़ ताज़्‍यानी।” 5:31 उत २:२४
32 आव पाँए ओअर्थ बनै घेप्‍पा लिज़्‍या। ङा फरी नो पाँए ओअर्थ आव ङासरोल जाँकोसै ख्रीस स़ोनो मन्‍दलीराए ल्‍योदा वाज़ झाःद ङानै। 33 हैदी ब जे ज्‍या दाव खेपाराए मनी, जेक्‍याँलाई किताव जेसमारिज़्‍याव, हिताव ज़ जेज्‍यारालाई समारिउ ताके। जे रे दाव मेंमार ब जेरेराए यामान नैद्याव ताके।

5:2 5:2 प्रस २९:१८; भज ४०:६

5:31 5:31 उत २:२४